ಉಡುಪಿ, ಆ.5: ಉಡುಪಿ ತುಳುಕೂಟ, ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘ ರಜತ ಮಹೋತ್ಸವ ಸಮಿತಿ, ಲಯನ್ಸ್ ಕ್ಲಬ್ ಉಡುಪಿ ಅಮೃತ್, ಲಯನ್ಸ್ ಕ್ಲಬ್ ಉಡುಪಿ ಚೇತನಾ, ಲಿಯೋ ಕ್ಲಬ್ ಬೊಕ್ಕ ಲಯನ್ಸ್ ಕ್ಲಬ್ ಉಡುಪಿ ಇಂದ್ರಾಳಿ, ಉಡುಪಿ ಬಡಗಬೆಟ್ಟು ಕ್ರೆಡಿಟ್ ಕೋ ಆಪರೇಟಿವ್ ಸೊಸೈಟಿದ ಸಹಯೋಗದೊಟ್ಟುಗ್ ಆಟಿದ ತಿರ್ಲ್- 2023 ಕಜ್ಜೊ ಉಡುಪಿ ಅಂಬಾಗಿಲುದ ಅಮೃತ ಗಾರ್ಡನ್‌ ಡ್ ಶನಿವಾರ ನಡತುಂಡ್..
‘ನಮ್ಮ ಟಿವಿ’ ನಿರೂಪಕೆರಾಯಿನ ನವೀನ್ ಶೆಟ್ಟಿ ಎಡ್ಮೆಮಾರ್ ಕಜ್ಜೊಡ್ ಕೈಮರ ಪಾತೆರ ಪಾತೆರ್ದ್ , ನಮ್ಮ ಪೆರಿಯಕ್ಲೆಗ್ ಪ್ರಕೃತಿದ ಬಗ್ಗೆ ಬೋಡಾಯಿನಾಯ್ ಗೇನ ಇತ್ತುಂಡ್. . ಅಂಚಾದ್ ಆಟಿ ತಿಂಗೊಲುಡ್ ಪರಿಸರೊಡ್ ತಿಕ್ಕೊಂದಿತ್ತಿನ ಪ್ರಕೃತಿದತ್ತ ತೆನಸುಲೆನ್ ತಿನೊಂದ್ ಆರೋಗ್ಯವಾದಿತ್ತೆರ್. ಆಟಿ ತಿಂಗೊಲ್ ಪಂಡ ಪಂಡ ಆನಿದ ಕಾಲೊಡ್ ಬದುಕುದ ಪರೀಕ್ಷೆಯಾದಿತ್ತುಂಡ್. ಆ ಪರೀಕ್ಷೆಡ್ ಪಾಸಾವರೆಗ್ ಆನಿದ ಕಾಲೊಡ್ ನಮ್ಮ ಹಿರಿಯೆರು ಈ ರೀತಿದ ಸಾದಿನ್ ನಾಡೊಂದಿತ್ತೆರ್ ಪಂಡುದು ತೆರಿಪಾಯೆರು.ಆಟಿ ತಿಂಗೊಲುದ ಆನಿದ ಬದುಕುನ್ ವೇದಿಕೆಡ್ ಆಚರಣೆ ಮಲ್ಪುನ ಕಾಲಘಟ್ಟೊಡ್ ನಮ ಇನಿ ಇತ್ತುಂಡಲಾ ಆನಿದ ಆಹಾರ ತೆನಸುಲೆನ್ ಪೊಸ ಪೀಳಿಗೆಗ್ ಪರಿಚಯೊನ್ ಈ ಮೂಲಕ ಆಂಡಲಾ ಮಲ್ಪುನವ್ ಎಡ್ಡೆ ವಿಚಾರ.ಒವ್ವೇ ರೀತಿದ ಗೌಜಿ ಗದ್ದಲ ಆವಂದೆ ಮೂಲಸತ್ಯ,ಸತ್ವೊಲೆನ್ ದುಂಬುದ ಪೀಳಿಗೆಗ್ ತೆರಿಪಾವುನ ಕೆಲಸ ಆವೊಡ್.. ಈ ಕೆಲಸ ಇಲ್ಲಡ್ ಜೋಕ್ಲೆಗ್ ಅಪ್ಪೆ ಕಲ್ಪಾದ್ ಕೊರೊಡ್ ಪಂಡೆರ್.
ಕಜ್ಜೊನ್ ಅಮೃತಾ ಪುರುಷೋತ್ತಮ ಶೆಟ್ಟಿ ಚೆನ್ನೆಮಣೆ ಗೊಬ್ಬುದ್ ಅಂಚೆನೇ ಸುಮಾರ್ 45 ಬಗೆತ್ತ ತೆನಸುಲೆನ್ ಅನಾವರಣ ಮಲ್ಪುನ ಮುಖೇನ ಉದಿಪನ ಮಲ್ತೆರು. ತುಳುಕೂಟದ ಗುರ್ಕಾರೆರಾಯಿನ. ಬಿ.ಜಯಕರ ಶೆಟ್ಟಿ ಇಂದ್ರಾಳಿ ಗುರ್ಕಾರ್ಮೆಡಿತ್ತೆರ್. ಈ ಪೊರ್ತುಡ್ ಬೇತೆ ಬೇತೆ ಕ್ಷೇತ್ರದ ಸಾಧಕೆರಾಯಿನ ಶೀಲಾ ಕೆ.ಶೆಟ್ಟಿ ಎರ್ಮಾಳ್, ವನಜ ಶೆಡ್ತಿ, ತನುಶ್ರೀ ಪಿತ್ರೋಡಿ ಮೊಕ್ಲೆಗ್ ಮಾನಾದಿಗೆ ಮಲ್ತೆರ್.
ಬಡಗಬೆಟ್ಟು ಸೊಸೈಟಿದ ಜನರಲ್ ಮೆನೇಜರ್ ರಾಜೇಶ್ ಶೇರಿಗಾರ್, ಉಡುಪಿ ಅಮೃತ್ ಲಯನ್ಸ್ ಕ್ಲಬ್ ಅಧ್ಯಕ್ಷೆ ಭಾರತಿ ಹರೀಶ್, ಉಡುಪಿ -ಇಂದ್ರಾಳಿ ಲಯನ್ಸ್ ಕ್ಲಬ್ ಅಧ್ಯಕ್ಷೆರಾಯಿನ ಅಜಿತ್ ಕುಮಾರ್ ಶೆಟ್ಟಿ, ಲಯನ್ಸ್ ಉಡುಪಿ ಚೇತನಾ ಅಧ್ಯಕ್ಷೆರಾಯಿನ ಜಗದೀಶ್ ಆಚಾರ್ಯ, ಉಡುಪಿ- ಇಂದ್ರಾಳಿ ಲಿಯೋ ಕ್ಲಬ್ ಅಧ್ಯಕ್ಷೆರಾಯಿನ ಅನುಪ್ ಮೋಹನ್ ಶೆಟ್ಟಿ, ತುಳುಕೂಟದ ಕಾರ್ಯಂತೆರಾಯಿನ ಗಂಗಾಧರ ಕಿದಿಯೂರು, ಪಣವುದ ಪಾಲವೆರಾಯಿನ ಚೈತನ್ಯ ಎಂ.ಜಿ. ಉಪಸ್ಥಿತರಿತ್ತೆರು.
ಆಟಿಕೂಟದ ಸಂಚಾಲಕಿ ಜ್ಯೋತಿ ಎಸ್.ದೇವಾಡಿಗ ಸ್ವಾಗತ ,ಪ್ರಾಸ್ತಾವಿಕ ಮಲ್ತೆರ್. ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷೆರಾಯಿನ ರಾಜೇಶ್ ಶೆಟ್ಟಿ ಅಲೆವೂರು ಸೊಲ್ಮೆ ಸಂದಾಯ್ತ ಮಲ್ತೆರು.ಉಡುಪಿ ತುಳುಕೂಟದ ಮದರಂಗಿದರಂಗ್ ದ ಸಂಚಾಲಕಿ ಯಶೋಧಾ ಕೇಶವ್ ಕಜ್ಜೊದ ನಿರೂಪಣೆ ಮಲ್ತೆರು. ತಾರಾ ಉಮೇಶ್ ಆಚಾರ್ಯ,ದಯಾಶಿನಿ ಪಂದುಬೆಟ್ಟು,ವೇದಾವತಿ ಶೆಟ್ಟಿ ಸಾಧಕೆರೆನ ಪರಿಚಯ ಮಲ್ತೆರ್…ವಿದ್ಯಾ ಸರಸ್ವತಿ ಕಜ್ಜೊಗ್ ಬೆರಿಸಾಯ ಕೊರಿನಕ್ಲೆನ ಪಟ್ಟಿ ಓದಿಯೆರ್.
45 ಬಗೆತ್ತ ಖಾದ್ಯೊಲ್ !
ಆಟಿದ ತಿರ್ಲ್ ಕಜ್ಜೊಡ್ ವನಸುಗ್ ಸುಮಾರು 44 ಬಗೆತ್ತ ತುಳುನಾಡುದ ಬೇತೆ ಬೇತೆ ತೆನಸುಲೆನ್ ತಯಾರ್ ಮಲ್ದಿತ್ತೆರ್. 300 ಕ್ ಲಾ ಮಿತ್ತ್ ಜನ ಈ ವಿಶಿಷ್ಟ ರೀತಿದ ತೆನಸುಲೆನ ವನಸ್ ಮಲ್ತೆರ್..
ಬಿರಿಂಡಾ ಸಾರ್, ಅನನಾಸ್ ಸಾರ್, ಕುಕ್ಕು ಸಾರ್, ಕುಡುತ ಸಾರ್, ತಿಮರೆ ಚಟ್ನಿ, ಕುಡು ಚಟ್ನಿ, ತೊಂಜಕ್ ಚಟ್ನಿ, ಬಿರಿಂಡಾ ಚಟ್ನಿ, ಪೆಜಕಾಯಿ ಚಟ್ನಿ, ತೇವುದ ಇರೆತ ಚಟ್ನಿ, ಪತ್ರೋಡೆ, ಉಪ್ಪಡ್ ಪಚ್ಚೀರ್, ತೊಜಂಕ್ ತೊಪ್ಪು, ಬೊಲೆ ಸುಕ್ಕ, ಕೇನೆದ ಪುಂಡಿ, ನೀರ್‌ದೋಸೆ, ಕಣಲೆ ಪದಂಗಿ ಗಸಿ ಪುಂಡಿ ಗಸಿ, ತೋಜಂಕ್ ಅಂಬಡೆ, ಕಾಡುಕಂಚಲ ಪ್ರೈ, ರಾಗಿ ಮಣ್ಣಿ, ಮೆಂತೆ ಗಂಜಿ, ಬಂಗುಡೆ ಮೀನು ಸಾರ್, ಎಟ್ಟಿ ಚಟ್ನಿ, ಗೋಲಾಯಿ ಚಟ್ನಿ,ತೆಕ್ಕರೇ ತಲ್ಲಿ,ಮುಲ್ಕ,ಪೆಲಕಾಯಿದ ಗಟ್ಟಿ,ಪುಂಡಿಗಸಿ,ಉಪ್ಪಡ್,ಕರಡಿಪಾಯಸ, ಇಂಚ ಬೇತೆ ಬೇತೆ ತುಳುನಾಡುದ ತೆನಸ್ ಇತ್ತುಂಡ್.
by 