ಸರ್ವಶ್ರೇಷ್ಠವಾಯಿನ ನರಮಾನಿ ಬದುಕುಡ್ ಅಪ್ಪೆನ ಜಾಗೆ ಬಾರೀ ವಿಶೇಷವಾಯಿನವ್ವ್.ಅಪ್ಪೆನ ಋಣೊನ್ ತೀರ್ಪಾವರೆಗ್ ಸಾಧ್ಯ ಇಜ್ಜಿ.ಅಂಚಾದ್ ನಮ ಅಪ್ಪೆಗ್ ಶ್ರೇಷ್ಠವಾಯಿನ ಸ್ಥಾನಮಾನ ಕೊರೊಡ್.ಪಂಡುದ್ ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಪ್ರಮುಖೆರಾಯಿನ ಶ್ರೀ ಕಲ್ಲಡ್ಕ ಪ್ರಭಾಕರ್ ಭಟ್ ಪಂಡೆರ್.
ಆರು ದ್ವಾರಕಾಮಾಯಿ ಶ್ರೀ ಸಾಯಿಬಾಬಾ ಮಂದಿರ ಶಂಕರಪುರೊಡ್ ನಡತಿನ ಶ್ರೀ ಸೌಭಾಗ್ಯ( ಧರ್ಮಾರ್ಥವಾದ್ ಮೂಕುದ ಬೊಟ್ಟು ಕಂತಾವುನ ಕಜ್ಜೊ) ಕಾರ್ಯಕ್ರಮೊನ್ ಉದಿಪನ ಮಲ್ತುದ್ ಪಾತೆರಿಯೆರ್.
ನಮ್ಮ ಹಿರಿಯೆರ್ ತನ್ನ ದಿನ ನಿತ್ಯದ ಬದುಕುಡ್ ಸಂಸ್ಕಾರೊಲೆನ್ ಪಾಲಿಸಾವೊಂದಿತ್ತೆರ್.ಇನಿ ವಿಜ್ಞಾನ ದಾದ ಪನ್ಪುಂಡ ಅವ್ವೆನ್ ಹಿರಿಯಕ್ಲು ಪಿರಾಕುಡಿಂಚಿಲಾ ತೆರಿದಿತ್ತೆರ್.ಆಂಡ ಇತ್ತೆದ ದಿನೊಕ್ಲೆಡ್ ಪೊಸ ಸಂಸ್ಕೃತಿಗ್ ಒಗ್ಗುದ್ ಪೋತಿನ ಯುವಜನಾಂಗ ನಮ್ಮ ದುಂಬುದ ಸಂಸ್ಕೃತಿಲೆನ್ ಮೂಲೆಗ್ ಪಾಡುದಿನಾವ್ ಬಾರೀ ಬೇಜಾರುದ ಸಂಗತಿಯಾತುಂಡ್.
ಜಗತ್ತ್ ಉಪ್ಪುನ್ ಪಿದಾಯಿಡತ್ತ್ ಅವ್ವ್ ನಮ್ಮ ಉಲಾಯಿಡೇ ಉಂಡು.ಅವ್ವೆನ್ ತೆರಿದ್ ಬದುಕುಂಡ ನರಮಾನಿ ಬದುಕುಗ್ ಒಂಜಿ ಅರ್ಥ ಉಪ್ಪುಂಡ್.ನಮ್ಮ ಕಣ್ಣುಗ್ ಸುರುಕ್ ತೋಜುನ ಚಿತ್ರ ನಮನ್ ಪೆದ್ದಿನ ಅಪ್ಪೆನವ್.ಆಲ್ ಜೋಕ್ಲೆಡ ಭೇದ ಮಲ್ಪುಜೊಲ್. ಜೋಕ್ಲೆನ ತಪ್ಪುಲೆನ್ ತಿದ್ದುದ್ ಸರಿಯಾಯಿನ ಸಾದಿಗ್ ಕನಪುನ ಬೇಲೆನ್ ಅಪ್ಪೆ ಮಲ್ಪುವೊಲು.ಅಂಚೆನೇ ಜೋಕುಲ್ಲಾ ಅಪ್ಪೆನ್ ಭೇದ ಮಲ್ಪರೆಗ್ ಬಲ್ಲಿ.ಅಂಚೆನೇ ಅಪ್ಪೆಲೆಕ್ಕ ಶ್ರೇಷ್ಠವಾಯಿನ ಜಾಗೆನ್ ಪೆತ್ತೊಗ್ ಕೊರೊಲಿ.ನಮ್ಮ ಊರುದ ಪೆತ್ತದ ಪೇರುಡ್ ಉಪ್ಪುನ ಶಕ್ತಿಲು ಬೇತೆ ಒಯಿಟುಲಾ ಇಜ್ಜಿ.ಪೆತ್ತೊಗ್ ನಮ ಅಪ್ಪೆಲೆಕ್ಕ ಮಾನಾದಿಗೆ ಕೊರೊಡ್ ಪಂಡುದ್ ಪಂಡೆರ್.
ಇನಿ ಯುವಜನಾಂಗೊನ್ ಎಚ್ಚರ ಮಲ್ಪುನ ಕಜ್ಜೊನ್ ಸಾಯಿ ಈಶ್ವರ್ ಗುರೂಜಿ ಮಲ್ತೊಂದುಲ್ಲೆರ್.ಪರತ್ತುನ್ ಕುಡೊರ ಪೊಸತ್ತ್ ಮಲ್ಪುನ ಈ ಕಜ್ಜೊಡ್ ಪೊಣ್ಣು ಜೋಕ್ಲೆಗ್ ಮೂಕುದ ಬೊಟ್ಟು ಕಂತಾವುನ ಬೇಲೆ ನಿಜವಾದುಲಾ ಮೆಚ್ಚೊಡಾಯಿನವ್ವ್.ಪೊಣ್ಣುಜೋಕುಲ್ ಮೂಕುದಬೊಟ್ಟು ಕಂತಾವುನೈಟ್ ಮಸ್ತ್ ರೋಗೊಲೆನ್ ದೂರ ಮಲ್ಪರೆಗಾಪುಂಡ್.ಆನು ಪೊಣ್ಣುಲು ಒಟ್ಟಾದ್ ನೈರ್ಮಲ್ಯವಾಯಿನ ಸಮಾಜ ನಿರ್ಮಾಣ ಮಲ್ಪೊಡ್ ಪಂಡುದ್ ಯುವನಜತೆಗ್ ಮಾರ್ಗದರ್ಶನ ಕೊರಿಯೆರ್.
ವೇದಿಕೆಡ್ ಮಾಜಿ ಸಚಿವೆರಾಯಿನ ಪ್ರಮೋದ್ ಮಧ್ವರಾಜ್ ಪಾತೆರ್ದ್ ಪೊಣ್ಣು ಜೋಕುಲೆಗ್ ಮೂಕುದ ಬೊಟ್ಟು ಕಂತಾವುನ ಒಂಜಿ ವಿಶೇಷವಾಯಿನ ಕಾರ್ಯಕ್ರಮ ಜೋಕ್ಲೆಗ್ ಎಡ್ಡೆ ಸಂಸ್ಕಾರೊಲೆನ್ ಕಲ್ಪಾವುನಂಚಿನ ಬೇಲೆ ಮಲ್ದೆರ್ ಪಂಡುದ್ ಕಜ್ಜೊಗ್ ಎಡ್ಡೆಪ್ಪು ಬಯಕಿಯೆರ್.
ವೇದಿಕೆಡ್ ಗುರೂಜಿ ಸಾಯಿ ಈಶ್ವರ್ ಮಂದಿರದ ಬಗ್ಗೆ ಸುರುತ್ತ ಪಾತೆರ ಪಾತೆರಿಯೆರ್.ಸಾಯಿ ಸಾಂತ್ವನ ಮಂದಿರದ ಟ್ರಸ್ಟಿ ಶ್ರೀ ವಿಶ್ವನಾಥ ಶೆಟ್ಟಿ ವೇದಿಕೆಡ್ ಉಪಸ್ಥಿತರಿತ್ತೆರ್.
“ಶ್ರೀ ಸೌಭಾಗ್ಯ” ಕಜ್ಜೊಡ್ ಸುಮಾರ್ 7ಡ್ದ್ 18 ವರ್ಸೊದ ಸುಮಾರು 121 ಪೊಣ್ಣು ಜೋಕ್ಲೆಗ್ ಧರ್ಮಾರ್ಥವಾದ್ ಬಂಗಾರ್ದ ಮೂಕುದ ಬೊಟ್ಟು ಕಂತಾಯೆರ್.ಬತ್ತಿನ ಮಾತಾ ಜೋಕ್ಲೆಗ್ ಗುರೂಜಿ ಸಾಯಿಈಶ್ವರ್ ಅಕ್ಲೆನ ಉಜ್ವಲ ಭವಿಷ್ಯೊಗ್ ಆಶೀರ್ವಾದ ಮಲ್ತೆರ್.
by 