ಬೇತೆ ಬಾಸೆಲೆಗ್ ಆಡಳಿತಾತ್ಮಕವಾಯಿನ ರಕ್ಷಣೆ ಉಂಡು. ಆಂಡತುಳುಬಾಸೆಗ್ ಆಡಳಿತಾತ್ಮಕವಾಯಿನ ರಕ್ಷಣೆ ಇಜ್ಜಿ.ಅಂಚಾದ್ ತುಳುಬಾಸೆನ್ ತುಳುಸಂಘಟನೆಲು ಮಾತ್ರ ರಕ್ಷಣೆ ಮಲ್ಪೊಡಾಯಿನ ಅಗತ್ಯ ಉಂಡು. ಆ ನಿಟ್ಟುಡ್ ಜೈ ತುಳುನಾಡ್ ಸಂಘಟನೆ ತುಳುಬಾಸೆಗ್ ಕೊರ್ಪಿನ ಕೊಡುಗೆ ಬಾರೀ ಮಲ್ಲ ಪಂಡುದ್ ಸಿರಿತುಳುವಚಾವಡಿ ಒಡಿಪುದ ಗುರ್ಕಾರೆರಾಯಿನ ಡಾ. ಗಣನಾಥ ಎಕ್ಕಾರ್ ಪಂಡೆರ್. ಆರು ಬನ್ನಂಜೆ ನಾರಾಯಣ ಗುರು ಮಂದಿರದ ಸಭಾಭವನೊಡ್ ನಡತಿನ ಜೈ ತುಲುನಾಡ್ ಸಂಘಟನೆದ ಒಡಿಪು ಎಗ್ಗೆನ್ ಉದಿಪನ ಮಲ್ತುದ್ ಪಾತೆರಿಯೆರ್.ರಾಜಕಾರಣಿಲು ವೇದಿಕೆಡ್ ತುಳುತ್ತ ಬಗೆಟ್ ಪಾತೆರುವೆರ್. ಆಂಡ ಏರ್ಲಾ ತುಳುಬಾಸೆದ ಏಳಿಗೆಗಾದ್ ಬಲವಾದ್ ಉಂತುದುಜೆರ್. ಅಂಚಾದ್ ತುಳು ಪಿರ ಒರಿಯೊಂದುಂಡ್. ಆಂಡ ತುಳುಪರ ಸಂಘಟನೆಲು ತುಳುಬಾಸೆಗ್ ಗಟ್ಟಿಯಾಯಿನ ರಕ್ಷಣೆ ಕೊರೊಂದು ಬತ್ತಿನೆಡ್ದಾವರ ತುಳುಬಾಸೆ ಒರಿಯೊಂದುಂಡ್ ಪಂಡುದ್ ಆರು ಈ ಪೊರ್ತುಡ್ ಪಂಡೆರ್.
ಒಡಿಪು ಎಗ್ಗೆದ ಗುರ್ಕಾರ್ದಿಯಾದ್ ಈ ಪೊರ್ತುಡ್ ಶ್ರೀಮತಿ ಸುಶೀಲ ಜಯಕರ್ ಮೆರೆನ್ ಆಯ್ಕೆ ಮಲ್ತೆರ್. ಅಂಚೆನೇ ಬಾಕಿದ ಪದಾಧಿಕಾರಿಲೆನ ಆಯ್ಕೆ ಪ್ರಕ್ರಿಯೆ ವೇದಿಕೆಡ್ ನಡತುಂಡ್.
ಜೈ ತುಲುನಾಡ್ ಸಂಘಟನೆದ ಒಡಿಪು ಎಗ್ಗೆದ ಉದಿಪನದ ಕಜ್ಜೊದ ಮಿತ್ತರ್ಮೆಡ್ ಸಂಘಟನೆದ ಕೇಂದ್ರ ಸಮಿತಿದ ಪ್ರಧಾನ ಕಾರ್ಯಂತೆದಿ ಪೂರ್ಣಿಮಾ ಬಂಟ್ವಾಳ ಮೇರು ಗುರ್ಕಾರ್ಮೆಡಿತ್ತುದ್ ಒಡಿಪು ಎಗ್ಗೆಗ್ ಆಯ್ಕೆ ಆಯಿನ ಪೊಸ ಪದಾಧಿಕಾರಿಲೆಗ್ ಎಡ್ಡೆಪ್ಪು ಬಯಕಿಯೆರ್.ಮಿತ್ತರ್ಮೇಡ್ ಒಡಿಪುದ ವಕೀಲೆರಾಯಿನ ಶ್ರೀ ರಮೇಶ್ ಎಲ್. ದೇವಾಡಿಗ, ತುಳುನಾಡಧ್ವನಿ ತುಳು ಅಂತರ್ಜಾಲ ಪತ್ರಿಕೆದ ಸಂಪಾದಕೆರಾಯಿನ ಶ್ರೀಮತಿ ಯಶೋದ ಕೇಶವ್, ಜೈ ತುಲುನಾಡ್ ಸಂಘಟನೆದ ಕೇಂದ್ರ ಸಮಿತಿದ ಸದಾಶಿವ ಮುದ್ರಾಡಿ, ಕೇಂದ್ರ ಸಮಿತಿದ ಸಂಘಟನಾ ಕಾರ್ಯಂತೆರಾಯಿನ ಸಂತೋಷ್ ಕಟಪಾಡಿ ಉಪಸ್ಥಿತರಿತ್ತೆರ್.ಸಂಘಟನೆದ ಸ್ಥಾಪಕ ಪದುಕೆರಾಯಿನ ಸುಮಂತ್ ಹೆಬ್ರಿ ಸುರುತ ಪಾತೆರ ಪಾತೆರಿಯೆರ್. ಒಡಿಪು ಎಗ್ಗೆದ ಕಾರ್ಯಂತೆರ್ಯಾನ ಸಾಗರ್ ಭಂಡಾರಿ ಬಿನ್ನೆರೆನ್ ಎದ್ಕೊಂಡೆರ್. ಸ್ಥಾಪಕ ಸಮಿತಿದ ಪದುಕೆರ್ ಆಯಿನ ಶರತ್ ಕೊಡವೂರು ಸೊಲ್ಮೆ ಸಂದಾಯ್ತ ಮಲ್ತೆರ್. ಕೇಂದ್ರ ಸಮಿತಿದ ಒತ್ತು ಕಾರ್ಯಂತೆರ್ ಪ್ರಜ್ಞಾ ಶ್ರಿ ಎಮ್. ಕೊಡವೂರು ಲೇಸ್ ಸುಧಾರಿಕೆ ಮಲ್ತೆರ್.
ಕಜ್ಜೊಡ್ ತುಳು ಲಿಪಿ ಪರೀಕ್ಷೆ ಬರೆದ್ ಪಾಸಾಯಿನಕ್ಲೆಗ್ ಅಜೋಲೆನ್ ಪಟ್ಟುದ್ ಮಾನಾದಿಗೆ ಮಲ್ತೆರ್.
by 