ಜೋಕ್ಲೆಗ್ ಬರವುದೊಟ್ಟುಗ್ ಕಲೆ,ಸಂಸ್ಕ್ರತಿ ಕಲ್ಪಾದ್ ಕೊರೊಡ್: ಪೂರ್ಣಿಮಾ..

ಶಾಲೆ ಜೋಕ್ಲೆಗ್ ಶಿಕ್ಷಣದೊಟ್ಟುಗ್ ಕಲೆ,ಸಂಸ್ಕ್ರತಿ ಕಲ್ಪಾದ್ ಕೊರೊಡ್ ಪಂಡುದ್ ಕನ್ನಡ ಬೊಕ್ಕ ಸಂಸ್ಕ್ರತಿ ಇಲಾಖೆ ಉಡುಪಿದ ಸಹಾಯಕ ನಿರ್ದೇಶಕೆರಾಯಿನ ಶ್ರೀಮತಿ ಪೂರ್ಣಿಮಾ ಪಂಡೆರ್.ಆರು ಕರಿನ ಜುಲೈ 16 ತಾರೀಕುದಾನಿ ಉಡುಪಿದ ಜಗನ್ನಾಥ ಸಭಾಭವನೊಡ್ ನಡತಿನ “ಮದರಂಗಿದರಂಗ್” ಉದಿಪನದ ಲೇಸ್ ಡ್ ಮಲ್ಲ ಬಿನ್ನೆರಾದ್ ಪಾತೆರಿಯೆರ್.ಜೋಕ್ಲೆಗ್ ಶಾಲೆಡ್ ಬರವುದೊಟ್ಟುಗ್ ನಮ್ಮ ನಾಡುದ ಆಚಾರ ವಿಚಾರ ಕಲೆ ಸಂಸ್ಕೃತಿ ದ ಬಗ್ಗೆ ಗೇನ ಪುಟ್ಟಾವುನ ಬೇಲೆ ಮಲ್ತುಂಡ ದುಂಬುದ ಪೀಳಿಗೆಗ್ ನಮ್ಮ ಸಂಸ್ಕ್ರತಿದ ಬಿಲೆ ತೆರಯುಂಡ್.ಈ ನಿಟ್ಟುಡ್ ಉಡುಪಿ ತುಳುಕೂಟ ಮಲ್ತೊಂದುಪ್ಪುನ ಬೇಲೆ ಶ್ಲಾಘನೀಯ ಪಂಡೆರ್.ಕಜ್ಜೊನ್ ಉಡುಪಿ ಬಂಟರ ಮಹಿಳಾ ವಿಭಾಗದ ಅಧ್ಯಕ್ಷೆರಾಯಿನ ಶ್ವೇತಾ ಜಯಕರ ಶೆಟ್ಟಿ ಇಂದ್ರಾಳಿ ಮೇರ್ ಮದರಂಗಿ ಕಡೆದ್ ಕೈಕ್ ದೀದ್ ಉದಿಪನ ಮಲ್ತೆರ್.ವೇದಿಕೆಡ್ ಉದ್ಯಾವರ ಎಮ್ಇಟಿ ಆಂಗ್ಲಮಾಧ್ಯಮ ಶಾಲೆದ ಆಡಳಿತಾಧಿಕಾರಿ ಮಲ್ಲ ಬಿನ್ನೆರಾದಿತ್ತುದ್ ಕಜ್ಜೊಗ್ ಎಡ್ಡೆಪ್ಪು ಬಯಕಿಯೆರ್.ತುಳುಕೂಟದ ಗುರ್ಕಾರೆರಾಯಿನ ಬಿ.ಜಯಕರ ಶೆಟ್ಟಿ ಇಂದ್ರಾಳಿ ಗುರ್ಕಾರ್ಮೆಡಿತ್ತುದ್ ಕೂಟದ ಬಗ್ಗೆ ಪ್ರಾಸ್ತಾವಿಕ ಪಾತೆರಿಯೆರ್.ಮದರಂಗಿದರಂಗ್ ಲೇಸ್ ದ ಸಂಚಾಲಕಿ ಯಶೋದ ಕೇಶವ್ ಕಜ್ಜೊದ ಬಗ್ಗೆ ಮಾಯಿತಿ ಕೊರಿಯೆರ್.ಕಾರ್ಯಂತೆರಾಯಿನ ಗಂಗಾಧರ ಕಿದಿಯೂರು ಸೊಲ್ಮೆ ಸಂದಾಯ್ತ ಮಲ್ತೆರ್.ಕೂಟದ ಪದುಕೆರಾಯಿನ ವಿದ್ಯಾ ಸರಸ್ವತಿ ಕಜ್ಜೊದ ಮದಿಪು ಕೊರಿಯೆರ್.ಪಣವುದ ಪಾಲವೆರಾಯಿನ ಚೈತನ್ಯ ಎಮ್.ಜಿ.ವೇದಿಕೆಡ್ ಉಪಸ್ತಿತರಿತ್ತೆರ್.ಜೋಕ್ಲೆಗ್ ಪೀಂಪಿರಿ ಊದುನ್,ಪೆಲತರಿತ್ತ ಚೋಲಿ ದೆಪ್ಪುನ್,ಮದರಂಗಿದ ಪಂಥ,ಒಲಿಟು ಗೊಬ್ಬುನ ವಸ್ತು ತಯಾರ್ ಮಲ್ಪುನ್,ಕೇಶಾಲಂಕಾರ,ಜಲ್ಲಿಬುಡ್ಪಾವುನ್,ಪೂಜೋಡಣೆ,ಬತ್ತಿಕಟ್ಟುನ್,ಮುಂಡಾಸ್ ಕಟ್ಟುನ, ಸೆಭಿ ಸವಾಲ್ ಇಂಚ ಬೇತೆ ಬೇತೆ ಪಂತೊಲು ನಡತುಂಡ್.ಮುಗಿತಲದ ಲೇಸ್ ಡ್ ಉದ್ಯಮಿ ವಿಶ್ವನಾಥ ಶೆಣೈ ಬೊಕ್ಕ ಉಡುಪಿ ಬಿಜೆಪಿ ಮಹಿಳಾ ಮೋರ್ಚಾದ ಜಿಲ್ಲಾಧ್ಯಕ್ಷೆರಾಯಿನ ವೀಣಾ ಎಸ್.ಶೆಟ್ಟಿ ಮಲ್ಲ ಬಿನ್ನೆರಾದಿತ್ತುದ್ ಪಂತೊಡ್ ಗೆಂದಿನಕ್ಲೆಗ್ ಇನಮು ಪಟ್ಟಿಯೆರ್.ಮುಗಿತಲದ ಲೇಸ್ ಡ್ ತಾರಾ ಉಮೇಶ್ ಆಚಾರ್ಯ ಮದಿಪು ಕೊರಿಯೆರ್.