ತುಳುನಾಡುಡ್ ಪಿಲಿನಲಿಕೆ ದುಂಬುಡಿಂಚಿಲಾ ಬಾರೀ ಪುಗಾರ್ತೆನ್ ಪಡೆದುಂಡ್..ಮಾರ್ಣಮಿ ಉಚ್ಚಯ ಬೊಕ್ಕ ಅಟ್ಟೆಮಿ ಉಚ್ಚಯಡ್ “ಪಿಲಿನಲಿಕೆ” ಮಾತಾ ಕಡೇಟುಲಾ ಮಲ್ಪುವೆರ್.ಇಂಚಪ್ಪೊಗ್ ಅಲ್ಪಲ್ಪ ಪಿಲಿನಲಿಕೆದ ಪಂತೊಲು ನಡಪುಂಡ್..
ವಿಶೇಷವಾದ್ ಪಿಲಿನಲಿಕೆ ಆಣುಜೋಕುಲ್ ಪಿಲಿತ್ತ ರಂಗ್ ಪಾಡುದ್ ನಲಿತೊಂದಿತ್ತೆರ್.ಆಂಡ ಇತ್ತೆ ಕಾಲ ಬದಲಾತುಂಡ್.ಇತ್ತೆದ ಪೊಣ್ಣುಲು ಇಲ್ಲದ ಜಾಲುಡ್ದ್ ಚಂದ್ರನ ಜಾಲುಗ್ ಕಾರ್ ದೀಯಿನ ಪೊರ್ತು..ಸಂಘ ಸಂಸ್ಥೆಲೆಡ್ ಪೊಣ್ಣು ಪೊಂಜೊವುನಕುಲು ಎತ್ತರದ ಮಟ್ಟೊಗ್ ಬುಲೆಯೊಂದ್, ರಾಜಕೀಯ,ಧಾರ್ಮಿಕ,ಸಾಂಸ್ಕೃತಿಕ ಕ್ಷೇತ್ರೊಡ್ ತನ್ನನೇ ಆಯಿನ ಶ್ರೇಷ್ಠ ಕೊಡುಗೆನ್ ಕೊರೊಂದುಲ್ಲೆರ್.
ಅಂಚ ಬನ್ನಗ ಪಿಲಿನಲಿಕೆ ಡುಲಾ ಪೊಣ್ಣುಲು ದುಂಬು ಬರೊಂದುಪ್ಪುನವ್ ನಮ ಇನಿತ್ತ ದಿನೊಟ್ ತೂವೊಂದುಲ್ಲ..ಪೊಣ್ಣು ಜೋಕುಲು ಉಮೇದುಡ್ ತನ್ನ ಒಟ್ಟುದಕ್ಲೆನೊಟ್ಟುಗ್ ತಂಡ ಕಟ್ಟೊಂದ್ ಪಿಲಿನಲಿಕೆಡ್ ದುಂಬು ಬರೊಂದುಲ್ಲೆರ್.
ಆ ಸಾಲುಡ್ ಈ ಸರ್ತಿ ಒಡಿಪುಡ್ ಒಂಜಿ ಪೊಸ ತಂಡ ಸೇರೊಂದುಂಡ್.ದರ್ಪಣ ಮಹಿಳಾ ತಂಡ ,ಕೊರಂಗ್ರಪಾಡಿದ ಪುದರುಡ್ ಒಡಿಪುಡ್ ಈ ಸರ್ತಿ ಪೊಸ ಪಿಲಿನಲಿಕೆದ ತಂಡ ತಯಾರಾತುಂಡ್..ಈ ತಂಡೊಡ್ ಸುಮಾರ್ 27. ಜನ ಪೊಣ್ಣುಲು ಇತ್ತುದ್ ,7 ಜನ 5 ವರ್ಷ ಪ್ರಾಯದ ಕಿನ್ನ ಜೋಕುಲು, ಕಾಲೇಜಿದ ಜೋಕುಲು ಬೊಕ್ಕ ಮದಿಮೆ ಆತಿನ ಪೊಂಜೊವುನಕುಲು ಈ ತಂಡೊಡುಲ್ಲೆರ್.ಉಡುಪಿದ ರಮ್ಯಾ ಮೆರೆನ ನೇತ್ರತ್ವದ ಈ ತಂಡ ಕರಿನ ಕೆಲವ್ ದಿನೊಡಿಂಚಿ ಒಡಿಪುಡ್ ಪಿಲಿನಲಿಕಗ್ ಅಟ್ಟಣೆ ಮಲ್ತೊಂದುಂಡ್.ಅಟ್ಟೆಮಿಗ್ ಈ ಸರ್ತಿ ಒಡಿಪುಡ್ ಪೊಣ್ಣು ಪಿಲಿಕ್ಲೆನ ಅಬ್ಬರದ ನಲಿಕೆನ್ ನಮ ತೂವರೆಗುಲ್ಲ..ಮಲ್ಪೆ,ಕಡಿಯಾಳಿ,ಉಡುಪಿದ ಕ್ರಷ್ಣಮಠೊಟ್ ವಿಶೇಷ ಪ್ರದರ್ಶನ ಕೊರ್ರೆಗುಪ್ಪುನ ಈ ತಂಡ..ಅಭಿಮಾನಿಲೆನ ಅಪೇಕ್ಷೆಗ್ ಅಕುಲು ಲೆತ್ತಿನಲ್ಪ ಬತ್ತುದ್ ಪ್ರದರ್ಶನ ಕೊರ್ರೆಗುಲ್ಲೆರ್.
ಸುವೀರಾ ಎಚ್.ಮೆರೆನ ನಿರ್ದೇಶನೊಡ್ ಪಿಲಿನಲಿಕೆ ಕಲ್ತೊಂದುಪ್ಪುನ ಈ ತಂಡೊಡ್ ಉಡುಪಿದ ಜಯ ತಂತ್ರಿ ಬೊಕ್ಕ ರಮಾನಂದ ಮೂರ್ತಿ ಮೊಕ್ಲೆನ ಜೋಕುಲಾಯಿನ ರಮ್ಯಾ ಬೊಕ್ಕ ರಕ್ಷಾ ಉಡುಪಿ ಮೊಕುಲು ಸಾರಥ್ಯೊಡುಲ್ಲೆರ್.
ಸೆಪ್ಟೆಂಬರ್ 6 ತಾರೀಕುದಾನಿ ದರ್ಪಣ ಮಹಿಳಾ ತಂಡದಕುಲು ಕೊರಂಗ್ರಪಾಡಿದ ವಿಷ್ಣುಮೂರ್ತಿ ದೇವಸ್ಥಾನೊಡ್ ಕಾಂಡೆ 8 ಗಂಟೆಗ್ ಲೋಬಾನ ಪಾಡೊಂದುಲ್ಲೆರ್.ಒಡಿಪುದ ಸಜ್ಜನ ಬಂಧುಲೆನ ಆಶೀರ್ವಾದ ಈ ಪೊಣ್ಣುಪಿಲಿಕ್ಲೆಗ್ ಉಪ್ಪಡ್..
by 