ಬತ್ತ್ಂಡ್ ಮರಿಯಾಲ
ತಂಪಾಂಡ್ ತುಳುವಪ್ಪೆ ನೆಲ
ಸುರುತ ಬರ್ಸೊಗು ದೊಂಬುಡು ಕಾಯ್ದಿ ನೆಲ,ತುಳುವ ಮಣ್ಣ ಕಮ್ಮೆನೊ ಕೊರೊಂದುಂಡು.ಅರೆಗಾಲ ಕರಿದ್ ಸುರುಕು ಭಾನೊ ಕಪ್ಪಾನಗ ಉಡಲ್ಡೊಂಜಿ ಕುಸಿ.ಇನಿ ಬರ್ಸ ಬರ್ಪುಂಡುಂದು.ಮೆಲ್ಲನೆ ತೆಡಿಲ್ ಮೆಂಚಿ ದಕ್ ನಗ ನಮ್ಮ ಕಣ್ಣ್ ನಾಲ್ ಸುತ್ತಲಾ ಭಾನೊ ತೂಪುಂಡು.ಒರ ಬರ್ಸ ಬರಡ್ ದೇವೆರೇ.ಸೆಕೆಟ್ಟ್ ತಡೆವುಜಿ.ನಾಲ್ ಪನಿ ಬೂರೊರ್ದುಂಬೇ ನುಂಗರೆ ಪಾಡ್ದಿನ ಕನಕ್ ,ಮಡಲ್,ಕೊತ್ತಲಿಗೆ ಪೂರ ಕೊಟ್ಯ ಸೇರುಂಡು.ಜಾಲ ಬರಿಟ್ಟ್ ನೀರ್ ಉಂತಂದಿಲೆಕ ಜತ್ತ್ ಪೋಯರೆ ಕೊಟ್ಟು ಪತೊಂದು ಇಲ್ಲದ ಯಜಮಾನೆ ತೋಡು ಪೆರೆಸೊಂದುಲ್ಲೆ.ನಾಲ್ ದಿಕ್ಕ್ ಡ್ ಲಾ ಕೊರೊಂದು ಬತ್ತ್ಂಡ್ ಬರ್ಸ .ಅಟ್ಟೊಡು ಮೂವೊಡು ದೀತಿನ ಕೊಡೆ ಬುಡ್ಪಾನಗ ಕೊಡೆ ಅರಪ್ಪರೆ ಆಪುಜಿ .ಮೂಜಿ ಕಡ್ಡಿ ಪೋತುಂಡು.ಕೊಂಬರ್ ಮಂಡೆಗ್ ದೀವೊಂದು ನನೆವೊಂದು ತೋಡು ಪೆರೆಸುನ ಪೊರ್ಲೇ ಬೇತೆ.ದುಂಬುದ ಕಾಲೊಡು ಮುಲಿತ್ತ ಇಲ್ಲ್.ಏತ್ ಎಡ್ಡೆಡ್ ಮುಲಿ ಬೇಂಡಲಾ ತೋರುನ ಕಮ್ಮಿಯಾಪುಜಿ.ಅಟ್ಟೊಡು ತೋಪು ದೀಪಿನ ದೀವೊಡೆ.ಬರ್ಸೊಗು ರಾತ್ರೆಡ್ ನೆಮ್ಮದಿದ ನಿದ್ರೆ.ಗೋಂಕುರ್ ಕಪ್ಪೆದ ಸ್ವರ,ಸಂಪುದ ಗಾಲಿ ,ಪರ ಪರಂದ್ ಬರ್ಸದ ಸಬ್ದ .ಆಂಡ ತೆಡಿಲ್ ಬನ್ನಗೊಂತೆ ಪೋಡಿಗೆ.ಇತ್ತೆ ಗಡಿ ಗಡಿ ಕರೆಂಟ್ ಪೋಪಿನಿ.ಧಾರವಾಹಿ ತೂಪಿನಕ್ಲೆಗೊಂತೆ ಬಂಗ.ದುಂಬೊಂಜಿ ಕಾಲ ಇತ್ತ್ಂಡ್ ಮರಿಯಲ ಸುರುವಾನಗ ಕಂಡ ಕಲಪ್ಪರೆ.ನುಗ ನಾಯರ್ ಪತೊಂದು ದಪ್ಪರೆ ಪೋಪಿನಿ.ಉರಲ್ದ ಸೊರೊಟ್ಟು ಬರ್ಸೊಗು ದಪ್ಪುನ ಪೊರ್ಲೇ ಬೇತೆ.
ಮರಿಯಾಲೊಗು ಬಡವು ಜಾಸ್ತಿ.ಕಾಂಡೆದ ಗಂಜಿಗ್ ಕಜಿಪು ಉಪಡಚ್ಚಿರ್,ನೀರುಪ್ಪಡ್ ಚಟ್ನಿ,ಪೆಜಕಾಯಿ ಗೂಂಜಿಗ್ ದಿರ್ಸಲೆ ಮುಂಚಿ ನುರ್ತುದು ಉನಿಯರೆ ಭಾರೀ ಕುಸಿಯಾವೊಂದಿತ್ತ್ಂಡ್.ಅರೆಗಾಲೊಡು ಮಲ್ದಿನ ಗುಜ್ಜೆದ ಅಪ್ಪಲ ಕಾಯಾದ್ ತಿನ್ಪಿನಿ.ಕೆರಗ್ ದ ಪೂಲ್.ಕುಡುಅರಿ ,,ಪುಲ್ಕಟೆ ಕಾಯಾದ್ ತಿನ್ಪಿನಿ ಇಂಚ ಮಾತ ತೊಡುವಾನಗ ತಿನ್ಪಿನ ವಸ್ತುಲು ನಂಕ್ ತಿಕೊಂದಿತ್ತ್ಂಡ್.ಆಂಡ ಇನಿ ಕೋಡೆದ ಜೋಕುಲೆಗ್ ಉಂದು ಮಾತ ದಾದಂದೆ ದೊತ್ತುಜ್ಜಿ.ಸುರುತ್ತ ಬರ್ಸೊಗು ರಾತ್ರೆ ತೋಡ ಬರಿಟ್ಟ್ ಬೆಟ್ರಿ ತೋಜುಂಡು .ಕಲೆಂಕ್ ನೀರ್ ಗ್ ದೆಂಜಿ ಪತ್ತರೆ ಪೋಪಿನಕುಲು.ಒಂಜಿ ಕೈಟ್ ಬೆಟ್ರಿ ಕುಡೊಂಜಿ ಕೈಟ್ ಕೊಡಪಾನ.ದೆಂಜಿ ಪತ್ ದ್ ಕೊಡಪಾನೊಡು ಪಾಡ್ದ್ ಮನದಾನಿ ದೆಂಜಿದ ಕೈಪು ತಿನರೆ ಭಾರೀ ಕುಸಿ.ಮಾಡ್ ಡ್ ಜಪ್ಪುನ ದಾರೆನೀರ್ ಗ್ ಬಾಲ್ದಿ ದೀಪಿನಿ.ಐಟೆ ಬಟ್ಟಲ್ ದೆಕ್ಕುನು,ಬಾಜನ ದೆಕ್ಕುನು,ಕೈಕಾರ್ ದೆಕ್ಕುನು ಅವ್ವೆ ಒಂಜಿ ತರತ್ತ ಕುಸಿ.ಜೋರು ಬರ್ಸ ಬನ್ನಗ ಬೈಲ್ ಮುರ್ಕುನ ತೂಯರೆಲಾ ಮಸ್ತ್ ಕುಸಿಯಾವೊಂದಿತ್ತ್ಂಡ್.ಆಂಡ ಒಂಜಿ ಬೇಜರ್ ಪಂಡ ಅಂಗಿ ಕುಂಟು ನುಂಗರೆನೇ ಇಜ್ಜಿ.ದೊಂಬುಡು ನುಂಗುದು ಸೈಯ್ಯರಾತಿನ ಮರ ಗಿಡೊಕ್ಕುಲು ಕುಡೊರ ಮೈನಿಲ್ಕೆ ಇರೆ ದಿಂಜಾವೊಂದು ಪಚ್ಚ ಪಸೆರ್ ಡ್ ಮಿನ್ ಕೊಂದಿಪ್ಪುವ.ಅಲ್ಪಲ್ಪ ಪಚ್ಚ ಪಜಿರ್.ಒಲ್ಪ ತೂಂಡಲಾ ಪಚ್ಚ ಪಜಿರ್ ಡ್ ತುಳುನಾಡ್ ಮಿನ್ ಕುಂಡು.ತುಳುವಪ್ಪೆ ನೆಲೊಕ್ಕು ಜೀವಕಲೆ ಬರ್ಪುಂಡು.ಮರಿಯಲದ ನೆಂಪು ಏಪೊಲಾ ಮದಪ್ಪರೆ ಸಾಧ್ಯ ಇಜ್ಜತೇ..?
🙏🙏🙏🙏🙏
✍️ಸುಕೇಶ್ ಶೆಟ್ಟಿ ಎಕ್ಕಾರ್
ತುಲುವೆರೆ ಕಲ ಕುಡ್ಲ
by 