ಅಕ್ಷಯ ಶೆಟ್ಟಿ ಬರೆತಿನ “ದೆಂಗ” ಕಾದಂಬರಿಗ್ ಈ ಸರ್ತಿದ ಪಣಿಯಾಡಿ ಪಟ್ಟ…

ತುಳುಕೂಟ ಉಡುಪಿ ನೆತ್ತ 2020-2021 ನೇ ಸಾಲುದ ‘ಎಸ್.ಯು.ಪಣಿಯಾಡಿ ಸ್ಮಾರಕ ತುಳು ಕಾದಂಬರಿ ಪ್ರಶಸ್ತಿ’ಗ್ ಮಂಗಳೂರು ಸಹ್ಯಾದ್ರಿ ಇಂಜಿನಿಯರ್ ಬೊಕ್ಕ ಮ್ಯಾನೇಜ್‌ಮೆಂಟ್ ಕಾಲೇಜ್ ದ ಸಹಾಯಕ ಪ್ರಾಧ್ಯಾಪಕಿ ಅಕ್ಷಯ ಆರ್.ಶೆಟ್ಟಿ ಮೆರೆನ ‘ದೆಂಗ’ ಕಾದಂಬರಿ ಆಯ್ಕೆಯಾತುಂಡ್.
ಸ್ವಾತಂತ್ರ್ಯ ಹೋರಾಟಗಾರೆರಾಯಿನ ತುಳು ಭಾಷೆದ ಶ್ರೇಷ್ಟ ಸಾಹಿತಿ ದಿ.ಎಸ್.ಯು.ಪಣಿಯಾಡಿ ಮೆರೆನ ನೆಂಪುಗಾದ್ ಉಡುಪಿ ತುಳುಕೂಟ ಕರಿನ 27 ವರ್ಷೊಡಿಂಚಿ ಪಣಿಯಾಡಿ ತುಳು ಕಾದಂಬರಿ ಪ್ರಶಸ್ತಿ, ಕೃತಿ ಬುಡುಗಡೆ ಸಮಾರಂಭೊನ್ ಆಯೋಜನೆ ಮಲ್ತೊಂದುಂಡ್. ಈ ಮುಖೇನ ತುಳು ಸಾಹಿತ್ಯ ಕಾದಂಬರಿಕಾರೆರೆನ್ ಪರಿಚಯ ಮಲ್ತುದ್, ಪ್ರಶಸ್ತಿ ವಿಜೇತ 33 ತುಳು ಕಾದಂಬರಿಲೆನ್ ಪ್ರಕಟನೆ ಮಲ್ಪುನ ಮುಖೇನ ತುಳು ಭಾಷಾ ಕೃತಿಕುಲೆನ ಬುಲೆಚ್ಚಿಲ್ ಗಾದ್ ವಿಶೇಷ ಕೊಡುಗೆ ಕೊರ್ತುಂಡ್.
ಈ ಬಾರಿ ಕಾದಂಬರಿ ಪಂತೊಗ್ ಒಟ್ಟು ಏಳು ಹಸ್ತಪ್ರತಿ ಕುಲ್ ಬತ್ತಿತ್ತುದ್ ಪಂತೊದ ತೀರ್ಪುಗಾರೆರಾದ್ ವಿಮರ್ಶಕ ಪ್ರೊ. ಮುರಳೀಧರ ಉಪಾಧ್ಯ ಹಿರಿಯಡ್ಕ, ಜಾನಕಿ ಬ್ರಹ್ಮಾವರ, ಸಕು ಪಾಂಗಾಳ, ಉಪನ್ಯಾಸಕಿ ಡಾ.ನಿಕೇತನ ಸಹಕಾರ ಮಲ್ತುದೆರ್.ಪಂಡುದ್ ತುಳುಕೂಟದ ಅಧ್ಯಕ್ಷ ಬಿ.ಜಯಕರ ಶೆಟ್ಟಿ ಇಂದ್ರಾಳಿ, ಕಾದಂಬರಿ ಪ್ರಶಸ್ತಿ ಸಂಚಾಲಕಿ ತಾರಾ ಉಮೇಶ್ ಆಚಾರ್ಯ, ಪ್ರಧಾನ ಕಾರ್ಯದರ್ಶಿ ಗಂಗಾಧರ್ ಕಿದಿಯೂರು ಪತ್ರಿಕಾ ಪ್ರಕಟನೆಡ್ ತೆರಿಪಾದೆರ್.