ಪಿದಾಯಿಡ್ ಕೀರ್ ಕಟ್ಟುದ್ ದೊರಿಪುನ ಬರ್ಸ, ನೀರ್ ಪರಿತುದ್, ತೋಡು ಸುದೆಯಾದ್, ಕಡಲಪ್ಪೆನ ಮಟ್ಟೆಲ್ ಸೇರುನ ಪೊರ್ತು ಅವ್ವೇ ಆಟಿ ತಿಂಗೊಲು ಪಂಡುದ್ ತ್ರಿಷಾ ವಿದ್ಯಾ ಪಿ. ಯು. ಕಾಲೇಜಿದ ಕಲ್ಪಾರ್ತಿ ಭವಿಷ್ ಬೆಳ್ಳಾರೆ ಪಂಡೆರ್. ಆರು ತುಳುಕೂಟ ಉಡುಪಿ, ತ್ರಿಷಾ ವಿದ್ಯಾ ಪಿ. ಯು. ಕಾಲೇಜ್ ಬೊಕ್ಕ ಕನ್ನಡ ಬೊಕ್ಕ ಸಂಸ್ಕ್ರತಿ ಇಲಾಖೆದ ಒತ್ತು ಸೇರಿಗೆಡ್ ತ್ರಿಷಾ ಕಾಲೇಜಿಡ್ ನಡತಿನ ಜೋಕ್ಲೆಗಾದ್ ಆಟಿದ ತಿರ್ಲ್ ಕಜ್ಜೊಡ್ ಆಟಿದ ಮಹತ್ವದ ಬಗೆಟ್ ಪಾತೆರಿಯೆರ್. ತುಳು ಸಂಸ್ಕ್ರತಿ ಮದೆ ಆವೊಂದುಂಡ್. ತುಲುವೆಪ್ಪೆ ಜೋಕುಲಾಯಿನ ನಮ ಅವ್ವೆನ್ ಒರಿಪಾವುನ ಅಗತ್ಯ ಉಂಡು, ಆಟಿದ ಅಮಾಸೆದಾನಿ ಪರ್ಪಿನ ಪಾಲೆಕೆತ್ತೆದ ಕಷಾಯಡ್ ನಮ್ಮ ಆರೋಗ್ಯನ್ ಕಾಪುನ ಸತ್ವ ಉಂಡು ಅವ್ವೆನ್ ನಮ್ಮ ಪೆರಿಯಕುಲು ವಾ ರೀತಿ ಅಟ್ಟಣೆ ಮಲ್ತೊಂದಿತ್ತೆರ್ ಪಂಡುದ್ ಸಭೆಕ್ ತೆರಿಪಾಯೆರ್.
ಆಟಿದ ತಿರ್ಲ್ ಲೇಸ್ ನ್ ಆಟಿ ಕಳಂಜಗ್ ತಡ್ಪೆಡ್ ಅರಿ ಕೊರ್ದ್ ತುಳುಕೂಟದ ಗುರ್ಕಾರೆರಾಯಿನ ಬಿ. ಜಯಕರ ಶೆಟ್ಟಿ ಇಂದ್ರಾಳಿ ಉದಿಪನ ಮಲ್ತುದ್, ತ್ರಿಷಾ ಕಾಲೇಜಿದ ಜೋಕುಲು ಅಟ್ಟಣೆ ಮಲ್ದಿನ ಕಜ್ಜೊದ ತಯಾರಿನ್ ಮೆಚ್ಚಿದ್ ತುಳುನಾಡುಗ್ ಈ ಜೋಕುಲು ಮಾದರಿ ಆತೆರ್ ಪಂಡೆರ್.
ಕನ್ನಡ ಬೊಕ್ಕ ಸಂಸ್ಕ್ರತಿ ಇಲಾಖೆದ ಸಹಾಯಕ ನಿರ್ದೇಶಕಿ ಶ್ರೀಮತಿ ಪೂರ್ಣಿಮಾ ಪಾತೆರ್ದ್ ತುಳುಬಾಸೆ ಸಂಸ್ಕ್ರತಿನ್ ಜೋಕುಲು ದುಂಬು ಕೊನೊಪಿನ ಮುಖೇನ ಒರಿಪಾವುನ ಬೇಲೆ ಮಲ್ಪೊಡ್ ಪಂಡೆರ್.
ಲೇಸ್ ದ ಸಂಚಾಲಕಿ ಶ್ರೀಮತಿ ವಿದ್ಯಾ ಸರಸ್ವತಿ ಕಜ್ಜೊದ ಬಗೆಟ್ ಸುರುತ ಪ್ರಾಸ್ತಾವಿಕ ಪಾತೆರಿಯೆರ್. ಕಲ್ಪಾರ್ತಿ ಅಖಿಲೇಶ್ ಪೂಜಾರಿ ಕಜ್ಜೊದ ಮದಿಪು ಕೊರಿಯೆರ್.
ಕಾಲೇಜಿದ ಜೋಕುಲೆಗ್ ತುಳುಕೂಟದ ತಾರಾ ಆಚಾರ್ಯ ಮೇರ್ ಸೆಭಿಸವಾಲ್ ನಡಪಾದ್ ಕೊರ್ದ್ ಅಲ್ಪನೇ ಇನಾಮುಲಾ ಕೊರಿಯೆರ್. ಕಾಲೇಜಿದ ಮಾತಾ ಜೋಕುಲು ತುಲುವೆರೆ ತುತೈತಡ್ ಬತ್ತುದ್ ಕಜ್ಜೊಗ್ ರಂಗ್ ದಿಂಜಾಯೆರ್. ಕೆಲವ್ ಜೋಕುಲು ತುಳುನಲಿಕೆ ನಲ್ತುದ್ ಲೇಸ್ ನ್ ಪೊರ್ಲು ಮಲ್ತೆರ್. ಅಕೇರಿಗ್ ಆಟಿದ ತೆನಸ್ ಅಟ್ಟಣೆ ಮಲ್ದಿತ್ತೆರ್.
by 