ಬೊಂಬಯಿಲ ಆತುಂಡ್ ತುಳುನಾಡ್..

ಬೊಂಬಯಿಲ ಆತ್ಂಡ್ ತುಳುನಾಡ್

ಬೊಂಬಯಿಗ್ ಸುರು ಕಾರ್ ದೀನಗ ಎನ್ನೊಂದಿತ್ತ ಏರ್ ಊರ್ದಕುಲು ತಿಕ್ಕುವೆರ್ಂದ್.ಊರ್ದಕುಲು ತಿಕ್ ನಗ ಆ ತುಳು ಭಾಸೆ ಪಾತೆರ್ನಗ ಆಪಿನ ಕುಸಿಯೇ ಬೇತೆ.ದಿನ ಕರಿಯೊಂದಿತ್ತಿಲೆಕೊನೇ ಊರ್ದ ಜವನೆರ್ ಸೇರ್ದ್ ಒಂಜೊಂಜೇ ಸಂಘ ಸಂಸ್ಥೆ ಮಲ್ಪರೆ ಸುರು ಮಲ್ತೆರ್.ಊರ್ದ ಒಂಜೊಂಜೇ ಕಜ್ಜೊಲೆನ್ ಬೊಂಬಯಿದ ತುಳುವೆರೆಗ್ ತೋಜಾಯೆರ್.ಕಾಲ ಬದಲಾವೊಂದಿತ್ತಿಲೆಕನೇ ಊರ್ದ ಆಟ,ನಾಟಕ ತಂಡೊಲೆನ್ ಬೊಂಬಾಯಿಗ್ ತರ್ಪಾದ್ ಮೂಲು ಕಲಾಭಿಮಾನಿಲೆನ ಉಡಲ್ ಗೆಂದಾಯೆರ್.ಅಂಚೆನೇ ಸಂಘ ಸಂಸ್ಥೆದ ವಾರ್ಷಿಕೋತ್ಸವೊಗು ತಂಡದ ಪದುಕೆರ್ ನಾಟಕೊಡು ಅಭಿನಯ ಮಲ್ತೊಂದು ತನ್ನ ಚಾತುರ್ಪುನು ಮತ್ತರ್ಮೆಡ್ ತೋಜಾದ್ ಉಡಲ್ ಗೆಂದಿಯೆರ್.ದಿನ ಕರಿಯೊಂದಿತ್ತಿಲೆಕನೇ ಭಜನಾ ತಂಡೊಲು ಸುರುವಾಂಡ್.ದೇವಸ್ಥಾನನೊಲೆಡ್ ಏಕಾಹ ಭಜನೆ,ಮಹಸ್ ಮಂಗಳೋತ್ಸವ ಅನ್ನಸಂತರ್ಪಣೆ ಅಲ್ಪಲ್ಪ ಆವರೆ ಸುರುವಾಂಡ್.ಕೆಲವು ಕಡೆಟ್ಟ್ ಊರ್ದ ದೈವೊಲೆನ್ ಕನತ್ ಮೂಲು ನಂಬರೆ ಸುರುವಾಂಡ್.ಬೊಂಬಯಿಡ್ಲ ನಮ್ಮೂರ ದೈವದ ಗಗ್ಗರ ಸಬ್ದ ಕೇನರೆ ಸುರುವಾಂಡ್,ತಾಸೆ ವಾದ್ಯದ ಸಬ್ದ ಕೇನರೆ ಸುರುವಾಂಡ್,ಮಲ್ಲಿಗೆ, ದೊಂದಿದ ಕಮ್ಮೆನೊಡು ಊರ್ದ ಕೋಲ ತೂಯಿಲೆಕಾಂಡ್.ದೈವದೇವೆರೆಗ್ ಬ್ರಹ್ಮಕಲಸಲಾ ಆಪುಂಡು.ನಾಗಮಂಡಲ ಸೇವೆಲಾ ದಂಡ್ ದ ರಾಜ್ಯೊಡು ಕಟ್ಟ್ ಕಟ್ಟಲೆಡ್ ಆಪುಂಡು.ಉಂದು ಸರಿ ತಪ್ಪುದ ಇಚಾರ ಎಂಕ್ ತೆರಿಯಂದ್.ಆಟಿಡೊಂಜಿ ಕೂಟ ,ಕೆಸರ್ದ ಗೊಬ್ಬು ಇಂಚ ಮಾತ ಬೊಂಬಯಿಡ್ಲ ತೂಯರೆ ತಿಕ್ಕುಂಡು.ಊರ್ದ ತೆನಸ್ ವನಸ್ ಮಾತ ಮೂಲು ತಿಕ್ಕುಂಡು.ಉಂದು ನಮ್ಮೂರ್ದ ತುಳುವೆರೆಗ್ ನಮ್ಮೂರ್ದ ಮಿತ್ತ್ ಇತ್ತಿ ಮೋಕೆ.ನಮ್ಮ ಸಂಸ್ಕೃತಿ ಆಚಾರ ವಿಚಾರೊನು ದೂರದ ಬೊಂಬಾಯಿಡ್ಲಾ ಮದದ್ದ್ ಜೆರ್.ಕಟೀಲ್ದಪ್ಪೆನ ಪೋಟೋ ,ನಿತ್ಯಾನಂದ ಸ್ವಾಮಿಲೆನ ಪೋಟೋ ತೂನಗ ಗೊತ್ತಾಪುಂಡು ಉಂದು ನಮ್ಮೂರ್ದಕಲ್ನ ಹೋಟೇಲ್ಂದ್.ಊರ್ದಕುಲು ತಿಕ್ ನಗ ಊರ್ದ ಸುದ್ದಿ ಪಾತೆರಂದೆ ಪಾತೆರ್ಲೆಕ ಆಪುಜಿ‌.ವಾರೊಡೊಂಜಿ ರಜೆ ಕೆಲವೆರೆಗ್ ಐತಾರ.ಆನಿ ದಾದಾಂಡಲ ಊರ್ದಕಲ್ನ ಕಜ್ಜೊ ಇಪ್ಪುಂಡು.ಅವು ಗೊತ್ತಾಪಿನಿ ಕಾಂಡೆ ಲಕ್ ದ್ ಕರ್ನಾಟಕ ಮಲ್ಲ ಪೇಪರ್ ತೂನಗ ಮಾತ್ರ.ಇತ್ತೆ ಬೊಂಬಯಿದಕ್ಲೆಗ್ ತುಳುನಾಡ್ ಕೈತಲಾತ್ಂಡ್ .ಎನ್ನ್ ನಗ ರಪ್ಪ ರೈಲ್ ಡ್ ಕುಲೊಂದು ಪೋವೊಲಿ.ಊರುಡು ಇತ್ತೆ ಒಂಜಿ ಇಲ್ಲಡ್ ರಡ್ಡ್ ತತ್ತ್ಂಡ ಮೂಜಿ ಜನಕ್ಕುಲು ಇಪ್ಪುನು.ಅಂಚ ಪರ್ಬೊ ಬನ್ನಗ ದಾದಾಂಡಲ ಒಂಜಿ ಬಗೆತ್ತ ತೆನಸ್ ಮಲ್ಪುವೆರ್.ಬೊಂಬಯಿಡ್ ಅಂಚತ್ತ್ ದುಂಬು ಊರುಡು ಮಲ್ತೊಂದಿತ್ತಿನ ತೆನಸ್ ಪೂರಲ ಮಲ್ಪುವೆರ್.ಅಂಚ ತೂಯರೆ ಪೋಂಡ ಊರುಡು ಪೇಂಟೆಡ್ ಇತ್ತಿನಕುಲು ಇಲ್ಲಡ್ ಅಟಿಲ್ ಮಲ್ಪುಜೆರ್ .ಹೋಟೇಲ್ ರ್ದೆ ಕನ್ಪಾವೆರ್.ಮೂಡೆ ಕೊಟ್ಟಿಗೆ ಸೇಮೆದಡ್ಡೆ ಪೂರಲ ಹೋಟೇಲ್ಡೆ ತಿಕ್ಕುಂಡು.ಬೊಂಬಯಿ ತುಳುನಾಡಾತ್ಂಡ್ .ತುಳುನಾಡ್ ಬೊಂಬಯಾತ್ಂಡ್.
ತುಳುನಾಡ್ದ ಆಚರಣೆ ಒಂತೆ ಒರಿಪಾವುನ ಕಜ್ಜೊ ಬೊಂಬಯಿದ ತುಳುವೆರೆರ್ದ್ ಆವೊಂದುಂಡು.ನಮ್ಮ ತುಳುನಾಡ್ ತುಳು ಭಾಸೆನ್ ಏಪಲಾ ಬುಡ್ದು ಕೊರ್ಪಿನಕುಲತ್ತ್ ಈ ತುಳುನಾಡ್ದಕುಲು.ಒಲ್ಪ ಪೋಂಡಲಾ ತುಳುನಾಡ್ದ ಆಚರಣೆಗ್ ದುಂಬು ಸೇರ್ದ್ ಕಜ್ಜೊನು ಪೊರ್ಲು ಮಲ್ಪಾದ್ ಕೊರ್ಪೆರ್.ತುಳು ಭಾಸೆ ಒರಿಪಾವೊಡು,ತುಳು ಭಾಸೆನ್ ಬುಳೆಪಾವೊಡು,ತುಳುವಪ್ಪೆ ಭಾಸೆಗ್ ತನ್ನನೇ ಆಯಿನ ಸ್ಥಾನಮಾನೊ ತಿಕ್ಕೊಡು ಪನ್ಪಿ ಅಂಗಲ್ಪುಡು ನಮ್ಮ ತುಳುವೆರ್ ಕಾತೊಂದುಲ್ಲೆರ್.ರಾಜಕೀಯದ ಅಮಲ್ಡ್ ತುಳುಭಾಸೆಗ್ ಅನ್ಯಾಯ ಆವಂದಿಲೆಕ ತೂಪಿನ ನಮ್ಮ ತುಳುನಾಡ ಪ್ರತಿಯೊಂಜಿ ಧರ್ಮೊದ ತುಳುವೆರ್ನ ಜನಮಾನಿಲ್ನ ಕರ್ತವ್ಯ.ತುಳುನಾಡ್ ಏಪೊಲ ತುಳುನಾಡೆ.ಆಂಡ ಬೊಂಬಯಿಡ್ಲ ತುಳುನಾಡ್ದ ಕಮ್ಮೆನ ಪಸೆರೊಂದುಂಡು.

🙏🙏🙏🙏🙏
ಸುಕೇಶ್ ಶೆಟ್ಟಿ ಎಕ್ಕಾರ್✍️
ತುಲುವೆರೆ ಕಲ