ಪೊಣ್ಣು ಪಂಡ ಸ್ವತಃ ಶಕ್ತಿ.

ಪೊನ್ನು ತನ್ನ ಶಕ್ತಿನ್ ಸರಿಯಾದ್ ಗಲಸೊಂದುಲ್ಲಲಾ ಇಜ್ಜಾ..?

ಪೊನ್ನು ಪಂಡ ಸ್ವತಃ ಶಕ್ತಿ, ಆಲೆಡ್ದೇ ಸೃಷ್ಟಿ, ಸ್ಥಿತಿ, ಲಯ ಪನ್ಪಿನ ಪಾತೆರ ಪಾತೆರ ಮಾತ್ರ ಅತ್ತ್. ಉಂದು ಅಕ್ಷರಶಃ ಸತ್ಯ.
ಪೊನ್ನನ್ ಮಣ್ಣ್ ದ ಲೆಕ್ಕ ಪನ್ಪಿನೆನ್ ಕೇಂದಿಪ್ಪರ್. ಪಂಡ ಪೊನ್ನ ಗುಣ ಮಣ್ಣ್ ದ ಲೆಕ್ಕ ಪಂಡ್ದ್. ಮಣ್ಣ್ ಗ್ ಫಲ ಕೊರ್ಪಿನ ಗುಣ ಉಂಡು, ತ್ಯಾಗ, ಮೋಕೆ, ಸೇರ್ದ್ ಬದುಕುನ ಗುಣ ಅಂಚೆನೆ ತತ್ತಂಡ ಕೋಪಲಾ ಉಂಡು ಈ ಮಣ್ಣ ಗುಣೊಟ್ಟು. ಬಂಗಾರ್, ಮಣ್ಣ್ ಬೊಕ್ಕ ಪೊನ್ನಗ್ ವಿಶೇಷ ಸ್ಥಾನ ಮಾನ ಉಂಡು. ಅನಾದಿ ಕಾಲೊಡ್ದಿಂಚಲಾ ಸನಾತನ ಧರ್ಮೊಡು ಪೊನ್ನನ್ ಪೂಜೆ ಪಡೆಯೆರೆ ಯೋಗ್ಯತೆ ಇಪ್ಪುನಾಲ್ ಪಂಡ್ದ್ ಎತ್ತರೊದ ಸ್ಥಾನ ಕೊರ್ತುಂಡಲಾ ಸರ್ವ ಶಕ್ತಿ ಇತ್ತಂಡಲಾ ಅಲೆಡ, ಅಲೆನ್ ಭೋಗದ ವಸ್ತು, ಕರ ಕೈಲ್ ಅಟಿಲ್ದ ಕೋಣೆಗ್ ಅಂಚೆನೆ ಸಂತಾನ ಪಡೆವೆರೆಗಿಂದೇ ಅಲೆನ ಶಕ್ತಿನ್ ದುರುಪಯೋಗ ಮಲ್ದಿನ ಅಣ್ಜೋವೆನ ಅಹಂಕಾರ, ದಬ್ಬಾಳಿಕೆ ತಡೆವಂದೆ ಓದು ಬರವು ಕಲ್ತ್ ಇನಿತ್ತ ಪೊನ್ನುಲು ಎಂಕುಲ್ಲಾ ಎರೆಗ್ಲಾ ಕಮ್ಮಿ ಇಜ್ಜಾಂದ್ ತೊಜಪ್ಪಾದ್ ಕೊರ್ತೆರ್. ಸತ್ಯ ಪನೊಡಾಂಡ ಪೊನ್ನು ದಾಂತಿ ಈ ಪುಡಮಿಡ್ ಆಣುಲೆನ ವಜೂದೇ ಇಜ್ಜಿ. ಅಂಚೆನೆ ಆಣುಲು ದಾಂತೆ ಪೊನ್ನುಲೆನಲಾ ವಜೂದೇ ಇಜ್ಜಿಂದ್ ಪನೊಲಿ. ಪುಗ್ಗೆಲ್ಗ್ ಪುಗ್ಗೆಲ್ ಕೊರ್ದು ನಡತ್ಂಡನೆ ಆಣ್ ಪೊನ್ನು ಸಂಸರೊಡು ಸುಖ ಉಂಡು.
ಆಧುನಿಕತೆ ಬಾರಿ ಜೋರುಡು ನಡತೊಂದುಂಡು. ಪೊನ್ನು ತನಕ್ ತಿಕ್ಕಿನ ತನ್ನಾಲ್ಮೆನ್ ಸರಿಯಾದ್ ಗಲಸೊಂದುಲ್ಲೊಲಾ..? ಇಜ್ಜಾ..? ಪನ್ಪಿನ ಪ್ರಶ್ನೆಗ್ ಉತ್ತರ ಬಾಕಿ ಉಂಡು. ಆಣುಲೆನ ಲೆಕ್ಕನೇ, ಐಡ್ದ್ ಲಾ ಜಾಸ್ತಿ ವಿದ್ಯಾವಂತೆ, ಜಾಸ್ತಿ ಸಂಬಳ ಪಡೆಂಡಲಾ ಅಲೆನ್ ಸಂಶಯೊದ ದಿಟ್ಟಿಡ್ ತೂಪಿನ ಇಲ್ಲದಕ್ಲೇತೋ ಉಲ್ಲೆರ್.ಅಲೆಗ್ ಬೋಡಾಯಿಲೆಕ್ಕ ಅಂಗಿ ಕುಂಟು ಪಾಡುನ ಸ್ವಾತಂತ್ರ್ಯಲಾ ಇಜ್ಜಾ..?
ದುಂಬು ಪೋಪಿನ ಸಮಾಜೊಡು ದುಂಬು ತೂಪಿನ ತಪ್ಪಾ..?. ನಮ ಪೊರ್ಲುಡು ಬದ್ಕ್ ಗಾ ಪನ್ಪಿನನೇ ಅಲೆನ ಆಸೆ. ಅಲೆನ ತನ್ನಾಲ್ಮೆನ್ ಆಲ್ ಎಂಚಲಾ ಉಪಯೋಗ ಮಲ್ಪೊಲಿ ಮನಸ್ ಮಲ್ತ್ಂಡ. ಆಂಡ ಅಲೆನ ಉಡಲ್ಡ್ ಎನ್ನ ಅಮ್ಮ, ಎನ್ನ ಅಮ್ಮೆರ್, ಎನ್ನ ಅಣ್ಣೆ ಮೆಗ್ಯೆ, ಮೆಗ್ದಿ, ಎನ್ನ ಸಂಸಾರ ಪನ್ಪಿನ ಗೇನ ಇಪ್ಪುನೆಟ್ಟಾವರೆಗಾದ್, ಆಲ್ ಕಡೆಪಿ ಕಲ್ಲ ಕಂಜಿದ ಲೆಕ್ಕ ಸೊಂದುವಲ್, ತ್ಯಾಗ ಮಲ್ಪುವಲ್. ಲೆಕ್ಕೊಡು ಬದುಕುವಲ್. ಆಂಡಲಾ ಅಸಮಾಧಾನ, ಸಂಶಯ ಮಲ್ತಂಡ ಎಂಚ ಬದುಕೊಡು ಈ ಪೊನ್ನು ಈ ಸಮಾಜೊಡು.?

ಇತ್ತೆದ ಪೊನ್ನು ತನ್ನ ಕುಟುಮೊದ ರೀತಿ ನೀತಿನ್ ಬುಡಂದೆ, ಸಮಾಜ ಹೀನ ದಿಟ್ಟಿಡ್ ಅಲೆನ್ ತೂವಂದಿಲೆಕ್ಕ ತುತೈತ್ತ ಮಲ್ತ್ತೊಂದು, ಅತ್ತ್ಂದೆ ತಾನ್ ಬುಲೆದ್ ತನ್ನಕುಲೆನ್ಲಾ ಬುಲೆಪಾವೊಂದು, ನಮನ ಸಂಸ್ಕೃತಿ ಸಂಸ್ಕಾರೊನು ಬುಡಂದೆ, ತನ್ನ ಜೋಕ್ಲೆಗ್ಲಾ ಅವೆನ್ ತೆರಿಪಾವೊಂದು ಬುಲೆವೊಡು ಬುಲೆಪ್ಪಾವೊಡು ಪೀಳಿಗೆನ್. ಇಜ್ಜಾಂಡ ಈ ನಮ್ಮ ಶಕ್ತಿ ಪನ್ಪಿನ ಪೊನ್ನೇ ಮನುಕುಲೊತ್ತ ಸರ್ವ ನಾಸೊಗು ಕಾರಣ ಆಪೊಲು ಪನ್ಪಿನೆಕ್ಕ್ ಸಂಶಯನೇ ಇಜ್ಜಿ. ಜನನ ಮರಣ ಏತ್ ಸತ್ಯೋನಾ ಆತೇ ಈ ಪಾತೆರೊಲಾ ಸತ್ಯನೆ.
ಪೊನ್ನನ್ ದಂಟಡೆ. ಅಲೆಗ್ ಒಂತೆ ಮೋಕೆ ಕೊರ್ಲೆ. ಅಲೆನ ಭರವಸೆಗ್ ಮೋಸ ಮಲ್ಪಡೆ. ಮಗಲೆನ್ ಲಕ್ಷೀ ಪಂಡ್ದ್, ಮರ್ಮಲೆನ್, ಮಗಲ್ ಪಂಡ್ದ್ ತೂಲೆ. ವಿಶ್ವಾಸ, ಮೋಕೆ, ಪುಗರ್ತೆಗ್ ಆಲ್ ಸೋತು ಪೋಪಲ್ ಪನ್ಪಿನೆನ್ ನೆಂಪು ದೀಲೆ. ಬೆರಿ ಬೊಟ್ಟುದು ಎಂಕ್ಲು ನಿನ್ನ ಬೆರಿಟ್ಟುಲ್ಲ ಪನ್ಲೆ, ಆಲಾದೇ ನಿಗ್ಲೆಗ್ ಬೆರಿ ಸಾಯ ಆದುಂತುವೊಲು. ಅಪ್ಪೆ ಅಮ್ಮೆರೆಡ್ದ್, ಅಣ್ಣೆ ತಂಗಡಿನಕ್ಲೆಡ್ದ್ ದೂರ ಪೋಂಡಲಾ ಅಪ್ಪೆ ಇಲ್ಲನ್ ಮದಪಂದೆ, ಅಕ್ಲೆ ಬೇನೆನ್ ಅರ್ಥ ಮಲ್ತೊನುವಲ್ ಪೊನ್ನು.
ಇಂಚಿತ್ತ್ ಪೊನ್ನನ್ ಎಡ್ಡೆ ತಾದಿ ತೋಜಾದ್ ದುಂಬು ಕಡಪುಡ್ಲೆ, ಪಿರ ಒಯಿಪ್ಪಡೇ. ಒಂಜಿ ಪೊನ್ನನ ಶಕ್ತಿನ್ ನಿಜವಾದ್ಲಾ ಆಲ್ ಸದುಪಯೋಗ ಮಲ್ತಲ್ಡ, ಮಲ್ಪೆರೆ ಅವಕಾಶ ತಿಕ್ಂಡ ತರೆ ದೆರ್ತ್ ಬದ್ಕೆರೆ ಬುಡುಂಡ ಅಲೆನ್ ಆಲ್ಲಾ ಉದ್ಧಾರೊಗು ಖಂಡಿತಾ ಕಾರಣ ಆಪೊಲು ಪನ್ಪಿನೆಟ್ಟ್ ರಡ್ಡ್ ಪಾತೆರೊನೋ ಇಜ್ಜಿ.
ಇತ್ತೆದ ಪೊನ್ನು ತಂಕ್ ತಾನೇ ಲಕ್ಷ್ಮಣ ರೇಖೆನ್ ಪಾಡೊಂದು, ಸರಿ ತಪ್ಪು ಅರ್ಥ ಮಲ್ತೊಂದು, ಸಂಸ್ಕೃತಿ ಸಂಸ್ಕಾರ ಮದಪಂದೆ, ಹಿರಿಯಾಕುಲು ನಂಬುದು ಬೈದಿನ ದೈವ ದೇವೆರೆನ್ ದಂಟಂದೆ, ಪೊರ್ಲುದ ಸಂಸಾರೊನು ಸಮಯೊಡು ಕಟ್ಟೊಂದು ಬದುಕೊಡು. ವಾ ದೇಸೊಗೇ ಪೋಂಡಲಾ ತನ್ನ ಪುಟ್ಟುದಿನ ಪುಡಮಿನ್ ಅಂಚೆನೆ ಪರಿವಾರೊನು, ದೇಸೊನು ಮದಪಂದೆ, ತರೆ ದೆರ್ತ್ ನಡತ್ ಪುಗರ್ತೆಗ್ ನಮ್ಮ ಇತ್ತೆದ ಪೊನ್ನು ಕಾರಣ ಆತೊಲು, ನನಲಾ ಆವೊಡುಂದು ಎನ್ನ ಆಸೆ.

ಕುಸುಮ್ ಸಾಲಿಯಾನ್
ಪುಣೆ ಮಹಾರಾಷ್ಟ್ರ
ತುಲುವೆರೆ ಕಲ