ಕರ್ಲ್ ದರ್ಕಟ್..

ಕರ್ಲ್‌ದರ್ಕಟ್
~~

ತಾಂಗ್ ತರ್ಕ್‌ದ್ ಮಲ್ಲೆ ಮಂತಲ್
ಅಪ್ಪೆ ಪನ್ಪಿನ ದೇವೆರ್
ಅಂಗ್ ದಾಂತೆನೆ ಪುಟ್ಟು ಬಲತೆರ್
ತಿಗಲೆದಮೃತೊ ಪರಿಯೆರ್

ಬಂಜಿ ಕಟ್ಟ್‌ದ್ ಬರವು ಕಲ್ಪದ್
ಬೇಲೆ ನಾಡ್‌ದ್ ಕೊರಿಯೆರ್
ಒಂಜಿ ದಿನೊಲ ಅಪ್ಪೆನೊಟ್ಟುಗು
ಕೂಡ್ದ್ ತೆಲಿಕೆಡ್ ಕರಿಜೆರ್

ಪೊರ್ತಿಂಗೊಲು ಬೇನೆ ತಿಂದಲ್
ಬಾಲೆ ಮೋನೆದ ಆಸೆಡ್
ರೆಂಕೆ ಬುಲೆದ್ ರಾದ್ ಪೋಂಡಲ
ಲೆತ್ತ್ ಬುಲಿಪುಡೇ.. ಕರಿಯಲ್

ಲತ್ತ್ ಪ್ರಾಯೊಡು ತೆಲಿಕೆ ನಲಿಕೆನ್
ಕಣ್ಣ್ ದಿಂಜ ತೂಯಲ್
ಕಷ್ಟೊ ಸುಕೊಕು ಬೆರಿ ತಾಂಗುನ
ಜೋಕ್ಲು ಎನ್ನವು, ಎನ್ಯಲ್

ಅಪ್ಪೆನ ಮೋಕೆನ್ ಮದತಿನ ಬಾಲೆಲು
ಕರ್ಲದರ್ಕಟ್ ಕಡಿತೆರ್
ಸುಕೊ ಸಂಸಾರೊ ಅಂಗಲಾಪುನು
ಮಣ್ಣ್ ಮುಕ್ಕದ್ ಬುಡಿಯೆರ್

✍️ ನಿರ್ಮಲಾ ಶೇಷಪ್ಪ ಖಂಡಿಗೆ
ತುಲುವೆರೆ ಕಲ ಕುಡ್ಲ