ಜೀವದ ನಾಗಗ್ ಅಭಿಷೇಕ

ತುಳುನಾಡೊರ್ಮೆ  ನಾಗರಪಂಚೆಮಿದಾನಿ ನಾಗಬನಟ್ ಬೊಂಡಾಭಿಷೇಕ ಮಲ್ತೊಂದಿತ್ತುಂಡ, ಕಾಪುದ  ಮಜೂರುಡ್ ಮಾತ್ರ  ಜೀವದ  ನಾಗಗೇ ಬೊಂಡ, ಜಲಾಭಿಷೇಕ, ಆರತಿ ಮಲ್ತುದ್  ಕೃತಾರ್ಥರಾತೆರ್.

ನಾಗರ ಪಂಚಮಿದಾನಿ  ದೂರದೂರುಡ್ದ್  ಸಂಬಂಧಿಕೆರು ತಮ್ಮ ಮೂಲನಾಗನ ಜಾಗೆಗ್ ಪೋದ್ ತನು ತಂಬಿಲ ಸೇವೆ ಸಲ್ಲಿಸಾದ್  ಕೃತಾರ್ಥರಾಪೆರ್. ನಾಗನ ಮಿತ್ತ್ ಇಪ್ಪುನಾತ್  ಭಯ ಭಕ್ತಿ ಬೇತೆ  ದೇವೆರೆನ ಮಿತ್ತ್  ಇಜ್ಜಿಂದೇ ಪನೊಲಿ. ತುಳುನಾಡುಡ್ ನಾಗಗ್ ಸುರುತ ತಾನೊ ಇಪ್ಪುನೇಟ್  ಸಂಶಯ ಇಜ್ಜಿ.
ಕಾಪು  ಮಜೂರು ಗ್ರಾಮದ ವಾಸುಕಿ ನಿಲಯದ  ನಿವಾಸಿ ಗೋವರ್ಧನ ರಾವ್  ಜೀವದ  ನಾಗಗ್  ಜಲ, ಸೀಯಾಳ ಅಭಿಷೇಕ ಅರ್ಪಿಸಾದ್  ಕೃತಾರ್ಥರಾತೆರ್.
ಪ್ರತಿ ವರ್ಷದಲೆಕ್ಕ  ಈ ಸರ್ತಿಲಾ ಪ್ರಚಾರ ಇಪ್ಪಂದೆ ಜೀವದ ನಾಗಗ್  ನೀರು, ಬೊಂಡ ಬೊಕ್ಕ  ಅರಸಿನ  ಪಾಡುದು ಪೂಜೆ ಮಲ್ದೆರ್.
ಈ ಕಾರ್ಯ ಸುಮಾರು ೨೫ ವರ್ಷಡಿಂಚಿ ನಿರಂತರವಾದ್ ಮಲ್ತೊಂದಿತ್ತೆರುಡಲಾ , ಪ್ರಚಾರ ಬಯಸಂದೆ ಮೇರು ಇರೆಮದೆತ ಕಾಯಿಯಾದೇ ಉಲ್ಲೆರ್.
ಈ ಬಗ್ಗೆ ಅರೆನಮಗೆ ಮಧುಸೂಧನ್‌ ರಾವ್‌ ಪಾತೆರ್ದ್, ವೃತ್ತಿಡ್  ಒರಿ  ಎಲೆಕ್ಟ್ರಿಶಿಯನ್ ಬೊಕ್ಕ ಕ್ಯಾಟರಿಂಗ್ ಸೇವೆ ಮಲ್ತೊಂದುಪ್ಪುನ ಗೋವರ್ಧನ ರಾವ್, ಕರಿನ ೨೫ ವರ್ಷಡಿಂಚಿ ಒಲ್ಪಲಾ  ಗಾಯ ಆಯಿನ  ನಾಗನ್  ಮುಲ್ಪ ಕನತುದ್   ಶುಶ್ರೂಶೆ ಮಲ್ಪುವೆರ್. ವರ್ಷಗ್ ಸುಮಾರು ೨೦ಡ್ದ್  ೨೫ ಉಚ್ಚುಲೆನ್  ಶುಶ್ರೂಶೆ ಮಲ್ತುದ್ ಕಾಡುಗ್ ಬುಡ್ಪಿನವೇ ಮೆರೆನ ಕಾಯಕ.
ಗೋವರ್ಧನ ರಾವ್ ಮೆರೆಗ್ ಉಚ್ಚು ಪಂಡ ಪಂಚಪ್ರಾಣ. ರಸ್ತೆಡ್ ಒಲ್ಪನೇ  ಉಚ್ಚುಲು  ಗಾಯ ಆದ್  ಬೂರುಂಡಲಾ, ಸುರುಕ್  ಗೋವರ್ಧನ ರಾವ್ ಮೆರೆಗ್ ಲೆಪ್ಪು ಬರ್ಪುಂಡ್.  ಒವ್ವೆ ಪೊರ್ತುಗಾಂಡಲಾ  ಅಲ್ಪಡ್ದೆ  ನೇರವಾದ್  ಗಾಯ ಆಯಿನ  ಉಚ್ಚು  ಇತ್ತಿನ ಜಾಗೆಗ್ ಪೋಪೆರ್. ಪೂರ್ಣವಾದ್  ಗುಣಮುಖ ಮಲ್ತುದ್  ಉಚ್ಚುನ್  ಕಾಡುಗ್  ಸೇರಿಸಾದ್  ಕೃತಾರ್ಥರಾಪೆರ್. ಕೆಲವೊಂಜಿ  ಉಚ್ಚುಲೆನ  ಗಾಯ ಸಂಪೂರ್ಣ ಗುಣ ಮುಖ ಆವರೆಗ್  ವರ್ಷನೇ  ಕರಿಯೊಂಡ್.
ಉಚ್ಚು ಸೈತುಂಡ , ಗಾಯ ಆತಿನ ಉಚ್ಚುನ್ ಕೊರಿನಕ್ಲೆಗ್  ತೆರಿಪಾವೆರ್..  ಅಕುಲು ಬತ್ತುದ್ ಗೋವರ್ಧನ ರಾವ್‌ ಮೆರೆನ ಇಲ್ಲಡ್  ಅಂತಿಮ ಕ್ರಿಯಾ ಕರ್ಮ ಮಲ್ಪುವೆರ್. ಕೆಲವೊಂಜಿ ಸರ್ತಿ  ಅಕುಲು ಕ್ರಿಯಾ ಕರ್ಮ ಮಲ್ಪರೆಗ್  ತಯಾರಿಜ್ಜೆರೆಡ ನಮನೇ ಸೇವೆ ಮಲ್ತುದ್ ಮುಗಿಪಾಯಿನ ಘಟನೆಲಾ  ನಡೆದುಂಡ್.
ವೃತ್ತಿಡ್  ಒರಿ  ಎಲೆಕ್ಟ್ರಿಶಿಯನ್ ಬೊಕ್ಕ ಕ್ಯಾಟರಿಂಗ್ ಉದ್ಯಮ ನಡಪಾವೊಂದುಪ್ಪುನ  ಗೋವರ್ಧನ್ ಮೇರು, ಇಲ್ಲಡ್ ಅಪ್ಪೆ ನೀರಜ, ಬುಡೆದಿ  ಶ್ರೀದೇವಿ, ಮಗೆ ಮಧುಸೂಧನ, ಮರ್ಮಾಲ್  ನಮಿತಾ, ಮಗಳು ಶ್ರೀಶೈಲಾ ರೆನೊಟ್ಟುಗ್  ಸಂತೃಪ್ತಿ ಜೀವನ ನಡಪಾವೊಂದುಲ್ಲೆರ್.
ನಮ್ಮ ಸಂತೋಷಗ್  ನಾಗರಾಜನ ಕೃಪೆನೇ ಕಾರಣ ಪಂಡುದ್ ಮಧುಸೂಧನ ರಾವ್ ಪನ್ಪೆರ್.