ಪಣಿಯಾಡಿ ಕಾದಂಬರಿ ಪ್ರಶಸ್ತಿ.

ತುಳುಕ್ ಮಲ್ಲ ಕೊಡುಗೆ ಕೊರಿನ ವರ್ಸೊಡೊರ ನೆಂಪು ಮಲ್ಪುನ ಬೇಲೆ ಬಾರೀ ಪೆರ್ಮೆದ ಸಂಗತಿ.ಪಂಡುದ್ ಕರ್ನಾಟಕ ತುಳುಸಾಹಿತ್ಯ ಅಕಾಡೆಮಿದ ಗುರ್ಕಾರೆರಾಯಿನ ಶ್ರೀ ತಾರಾನಾಥ ಗಟ್ಟಿ ಕಾಪಿಕಾಡ್ ಮೇರ್ ಪಂಡೆರ್.

ಆರು  ತುಳುಕೂಟ ಉಡುಪಿ, ಅಖಿಲ ಭಾರತ ತುಳು ಒಕ್ಕೂಟ, ಕನ್ನಡ ಬೊಕ್ಕ ಸಂಸ್ಕ್ರತಿ ಇಲಾಖೆದ ಒತ್ತು ಸೇರಿಗೆಡ್ ನಡತಿನ ಪಣಿಯಾಡಿ ಕಾದಂಬರಿ ಪ್ರಶಸ್ತಿ ಮಾನಾದಿಗೆದ ಲೇಸ್ ನ್ ಉದಿಪನ ಮಲ್ತುದ್ ಪಾತೆರಿಯೆರ್.
ಅವಿಭಜಿತ ದಕ ಜಿಲ್ಲೆದ  40 ಶಾಲೆಲೆಡ್  ತುಳು ಕಲ್ತೊಂದುಪ್ಪುನ  ಶಿಕ್ಷಕೆರೆನ್  ಉರ್ದು, ಫ್ರೆಂಚ್  ಭಾಷಾ ಶಿಕ್ಷಕೆರೆಲೆಕ್ಕನೇ, ಅತಿಥಿ ಶಿಕ್ಷಕೆರೆನ  ಪಟ್ಟಿಗೆ ಸೇರ್ಪಾದ್  ಗೌರವ ಧನ ಕೊರ್ರೆಗ್  ಸರ್ಕಾರಗ್ ಪ್ರಸ್ತಾಪ ಕೊರ್ತುಂಡ್.
ಪ್ರಸ್ತುತ ತುಳು ಶಿಕ್ಷಕೆರೆಗ್ ತುಳು ಅಕಾಡೆಮಿಡ್ದೇ ಗೌರವಧನ ಕೊರೊಂದುಂಡ್. ಈ ಶಿಕ್ಷಕೆರೆಗ್  ಬಾಕಿ 12.50 ಲಕ್ಷ ರು. ಇತ್ತೆನೇ ಬುಡುಗಡೆ ಮಲ್ದುಂಡ್ ಪಂಡೆರ್..
ತುಳು ಭಾಷೆಗೆ ಮುಂದಿನ ಅಧಿವೇಶನದಲ್ಲಿ ರಾಜ್ಯದ ಅಧಿಕೃತ ಭಾಷೆಯಾದ್  ಮಾನ್ಯತೆದ  ಸುದ್ದಿದ ನಿರೀಕ್ಷೆ ಉಂಡು, ಒಟ್ಟುಡ್  ತುಳು ಭಾಷೆನ್ ಯೂನಿಕೋಡ್ ಡ್ ಬಳಸುನ ವ್ಯವಸ್ಥೆಲಾ  ಆವೊಂದುಂಡ್  ಪಂಡೆರು.
ತುಳು ಭಾಷೆಗಾದ್ ಪೊರಂಬಾಟ  ಮಲ್ದಿನ ಯು.ಎಸ್. ಪಣಿಯಾಡಿ ಅರೆನ್  ಸರ್ಕಾರ ಮಟ್ಟಡ್  ಪ್ರಶಸ್ತಿ, ದತ್ತಿನಿಧಿ, ಪೀಠ ಇಂಚಿತ್ತಿನ ಮಾನಾದಿಗೆದ  ಮೂಲಕ ಗುರುತಿಸವೊಡಾಪುಂಡ್.. ಈ ಬಗ್ಗೆ ಅಕಾಡೆಮಿಡುಲಾ ಯೋಚನೆ ಮಲ್ಪುಂಡ್ ಪನ್ಪಿನ  ಭರವಸೆ ಕೊರಿಯೆರು. ಈ ಸಂಧರ್ಭಡ್  ಆರು ಪ್ರಶಸ್ತಿ ವಿಜೇತ ‘ಪಮ್ಮಕ್ಕೆನ ಪೊರುಂಬಾಟ’ ಕಾದಂಬರಿನ್  ಬಿಡುಗಡೆ ಮಲ್ತೆರು. ಸಾಹಿತಿ ಅಮಿತಾಂಜಲಿ ಕಿರಣ್ ಮೇರು ಪ್ರಶಸ್ತಿ ವಿಜೇತ ಕೃತಿನ್  ಪರಿಚಯ ಮಲ್ತೆರು.
ಮಂಗಳೂರುದ  ತುಳು ಸಾಹಿತಿ ರೂಪಕಲಾ ಆಳ್ವ ಅರೆಗ್ ಈ ಸಾಲುದ  ಪಣಿಯಾಡಿ ತುಳು ಕಾದಂಬರಿ ಪ್ರಶಸ್ತಿನ್  ಪ್ರದಾನ ಮಲ್ತೆರ್.
ಅತ್ತಾವಂದೇ ಎಸ್ಎಸ್ಎಲ್ ಸಿ ಪರೀಕ್ಷೆದ  ತುಳುಪಠ್ಯಡ್ ಶೇ 100 ಅಂಕೊ ಪಡೆಯಿನ  ಜಿಲ್ಲೆದ ವಿದ್ಯಾರ್ಥಿಲೆನ್ ಅಭಿನಂದನೆ ಮಲ್ತೆರ್. ತೀರ್ಪುಗಾರೆರಾಯಿನ  ವಿಮರ್ಷಕ ಮುರಳೀಧರ ಉಪಾಧ್ಯಾಯ ಹಿರಿಯಡ್ಕ ಬೊಕ್ಕ ಸಾಹಿತಿ ಪುತ್ತಿಗೆ ಪದ್ಮನಾಭ ರೈ ಅರೆನ್  ಗೌರವ ಮಲ್ತೆರ್.
ಕಾರ್ಯಕ್ರಮದ ಮಲ್ಲ  ಬಿನ್ನೆರಾದ್ ಅಖಿಲ ಭಾರತ ತುಳು ಒಕ್ಕೂಟದ ಅಧ್ಯಕ್ಷ ಎ.ಸಿ. ಭಂಡಾರಿ, ಸಂಗೀತ ನಿರ್ದೇಶಕ ವಿ.ಮನೋಹರ್, ಉದ್ಯಮಿ ವೈ. ಸುಧೀರ್ ಕುಮಾರ್, ಕೊಡುಗೈ ದಾನಿ ಯು. ವಿಶ್ವನಾಥ ಇತ್ತೆರು.
ತುಳುಕೂಟದ ಅಧ್ಯಕ್ಷ ಜಯಕರ ಶೆಟ್ಟಿ ಕಜ್ಜೊದ  ಗುರ್ಕಾರ್ಮೆಡಿತ್ತೆರು, ಕಾರ್ಯಂತೆರಾಯಿನ  ಗಂಗಾಧರ ಕಿದಿಯೂರು, ಪಣವುದ ಪಾಲವೆರಾಯಿನ  ಚೈತನ್ಯ ಎಂ.ಜಿ. ವೇದಿಕೆಡಿತ್ತೆರು.
ಪ್ರಶಸ್ತಿ ಸಮಿತಿ ಸಂಚಾಲಕೆರಾಯಿನ ತಾರಾ ಉಮೇಶ್ ಆಚಾರ್ಯ ಪ್ರಾಸ್ತಾವಿಕ ಪಾತೆರ್ದ್  ಸ್ವಾಗತ ಮಲ್ತೆರು, ರತ್ನಾಕರ ಇಂದ್ರಾಳಿ ಕಾರ್ಯಕ್ರಮದ ನಿರೂಪಣೆ ಮಲ್ತೆರು.