ಮದೆಟಿತ್ತಿನ ತುಳುಸಾಧಕೆರೆನ್ ಪತ್ತೆ ಮಲ್ತುದ್ ಮಾನಾದಿಗೆ ಮಲ್ಪುಗ ಪಂಡುದ್ ಕರ್ನಾಟಕ ತುಳುಸಾಹಿತ್ಯ ಅಕಾಡೆಮಿದ ಗುರ್ಕಾರೆರಾಯಿನ ದಯಾನಂದ ಜಿ. ಕತ್ತಲ್ಸಾರ್ ಪಂತೆರ್.ಆರು ಕರ್ನಾಟಕ ತುಳುಸಾಹಿತ್ಯ ಅಕಾಡೆಮಿದ ಸಿರಿ ಚಾವಡಿಡ್ ಅಕ್ಟೋಬರ್ 30 ತಾರೀಕುದಾನಿ ನಡತಿನ ಚಾವಡಿ ತಮ್ಮನ ಕಜ್ಜೊಡ್ ಗುರ್ಕಾರ್ಮೆದ ನಿಲೆಟ್ ಪಾತೆರಿಯೆರ್.
ತುಳು ಭಾಷೆ-ಸಂಸ್ಕೃತಿ-ಸಂಸ್ಕಾರೊಗಾದ್ ಸಮಾಜದ ದುಂಬು ತೋಜಂದೆ ಮದೆಟುಪ್ಪುನ ಬೇತೆ ಬೇತೆ ಕ್ಷೇತ್ರೊಡ್ ವಿಶೇಷ ಸಾಧನೆ ಮಲ್ತಿನಕ್ಲೆನ್ ಗುರುತಿಸಾದ್, ಮಾನಾದಿಗೆ ಮಲ್ಪುನ ಮುಖೇನ ಅಕ್ಲೆನ ಪರಿಶ್ರಮೊಗ್ ತಕ್ಕ ಪ್ರತಿಫಲ ಕೊರ್ಪುನ ಬೇಲೆ ಮಲ್ಪೊಡ್ , ಅಂಚಾಂಡ ಮಾತ್ರ ಸಮಾಜೊಡ್ ನನಲಾತ್ ಸಾಧಕೆರೆಗ್ ಅಕ್ಲೆನ ಮಾನಾದಿಗೆ ಪ್ರೇರಣೆ ಆಪುಂಡ್ ಪಂಡೆರ್.
ಈ ಸಂದರ್ಭೊಡ್ ತುಳುವೆರ್ ಕುಡ್ಲ ಬೊಕ್ಕ ಬೆಳ್ತಂಗಡಿದ ರಿಷಿ ಸಾಮಾಜಿಕ ಸಾಂಸ್ಕೃತಿಕ ಪ್ರತಿಷ್ಠಾನದ ಮುಖೇನ ಯುವ ಸಮುದಾಯೊಗ್ ನಡತಿನ “ಸೆಬಿ ಸವಾಲ್” ಕಾರ್ಯಕ್ರಮೊಡ್ ಇನಾಮು ಗೆಂದಿನಕ್ಲೆಗ್ ಪಣವು ಪ್ರಶಸ್ತಿ ಬೊಕ್ಕ ಮಾನಾದಿಗೆದ ಓಲೆ ಕೊರ್ದ್ ಮಾನಾದಿಗೆ ಮಲ್ತೆರ್.
ತುಳು-ಕನ್ನಡ ಸಿನಿಮಾ ನಟೆರಾಯಿನ ಸೂರ್ಯೋದಯ ಪೆರಂಪಳ್ಳಿ ಮೆರೆನ ನಿರ್ಮಾಣ ನಿರ್ದೇಶನದ ಅಕಾಡೆಮಿ ಸದಸ್ಯೆ ಕಲಾವತಿ ದಯಾನಂದ ಮೆರೆನ ಗಾಯನದ “ಸೋಬಾನೆ” ತುಳು ಜನಪದ ಪದೊನ್ ಈ ಪೊರ್ತುಡ್ ಲೋಕಾರ್ಪಣೆ ಮಲ್ತೆರ್.
ಮಂಗಳೂರು ಮಹಾನಗರ ಪಾಲಿಕೆಯ ಸದಸ್ಯ ಬೊಕ್ಕ ಪಟ್ಟಣ ಯೋಜನೆ ಬೊಕ್ಕ ಸುಧಾರಣಾ ಸಮಿತಿದ ಅಧ್ಯಕ್ಷ ಲೋಕೇಶ್ ಬೊಳ್ಳಾಜೆ ಕಜ್ಜೊನ್ ಉದಿಪನ ಮಲ್ತುದ್ ಎಡ್ಡೆಪ್ಪು ಬಯಕಿಯೆರ್.
ಹೋಟೆಲ್ ಬೊಕ್ಕ ರೆಸ್ಟೋರೆಂಟ್ ಮಾಲೀಕರ ಸಂಘದ ಉಪಾಧ್ಯಕ್ಷ ಸ್ವರ್ಣಸುಂದರ್, ಪತ್ರಕರ್ತ ಮೋಹನದಾಸ್ ಮರಕಡ, ಸೂರ್ಯೋದಯ ಪೆರಂಪಳ್ಳಿ, ತುಳುವೆರ್ ಕುಡ್ಲದ ಸ್ಥಾಪಕಾಧ್ಯಕ್ಷ ಪ್ರತೀಕ್ ಪೂಜಾರಿ, ಕರಾವಳಿ ಕುರುಬರ ಸಂಘದ ಉಪಾಧ್ಯಕ್ಷ ನವೀನ್ ಗಾಂಧಿನಗರ, ಅಕಾಡೆಮಿದ ಸದಸ್ಯರಾಯಿನ ಕಲಾವತಿ ದಯಾನಂದ್, ನಿಟ್ಟೆ ಶಶಿಧರ ಶೆಟ್ಟಿ, ಮಲ್ಲಿಕಾ ಅಜಿತ್‌ಕುಮಾರ್ ಶೆಟ್ಟಿ, ಚೇತಕ್ ಪೂಜಾರಿ, ರವಿ ಪಿ.ಎಂ. ಮಡಿಕೇರಿ, ನರೇಂದ್ರ ಕೆರೆಕಾಡು ಕಾರ್ಯಕ್ರಮದ ಸದಸ್ಯ ಸಂಚಾಲಕ ನಾಗೇಶ್ ಕುಲಾಲ್, ಕುಳಾಯಿ, ರಿಜಿಸ್ಟ್ರಾರ್ ಕವಿತಾ ಉಪಸ್ಥಿತರಿತ್ತೆರ್.
ಈ ಸಂದರ್ಭೊಡ್ ಬೇತೆ ಬೇತೆ ಕ್ಷೇತ್ರೊಡ್ ಸಾಧನೆ ಮಲ್ದಿನ ಕೇಶವ ಶಕ್ತಿನಗರ ಮೆರೆಗ್ ಚಾವಡಿ ಪ್ರಶಸ್ತಿ ಬೊಕ್ಕ ಮಾಧ್ಯಮ ಕ್ಷೇತ್ರದ ಸಾಧನೆಗಾದ್ ಶಶಿಧರ್ ಪೊಯ್ಯತ್‌ಬೈಲ್, ಯುವ ಸಾಧಕ ಪ್ರಶಸ್ತಿಡ್ ಡಾ.ಅರುಣ್ ಉಳ್ಳಾಲ್, ಬಾಲ ಪ್ರತಿಭಾ ಪ್ರಶಸ್ತಿಡ್ ತೀರ್ಥ ಪೊಳಲಿ ಬೊಕ್ಕ ವಿಶೇಷ ಸಂಘಟನಾ ಪ್ರಶಸ್ತಿಡ್ ತುಳುವೆರೆ ಕೂಟ ಶಕ್ತಿನಗರ ಮೊಕ್ಲೆನ್ ಮಾನಾದಿಗೆ ಮಲ್ತೆರ್.
ಕಾರ್ಯಕ್ರಮದ ಸದಸ್ಯ ಸಂಚಾಲಕ ನಾಗೇಶ್ ಕುಲಾಲ್ ಕುಳಾಯಿ ಸ್ವಾಗತ ಮಲ್ತುದ್ ಪ್ರಾಸ್ತವಿಕ ಪಾತೆರಿಯೆರ್. ಸದಸ್ಯೆರಾಯಿನ ನಿಟ್ಟೆ ಶಶಿಧರ ಶೆಟ್ಟಿ, ಮಲ್ಲಿಕಾ ಅಜಿತ್‌ಕುಮಾರ್ ಶೆಟ್ಟಿ, ಚೇತಕ್ ಪೂಜಾರಿ, ರವಿ ಪಿ.ಎಂ. ಮಡಿಕೇರಿ ಮಾನಾದಿಗೆದ ಓಲೆ ಓದಿಯೆರ್. ನರೇಂದ್ರ ಕೆರೆಕಾಡು ಕಜ್ಜೊದ ನಿರೂಪಣೆ ಮಲ್ತೆರ್.
-೦-
by 