ತುಳುನಾಡುಡ್ ದೀಪೊಲಿ ಪರ್ಬ.

ತುಳುನಾಡುಡ್ ದೀಪೊಲಿ ಪರ್ಬೊನ್ ವಿಶೇಷ ರೀತಿಡ್ ನಮ್ಮ ಸಂಸ್ಕ್ರತಿನ್ ಒರಿಪಾವೊಂದ್ ಆಚರಣೆ ಮಲ್ತೊಂದಿತ್ತೆರ್.ನಮ್ಮ ಹಿರಿಯೆರೆಗ್ ದೀಪೊಲಿ ಪರ್ಬ ಹೆಚ್ಚಾದ್ ಕ್ರಷಿಕೆರೆಗ್ ಅವ್ವ್ ಮೂಜಿ ದಿನೊತ್ತ ಪರ್ಬ.ಸುರುತ್ತ ದಿನ ಸೈತಿನಕ್ಲೆಗ್,ರಡ್ಡನೇ ದಿನ ಇತ್ತಿನಕ್ಲೆಗ್,ಮೂಜನೇ ದಿನ ಪೆತ್ತೊಲೆಗ್.ಇಂಚ ಮೂಜಿ ದಿನೊಲಾ ಬೇತೆ ಬೇತೆ ರೀತಿ ರಿವಾಜುಲು ನಡತೊಂದಿತ್ತುಂಡ್.ಗುರ್ಕೆಡ್ ನೀರು ಬೆಚ್ಚ ಮಲ್ತುದ್ ಎಣ್ಣೆ ನೀರು ಮೀದ್ ಪೊಸ ಕುಂಟು ಪಾಡುವೆರ್.ರಡ್ಡನೇ ದಿನ ಪೆತ್ತ ,ಎರು,ಕೈಕಂಜಿಲೆಗ್ ಎಣ್ಣೆ ಪೂಜಿದ್ ಮೀಪಾದ್ ಪೂತಮಾಲೆ ಪಾಡುದ್ ಸೇಡಿದ ಮಣ್ಣುಡ್ ಅಯಿಕ್ಲೆನ ಮಿತ್ತ್ ಚಿತ್ರ ಬರೆಪೆರ್.ತಿನರೆಗ್ ಪೊಟ್ಟುಗಟ್ಟಿ ಮಲ್ತುದ್ ಕೊರೊಂದಿತ್ತೆರ್.ಆನಿಯೇ ಬಯ್ಯಗ್ ಮುಳ್ಳುದ ರಾಶಿಗ್ ತೂ ಕೊರ್ದ್ ಪೊತ್ತಾವುನ ಕ್ರಮ ನಡತೊಂದುಂಡ್.ಆಂಡ ಇತ್ತೆದ ದೀಪೊಲಿ ಪರ್ಬ ಬದಲಾವಣೆದ ಕಾಲಘಟ್ಟೊಡ್ ಆಧುನಿಕತೆದ ಒರುಟು ನಡತೊಂದುಂಡ್ ಪಂಡುದ್ ಒಡಿಪು ಸಿರಿ ತುಳುವಚಾವಡಿದ ಕಾರ್ಯಾಧ್ಯಕ್ಷೆರಾಯಿನ ಈಶ್ವರ್ ಶೆಟ್ಟಿ ಚಿಟ್ಪಾಡಿ ತೆರಿಪಾಯೆರ್.ಆರು ಸಿರಿತುಳುವ ಚಾವಡಿ ಒಡಿಪುದ 102 ನೇ ಮುಂದಿಲ್ದ ಕೂಟಡ್ “ದೀಪೊಲಿ-ಪರ್ಬ” ದ ವಿಚಾರೊಡ್ ಪಾತೆರಿಯೆರ್. ಅಕ್ಟೋಬರ್ 14 ತಾರೀಕುದಾನಿ ಕಟಪಾಡಿ ದುರ್ಗಾನಗರದ ಗಣೇಶ್ ಇಂಜಿನಿಯರ್ ನ ಇಲ್ಲಡ್ ನವೋದಯ ಮಹಿಳಾ ಸಂಘದ ವತಿಡ್ದ್ ನಡತಿನ ಈ ಕಜ್ಜೊಡ್ ಮಹಿಳಾ ಸಂಘದ ಮಾಜಿ ಅಧ್ಯಕ್ಷೆರಾಯಿನ ಸುಗುಣ ಪೂಜಾರಿ ಮೆರೆಗ್ ಮಾನಾದಿಗೆ ನಡತುಂಡ್.
ಕಜ್ಜೊಡ್ ಸಿರಿತುಳುಚಾವಡಿದ ಸಂಚಾಲಕೆರಾಯಿನ ಪ್ರಭಾ ಬಿ.ಶೆಟ್ಟಿ ಸ್ವಾಗತ ಮಲ್ತುದ್,ಕಾರ್ಯಕ್ರಮ ನಿರೂಪಣೆ ಮಲ್ತೆರ್.ಗ್ರಾಮ ಪಂಚಾಯತ್ ಸದಸ್ಯೆರಾಯಿನ ಜೋಸೆಫ್ ಮೊಂತೆರೋ ಬೊಕ್ಕ ಕಡಪಾಡಿ ಗ್ರಾಮ ಪಂಚಾಯತ್ ಅಧ್ಯಕ್ಷೆರಾಯಿನ ಇಂದಿರಾ ಆಚಾರ್ಯ ಮಲ್ಲ ಬಿನ್ನೆರಾದಿತ್ತೆರ್.ಗಿರೀಶ್ ಚಿಟ್ಪಾಡಿ ಸೊಲ್ಮೆ ಸಂದಾಯ್ತ ಮಲ್ತೆರ್.