ಮಂಜಲ್ ಸುಕುರುಂಡೆ.

ತುಲು ಕತೆ

“ಮಂಜಲ್ ಸುಕುರುಂಡೆ

ಐತಾರ ರಜೆತ ದಿನ,ಇನಿ ಓಡೆ ಪೋಯೆರೆಲ ಇಜ್ಜಿ ಮನಿಪಂದೆ ಮದ್ಯಾಹ್ನ ಮುಟ್ಟ ಜೆಪ್ಪೊಡುಂದ್ ನನಲ ಪಜೆಟೆ ಪೆರ್ಮರಿದಲೆಕ ಬೂರೊಂದಿತ್ತಿನಾಯಗ್ “ಇನಿ ಮೂಜಿ ಮದಿಮೆ ಉಂಡು ಒಂಜಿ ಮದಿಮೆಗ್ ಪೋದು ಬಲಂದ್” ಅಟಿಲ್‌ದ ಕೋಣೆರ್ದ್ ಅಮ್ಮ ಅರಬಾಯಿ ದೀಪಿನ ಕೇನ್ಂಡ್, ನನ ಯಾನ್ ಜೆತ್ತಿಲೆಕನೆಂದ್ ಲಕ್ಕ್‌ದ್ ಚಾ ಪರ್ದ್ ಮದಿಮೆಗ್ ಪಿದಡಿಯೆ.
ಮದಿಮೆದ ಹಾಲ್‌ಗ್ ಪೊಗ್ಗುನಗ ಧಾರೆ ಅವೋಂದಿತ್ತ್ಂಡ್, ಧಾರೆ ಅಯಿಬೊಕ್ಕ ಬೇಗ ಮದಿಮಯೆ ಮದಿಮಲೆಗ್ ವಿಶ್ ಮಲ್ತ್ ಮದ್ಯಾಹ್ನದ ಬೊಕ್ಕಂಡಲ ಒಂತೆ ಜೆಪ್ಪೊಡುಂದು ಅಂದಾಜಿ ಪಾಡ್‌ದ್ ಎದುರುದ ಲೈನ್‌ಡ್ ಕುಲ್ಲಿಯೆ…..!
ಒಂತೆ ಪೊರ್ತಾನಗ ಒಂಜಿ ಮಂಜಲ್ ಚೂಡಿದಾರದ ಪೊಣ್ಣು ಎನ್ನ ಎದುರು ಸುಯಿಂಕ ಪಾಸಯಿಲೆಕಾಂಡ್, ಯಾನ್ ಆತ್ ಗಮನ ಕೊರಂದಿನ ತೂದು ಕುಡ ಅವ್ವೆ ಪೊಣ್ಣು ಎಂಕ್ ಒಂತೆ ತಾಂಟೊಂದೆ ಸುಯಿಂಕ ಇಂಚಿ ಪಾಸಯಲ್, ದಾದನ ಪ್ಯಾರ್ ಎಂಡ್ ಲವ್ಲಿ ಕನವಂದಿನ ಅಮಸರಡ್ ಉಪ್ಪೊಡುಂದು ಎನ್ನೊಂದು ಕುಡೊರ ಪುನರ್ಪುಳಿತ ಶರ್ಬತ್ ಪರ್ದ್ ಬರ್ಕಂದ್ ಹಾಲ್‌ದ ಪಿದಯಿ ಬನ್ನಗ ಆ ಮಂಜಲ್ ಚೂಡಿದಾರದ ಪೊಣ್ಣು ಎನ್ನ ಪಿರವುಡೆ ಉಲ್ಲಲ್,ಅಂಚಿ ಇಂಚಿ ಒಂಚಿ ಪೋಂಡಲ ಎನ್ನ ಬೆರಿಟೆ ಉಲ್ಲಲ್ ಕಣ್ಣ್ ಪಿಲಿಪಿಲಿ ಮಲ್ತ್‌ದ್ ಕಿಸಿಕಿಸಿ ತೆಲ್ತೊಂದುಲ್ಲಲ್, ಎದುರು ಬತ್ತುದೊರ ತೂಪಲ್ ಪಿರ ಬತ್ತುದೊರ ತೂಪಲ್, ಕುಡ ಮೊಬೈಲ್‌ಡ್ ಎಂಕ್ ಗೊತ್ತಾವಂದಿಲೆಕ ಪೋಟೋ ದೆತ್ತೊಂದುಲ್ಲಲ್, ಆ ಪೋಟೊನು ಕೊನೊದು ಒಂಜಿ ಅಜ್ಜಿಡ ತೋಜಪಾದ್ ಕೆಬಿಟ್ ದಾದನ ಪನೊಂದುಲ್ಲಲ್, ದೊಡ್ಡಲ ಎನನ್ ತೂದು ತೆಲ್ತೊಂದುಲ್ಲೆರ್, ಯಾನ್ ಮುಂಗಾರು ಮಳೆತ ಗಣೇಶಲೆಕ ಮಂಡೆಗ್ ಕೈ ಪಾಡೊಂದು ಪರ ಪರಂದ್ ಕಿರ್ಂಬೊಂದುಲ್ಲೆ…..!
ಎಲಕಥೆನೆ ಒವ್ವೆ ಫಂಕ್ಷನ್‌ಗ್ ಪೋಂಡಲ ನಮನೆ ಓಂಗುನು ಆಂಡ ಮುಲ್ಪ ಅಲಕ್ಕ ಉಲ್ಟ ,ಪೊಣ್ಣು ಲಾಗ ದೆತ್ತೊಂದುಲ್ಲಲ್,ಯಾನ್ ಎನ್ನಿಯೆ ಈ ಸರ್ತಿ ಮಂಜಲ್ ಸುಕುರುಂಡೆ ಬಾಯಿಗ್ ಬೂರುಂಡುಂದ್, ಮೊಲ್ನ ಲಾಗ ದೆಪ್ಪಟಿಗೆಡ್ ಎನ್ನ ಪಿರವುದ ಕಿಸೆಟ್ ಇತ್ತಿನ ಪತ್ತ್ ರೂಪಾಯಿದ ಪೌಡರ್ ಡಬ್ಬೆ ಖಾಲಿ.
ಪೊಣ್ಣಗ್ ಎನ್ನ ಮಿತ್ತ್ ಮನಸಾದ್ ಎನ್ನ ಪೋಟೋ ತೋಜಪಾದ್ ಹಿರಿಯಕ್ಲೆನ ಒಪ್ಪಿಗೆ ದೆತೊನೆರೆ ದೊಡ್ಡಡ ಪನೊಂದು, ದೊಡ್ಡನ ಕೆಬಿಟ್ ಮದಿಮೆ ಆಂಡ ಅರೆನೆ ಅಪಿನಿಂದ್ ಪನೊಂದುಪ್ಪೊಡುಂದ್ ಎನ್ನ ಏಳನೇ ಇಂದ್ರಿಯ ಪನೊಂದಿತ್ತ್ಂಡ್….!
ಮದಿಮೆ ಆಪಿನ ಜೋಡಿಲೆಗ್ ವಿಶ್ ಮಲ್ಪೆರೆ ಸ್ಟೇಜಿದ ಮಿತ್ತ್ ಪೋನಗಲ ದೊಡ್ಡನ ಒಟ್ಟಿಗೆ ಮಂಜಲ್ ಚೂಡಿದಾರದ ಪೊಣ್ಣು ಎನ್ನ ಪಿರವುಡೆ ಉಲ್ಲಲ್, ಎಂಕ್ ನಾಚಿಕೆಡ್ ಲೋಕ ಇಜ್ಜಿ, ಎಂತೂ ಎಂಕ್ ಇಲ್ಲದಕುಲು ಪೊಣ್ಣು ತೂವೊಂದುಲ್ಲೆರ್ ಒಂತೆ ಸಪೂರಂಡಲ ಮಲ್ಲೆಜ್ಜಿ ಪಾಲಿಗೆ ಬಂದದ್ದು ಪಾಲೆದ ಬಟ್ಟಲ್ಂದ್ ಎನ್ನ ಮನಸುದುಲಯಿ ಸೈ ತಾಗ್ಂಡ್ಂದ್ ಪಂಡೆ…
ಪೂರ ಆದ್ ವನಸ್ ಮಲ್ತ್‌ದ್ ಐಸ್ ಕ್ರೀಮ್ ತಿಂದ್‌ದ್ ರಡ್ಡ್ ಸ್ವೀಟ್ ಪಾನ್ ಬೀಡನ್ ಒರನೆ ಬಾಯಿಗ್ ಪಾಡ್ನಗ ದೊಡ್ಡ ಎನ್ನ ಎದುರುಡೆ ಉಂತುದೆರ್, ದೊಡ್ಡನ ಪಿರವುಡು ತರೆ ತಿರ್ತ್ ಪಾಡೊಂದು ಮಂಜಲ್ ಚೂಡಿದಾರದ ಪೊಣ್ಣು ಉಲ್ಲಲ್, ಯಾನ್ ಎನ್ನಿಯೆ ಫಿಕ್ಸ್ ಫಿಕ್ಸ್ ದೊಡ್ಡ ಪೊದು ಸಂಧಾನ ಇತ್ತೆನೆ ಮಲ್ಪುವೆರ್ ನನ ದಾದ ಇತ್ತ್ಂಡಲ ಮದಿಮೆದ ಮಂಟಪಡ್ ಟೊಪ್ಪಿ ಪಾಡೊಂದು ಕುಲ್ಲುನೇ.. ದೊಡ್ಡ ಎನ್ನ ಎದುರುಡು ಚೇರ್ ದೀದ್ ಕುಲ್ಲುದು ಪಂಡೆರ್ “ಎನ್ನ ಪುಲ್ಲಿ ನಿನ್ನ ನಮೂನೆ ನಮೂನೆದ ಪೋಟೋ ದೆತ್ತ್‌ದ್ ಎಂಕ್ ತೊಜಪಾದ್ “ತೂಲೆ ದೊಡ್ಡ ಮೇರ್ ಎನ್ನ ಅಜ್ಜೆರೆಲೆಕನೆ ಉಲ್ಲೆರ್ ತೂಲೆಂದ್” ಪನೊಂದುಲ್ಲಲ್” “ಎನ್ನ ಪುಲ್ಲಿಗ್ ಅಲ್ನ ಅಜ್ಜೆರೆನ ಜವನಾಟಿಗೆದ ಪೋಟೊ ಕೋಡೆ ತೊಜಪಾದಿತ್ತೆ ಅಂಚ ನಿನನ್ ತೂದು ಅಲೆಗ್ ಅಲ್ನ ಅಜ್ಜೆರೆನ್ ತೂಯಿಲೆಕಾಂಡ್ಗೆ” ಎನ್ನ ಕಂಡನಿ ಜವನಾಟಿಗೆಡ್ ನಿನ್ನಲೆಕನೆ ಪುಡ್ಕನೆ ಪುಡ್ಕನೆ ಇತ್ತೆರ್ಂದ್ ಡೊಡ್ಡ ಸೇಲೆಡ್ ಪನ್ನಗ, ಒವ್ವ ಪ್ರೇಮ ಲೋಕಡ್ ಇತ್ತಿನ ಎನನ್ ಅಲಕ್ಕ ಕನತ್‌ದ್ ಪೊಟ್ಟು ಗುವೆಲ್‌ಗ್ ದಕ್ಕಿಲೆಕಾಂಡ್…
ಪರಬುನ ತಿಗಲೆದ ಕಟ್ಟದ ಡೈಲಾಗ್‌ಗ್ ಎನ್ನ ಬಾಯಿಡ್ ಇತ್ತಿನ ಸ್ವೀಟ್ ಪಾನ್ ಬೀಡ ದೊಂಡೆಡ್ ಅಡ್ಡ ತಿಕಲ್ಂಡ್…
ಮಂಜಲ್ ಸುಕುರುಂಡೆದ ಮಲ್ಲ ಗೋಣಿಯೇ ಎನ್ನ ಮಂಡೆಗ್ ಬೂರಿಲೆಕಾಂಡ್.
🖋 ಚೇತನ್ ಅಮೀನ್ ವಾಮಂಜೂರು
ತುಲುವೆರೆ ಕಲ