ಜೋಡು ಜೀಟಿಗೆ

ಸಾಯಿಶಕ್ತಿ ಕಲಾಬಳಗದ ರಡ್ಡನೇ ಕಲಾಪುರ್ಪ : ಜೋಡು ಜೀಟಿಗೆ ಪೋಸ್ಟರ್ ಬುಡುಗಡೆ

ಚಿಲಿಂಬಿ : ಜುಲೈ 22: ತುಳು ರಂಗಭೂಮಿಗ್ ತೆಲಿಕೆನೆ ಪ್ರಧಾನ, ತೆಲಿಕೆ ಇಜ್ಜಿ ಪಂದ್ ಆಂಡ ನಾಟಕೊಗು ಪ್ರೇಕ್ಷಕೆರೆನ ಕೊರತೆ ಪನ್ಪಿನ ಅಪವಾದ ಇತ್ತ್ oಡ್ . ಆಂಡ ಕರಿನ ಮೂಜಿ ವರ್ಸೊರ್ದು ಈ ಚಿತ್ರಣನೇ ಬದಲ್ ಆತುಂಡು , ಎಡ್ಡೆ ಪೌರಾಣಿಕ, ಜಾನಪದ ನಾಟಕಗ್ ಬೇಡಿಕೆ ಜಾಸ್ತಿ ಆತ್oಡ್ ಪಂದ್ ರಂಗ ನಿರ್ದೇಶಕ ವಿಜಯಕುಮಾರ್ ಕೊಡಿಯಾಲ್‌ಬೈಲ್ ಪಂಡೆರ್.

ಶ್ರೀ ಶಿರಿಡಿ ಸಾಯಿಬಾಬಾ ಮಂದಿರ ಆಶ್ರಿತ – ಸಾಯಿಶಕ್ತಿ ಕಲಾಬಳಗ ಉರ್ವ ಚಿಲಿಂಬಿ ವತಿರ್ದ್ ಸಾಯಿಬಾಬಾ ಮಂದಿರಡ್ ಪೊಸ ನಾಟಕ ‘ಜೋಡು ಜೀಟಿಗೆ’ ಪೋಸ್ಟರ್ ಬುಡುಗಡೆ ಲೇಸ್ ಡ್ ಆರ್ ಪಾತೆರಿಯೆರ್.

ರಂಗನಿರ್ದೇಶಕಿ, ಸಾಯಿ ಮಂದಿರದ ಟ್ರಸ್ಟಿ ಲಾವಣ್ಯ ವಿಶ್ವಾಸ್‌ ದಾಸ್‌ ಪಾತೆರ್ದ್ , ಸಾಯಿ ಶಕ್ತಿ ಕಲಾ ಬಳಗದ ‘ಜೋಡು ಜೀಟಿಗೆ’ ನಾಟಕ ಕಲ್ಲುರ್ಟಿ-ಕಲ್ಕುಡ ದೈವದ ಕಥೆಯಾತುಂಡು , ವಿಭಿನ್ನವಾಗಿ ಮೂಡ್ದು ಬರಿಯೆರೆ ಉಂಡು .ಶೀರ್ಷಿಕೆ ಬುಡುಗಡೆರ್ದ್ ದುಂಬೇ 20 ನಾಟಕ ಬುಕ್ಕಿಂಗ್ ಆತುಂಡು . ಈ ನಾಟಕಡ್ಲ ಪೊಸ ಕಲಾವಿದೆರೆಗ್ ಎಚ್ಚದ ಆದ್ಯತೆ ಕೊರ್ತ ಪಂದ್ ಪಂಡೆರ್ .

ಸಾಯಿಬಾಬಾ ಮಂದಿರದ ಆಡಳಿತ ಮೊಕ್ತಸರೆರಾಯಿನ ವಿಶ್ವಾಸ್ ಕುಮಾರ್‌ದಾಸ್‌ ಗುರ್ಕಾರ್ಮೆ ವಹಿಸ್ ದಿತ್ತೆರ್ . ವಿಧಾನ ಪರಿಷತ್ ಸದಸ್ಯ ಐವನ್ ಡಿಸೋಜ, ಪಣೋಲಿಬೈಲ್ ಕ್ಷೇತ್ರದ ಕಾರ್ಯ ನಿರ್ವಹಣಾಧಿಕಾರಿ ದಿವಾಕರ್ ಮುಗುಳ್ಯ, ಡಾ. ಕವಿತಾ ಐವನ್ ಡಿಸೋಜ, ಸಾಹಿತಿ ಕೀರ್ತನ್ ಭಂಡಾರಿ, ದೀಪಕ್ ಪಿಲಾ‌ರ್, ಕಾರ್ಪೊರೇಟ‌ರ್ ಕೇಶವ ಮರೊಳಿ , ಶೈಲೇಶ್ ಮಲ್ಯ, ದೇವಿ ಪ್ರಸಾದ್ ಅಜಿಲ ಪಾಲ್ ಪಡೆದಿತ್ತೆರ್ . ಕೂಟದ ಸದಸ್ಯೆ ಶ್ರೀನಿಧಿ ಶೆಟ್ಟಿ ಬತ್ತಿ ಬಿನ್ನೆರೆನ್ ಎದುಕೊಂಡೆರ್. ಡಾ.ಪ್ರಿಯಾ ಹರೀಶ್ ಲೇಸ್ ನಡಪಾದ್ ಕೊರಿಯೆರ್.