ಸೋದೆ ಮಠದ ವತಿಡ್ದ್ ಮಟ್ಟು ಗುಳ್ಳ ಕೃಷಿಕ್ ಚಾಲನೆ”

ಸೋದೆ ಮಠದ ವತಿಡ್ದ್ ಮಟ್ಟು ಗುಳ್ಳ ಕೃಷಿಕ್ ಚಾಲನೆ”

ಸೋದೆ ಶ್ರೀವಾದಿರಾಜ ಮಠದ ಗುರುಪರಂಪರೆಡ್ ಶ್ರೇಷ್ಠೆರೂ, ಕ್ರಾಂತಿಕಾರಕೆರ್ ಆಯಿನ ಭಾವಿಸಮೀರ ಶ್ರೀವಾದಿರಾಜ ಗುರುಸಾರ್ವಭೌಮೆರು 500 ವರ್ಷದ ಪಿರಾಕುಡ್ ಉಡುಪಿ ಕೈತಲುದ ಮಟ್ಟು ಗ್ರಾಮದ ಬ್ರಾಹ್ಮಣೆರೆಗ್ ಶ್ರೀಹಯಗ್ರೀವ ದೇವೆರೆನ ಪ್ರೇರಣೆಡ್ದ್ ಗುಳ್ಳದ ಬೀಜನ್ ಕೊರ್ದ್ ಅಕ್ಲೆನ ಉದ್ದಾರಗ್ ಕಾರಣೀಕರ್ತೆರಾದ್ “ಮಟ್ಟು ಗುಳ್ಳ”ನ್ ಜಗತ್ತುಗ್ ಪರಿಚಯ ಮಲ್ತುದೆರ್. ಔಷಧೀಯ ಗುಣ ಉಪ್ಪುನ ಈ ಮಟ್ಟು ಗುಳ್ಳನ್ ಮಟ್ಟು ಗ್ರಾಮದ ಅವ್ವೇತೊ ಕೃಷಿಕೆರು ಇನಿಕುಲಾ ಬುಲೆಪಾದ್ ಒರಿಪಾವೊಂದ್ ಬೈದೆರ್. ಪ್ರಸ್ತುತ ಸಂದರ್ಭಡ್ ಮಟ್ಟು ಗುಳ್ಳ ಬುಲೆಪುನಕ್ಲೆಗ್ ಉತ್ತೇಜನ ಕೊರ್ಪಿನ  ಸೋದೆ ಶ್ರೀವಾದಿರಾಜ ಮಠದ ಪೀಠಾಧಿಪತಿಲಾಯಿನ ಶ್ರೀ ಶ್ರೀ ವಿಶ್ವವಲ್ಲಭ ತೀರ್ಥ ಶ್ರೀಪಾದೆರು ಶ್ರೀಮಠದ ವತಿಡ್ದ್ ಮಟ್ಟುಗುಳ್ಳ ಕೃಷಿ ಮಲ್ಪರೆಗ್ ಯೋಜನೆ ಪಾಡೊಂದೆರ್

. ಸ್ವತಃ ತಾನೇ ಗ್ರಾಮಗ್ ಬತ್ತುದ್, ಮಟ್ಟು ಗ್ರಾಮದ ನಾಗಪಾತ್ರಿಲಾಯಿನ ಶ್ರೀ ಲಕ್ಷ್ಮಣ ರಾಯೆರೆನ ಕಂಡೊಡ್ ಮಟ್ಟು ಗುಳ್ಳದ ಸಸಿನ್ ನಡ್ದ್ ಪ್ರಸಕ್ತ 2022 ನೇ ಸಾಲುದ ಗುಳ್ಳದ ಬುಳೆಕ್ ಚಾಲನೆ ಕೊರಿಯೆರ್. ಈ ಶುಭಸಂದರ್ಭಡ್ ಶ್ರೀಗುರು ವಾದಿರಾಜೆರೆನ ಕೃಪಾ ಕಟಾಕ್ಷಗ್ ನಿದರ್ಶನ ಪನ್ಪಿಲೆಕ್ಕ ಶ್ರೀಪಾದೆರು ಗಿಡ ನಡ್ಪಿನ ಪೊರ್ತುಡ್ ಪುಷ್ಪವೃಷ್ಟಿದಲೆಕ್ಕ ಬರ್ಸ ಬತ್ತಿನವ್ವ್ ಅಲ್ಪ ಇತ್ತಿನ ಭಕ್ತೆರೆನ ಭಾವನೆಗ್ ಪುಷ್ಟಿಕೊರಿಲೆಕ್ಕ ಆಂಡ್.

ಈ ಕಾರ್ಯಕ್ರಮಡ್ ಶ್ರೀಪಾದೆರೆನೊಟ್ಟುಗ್ ಮಠದ ದಿವಾನೆರಾಯಿನ ಪಾಡಿಗಾರು ಶ್ರೀನಿವಾಸ ತಂತ್ರೀ , ಸೋದೆ ವಾದಿರಾಜ ಮಠ ಎಜುಕೇಶನ್ ಟ್ರಸ್ಟ್ ದ ಕಾರ್ಯದರ್ಶಿಲಾಯಿನ ರತ್ನಕುಮಾರ್, ಮಟ್ಟು ಗುಳ್ಳ ಬೆಳೆಗಾರರ ಸಂಘದ ಪದಾಧಿಕಾರಿಲು ,ಮಟ್ಟು ವಲಯ ಬ್ರಾಹ್ಮಣ ಸಂಘದ ಅಧ್ಯಕ್ಷೆರು ಬೊಕ್ಕ ಗ್ರಾಮಸ್ಥೆರು ಉಪಸ್ಥಿತರಿತ್ತೆರ್.