🙃🙃 ಅಮಸರ ಅಮಸರೊಡು 🙃🙃
ದೂರದ ಊರುಡು ವರ್ಷ ಇಡೀ ಬೆಗರ್ ಜಪುಡದ್ ಬೆಂದ್‌ದ್ ವರ್ಷಡ್ ಬಾರಿ ಬಂಙಡ್ ನಟ್ಟ್‌ದ್ ತಿಕ್ಕುನ ಒಂಜಿ ತಿಂಗೊಲುದ ರಜೆಟ್ ಊರುಗು ಬತ್ತುದು ಒಂತೆ ರೆಸ್ಟ್ ಮಲ್ಪುಗ ಪನ್ನಗ ಊರುಡು ಮದಿಮೆದ ಸೀಸನ್….
ಬೊಡೆದಿ ಒಂಜಿ ತಿಂಗೊಳ್ದ ಪಟ್ಟಿ ಬುಡ್ಪದ್ ದಿಯಾಲ್. ಒಂಜಿ ತಿಂಗೊಳುಡು ಇರ್ವತ್ತಾನಾಲ್ ಕಾರ್ಯಕ್ರಮ, ಮದಿಮೆ ಬಯಕೆ ಪೂಜೆ ಆಟ ನೇಮ ಕೋಲಂದ್ ಒಡೆ ಪೋಪಿನಿ ಓಡೆ ಪೋಪಿನಿ, ಒಂಜಿ ಮೈಟ್ ಏಪ್ರಿಲ್‌ದ ದೊಂಬುದ ಪೆಟ್ಟ್ ಒಂಜಿ ಮೈಟ್ ಸ್ವಂತ ಬೊಡೆದಿನ ಕಿರಿ ಕಿರಿ, ದಾದ ಮಲ್ಪುನು.
ಆನ ಜೀವನ ಅಲ್ಯುಮಿನಿಯಂ ಬಾಜನ, ಪಂದ್ ಪ್ರಯೋಜನ ಇಜ್ಜಿ ಓಡೆ ಬೊಟ್ಟುಂಡಲ ನ್ಯಕ್ಕೆ ನಲಿದ್ ಪೋಪುಂಡು ..
ಅಮಸರ ಅಮಸರೊಡು ಪುಲ್ಯ ಕಾಂಡೆ ಬೇಗ ಲಕ್ಕ್‌ದ್ ಒಂಜಿ ಮದಿಮೆಗ್ ಪೋವೊಡುಂದ್ ರಾತ್ರೆ ಜೈದಿನಯೇ ಮನದನಿ ಲಕ್ಕಿನಿ 9 ಗಂಟೆಗ್. ಕೈ ಪತ್ತಿ ಬೊಡೆದಿನ ಬಾಯಿಗ್ ಬತ್ತಿನ ಸಹಸ್ರ ನಾಮಾರ್ಚನೆನ್ ಒಂಜಿ ಕೆಬಿಟ್ ಕೇನೊಂದು ಬೊಕೊಂಜಿ ಕೆಬಿಟ್ ಸುಯಿಂಕ ಬುಡೊಂದು ಅರ್ಧಂಬರ್ಧ ಚಾ ಪರ್ದ್ ರಪ ರಪ ಮೀದ್ ಪಿದಡ್‌ದ್ ಅಮಸರ ಅಮಸರಡ್ ಬಸ್‌ಟ್ ಕುಲ್ಲಿಯೆ. ಓಡೆ ಮುಟ್ಟ ಅಮಸರ ಪಂಡ ಎನ್ನ ಕೆಬಿಟ್ ಇತ್ತಿನ ಸಂತೂರು ಸೋಪುದ ನುರೆನ್ ಯಾನ್ ಒರೆಸಿನಿ ನಂತೂರುಡು ಅಡೇ ಮುಟ್ಟ ಅಮಸರ.
ಅಮಸರ ಅಮಸರೊಡು ಕದ್ರಿ ಮಲ್ಲಿಕಟ್ಟೆದ ಜುಗುಲು ಹಾಲ್‌ಗ್ ಬನ್ನಗ ಗಂಟೆ ಬರ್ತಿ ಒಂಜಿ ಯಾನ್ ಬೆಗರ್ದ್ ಚಂಡಿ ಪುಂಡಿ. ಜುಗುಲುಡು ಮೂಜಿ ಹಾಲ್ ಉಂಡು ಆನಿ ಮೂಜಿ ಹಾಲ್‌ಡ್ಲ ಮದಿಮೆ ತಿರ್ತ್ ಬರೆತಿನ ಬೋರ್ಡು ತೂಯೆ. ಒಕ್ಕನೂಲು ಓಮಯ್ಯ ಕುಟ್ಟಿಕಾರ್ ಕೂಸಮಕ್ಕನ ವಿವಾಹ ಸಮಾರಂಭ ಮೊದಲನೇ ಮಹಡಿಯಲ್ಲಿಂದ್ ಬರೆದಿತ್ತೆರ್, ರಪ ರಪ ಮೊದಲನೇ ಮಹಡಿಗ್ ಪೋಯೆ.
ಅಮಸರ ಅಮಸರೊಡು ಕಾಂಡೆ ತಿಂತಿನ ಅರ್ಧಂಬರ್ಧ ಪುಂಡಿ ಏತ್ ಕಿಲೋಮೀಟರ್ ದೂರ ಪೋತುಂಡ ದಾನ ಬಡವುಡು ಲೋಕ ಇಜ್ಜಿ, ನನ ಮದಿಮಯೆ ಮದಿಮಲೆಗ್ ಬೊಕ್ಕ ತಿಕ್ಕ್‌ದ್ ವಿಷ್ ಮಲ್ತ್‌ದ್ ಕೊರೊಲಿ, ಸುರುಕು ವನಸ್ ಮಲ್ಪುಗಂದ್ ವನಸ್ದಡೆ ಪೋಯೆ, ಬಾರಿ ಒಂಜಿ ಸೋಕುದ ತರಕಾರಿದ ವನಸ್ ಬಂಜಾರ ವನಸ್ ಮಲ್ತ್‌ದ್ ಮಂಟಪದಡೆ ಬನ್ನಗ ತೂಪಿನಿ ದಾದ! ಮಂಟಪಡ್ ಒಕ್ಕನೂಲು ಓಮಯ್ಯಣ್ಣೆ ಕುಟ್ಟಿಕಾರ್ ಕೂಸಮಕ್ಕ ಇಜ್ಜೆರ್, ಬೇತೆ ರಡ್ಡ್ ಜೋಡಿಲು ಪೋಟೊಕು ಫೋಸು ಕೊರೊಂದುಲ್ಲೆರ್, ಯಾನ್ ಬರಿಟ್ ಇತ್ತಿನ ಒಂಜಿ ಅಜ್ಜೆರೆಡ ಕೇಂಡೆ, ಅಜ್ಜೆರೆ ಉಂದು ಮದಿಮೆ ಏರೆನಾಂದ್ ಐಕ್ ಆರ್ ಪಂಡೆರ್ ಉಂದು ಚಿ! ಜಿಲಾಬ್ ಜನಾರ್ದನ ಬೊಕ್ಕ ಚಿ! ಸೌ! ಜಕ್ಕಮದಿನ ಜಾನಕಿನ ಮದಿಮೆಂದ್ ಎಂಕ್ ಒರನೇ ತಿಂತಿನ ಲತ್ತನೆದ ಸುಕ್ಕ ಬಾಯಿಗ್ ಬತ್ತಿಲೇಕಾಂಡ್. ತಿರ್ತ್ ಹಾಲ್‌ಗ್ ಪೊಗ್ಗುನಗ ಬೋರ್ಡು ಬರೆತಿನಯನ ತಪ್ಪಾ ಅತ್ತ್ ಬಡವುದ ಪೊರ್ತುಗು ದೊಂಬುದ ಪೆಟ್ಟ್‌ಗ್ ಯಾನ್ ಓದಿನ ತಪ್ಪಾಂದ್ ಎಂಕೆ ಒರ ಅಂಬರಪ್ಪು ಆದ್ ಪೋಂಡು.
ಅಮಸರ ಅಮಸರೊಡು ರಡ್ಡನೇ ಮಹಡಿಗ್ ಬನ್ನಗ ಓಮಯ್ಯಣ್ಣೆ ಕೂಸಮಕ್ಕನ ಪುಗೆಲ್ಗ್ ಕೈ ಪಾಡೊಂದು ಪೋಟೊಕು ಫೋಸು ಕೊರೊಂದು ಉಲ್ಲೆರ್. ಎನ್ನ ಮಂಡೆನ್ ಯಾನೆ ಪರ ಪರಂದ್ ಕಿರ್ಂಬೊಂದು ಮಂಟಪೊಗು ಪೋದು ಮದಿಮಯೆ ಮದಿಮಲೆನ ಕೈಕ್ ಕವರ್ ಕೊರ್ದು ನಾಲ್ ಕಜೆ ಅರಿ ದಕ್ದ್ ಮಂಟಪರ್ದ್ ತಿರ್ತ್ ಜಪ್ಪುನಗ ಘಮಘಮಂದ್ ಕೋರಿದ ಸುಕ್ಕದ ಪರಿಮಳ ಮೂಂಕುದ ಬಾಕಿಲ್‌ಗ್ ಬೊಟ್ಟೊಂದುಂಡು, ಯಾನ್ ಈತ್ ಮಂಗ ಕೋಲ ಕಟ್ಟ್ಂಡಲ ಒಂತೆಲ ಬೇಜಾರವಂದಿನ ಎಂಕ್ ಇತ್ತೆ ಕೋರಿ ಸುಕ್ಕನ್ ಎನ್ನ್‌ದ್ ಮಸ್ತ್ ಬೇಜಾರಾಂಡ್, ನಾನ್ ವೆಜ್‌ದ ಮದಿಮೆಗ್ ಬತ್ತ್‌ದ್ ಕಾಯಿ ಕಜಿಪು, ತಪ್ಪು ತರಕಾರಿ ಗೆಡ್ಡೆ ಗೆಣಸುಲೆನ್ ಧರ್ಮೋಗ್ ತಿಂದೆತಂದ್ ಎಂಕ್ ಯಾನೆ ನೆರೊಂದುಪ್ಪುನಗ ಒಂಜಿ ಗುರ್ತದ ಜನ ಬಲೆ ಬಲೆ ವನಸ್ ಮಲ್ಪುಗಂದ್ ಎನ್ನ ಕೈಕ್ ಪ್ಲೇಟ್ ಒಚ್ಚಿದ್ ಕೊರ್ದುಲಾಂಡ್, ಒಂಜಿ ಮೈಟ್ ಬಂಜಿ ಗಟ್ಟಿ ಆತ್ಂಡ್ ಬೊಕೊಂಜಿ ಮೈಟ್ ಕ್ಯಾಟ್ರಿಂಗ್ ದಕ್ಲೆನ ಬಾಜನೊಡಿತ್ತಿನ ಕೋರಿದ ಕಬಾಬ್ ಚಿಲ್ಲಿ ಸುಕ್ಕೊಲು ಮಾತ ಎನನ್ ತೂದು ಕಿಟಿಕಿಟಿಂದ್ ತೆಲ್ತೊಂದುಲ್ಲ.
ಅಮಸರ ಅಮಸರೊಡು ಮನಿಪಂದೆ ಬಟ್ಟಲ್ ಪತ್ತೊಂದು ಲೈನ್‌ಡ್ ಉಂತುದು ಎದುರು ಎದುರು ಬನ್ನಗ ಕಬಾಬ್ ಬಲಸುನ ಒಂಜಿ ಜನ ಬರಿಟ್ ಚಿಲ್ಲಿ ಬಲಸುನಯಡ “ಈ ಜನ ಏಕಡ್ ತಿರ್ತ್ ವನಸ್ ಮಲ್ತೊಂದಿತ್ತ್ಂಡ್ ಇತ್ತೆ ಮುಲ್ಪಲ ಉಂಡುಂದ್” ಪನೊಂದುಂಡು, ಎಂಕ್ ಕೆಪ್ತಂಡೆಗ್ ಹಾಕಿಲೆಕಾಂಡ್ ಎನ್ನ ಸೋಲುಗು ರಡ್ಡ್ ಮದಿಮೆಗ್ಲ ಒಂಜೆ ಜನತ ಕ್ಯಾಟ್ರಿಂಗ್ ತಿರ್ತ್ ಲತ್ತನೆ ಬಲಸುನಯೆ ಒಂತೆ ವನಸ್ದಲ್ಪ ರಶ್ ಕಮ್ಮಿ ಆಯಿಬೊಕ್ಕ ಮಿತ್ತ್ ಬತ್ತ್‌ದ ಕಬಾಬ್ ಬಲಸೊಂದಿತ್ತೆ….
ಈ ಅಮಸರ ಅಮಸರೊಡು ಮಾನ ಮರ್ಯಾದಿ ಸುದ್ದಿ ಇಜ್ಞಂದೆ ಪೋಂಡು….!
ನಂಕ್ ಅಬ್ಯಾಸ ಇತ್ತಿನೆಟಾಂಡ್ ಇಜ್ಜಿಂಡ ಮಸ್ತ್ ಬೇಜಾರಾತು……..! ✒️ *ಚೇತನ್ ಅಮೀನ್* ತುಲುವೆರೆ ಕಲ ಕುಡ್ಲ
by 