ಕಾರ್ಲಡ್ ನೆತ್ತೆರ್ ಉಂಬೊಲಿ ಶಿಬಿರ.

ಜೈ ತುಳುನಾಡ್(ರಿ.) ಮುಂದಾಳತ್ವಡ್ ರಕ್ತನಿಧಿ, ಜಿಲ್ಲಾಸ್ಪತ್ರೆ, ಉಡುಪಿ ಬೊಕ್ಕ ಸ್ಥಳೀಯ ಸಂಘ ಸಂಸ್ಥೆಲೆನ ಸಹಭಾಗಿತ್ವಡ್ ಕಾರ್ಕಳದ ರೋಟರಿ ಬಾಲಭವನಡ್ ‘ನೆತ್ತೆರ್ ಉಂಬೊಲಿ’ ರಕ್ತದಾನ ಶಿಬಿರ 04 ಡಿಸೆಂಬರ್ 2022 ಐತಾರದಾನಿ ನಡತುಂಡ್.

ಕಾರ್ಯಕ್ರಮನ್ ಉದಿಪನ ಮಲ್ತಿನ ಯೋಗದೀಪಿಕ ವಿದ್ಯಾಪೀಠ, ಪಲಿಮಾರು ಮುಲ್ಪದ ಪ್ರಾಶುಪಾಲೆರಾಯಿನ , ಕಾರ್ಕಳದ ಶ್ರೀ ಅನಂತಪದ್ಮನಾಭ ದೇವಸ್ಥಾನದ ಪ್ರಧಾನ ಅರ್ಚಕೆರಾಯಿನ ಡಾ. ಕಾ. ವೇ. ಶಂಕರನಾರಾಯಣ ಭಟ್ ಪಾತೆರ್ದ್ ಭಾಷೆ ಬೊಕ್ಕ ಲಿಪಿ ಇತ್ತಿನ ಭಾಷೆಲೆಡ್ ತುಳು ಒಂಜಾತ್ತಿದ್ , ಅಯಿತ್ತ ಬಗ್ಗೆ ನಮಕ್ ಪೆರ್ಮೆ ಉಂಡು ಅಂಚೆನೇ ಮಾತಾ ತುಳುವೆರೆಗ್ ಈ ಬಗ್ಗೆ ಪೆರ್ಮೆ ಆವೊಡು. ಮುನ್ನೂರು ವರ್ಷದ ಪಿರಾವುಡ್ ಉಡುಪಿ, ಮಂಗಳೂರು, ಕಾಸರಗೋಡು ಬೊಕ್ಕ ಉತ್ತರ ಕನ್ನಡದ ಕೆಲ ಪ್ರದೇಶಲೆಡ್ ಭಾಷೆ ಪಂಡ ತುಳು, ಲಿಪಿ ಪಂಡ ತುಳು ಲಿಪಿ ಪಂಡುದಿತ್ತುಂಡ್. ತುಳುನಾಡುದ ಮಾತಾ ದೇವಸ್ಥಾನಲೆಡ್ ಪೂಜಾ ಕೈಂಕರ್ಯಲೆನ ವಿದ್ಯಾಭ್ಯಾಸನ್ ಮಲ್ಪುನಕುಲು ತುಳು ಲಿಪಿನ್ ಕಲ್ಪೊಡಿತ್ತುಂಡ್ ಬೊಕ್ಕ ಅವ್ವೆನ್ ದಿನೊಲಾ ದೇವಸ್ಥಾನಲೆಡ್ ಗಲಸೊಡಿತ್ತುಂಡ್, ಇತ್ತೆಲಾ ಈ ಪದ್ಧತಿ ಮಸ್ತ್ ಕಡೆಟ್ ಚಾಲ್ತಿಡ್ ಉಂಡು ಪಂಡೆರು.

ಮುಖ್ಯ ಅತಿಥಿಯಾದಿತ್ತಿನ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಸದಸ್ಯೆರು ಬೊಕ್ಕ ಆಳುಪ ವಂಶಸ್ಥರಾಯಿನ ಡಾ. ಆಕಾಶ್ ರಾಜ್ ಜೈನ್ ಪಾತೆರ್ದ್ ಕರ್ನಾಟಕ ರಾಜ್ಯಡ್ ಜಾಸ್ತಿ ಆದಾಯನ್ ಕನಪಿನ ಜಿಲ್ಲೆಲೆಡ್ ತುಳುನಾಡುದ ಜಿಲ್ಲೆಲು ಅಗ್ರಸ್ಥಾನಡ್ ಉಂಡು. ನಮ್ಮಲ್ಪ ಭೂಮಾರ್ಗ, ಜಲಮಾರ್ಗ ವಾಯುಮಾರ್ಗದಂಚಿನ ಮಾತಾ ಸೌಕರ್ಯಲಾ ಉಂಡು. ಬ್ರಿಟಿಷೆರೆನ ಕಾಲಡ್ ಉದ್ದದ ಭಾರತದ ರೈಲ್ವೆ ಮಾರ್ಗ ತುಳುನಾಡುಡ್ ಇತ್ತುಂಡ್. ಈತ್ ಮಾತಾ ಇತ್ತುಂಡಲಾ ಮುಲ್ಪದ ಅಪ್ಪೆ ಭಾಷೆ ತುಳುಕ್ ಕರ್ನಾಟಕ ರಾಜ್ಯಡ್ ನನಲಾ ಆಡಳಿತ ಭಾಷಾ ಸ್ಥಾನಮಾನ ಸಿಕ್ಕಂದಿನವ್ವ್ ಬೇಜಾರುದ ಸಂಗತಿ ಪಂಡೆರು. ಈ ಪೊರ್ತುಡ್ ಆರು ಭಾರತದ ಸುರುತ್ತ ಸ್ವಾತಂತ್ರ್ಯ ಸಂಗ್ರಾಮ ನಡಪುನ 20 ವರ್ಷೊಡ್ ಪಿರಾವುಡೇ ತುಳುನಾಡುಡ್ ನಡತಿನಂಚಿನ ಅಮರ ಸುಳ್ಯ ಕ್ರಾಂತಿನ್ ಪ್ರಸ್ತಾಪನೆ ಮಲ್ತುದ್ ತುಳುನಾಡುದ ಸ್ವಾತಂತ್ರ್ಯ ಸಂಗ್ರಾಮದ ಬಗ್ಗೆ ಸಭೆಟ್ ನೆಂಪು ಮಲ್ತೆರ್.

ಜೈ ತುಲುನಾಡ್(ರಿ.) ಸಂಘಟನೆದ ಅಧ್ಯಕ್ಷರಾದಿತ್ತಿನ ಶ್ರೀ ಅಶ್ವಥ್ ತುಳುವೆ ಕಾರ್ಯಕ್ರಮದ ಅಧ್ಯಕ್ಷತೆಡಿತ್ತೆರ್. ರಕ್ತ ನಿಧಿ ಜಿಲ್ಲಾಸ್ಪತ್ರೆ, ಉಡುಪಿ ನೆತ್ತ ವೈದ್ಯಾಧಿಕಾರಿ ಡಾ. ವೀಣಾ ಕುಮಾರಿ ಮುಖ್ಯ ಅತಿಥಿಯಾದ್ ವೇದಿಕೆಡಿತ್ತೆರ್. ಕಾರ್ಯಕ್ರಮದ ಸಹಭಾಗಿತ್ವಡಿತ್ತಿನ ಸಂಘ ಸಂಸ್ಥೆಲಾಯಿನ ಜಿ.ಎಸ್.ಬಿ ಹಿತರಕ್ಷಣಾ ವೇದಿಕೆ ಕಾರ್ಕಳ ನೆತ್ತ ಸಂಚಾಲಕೆರಾಯಿನ ಆರ್ ವಿವೇಕಾನಂದ ಶೆಣೈ, ಎಚ್.ಡಿ.ಎಫ್.ಸಿ ಬ್ಯಾಂಕ್ ಲಿ. ಮಂಗಳೂರು ನೆತ್ತ ಸಹ ವ್ಯವಸ್ಥಾಪಕ ನಿತೇಶ್ ಕುಮಾರ್, ಯುವ ವಾಹಿನಿ (ರಿ.) ಕಾರ್ಕಳ ಘಟಕದ ಅಧ್ಯಕ್ಷೆರಾಯಿನ ತಾರಾನಾಥ ಕೋಟ್ಯಾನ್, ಸೌಹಾರ್ದ ಫ್ರೆಂಡ್ಸ್ ಕ್ಲಬ್ ಜಾರ್ಕಳ-ಮುಂಡ್ಲಿದ ಅಧ್ಯಕ್ಷೆರಾಯಿನ ಪ್ರಜ್ವಲ್ ಜೈನ್, ಅಮ್ಮಾಸ್ ಸ್ಪೋರ್ಟ್ಸ್ & ಗಿಫ್ಟ್ಸ್ ಕಾರ್ಕಳ ನೆತ್ತ ಮಾಲಕೆರಸಯಿನ ಸುಧೀರ್ ಪೂಜಾರಿ, ಗೆಳೆಯರ ಬಳಗ ನೆಲ್ಲಿಗುಡ್ಡೆ ಬಜಗೋಳಿ ಅಧ್ಯಕ್ಷೆರು ಸುರೇಶ್ ಸಾಲಿಯಾನ್, ಛತ್ರಪತಿ ಶಿವಾಜಿ ಮಹಾರಾಜ್ ಬಳಗ ಕಾಂತರಗೋಳಿ ನೆತ್ತ ಅಧ್ಯಕ್ಷೆರಾಯಿನ ಶ್ರೀ ಸತೀಶ್ ಪೂಜಾರಿ ಕಾಂತರಗೋಳಿ ವೇದಿಕೆಡಿತ್ತೆರ್.

ಸ್ವರಾಜ್ ಶೆಟ್ಟಿ ಕಾರ್ಕಳ ಕಾರ್ಯಕ್ರಮ ನಿರೂಪಣೆ ಮಲ್ತುದ್, ಆತ್ಮ ಕೆ. ತುಳುನಾಡಗೀತೆ ಪಂಡುದ್ ಸುಗಿತೆರ್, ಜೈ ತುಲುನಾಡ್ (ರಿ.) ಸಂಘಟನೆದ ಜೊತೆ ಕಾರ್ಯದರ್ಶಿ ರಾಜೇಶ್ ತುಲುವೆ ಉಪ್ಪೂರು ಸ್ವಾಗತ ಮಲ್ತುದ್ ಉಪಾಧ್ಯಕ್ಷೆರಾಯಿನ ವಿಶು ಶ್ರೀಕೇರ ಸೊಲ್ಮೆ ಸಂದಾಯ್ತ ಮಲ್ತೆರ್. ಪ್ರಧಾನ ಕಾರ್ಯದರ್ಶಿಲಾಯಿನ ಅವಿನಾಶ್ ಮುಕ್ಕ, ಸಂಘಟನಾ ಕಾರ್ಯದರ್ಶಿ ಸದಾಶಿವ ಮುದ್ರಾಡಿ, ಸಹ ಸಂಘಟನಾ ಕಾರ್ಯದರ್ಶಿ ಪೃಥ್ವಿ ತುಲುವೆ, ಕೇಂದ್ರ ಸಮಿತಿದ ಗೀತಾ ಲಕ್ಷ್ಮೀಶ್, ವಿನಯ್ ರೈ, ಸಂಘಟನೆದ ಸದಸ್ಯೆರ್ ಬೊಕ್ಕ ರಕ್ತ ನಿಧಿ ಜಿಲ್ಲಾ ಆಸ್ಪತ್ರೆ, ಉಡುಪಿ ನೆತ್ತ ಸಿಬ್ಬಂದಿ ವರ್ಗ ಉಪಸ್ಥಿತರಿತ್ತೆರ್. ಬೇತೆ ಬೇತೆ ಸಂಸ್ಥೆಲೆನ 60ಗ್ ಲಾ ಜಾಸ್ತಿ ಸದಸ್ಯೆರು ರಕ್ತದಾನ ಮಲ್ಪುನ ಮುಖೇನ ಶಿಬಿರಡ್ ಪಾಲ್ ಪಡೆಯೆರ್.