ಸುಮನಸಾ ರಂಗಹಬ್ಬ

“ಸುಮನಸಾ ಕೊಡವೂರು” ಸಂಸ್ಥೆದ ರಂಗಹಬ್ಬದ 6ನೇ ದಿನದ ಕಾರ್ಯಕ್ರಮಡ್  ಜಯಕರ ಶೆಟ್ಟಿ ಇಂದ್ರಾಳಿ

ಸಂಘಟನೆದ  ಶಿಸ್ತು ಮಾತೆರೆಗುಲಾ ಮಾದರಿ

ಉಡುಪಿ: ಸುಮನಸಾ ಸಂಘಟನೆದ  ಶಿಸ್ತು, ಸಾಮಾಜಿಕ ಕಳಕಳಿ  ಮಾತೆರೆಗುಲಾ ಮಾದರಿ ಪಂಡುದು ತುಳುಕೂಟದ ಅಧ್ಯಕ್ಷ ಜಯಕರ ಶೆಟ್ಟಿ ಇಂದ್ರಾಳಿ ಪಂಡೆರು.

ಕನ್ನಡ ಬೊಕ್ಕ  ಸಂಸ್ಕೃತಿ ಇಲಾಖೆದ  ಸಹಯೋಗಡ್ ಮುಲ್ಪದ  ಭುಜಂಗಪಾರ್ಕ್ ಬಯಲು ರಂಗಮಂದಿರಡ್ ನಡತೊಂದುಪ್ಪುನ  ಸುಮನಸಾ ಕೊಡವೂರು ಸಾಂಸ್ಕೃತಿಕ ಸಂಘಟನೆದ 12ನೇ ವರ್ಷದ ರಂಗಹಬ್ಬದ 6ನೇ ದಿನದ ಕಾರ್ಯಕ್ರಮಡ್ ಆರು  ಪಾತೆರಿಯೆರು.

ಯುವಜನತೆ  ಇಂಚಿನ ಚಟುವಟಿಕೆಲೆಡ್  ತೊಡಗಿಸಾವೊಂಬಿನವ್  ಕಡಿಮೆಯಾತುಂಡ್. ಇಂಚಿನ ಸಂದರ್ಭಡ್  60ಕ್ ಲಾ  ಜಾಸ್ತಿ  ಯುವಜನಕ್ಲೆನ್  ಒಂಜಿ ಕಡೆ ಸೇರಿಸಾವೊಂದ್  ಅಕ್ಲೆನ ಪ್ರತಿಭೆಲೆನ್  ಅನಾವರಣ ಮಲ್ಪರೆಗ್ ಅವಕಾಶ ಕೊರೊಂದ್ , ಸಮಾಜಡುಪ್ಪುನ  ಪ್ರತಿಭೆಲೆನ್  ಗುರುತಿಸಾವೊಂದ್ ಗೌರವಿಸಾವೊಂದ್ ಬರೊಂದುಪ್ಪುನವ್  ಮಹತ್ವದ ಕೆಲಸ ಪಂಡುದ್  ಪುಗಾರಿಯೆರ್.

ಶಿಕ್ಷಣದ ಬಗ್ಗೆ, ರಂಗಶಿಕ್ಷಣದ ಬಗ್ಗೆ, ಸಮಾಜದ ಬಗ್ಗೆ ಚಿಂತನೆ ದೀಯೊಂದ್  ಕೆಲಸ ಮಲ್ತೊಂದುಪ್ಪುನ  ಸುಮನಸಾ ಸಂಘಟನೆ ರಾಜ್ಯ ಬೊಕ್ಕ ದೇಶದ ಬೇತೆ ಬೇತೆ  ಕಡೆಟ್  ರಂಗತಂಡಲೆನ್  ಲೆತ್ತುದ್  ಅಲ್ಪದ  ಸಾಂಸ್ಕೃತಿಕ ಜಗತ್ತುನ್  ಮುಲ್ಪದ ಜನಕ್ಲೆಗ್  ಪರಿಚಯ ಮಲ್ತೊಂದ್ ಬೖದುಂಡ್ ಪಂಡುದು ತೆರಿಪಾಯೆರು.

ಕಿನ್ನ  ಜೋಕ್ಲೆಗ್  ರಂಗಶಿಸ್ತು ಮೂಡಿಸಾವುನ  ಕೆಲಸ ಮುಲ್ಪ  ನಡತೊಂದುಂಡ್. ಮಾತಾ ರಂಗ ಸಂಘಟನೆಲೆಗ್ ಉಂದು ಮಾದರಿ ಪಂಡುದು ಪಂಡೆರು.

ಕಲಾವಿದ ಮಧುಕರ ಸನೀಲ್‌ ಉದ್ಯಾವರ ಅರೆಗ್ ರಂಗಸಾಧಕ ಸನ್ಮಾನ ಕೊರ್ದ್  ಮಾನಾದಿಗೆ ನಡತುಂಡ್. ಮಲ್ಪೆ ಬಿಲ್ಲವ ಸೇವಾ ಸಂಘದ ಅಧ್ಯಕ್ಷ ಗೋಪಾಲ ಸಿ. ಬಂಗೇರ, ಉಡುಪಿ ನಗರಸಭೆ ವಿಪಕ್ಷ ನಾಯಕ ರಮೇಶ್ ಕಾಂಚನ್, ಮುದ್ರಣ ಮಾಲೀಕರ ಸಂಘದ ಕಾಪು ವಲಯ ಅಧ್ಯಕ್ಷ ಸುಧೀರ್ ಡಿ. ಬಂಗೇರ, ಕೀಳಂಜೆ ಬಿ.ವಿ. ಹೆಗ್ಡೆ ಹಿರಿಯ ಪ್ರಾಥಮಿಕ ಶಾಲೆದ ಮುಖ್ಯೋಪಾಧ್ಯಾಯ ಸಖಾರಾಮ್‌ ಶೆಟ್ಟಿ, ಕೊಡವೂರು ಉದ್ಯಮಿ ರಾಮಚಂದ್ರ ಕರ್ಕೇರ, ಕರಾವಳಿ ಕ್ರೆಡಿಟ್‌ ಕೋ ಆಪರೇಟಿವ್‌ ಸೊಸೈಟಿ ಅಧ್ಯಕ್ಷ ಉಮೇಶ್‌ ಶೆಟ್ಟಿ, ಮಲ್ಪೆ ಉದ್ಯಮಿ ಪ್ರಕಾಶ್ ಬಂಗೇರ, ಸುಮನಸಾ ಅಧ್ಯಕ್ಷ ಪ್ರಕಾಶ್ ಜಿ., ದಿವಾಕರ್ ಕಟೀಲ್‌, ಅಶೋಕ್ ಅಮ್ಮುಂಜೆ ಉಪಸ್ಥಿತರಿತ್ತೆರು.

ಯೋಗೀಶ್‌ ಕೊಳಲಗಿರಿ ಸ್ವಾಗತ ಮಲ್ತೆರು. ಶ್ರೀವತ್ಸ ರಾವ್‌ ವಂದಿಸಾಯೆರು. ಅಕ್ಷತ್‌ ಅಮೀನ್ ಕಾರ್ಯಕ್ರಮ ನಿರೂಪಣೆ ಮಲ್ತೆರು.‘ಸಮುದಾಯ ಬೆಂಗಳೂರು’ ಕಲಾವಿದರೆಡ್ದ್  ‘ಕರಿಯ ದೇವರ ಹುಡುಕಿ’ ನಾಟಕ ಪ್ರದರ್ಶನ ನಡತುಂಡ್.