ಪಣಿಯಾಡಿ ಕಾದಂಬರಿ ಪ್ರಶಸ್ತಿ

ಆ.18 – ರೂಪಕಲಾ ಆಳ್ವೆರೆಗ್ ಪಣಿಯಾಡಿ ತುಳು ಕಾದಂಬರಿ ಪ್ರಶಸ್ತಿ ಪ್ರದಾನ

ಉಡುಪಿ
ಉಡುಪಿ ತುಳುಕೂಟ ವತಿಡ್ದ್ ಕೊರ್ಪಿನ  29ನೇ ವರ್ಷದ ‘ಪಣಿಯಾಡಿ ತುಳು ಕಾದಂಬರಿ ಪ್ರಶಸ್ತಿ’ಗ್ ಮಂಗಳೂರು ಕರಂಗಲ್ಪಾಡಿದ  ರೂಪಕಲಾ ಆಳ್ವ ಮೆರೆನ’ಪಮ್ಮಕ್ಕೆನ ಪೊರುಂಬಾಟ’ ಕಾದಂಬರಿ ಆಯ್ಕೆಯಾದಿತ್ತುದ್, ಪ್ರಶಸ್ತಿ ಪ್ರಧಾನ ಸಮಾರಂಭ ಆ. 18 ತಾರೀಕುಗ್, ಬಯ್ಯಗ್ 4 ಗಂಟೆಗ್ ಯಕ್ಷಗಾನ ಕಲಾರಂಗದ ಪೊಸ ಸಭಾಂಗಣ ಐವೈಸಿಡ್  ನಡಪರೆಗುಂಡ್.
ಕಾರ್ಯಕ್ರಮದ ಅಧ್ಯಕ್ಷತೆಡ್ ತುಳುಕೂಟದ ಜಯಕರ್ ಶೆಟ್ಟಿ ಇಂದ್ರಾಳಿ ಉಪ್ಪುವೆರ್. ಮಲ್ಲ ಬಿನ್ನೆರಾದ್ ಕರ್ನಾಟಕ ತುಳುಸಾಹಿತ್ಯ ಅಕಾಡೆಮಿದ ಅಧ್ಯಕ್ಷ ತಾರಾನಾಥ್ ಗಟ್ಟಿ, ಮಂಗಳೂರು ಅಖಿಲ ಭಾರತ ತುಳು ಒಕ್ಕೂಟದ ಅಧ್ಯಕ್ಷ ಎ.ಸಿ. ಭಂಡಾರಿ, ಉದ್ಯಮಿ ವೈ. ಸುಧೀರ್ ಕುಮಾರ್ ಬೊಕ್ಕ ಸಮಾಜಸೇವಕೆ ಯು. ವಿಶ್ವನಾಥ ಶೆಣೈ  ಪಾಲ್ ಪಡೆಯರೆಗುಲ್ಲೆರ್.ಪ್ರಶಸ್ತಿ ಪುರಸ್ಕೃತ ಕಾದಂಬರಿನ್ ಅಮಿತಾಂಜಲಿ ಕಿರಣ್ ಮೇರು ಪರಿಚಯ ಮಲ್ಪುವೆರ್.ಈ ಪೊರ್ತುಡ್ , ತುಳುಭಾಷೆನ್  ತೃತೀಯ ಐಚ್ಛಿಕ ಭಾಷೆಯಾದ್  ಆಯ್ಕೆ ಮಲ್ತೊಂದ್ ಈ ಸರ್ತಿದ ಎಸ್.ಎಸ್.ಎಲ್. ಸಿ ವಾರ್ಷಿಕ ಪರೀಕ್ಷೆಡ್ ಶೇ 100 ಅಂಕ ಪಡೆಯಿನ  ಜಿಲ್ಲೆದ  17 ವಿದ್ಯಾರ್ಥಿಲೆನ್ ಮಾನಾದಿಗೆ ಮಲ್ಪುಂಡ್ ಪಂಡುದು ತುಳುಕೂಟದ ಕಾರ್ಯದರ್ಶಿ ಗಂಗಾಧರ್ ಕಿದಿಯೂರು ಬೊಕ್ಕ ಪಣಿಯಾಡಿ ತುಳು ಕಾದಂಬರಿ ಪ್ರಶಸ್ತಿ ಸಂಚಾಲಕಿ ತಾರಾ ಉಮೇಶ್ ಆಚಾರ್ಯ ಪ್ರಕಟಣೆಡ್ ತೆರಿಪಾದೆರ್.

29 ನೇ ವರ್ಷದ ಪ್ರಶಸ್ತಿ
ತುಳು ಭಾಷೆ, ಸಂಸ್ಕೃತಿ, ಸಾಹಿತ್ಯಕ್ಕಾದ್ ಅಪಾರ ಸೇವೆ ಸಲ್ಲಿಸಾಯಿನ, ತುಳು ಚಳುವಳಿ, ದೇಶದ ಸ್ವಾತಂತ್ರ್ಯ ಹೋರಾಟಡುಲಾ ಪಾಲ್ ಪಡೆಯಿನ, ಹಿರಿಯ ಸಾಹಿತ್ಯ ಚೇತನ ದಿ. ಶ್ರೀನಿವಾಸ ಉಪಾಧ್ಯಾಯ ಪಣಿಯಾಡಿ ಅರೆನ ಸ್ಮರಣಾರ್ಥ ತುಳುಕೂಟ  ತುಳುನಾಡುದ ಸಾಂಸ್ಕೃತಿಕ, ಸಾಮಾಜಿಕ ಬದುಕುದ ಮಿತ್ತ್ ಬೊಲ್ಪು  ಚೆಲ್ಲುನ ತುಳು ಕಾದಂಬರಿಗ್ ಕರಿನ 29 ವರ್ಷಡಿಂಚಿ ಈ ಪ್ರಶಸ್ತಿನ್ ಕೊರೊಂದುಂಡ್. ಪ್ರಶಸ್ತಿ 10 ಸಾವಿರ ರು. ಪಣವುಉಪ್ಪುಂಡ್.
ಈ ಬಾರಿ ಖ್ಯಾತ ವಿಮರ್ಶಕ ಪ್ರೊ.ಮುರಳಿಧರ ಉಪಾಧ್ಯಾಯ ಹಿರಿಯಡ್ಕ, ಸಾಹಿತಿ ಪದ್ಮನಾಭ ರೈ ಪುತ್ತಿಗೆ, ಕಲಾವಿದ ಸಕು ಪಂಗಾಳ ಮೊಕುಲು ತೀರ್ಪುಗಾರೆರಾದ್ ಪ್ರಶಸ್ತಿಗ್ ಕಾದಂಬರಿನ್  ಆಯ್ಕೆ ಮಲ್ದೆರ್.

ಸಾಹಿತಿ ರೂಪಕಲಾ ಆಳ್ವ
ಕನ್ನಡ ಬೊಕ್ಕ ತುಳು ಭಾಷೆ ರಡ್ಡೇಟುಲಾ ಸಾಹಿತ್ಯ ಬರೆಪಿನ ರೂಪಕಲಾ ಮೇರು ಮಂಗಳೂರುದ ಸಂದೇಶ ಪ್ರತಿಷ್ಠಾನಡ್ ಸಂಶೋದಕಿಯಾದುಲ್ಲೆರ್. ಮೇರು ನಾಟಿ, ಜೋಳಿಗೆಯಿಂದ ಹೊಳಿಗೆ, ಪಡಿಪ್ಪಿರೆ ಇತ್ಯಾದಿ ಕೃತಿಕುಲೆನ್ ರಚನೆ ಮಲ್ದಿನ ಅರೆಗ್ ತುಳು ಸಾಹಿತ್ಯ ಅಕಾಡೆಮಿದ ಪುಸ್ತಕ ಬಹುಮಾನ, ಸಾರಾ ಅಬೂಬಕ್ಕರ್ ಸಾಹಿತ್ಯ ಪ್ರಶಸ್ತಿಲು ಸಿಕ್ಕುದುಂಡ್.
ತುಳು ಸಾಹಿತ್ಯ ಅಕಾಡೆಮಿದ  ಸದಸ್ಯೆರಾದ್ , ಮಂಗಳೂರು ನಗರ ಗ್ರಂಥಾಲಯದ ಸಲಹಾ ಪ್ರಾಧಿಕಾರದ ಸದಸ್ಯೆರಾದ್, ಲೇಖಕಿಯೆರು ವಾಚಕಿಯೆರು ಸಂಘ ಇತ್ಯಾದಿ ಕೆಲವ್ ಸಂಸ್ಥೆಲೆಡ್  ಸೇವೆ ಮಲ್ದೆರ್.