ಗಡಿ ಕಾತ್ ಬದ್ಕ್ ಗೆಂದಿನ ಬೀರೆ ಬಿಎಸ್ಸೆಫ್ ಮಾಜಿ ಡೆಪ್ಯುಟಿ ಕಮಾಂಡೆಂಟ್ ಚಂದಪ್ಪ ಮೂಲ್ಯೆರ್….

ದುಂಬುದ ಕಾಲೊಡು ಕಲ್ತ್‌ನಕ್ಲ್ ಕಮ್ಮಿ. ಅಯಿಟ್‌ಲಾ ದೇಶ ಕಾಪುನ ದಂಡ್‌ದ ಸೈನಿಕೆ ಅಪುನಂಚಿನ ಬಲೊ ಬೊಕ್ಕ ತಂಕೊದ ಬೇಲೆದಂಚಿ ಮೋನೆ ಪಾಡುನ ಧೈರ್ಯೊಲಾ ಮನ್ಪುಜೆರ್ ಪನ್ಪುನವು ಒಪ್ಪೊಡಾಯಿನ ವಿಚಾರ. ಅಂಚಿನ ಆ ಕಾಲೊಡುಲಾ ರಡ್ಡ್ ತಿಗಲೆದ ಧೈರೊ ಮಲ್ತ್ ದೇಶ ಸೇವೆದಂಚಿ ಮೋನೆ ಪಾಡ್‌ದ್ ಗೆಂದ್‌ದ್ ಬತ್ತಿನಾರ್ ನಮ್ಮ ತುಳುವಪ್ಪೆ ಮಗೆ ನಿವೃತ್ತ ಮೇಜರ್ ಚಂದಪ್ಪ ಮೂಲ್ಯೆರ್. ಆರ್ನ ಬದ್ಕ್‌ದ ತಿರ್ಲ್ ದಿಂಜಿನ ಅಲ್ಮೋಗೊದ ಸಾಲ್‌ನ್ ನಮ ತೂದು, ಕೇಂದ್ ತೆರಿಯೊಂದು ಊರುಗು ತೆರಿಯುಲೆಕ ಮನ್ಪುನ ಬೇಲೆ ಆವೊಡು ಪನ್ಪಿ ನಿಲೆಟ್ ಅಂಚನೇ ಭಾರತೀಯ ಆರ್ಮಿ ಡೇ ಅತಂಡ ಭೂಸೇನಾ ದಿನತ್ತ ಲೆಕ್ಕಡ್ ನಮ್ಮ ಊರುದ ತಂಕೊದ ಬೀರನ್ ಲೋಕೊಮುಖ ಮಲ್ಪಿ ಕಿನ್ಯ ಪ್ರಯತ್ನ ಉಂದು.

1950 ಮೇ 5ನೇನಾನಿ ಕನ್ಯಾನದ ಕೊರಗು ಮೂಲ್ಯ ಬೊಕ್ಕ ಸುಬ್ಬಮ್ಮ ದಂಪತಿಲೆನ ಮಗೆಯಾದ್ ಪುಟ್ಟ್‌ನ ಚಂದಪ್ಪ ಮೂಲ್ಯೆರ್ ಕನ್ಯಾನ ಶಾಲೆಡ್ ಪ್ರಾಥಮಿಕ ಶಿಕ್ಷಣ, ಅಳಿಕೆ ವಿದ್ಯಾಸಂಸ್ಥೆಲೆಡ್ ಪದವಿ ಪೂರ್ವ ಶಿಕ್ಷಣ ಮುಗಿತ್ ಮೈಸೂರು ಯೂನಿವರ್ಸಿಟಿಡ್ ಬಿ.ಎ ಪದವಿ ಪಡೆಯೆರ್. ಮಲ್ಲ ಮಲ್ಲ ಬೇಲೆದ, ಅಧಿಕಾರೊದ ಗದ್ದಿಗೆದ ಸಾದಿ ಕಣ್ಣೆದ್‌ರ್ ಇತ್ತ್ಂಡಲಾ ಅಯಿಕ್ ಬಯಕಂದೆ ದೇಶ ಸೇವೆದಂಚಿ ಕಣ್ಣ್ ಪಾರಾಯಿನಾರ್ ಈ ಬಿರ್ಸೆ ಪಂಡ ತಪ್ಪಾವಂದ್. 38 ವರ್ಸ ಭರತ ಭೂಮಿದ ಸೇವೆ ಮಲ್ತಿನ ಈ ಗಟ್ಟಿ ಜೀವ ಅಯಿಕಾದ್ ಬತ್ತಿನ ಬಙೊಲೆನ್ ಒಂಜಿ ಬರವುಡು ಬಾಮಿದ್ ಮುಗಿಪೆರೆ ಸಾಧ್ಯ ಇಜ್ಜಂದಿನ ಪನ್ಪುನವು ಸತ್ಯೊದ ಇಚಾರೊ.

ಭಾರತ ಪಾಕ್ ಯುದ್ಧಡ್ ಗುಜರಾತ್‌ದ ಭೂಜ್‌ಕಟ್ ಬಾರ್ಡರ್‌ಡ್, ಜಮ್ಮು ಕಾಶ್ಮೀರ ಕಣಿವೆಡ್ ಉಗ್ರವಾದಿಲೆನ ಎದುರು ಕಾದ್ ದ್ ಬೊಕ್ಕ ಅಮೃತಸರ ಗೋಲ್ಡನ್ ಟೆಂಪಲ್ ಬ್ಲೂಸ್ಟಾರ್ ಆಪರೇಷನ್‌, ಅಸ್ಸಾಮ್ ಬೊಕ್ಕ ನಾಗಾಲ್ಯಾಂಡ್ ಉಗ್ರವಾದಿ ಕಾಳಗಲೆಡ್ ಸಮರ್ಥ ನೇತೃತ್ವ ಗೆತೊಂದು ಮಲ್ತಿ ಪೊರ್ಂಬಾಟೊಲೆಡ್ ಮಲ್ತಿ ಸಾಧನೆಲ್ ಮಿತ್ತ ಸಾಲ್‌ಡಿತ್ತ್‌ದ್ ಅವೆಕ್ ಬೇತೆ ಬೇತೆ ಇನಾಮುಲುಲಾ ತಿಕೀಂಡ್. 1986ಡ್ದ್ 1993 ಮುಟ್ಟ 7 ಒರ್ಸೊ ಬ್ಲಾಕ್‌ಕ್ಯಾಟ್ ಕಮಾಂಡೋಡು ಇತ್ತಿನ ಚಂದಪ್ಪ ಮೂಲ್ಯೆರ್ ಪ್ರಧಾನಮಂತ್ರಿಲೆಗ್ ಅಂಚನೆ ಗಣ್ಯ ಮಾನ್ಯೆರೆಗ್ ಸುರಕ್ಷಾ ಕವಚ ಆದ್ ಕಜ್ಜೊ ಕೈಕೊಂದು ಅಯಿಟ್ಲಾ ಮಾನಾದಿಗೆಲೆನ್ ಪಡೆಯಿನಾರ್.

1971 ನೇ ಇಸವಿಡ್ ಬಾಂಗ್ಲಾ ಯುದ್ದೊದ ಪೊರ್ತುಡು ಪಾಕಿಸ್ತಾನ ಮಿಲಿಟರಿ ದಂಡ್‌ದ ಸೈನಿಕೆರ್ಡ ಯುದ್ಧ ಮಲ್ತೊಂದು ಪೋನಗ ಆ ದೇಸೊದ ಉಲಯಿ ಒರಿದ್ ಪೋಪೆರ್. ಆ ಪೊರ್ತು ಉನೆರ ತಿನೆರೆ ಇಜ್ಜಂದೆ ಬಾರಿ ಬಙೊಡು ದಿನ ನೂಕಿನ ಭಾರತದ ಪೆರ್ಮೆದ ಗಡಿಕಾಪುನ ಬಂಟೆರ್ ಬಂಜಿದ ಬಡವುಗು ಹಳ್ಳಿಲೆಗ್ ಪೊಗ್ಗ್‌ದ್ ಎಂಚಾಂಡಲಾ ಬಂಜಿ ದಿಂಜವೊಂದು ಇತ್ತೆರ್. ಅಪಗ ವಾಯುಪಡೆ ಮನ್ಪುನ ದಾಳಿದ ನಡುಟು ಬದ್ಕ್‌ದ್ ಒರಿನವೇ ಒಂಜಿ ಮಲ್ಲ ಸಂಗತಿ ಆದಿತ್ತ್ಂಡ್. ಅಂಚಿನ ಸಮಯೊಡುಲಾ ಪಗೆಮಾನಿಲೆ ಸೈನ್ಯಲೆಗ್ ಮಣ್ಣ್ ತಿನ್ಪದ್ ಬಚಾವು ಆಯಿನ ನೆಂಪುನು ಪೆರ್ಮೆಡೇ ಪಟ್ಟೊನುವೆರ್ ನಮ್ಮ ಚಂದಪ್ಪ ಮೂಲ್ಯೆರ್.

ಉಗ್ರಗಾಮಿಲು ಕಾಶ್ಮೀರೊಗು ಕಾರ್ ದೀದ್ ಉಪದ್ರ ಕೊರ್ಪುನ ಆ ಕಾಲೊಡು ಬೇಟಾಲಿಯನ್‌ದ ರಡ್ಡನೆ ಕಮಾಂಡ್ ಆದ್ ಚಂದಪ್ಪ ಮೂಲ್ಯೆರ್ ದಂಡ್‌ನ್ ನಡಪಾವೊಂದು ಇತ್ತೆರ್. ಅಪಗ ಒಂಜಿ ದಿನ ಅಪಘಾನಿಸ್ಥಾನದ ಭಯೋತ್ಪಾದಕೆರ್ ಒಂಜಿ ಇಲ್ಲಡ್ ಕಂಡ್‌ದ್ ಕುಲ್ಲ್‌ದೆರ್ ಪನ್ಪಿನ ಸುದ್ದಿ ತಿಕ್ಕಿನಪಗ ಉಗ್ರಗಾಮಿಲೆನ್ ನಾಡೊಂದು ಪಿದಡಿನಕ್ಲೆಗ್ ಜೋಕ್ಲೆಡ್ದ್ ಸಕುನ ತಿಕ್ನಗ ಆ ಜೋಕ್ಲೆಗ್ ಚಾಕ್ಲೇಟ್ ಕೊರ್ದ್ ಉಗ್ರೆರೆನ ನಿಲೆ ತೆರಿಯೊನಿನ ಚಂದಪ್ಪ ಮೂಲ್ಯೆರ್ನ ತಂಡ ತನ್ನ ಪಿರನೊನು ಲೆಕ್ಕ ದಿವಂದೆ ನಾಡ್‌ಪತ್ತ್‌ದ್ ಉಗ್ರಗಾಮಿಲೆನ್ ಭಸ್ಮ ಮಲ್ತಿ ಪೊರ್ತುನು ಚಂದಪ್ಪ ಮೂಲ್ಯೆರ್ ವರ್ನಿಪೆರೆ ಉಂತ್ಯೆರ್ಡ ಕೇನುನಾಯನ ಮೆಯಿ ಕೊಕ್ಕೇರುಂಡು.

ಇಂಬೆರೆನ ಸಾಧನೆದ ಪಜ್ಜೆನ್ ಒಂಜೊಂಜಾದ್ ಗೆನ್ತ್ ಗೆನ್ತ್ ತೂಂಡ ನೆಗಪುನವು ಇಂಬೆರ್ನ ಉಡಲ್ ದಿಂಜಿದಿತ್ತಿನ ಬಗೆಪ್ಪೆರಾವಂದಿನ ದೇಶಪ್ರೇಮ. ಸೇನೆ ಸೇರೊಡೇ ಪನ್ಪಿನ ಬಾರಿ ಮಲ್ಲ ಅಂಗಲಾಪುನು ಉಡಲ್‌ಡ್ ದೀವೊಂದು ಮಲ್ಲ ಮಲ್ಲ ಪರೀಕ್ಷೆಲೆನ್ ಬರೆದ್ ಅಯಿಟ್ ಗೆಂದಿನ ಇಂಬೆರೆನ ಮಿಲಿಟರಿ ಸಾಧನೆನ್ ತೂವೊಂದು ಪೋಂಡ 1971ನೇ ಭಾರತ ಪಾಕಿಸ್ತಾನ ಯುದ್ದೊಡು ಪ್ರಾಮಾಣಿಕ ಸೇವೆ ಕೊರ್‌ದ್ ಗೆಂದಿನೆಕ್ ಸೇನಾ ಮೆಡಲ್, ಸಂಗ್ರಾಮ, ಮೆಡಲ್, ಪಶ್ಚಿಮ ಸ್ಟಾರ್ ಪಡೆತಿನಾರ್, ಜಮ್ಮು ಕಾಶ್ಮೀರ ಗಡಿಟ್ ಉಗ್ರೆರೆನ ನಡುಟು ನಡತಿ ಯುದ್ದೊಗ್ ರಾಷ್ಟ್ರಪತಿಲೆನ ಗೆಲಂಟರಿ ಮೆಡಲ್, ಪಂಜಾಬ್ ಉಗ್ರೆರೆನ ನಡುಟು ಮಲ್ತಿನ ಪೊರ್ಂಬಾಟೊಗು ಗರಾಜ್ ಮೆಡಲ್, ಅಸ್ಸಾಮ್‌ಡ್ ಮಲ್ತಿನ ಸೇವೆಗ್ ವಿಶಿಷ್ಟ ಸೇವಾ ಮೆಡಲ್, 2 ಸರ್ತಿ ಡಿ. ಜೆ ಕಮಾಂಡೇಷನ್ ಅಂಚೆನೇ ಸೇನೆದ ಒಟ್ಟು 54 ಪ್ರಶಸ್ತಿ ಪಡೆತಿ ಚಂದಪ್ಪ ಮೂಲ್ಯೆರ್ ಸೇನೆಡ್ ಇತ್ತ್ ದೇಶಸೇವೆ ಮಲ್ತ್‌ದ್ ಬಾರೀ ಗೌರವೊಡು ಸೇನಾನಿವೃತ್ತಿ ಪಡೆಯೆರ್.

ಬಿಎಸ್‌ಎಫ್ ಸಬ್‌ಇನ್ಸ್‌ಪೆಕ್ಟರ್‌ ಎಂ. ಸಂಜೀವ ಕುಲಾಲ್‌ ಚಂದಪ್ಪ ಮೂಲ್ಯೆರೆ ಉಮೇದ್‌ನ್ ಇಂಚ ನೆಂಪು ಮಲ್ತೊನುವೆರ್. ‘ದಂಡ್ ಅತಂಡ ಸೇನೆಗ್ ಸೇರುಂಡ ಮಸ್ತ್ ಪರೀಕ್ಷೆಲೆಡ್ ಗೆಂದೊಡು. ತಾನ್ ಸೈನ್ಯ ಸೇರುನ ಪೊರ್ತು ಈ ಪರೀಕ್ಷೆಲೆಗ್ ಬೋಡಾಯಿನ ಮಾತಾ ಪುಸ್ತಕ, ಅಗತ್ಯ ಸಲಹೆಲೆನ್ ಕೊರ್‌ದ್ ಉಮೇದ್ ದಿಂಜಯಿನಾರ್ ಬಿಎಸ್ಸೆಫ್‌ ಮಾಜಿ ಡೆಪ್ಯುಟಿ ಕಮಾಂಡೆಂಟ್‌ ಆದಿತ್ತಿ ಕನ್ಯಾನದ ಚಂದಪ್ಪ ಮೂಲ್ಯೆರ್. ಆರ್ನ ನಿರಂತರ ಪ್ರೋತ್ಸಾಹಡ್ ದೇಶ ಸೇವೆಡ್ ಧನ್ಯತಾಭಾವ ಅನುಭವಿತೊಂದುಲ್ಲೆ’ ಪನ್ಪೆರ್. ಇಂಚನೇ ಮಸ್ತ್ ಜನಕ್ಕ್ ಸೈನ್ಯ ಸೇರುನ ಉಮೇದ್ ಕೊರ್ನ ಚಂದಪ್ಪ ಮೂಲ್ಯೆರ್ ಭಾರತೊದ ದೇಶಪ್ರೇಮಿಲ್ನ ಸಾಲ್‌ಡ್ ಮೆನ್ಕುನ ತುಳುವ ನೇಸರೆ.

ನಿವೃತ್ತಿ ಜೀವನೊಡುಲಾ ಮನಿಪಂದೆ ಕುಲ್ಲಂದೆ ಸಮಾಜ ಸೇವೆದಂಚಿ ತರೆಪಾಡಿನ ಚಂದಪ್ಪೆರ್ ಕೇಂದ್ರೀಯ ಸಶಸ್ತ್ರ ಪಡೆ – ನಿವೃತ್ತ ಯೋಧರ ಕ್ಷೇಮಾಭಿವೃದ್ಧಿ ಸಂಘ ಕರ್ನಾಟಕ ರಾಜ್ಯದ ರಾಜ್ಯಾಧ್ಯಕ್ಷೆರ್ ಬೊಕ್ಕ ಅಖಿಲ ಭಾರತ ಕೇಂದ್ರ ಸಶಸ್ತ್ರ ಪಡೆಗಳ ನಿವೃತ್ತರ ಸಂಘ ಒಕ್ಕೂಟದ ಉಪಾಧ್ಯಕ್ಷೆರ್ ಅಂಚನೇ ಅಖಿಲ ಭಾರತಪ್ರಜಾಪತಿ (ಕುಂಬಾಕರ್) ಸಂಘ (ರಿ) ನ್ಯೂಡೆಲ್ಲಿ ಉಂದೆತ ಕರ್ನಾಟಕ, ಕೇರಳ ಬೊಕ್ಕ ತಮಿಳ್ನಾಡ್ ವಿಭಾಗದ ಪ್ರಾಂತೀಯ ಅಧ್ಯಕ್ಷೆರ್ ಆದುಲ್ಲೆರ್. ಸೈನ್ಯದ ಪೊರ್ಂಬಾಟೊಗು ಬೆರಿಪಾಡಿ ಚಂದಪ್ಪ ಮೂಲ್ಯೆರೆ ಬದ್ಕ್ ದಾಲಾ ಶಾಂತತೆ ದಿಂಜವೊಂದು ಇಜ್ಜಂಡ್. ಗ್ಯಾಸ್ ಏಜೆನ್ಸಿ ಸುರು ಮಲ್ಪುನ ಪೊರ್ತು ಪಂಚಾಯತ್ ಬೊಕ್ಕ ಕೆಲವು ನಿರೆಕರೆತ್ತ ಸಮಸ್ಯೆಲೆನ್ ಮುಗಿಪುನಲ್ಪಲಾ ಪೊರ್ಂಬೊಡಾದ್ ಬತ್ತಿನವು ದುರ್ದೈವೊಂದು ಪನೊಲಿ. ಆ ಮಾತಾ ಸಮಸ್ಯೆಲೆ ನಡುಟು ಉಬಾರ್‌ಡ್ ಉದಿತಿ ಅಮೂಲ್ಯ ಗ್ಯಾಸ್ ಏಜೆನ್ಸಿದ ದನಿಯಾದ್ BPL ಕಾರ್ಡ್‌ದಕ್ಲೆಗ್ ಮಾತಾ ಸೌಲತ್ತ್‌ಲೆನ್ ಒದಗದ್ ಕೊರ್ನ ಮೂಲ್ಯೆರ್ ಸಾದಾಸೀದಾ ನರಮಾನಿ. ಕುಂಬಾರ ಸಂಘಟನೆದ ರೂವಾರಿಯಾದ್‌ಲಾ ಬೆಂದಿನ ಇಂಬೆರ್ ದಿಕ್ಕ್ ದೆಸೆ ಇಜ್ಜಂದಿನ ಅಪ್ಪೆ ಅಮ್ಮದಾಂತಿ ಜೋಕುಲೆನ್ ದತ್ತು ದೆತೊನುನ ಕುಲಾಲ್ ವೇದಿಕೆ ಮಲ್ಪುನ ಸಮಾಜ ಸೇವೆದ ಬೇಲೆಡ್ ಕೈಗೋಡಿನ ಚಂದಪ್ಪ ಮೂಲ್ಯೆರ್ ಒಂಜಿ ಬಾಲೆನ್ ದತ್ತು ಸ್ವೀಕಾರ ಮಲ್ತ್ ವಿದ್ಯಾಭ್ಯಾಸದ ಖರ್ಚಿನ್ ತೂವೊಂದು ಇಪ್ಪುನಾರೆನ ಈ ಸಾಧನೆದ ಪಜ್ಜೆನ್ ಗುರ್ತಿಸದ್ ಮಸ್ತ್ ಸಂಘ ಸಂಸ್ಥೆಲು ಇಂಬೆರೆಗ್ ತಮ್ಮನ ಬಲ್ಮನ ಮಲ್ತ್ ಮಟ್ಟೆಲ್ ದಿಂಜದೆರ್. ಅಂಚನೆ ಸಮಾಜಸೇವೆಗಾದ್ ಕುಲಾಲ ಸಮಾಜರತ್ನ ಮಾನಾದಿಗೆ ಪಡೆತೆರ್.

ನಿವೃತ್ತ ಜೀವನಡ್ ಬೊನ್ಸಾಯ್ ಕಲೆಕ್ಷನ್ ಬೊಕ್ಕ ವಿದೇಶಿ ತಳಿ ದೈ ಬೂರುಲೆನ ಸಂಪೊಲಿಗೆ ಮಲ್ಪುನ ಒಟ್ಟುಗು ಪೊಸ ಪೊಸ ಜಾಗೆಲೆಗ್ ಪ್ರವಾಸ ಮಲ್ಪುನಂಚಿನ ಹವ್ಯಾಸ ಇಪ್ಪುನ ಚಂದಪ್ಪ ಮೂಲ್ಯೆರ್ ಬಿ.ಸಿ.ರೋಡ್ ಸೋಮಾಯಾಜಿ ಆಸ್ಪತ್ರೆ ಕೈತಲ್ ಇಪ್ಪುನಾ ಇಲ್ಲಡ್ ಬೊಡೆದಿ ಮಾಲಾ ಚಂದಪ್ಪ ಬೊಕ್ಕ ಮಗೆ ಧೀರಜ್‌ನ ಒಟ್ಟಿಗೆ ಸುಖ ಸಂಸಾರ ನಡಪಾವೊಂದು ಇಪ್ಪುನ ದೇಶ ಕಾತಿನ ತುಳುವಪ್ಪೆ ಮಗನ ಈ ಸಾಧನೆನ್ ಪ್ರತಿ ಒಂಜಿ ನರಮಾನಿಲ ಮಾನಾವುಲೆಕ ಆವಡ್. ತಮ್ಮನದ ಬೊಲ್ಮನ ನನಲಾತ್ ತಿಕ್ಕಡ್, ಮಾನಾದಿಗೆಡ್ ಮಟ್ಟೆಲ್ ದಿಂಜಡ್ ಪನ್ಪಿ ಬಯಕೆ ಎಂಕ್ಲೆನವು…

ಸುಶಾಂತ್ ಪೂಜಾರಿ ಕನ್ನಡಿಕಟ್ಟೆ