ಬೆನ್ನಿ

🪷 ಬೆನ್ನಿ….ನನ….ಪತ್ತ್🪷

ಪಾರ್ ಪಡಿಲ್ ಬೂರ್ದಿನ
ತಮೇರಿ ಪುಣಿ ದಾಂತಿನ
ಒಡಿ ತೋಡು ಮಾಜಿದಿನ
ಮುಂಡೆಯಿ ಬಲ್ಲೆಡ್ ಮುರ್ಕುದಿನ
ಉಂದ್ ಮಾತಾ ಕಂಡನಾ?
ಉಂದ್ ಮಾತಾ ದಂಡನಾ?

ಮನಸ್ಸೊಂಜಿ ಭೂಮ್ಯಪ್ಪೆನ ಮಿತ್ತ್
ಆನಿ ಆನಿ ಬೆಂತಿನ ನೆನಪುದ ಮಿತ್ತ್
ಇನಿ ಬೆನ್ನಿ ಬೆನೋಲಿ ಪನ್ಪಿನ ಗತ್ತ್
ಸುರು ಆಂಡ್ ಒಟ್ಟು ಪಾಡೆರೆ ಸೊತ್ತ್

ಬಲ್ಲೆ ಕಡ್ಪಾಂಡ್ ಕಸ ಮುಳ್ಳು ದೆಪ್ಪಾಂಡ್
ತೋಡ್ ದಿಪ್ಪಾಂಡ್ ಪುಣಿ ಕಟ್ಚಾಂಡ್
ಪಿರಿಯಕಲು ಪಂತಿನ ನೆನಪಾಂಡ್
ಕಾರ್ತಿ ಧರ್ತಿ, ಸುಗ್ಗಿ ಸೂಳೆ, ಕೊಳಕೆ ಪೆದ್ಮೆದಿ
ಅರ್ತಿಡ್ ಕಾತುಂಡ್ ಬಾನ ಬರ್ಸೊನ್

ಕಡಲುಡ್ ಅಬ್ಬರ..ತುದೆಟ್ ಉಬ್ಬರ
ಅಕ್ಕಸೊಡ್ ಕರಿ ಕರಿ ಮೋಡ ಸಾರ
ತಂಪು ಗಾಳಿ ಸುಳಿಂಡ್ ನೀರ ಧಾರೆ
ಭೂಮಿ ತಣಿಂಡ್ ಮನಸಾರೆ
ನಂಕ್ ಆಂಡ್ ಖುಷಿ ಸಾರ ಸಾರ

ನಾವೆರ್ ನೊಗ, ಎರ್ಲು ಬೋರಿ ದಾಂತಿನ
ತನ್ನು ಮುಡಿ ಪನ್ನರ್ ಪತ್ತ್ ಉಪ್ಪಂದಿನ
ಮುನೆ..ನಾವೆರ್ ಉರ್ಲು ಬೊಡ್ಚಾಯಿನ
ಯಂತ್ರದ ತಂತ್ರೊಡ್ ದಪ್ಪುನ
ಏರುಡ್ ಏರುಂಡ್ ತಾರುಡ್ ತಾರ್ಂಡ್

ಪಡಿಲು ಲಕ್ಕಾಂಡ್ ಗೊಬ್ಬರ ಕಂತ್ತಾಂಡ್
ನೀರ್ ಕಟ್ಟುಂಡ್ ಪಜೀರ್ ಕುರಿಪಾಂಡ್
ಬಾನ ತೂಂಡ್ ಬರ್ಸೊನ್ ಕಾತುಂಡ್
ಆದ್ರೆ ಪೋಂಡ್ ಪುನರ್ವಸು ಬತ್ತುಂಡ್
ವರುಣ ದೇವೆರೆಗ್ ಕರುಣೆ ಬತ್ತುಂಡ್
ನೀರ ಬರ್ಸ..ಬರ್ಸದ ನೀರ್ ದೊರಿಂಡ್

ನೇಜಿ ಬತ್ತುಂಡ್…ನಡ್ಪಿನ ಮೇಶಿನ್
ಗೌಜಿಡೇ ಸುತ್ತುಂಡ್ ಕಂಡ ನಡುಂಡ್
ನಡು ನಡುಟ್ ಎಡ್ಡೆನೇ ತಾರುಂಡ್
ಗಟ್ಟಿ ಜವ್ವನೆರೆ ತಂಡ ಮಿತ್ತ್ ಪಾಡುಂಡ್
ನಟ್ಟಿ ಮುಗಿಂಡ್ ಒಂಜೇ ಒಂಜಿ ದಿನೊಟ್

ನೆಂಪಾಂಡ್…ಪಿರಿಯೆರೆ ಪಾತೆರೆ ಮುಗಿತಲಡ್
ಬೆನ್ನಿ ಮಲ್ದೆಗೆ ಬ್ಯಾರಿ ಬಾರಿ ಅಬ್ಬೊರೊಡ್
ಮಾತ ಆಂಡ್…ನನ “ಪತ್ತ್” ಆವೊಡ್
ಪನ್ನಗ..ನನ ಪತ್ತಾ?..ಬೆನ್ನಿ ಬುಡ್ತೆಗೆ
ಬೆನ್ಲೆ ಬೆನ್ನಿ….ನನ “ಪತ್ತು”ದಂಚಿ ಎನ್ನೊಡ್ಚಿ.

✍️ಉದಯ ಬಿ. ಶೆಟ್ಟಿ, ಪಂಜಿಮಾರು