ಕಂಬುಲದ ಎರ್ಲೆನೊಟ್ಟುಗ್ ತುಳು ಬಾಸೆ ಕಲ್ತಿನ ಬಾರ್ಕೂರು ಶಾಂತಾರಾಮ್ ಶೆಟ್ಟಿ..

ಜೈ ತುಳುನಾಡ್ (ರಿ) ಸಂಘಟನೆಡ್ದ್ ತುಳುನಾಡ್ದ ಐತಿಹಾಸಿಕ ರಾಜಧಾನಿ ಬಾರ್ಕೂರುದ ಶ್ರೀ ಪಂಚಲಿಂಗೇಶ್ವರ ದೇವಸ್ಥಾನಡ್ ತುಲು ಲಿಪಿ ಪುದರ್ ಪಲವೆ ಪಾಡುನ ಕಜ್ಜೊ ಬೊಕ್ಕ “ಅಲ್ಲಿಗೆ” ತುಲು ಲಿಪಿ ಫಾಂಟ್ ಬುಡುಗಡೆ ಕಜ್ಜೊ ದೇವಲ್ಯದ ಅಂಗಣೊಡ್ ನಡತುಂಡ್.
ಕಜ್ಜೊನ್ ಉದಿಪನ ಮಲ್ತಿನ ಕಂಬುಲ ಕ್ಷೇತ್ರೊಡ್ ಪುಗಾರ್ತೆನ್ ಪಡೆಯಿನ ಬಾರ್ಕೂರು ಗ್ರಾಮ ಪಂಚಾಯತ್ ಅಧ್ಯಕ್ಷೆರಾಯಿನ ಶ್ರೀ ಬಿ.ಶಾಂತಾರಾಮ್ ಶೆಟ್ಟಿ ಪಾತೆರ್ದ್ ಎಂಕ್ ತುಳುಬಾಸೆ ಪಾತೆರ್ರೆಗ್ ಬರೊಂದಿತ್ತುಜಿ.ಆಂಡ ಕಂಬುಲದ ಎರ್ಲೆನೊಟ್ಟುಗ್ ಪೋಯಿನಲ್ಪ ತುಲುಟೇ ಪಾತೆರ್ದ್ ಯಾನ್ ತುಲು ಕಲ್ತೆ ಪನ್ಪಿನ ವಿಚಾರೊನ್ ಈ ಪೊರ್ತುಡ್ ತೆರಿಪಾಯೆರ್.ಬಾರ್ಕೂರು ತುಲುನಾಡ್ದ ರಾಜಧಾನಿ ಪನ್ಪಿನ ಒಂಜಿ ಪೆರ್ಮೆದ ಸಂಗತಿಯಾಂಡಲಾ ಮುಲ್ಪದ ದೇವಸ್ಥಾನೊಲೆಗ್ 800. ವರ್ಷ ಇತಿಹಾಸ ಉಂಡು.ಇತ್ತೆ ದೇವಸ್ಥಾನೊಲ್ ಅಳಿಯೊಂದುಪ್ಪುನ ಪರಿಸ್ಥಿತಿಡ್ ಉಂಡು.ಸರಕಾರ ನೆತ್ತ ಬಗ್ಗೆ ದಾಲ ಮಲ್ತುಜೆರ್ ಪನ್ಪಿನವ್ ಬಾರೀ ಬೇಜಾರುದ ಸಂಗತಿಯಾತುಂಡ್‌.ದುಂಬು ಶಾಲೆಜೋಕ್ಲೆನ್ ಇಡೆಗ್ ಟೂರ್ ಗ್ ಲೆಸೊಂದ್ ಬರೊಂದಿತ್ತೆರ್.ಆಂಡ ಮುಲ್ಪದ ಶಿಲಾಶಾಸನೊಲ್ ಪೂರಾ ಹಾಳಾದ್ ಪೋತುಂಡ್.ಇತ್ತೆ ಬರ್ಪಿನಕುಲು ಕಮ್ಮಿ ಆತೆರ್.ತುಳುವೆರ್ ಮಾತೆರ್ಲಾ ಒಟ್ಟಾಯೆರೆಡ ಬಾರ್ಕೂರುದ ಅಭಿವೃದ್ಧಿ ಮಲ್ಪೊಲಿ ಪಂಡೆರ್.
ಕಜ್ಜೊಡ್ ಮಲ್ಲ ಬಿನ್ನೆರಾದಿತ್ತಿನ ಟೈಮ್ಸ್ ಆಫ್ ಕುಡ್ಲ ತುಲು ಪತ್ರಿಕೆದ ಮುಖ್ಯಸ್ಥೆರಾಯಿನ ಶಶಿರಾಜ್ ಬಂಡಿಮಾರ್ ಪಾತೆರ್ದ್ ತುಲುನಾಡ್ದ ರಾಜಧಾನಿ ಬಾರ್ಕೂರುದ ಮಾತಾ ದೇವಸ್ಥಾನೊಡ್ ತುಲು ಲಿಪಿ ಪುದರ್ ಪಲವೆ ಪಾಡೊಡ್.ಬಾರ್ಕೂರುಡ್ ತುಲುತ್ತ ಆಂದೋಲನ ಆವೊಡ್ ಪಂಡೆರ್.
ಕುಡೊರಿ ಬಿನ್ನೆರಾದಿತ್ತಿನ ಕರ್ನಾಟಕ ತುಲುಸಾಹಿತ್ಯ ಅಕಾಡೆಮಿದ ಮಾಜಿ ಪದುಕೆರ್,ಅಂಚೆನೇ ಆಳುಪ ರಾಜ ವಂಶಸ್ಥೆರಾಯಿನ ಡಾ.ಆಕಾಶ್ ರಾಜ್ ಜೈನ್ ಪಾತೆರ್ದ್ ಕರ್ನಾಟಕದ ಸುರುತ್ತ ಶಾಸನೊಡ್ ಉಪ್ಪುನನೇ ತುಳುತ್ತ ಶಾಸನ
ಶಿಲಾಶಾಸನೊಡ್ ಸುರಕ್ ಉಲ್ಲೇಖ ತಿಕ್ಕುನ್ ತುಳುಟ್.1 ಸಾವಿರ ಮಿತ್ತುದ ಗ್ರಂಥೊಲ್ ತಿಕ್ಕುದುಂಡ್.ಬ್ರಿಟಿಷೆರೆನ ದಬ್ಬಾಳಿಕೆಡ್ ಅವ್ವೇತೊ ಸಂಸ್ಕ್ರತಿ ಹಾಳಾತುಂಡ್.ಅಂಚ ತುಳುಲಿಪಿಲಾ ಅಡಿಕ್ ಪೋದ್ ಬೂರ್ದ್ ಪೋಂಡ್.
ಕ.ರಾಜ್ಯೊಡ್ 142 ತಮಿಳು ಶಾಲೆಲು ಉಂಡು,162 ತೆಲುಗು ಶಾಲೆ ಉಂಡು.1000 ಉರ್ದು ಶಾಲೆ ಉಂಡು ಆಂಡ ನಮ್ಮ ತುಳುಶಾಲೆ ಒಂಜಿಲಾ ಇಜ್ಜಿ.ಬೆಂಗಳೂರು ಬುಡುಂಡ ಎಚ್ಚ ಟ್ಯಾಕ್ಸ್ ಕೊರ್ಪಿನ ನಾಡು ತುಳುನಾಡು.
ಕುಂದಗನ್ನಡ ವಿಶಿಷ್ಟವಾಯಿನ ಬಾಸೆ.ವಾ ಕಾರಣೊಗುಲಾ ತುಳುನ್ ಬುಡ್ದ್ ಪೋರೆಗಿಜ್ಜಿ.ತುಳು ಬಾ಼ಷಾ ಸಂಸ್ಕ್ರತಿ ಬಾರೀ ಪೊರ್ಲುಡ್ ಬುಲೆಯೊಂದುಂಡ್ ಪಂಡೆರ್.
ಪಂಚಲಿಂಗೇಶ್ವರ ದೇವಲ್ಯದ ಮುಕ್ತೇಸರೆರಾಯಿನ ಮಂಜುನಾಥ. ರಾವ್ ಪಾತೆರ್ದ್ .ಬಾರ್ಕೂರು ತುಲುನಾಡುದ ರಾಜಧಾನಿಯಾದಿತ್ತುಂಡ್.ಆಂಡ ಇತ್ತೆ ಬತ್ತುದ್ ತೂಂಡ ದಾಲ; ಇಜ್ಜಿ.ಮುಲ್ಪ ಇತ್ತಿನ ಕೋಟೆ ಪೂರಾ ಹಾಳಾದ್ ಪೋತುಂಡ್.ತುಲುನಾಡುಡ್ ತುಲುಬಾಸೆ ಸಂಸ್ಕ್ರತಿನ್ ಬುಲೆಪಾವುನ ಬೇಲೆನ್ ಮಲ್ಪೊಡ್.ಬಾರ್ಕೂರುದಕುಲು ಮಾತೆರ್ಲಾ ಕೈ ಜೋಡಿಸಾವೊಡ್..ಕುಡೊರ ಬಾರ್ಕೂರು ಸುರುತ್ತಲೆಕ್ಕನೇ ಆವಡ್.ತುಲುಬಾಸೆಗ್ ಮಾನ್ಯತೆ ಆಯಿನಾಥ್ ಬೇಗ ತಿಕ್ಕಡ್ ಪಂಡೆರ್‌.
ಜೈ ತುಲುನಾಡ್ ಸಂಘಟನೆದ ಒತ್ತು ಗುರ್ಕಾರೆರಾಯಿನ ವಿಶು ಶ್ರೀಕೆರ ಕಜ್ಜೊದ ಗುರ್ಕಾರ್ಮೆಡಿತ್ತೆರ್.ರಕ್ಷಿತ್ ರಾಜ್ ಬತ್ತಿ ಬಿನ್ನೆರೆನ್ ಮೋಕೆಡ್ ಎದ್ಕೊನೊಂದ್,ಶರತ್ ಕೊಡವೂರು ಸೊಲ್ಮೆ ಸಂದಾಯ್ತ ಮಲ್ತೆರ್.ಸುಷ್ಮಾ ದೇವಾಡಿಗ ಕಜ್ಜೊದ ಮದಿಪು ಕೊರಿಯೆರ್.