ತುಳು ಭಾಷೆ ಒರಿಪಾದ್ ಬುಲೆಪಾವುನೇಟ್ ಪರವೂರುದ ತುಳುವೆರೆನ ಕೊಡುಗೆ ಅನನ್ಯವಾಯಿನವ್ : ತಾರಾನಾಥ್ ಗಟ್ಟಿ ಕಾಪಿಕಾಡ್
ಭದ್ರಾವತಿಡ್ ನಡತಿನ ತುಳು ಉಚ್ಚಯ.
*“
ಮಂಗಳೂರು : ತುಳು ಭಾಷೆನ್ ಒರಿಪಾದ್ ಬುಲೆಪಾವುನ ನಿಟ್ಟುಡ್ ಪರವೂರುದ ತುಳುವೆರು ಗಣನೀಯ ಕೊಡುಗೆ ಕೊರ್ತೆರ್ ಪಂಡುದು ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ತಾರಾನಾಥ್ ಗಟ್ಟಿ ಕಾಪಿಕಾಡ್ ಪಂತೆರು.
ಆರು ಭದ್ರಾವತಿದ ಬಂಟೆರೆನ ಭವನಡ್ ಶುಕ್ರವಾರ ಬಯ್ಯಗ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಬೊಕ್ಕ ತುಳು ಕೂಟ ಭದ್ರಾವತಿ ಆಯೋಜನೆ ಮಲ್ದಿನ ತುಳು ಉಚ್ಚಯನ್ ಉದಿಪನ ಮಲ್ತುದ್ ಪಾತೆರಿಯೆರು.
ತುಳು ಭಾಷೆ ಬೊಕ್ಕ ಸಂಸ್ಕೃತಿಗ್ ಮಾತೆರೆನುಲಾ ಒಟ್ಟಾದ್ ಉಪ್ಪುನ ಗುಣಧರ್ಮ ಉಂಡು. ಈ ಕಾರಣದಿಂದಾಗಿ ಹೊರನಾಡಿನಲ್ಲಿ ತುಳುವೆರು ಸಾಮರಸ್ಯ ಬೊಕ್ಕ ಶಾಂತಿದ ರಾಯಭಾರಿಯಾದಿತ್ತುದ್ ತುಳು ಬಾಸೆನ್ ಒರಿಪಾದ್ ಬುಲೆಪಾವುನ ಮಹತ್ಕಾರ್ಯನ್ ಮಲ್ತೊಂದ್ ಬರೊಂದುಲ್ಲೆರ್ ಪಂಡುದು ತಾರಾನಾಥ್ ಗಟ್ಟಿ ಅಭಿಪ್ರಾಯಪಟ್ಟಿಯೆರು.
ಕಾರ್ಯಕ್ರಮಡ್ ಮುಖ್ಯ ಅತಿಥಿಯಾದ್ ಪಾಲ್ ಪಡೆಯಿನ ಕರ್ನಾಟಕ ಸರಕಾರದ ಕೆ.ಆರ್.ಐ.ಡಿ.ಎಲ್ ಅಧ್ಯಕ್ಷ ಬೊಕ್ಕ ಭದ್ರಾವತಿ ಶಾಸಕ ಬಿ.ಕೆ.ಸಂಗಮೇಶ್ವರ ಪಾತೆರ್ದ್ , ಭದ್ರಾವತಿದ ಅಭಿವೃದ್ಧಿ ಬೊಕ್ಕ ಬುಲೆಚ್ಚಿಲ್ ಡ್ ತುಳುವೆರೆನ ಪರಿಶ್ರಮ ಅಪಾರವಾಯಿನವ್ ಪಂಡುದು ಪುಗಾರಿಯೆರು. ತುಳು ಭಾಷೆನ್ ರಾಜ್ಯದ ರಡ್ಡನೇ ಅಧಿಕೃತ ಭಾಷೆಯಾದ್ ಘೋಷಣೆ ಮಲ್ಪೊಡ್ ಪನ್ಪಿನ ಪ್ರಸ್ತಾಪನ್ ತಾನು ಬೆಂಬಲ ಮಲ್ಪುವೆ ಪಂಡೆರು. ಈ ಪೊರ್ತುಡ್ ಭದ್ರಾವತಿ ತುಳು ಸಂಘದ ಸಮಾಜಮುಖಿ ಕಾರ್ಯಕ್ರಮಗ್ ತಾನು ಐನ್ ಲಕ್ಷ ರೂ ದೇಣಿಗೆ ಕೊರ್ಪೆ ಪಂಡುದ್ ಶಾಸಕೆ ಬಿ.ಕೆ.ಸಂಗಮೇಶ್ವರ ಪಂಡೆರು.
ಸಮಾರಂಭಡ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆಯಿನ ಅಖಿಲ ಭಾರತ ತುಳು ಒಕ್ಕೂಟದ ಒತ್ತು ಗುರ್ಕಾರೆರಾಯಿನ ಬಿ.ಜಯಕರ ಶೆಟ್ಟಿ ಇಂದ್ರಾಳಿ ಮೆರೆನ್ ಮಾನಾದಿಗೆ ಮಲ್ತೆರ್.
ಭದ್ರಾವತಿ ತುಳು ಕೂಟದ ಅಧ್ಯಕ್ಷ ಪಿ.ಸುಧಾಕರ ಶೆಟ್ಟಿ ಸಭೆತ್ತ ಅಧ್ಯಕ್ಷತೆಡಿತ್ತೆರು. ನಾರಾಯಣ ಪೂಜಾರಿ, ಸುಬ್ಬಣ್ಣ ರೈ , ಡಾ.ವೈ.ಆನಂದ್ ಉಪಸ್ಥಿತರಿತ್ತೆರು.
ವಂದನೀಯ ಪ್ರಕಾಶ್ ಪಿಂಟೋ ಎದ್ಕೊಂಡೆರು, ಶ್ಯಾಮರಾಯ ಆಚಾರ್ ಕಾರ್ಯಕ್ರಮ ನಿರ್ವಹಣೆ ಮಲ್ತೆರು. ಪ್ರಧಾನ ಕಾರ್ಯದರ್ಶಿ ಡಾ. ಹರೀಶ್ ದೇಲಂತಬೆಟ್ಟು ಸೊಲ್ಮೆ ಸಂದಾಯ್ತ ಮಲ್ತೆರು.
ಕಜ್ಜೊಡ್ ತುಳು ಕೂಟದ ಸದಸ್ಯೆರೆನ ಜೋಕ್ಲೆಗ್ ಪ್ರತಿಭಾ ಪುರಸ್ಕಾರ ಪ್ರಧಾನ ಮಲ್ತೆರ್, ತುಳು ಕೂಟದ ಹಿರಿಯ ಸದಸ್ಯರೆಗ್ ಮಾನಾದಿಗೆ ನಡತುಂಡ್.
ಸಭಾ ಕಾರ್ಯಕ್ರಮಡ್ ಬೊಕ್ಕ ವೈವಿಧ್ಯಮಯ ಸಾಂಸ್ಕೃತಿಕ ಕಾರ್ಯಕ್ರಮೊಲು ನಡತುಂಡ್.
by 