ಪೊರ್ಲು ತೂಪಿನಾಸೆ..

ಪೊರ್ಲು ತೂಪಿನಾಸೆ

ಮಗಳೆನ ಮದಿಮೆದ ಪೊರ್ಲುನು ತೂಪಿನ
ಆಸೆನೇ ಉಡಲ್ ಡ್ ಎಂಕುಂಡು|
ಪುಗೆಲ್ ಡ್ ಗೊಬ್ಬಿನ ಬಾಲೆದ ದಿಬ್ಬಣೊನು
ತೂಪಿನ ಕೊದಿಯೇ ದಿಂಜಿಂಡ್||

ಬಂಗಾರ್ ದೀವೊಡು ಐತೊನೆ ಆವೊಡು
ಆಲೆನ ಪೊರ್ಲುಗು ಏರುಂಡು|
ಸಿಂಗಾರ ಮಲ್ತ್ ದ್ ಪಿದಡುನ ಪೊರ್ತುಗು
ಕಾತ್ ಕುಲ್ದಿನ ಎನ್ನ ಕಣ್ಣುಂಡು||

ಇಲ್ಲ್ ದ ಐಸಿರೊ ಏಪೊಲ ಮಗಳೆನ್ನನೆ
ಉಡಲ್ಡ್ ಮದಿಮೆದ ಕನೊಯೆಂಕ್|
ಜಲ್ಲಿಯೆ ಪಾಡೊಡು ಮಲ್ಲಿಗೆ ಪುರ್ಪೊದ
ದಾರೆದ ಪೊರ್ತುದ ಕೊದಿಯೆಂಕ್||

ನಿಂಗ್ ದೇ ಕುಲ್ಲುದೆ ಮನಸ್ ದ ಪಾತೆರ
ಮೂರ್ತೊನೆ ಕೂಡಡ್ ಅಲೆಗಣ್ಣ|
ದಂಗಿನ ಪ್ರಾಯೊದ ಜೂವೊದ ಆಸೆನೇ
ಪೊರ್ಲುಡೆ ಕರಿಯೊಡು ಮಗಲಣ್ಣ||

ಬಾಲೆಲೆ ಖುಷಿಯೆ ಒಡ್ಕೊದ ಆಸೆನೇ
ಸೈಪುನ ಸುರುಕೇ ನಡಪೊಡುಗೆ|
ಮೂಲೆಡ್ ಒರಿಂಡನೆ ತೂಯರೆ ಆಪುಂಡಾ
ತ್ರಾಣೊದ ಪ್ರಾಯೊಡು ಆವೊಡುಗೆ||

🖊️ಉಮೇಶ್ ಶಿರಿಯ
ತುಲುವೆರೆ ಕಲ