ತುಳುಟ್ ಪಾತೆರ್ದ್ ತುಳು ಬಾಸೆಗ್ ಮಾನಾದಿಗೆ ಕೊರಿನ ಒಡಿಪು ಜಿಲ್ಲಾಧಿಕಾರಿ: ಕೂರ್ಮಾ ರಾವ್..

ಮಾತೆರೆಗ್ಲಾ ಸೊಲ್ಮೆಲು,ಪಂಡುದ್ ಕಾರ್ಯಕ್ರಮೊಡ್ ಪಾತೆರ್ನಗ ಸುರುಕ್ಕಾದ್ ತುಳುಟ್ ಪಾತೆರ್ದ್ ತುಳುಬಾಸೆಗ್ ಒಡಿಪು ಜಿಲ್ಲಾಧಿಕಾರಿ ಕೂರ್ಮಾ ರಾವ್ ಮಾನಾದಿಗೆ ಸಂದಾಯ್ತ ಮಲ್ತೆರ್.ಕನ್ನಡದ ಭಾಗೊಡ್ ಬತ್ತಿನಾರಾಂಡಲಾ ತುಳುವಪ್ಪೆಗ್ ಮಾನಾದಿಗೆ ಕೊರೊಡ್ ಪನ್ಪಿನ ದಿಟ್ಟಿಡ್ ಜಿಲ್ಲಾಧಿಕಾರಿ ಪೊರ್ಲುಡೆ ಪಾತೆರಿಯೆರ್.
ಕಟಪಾಡಿ ಪೇಟೆಬೆಟ್ಟು ಬಬ್ಬುಸ್ವಾಮಿ ದೈವಸ್ಥಾನದ ಅಂಗಣೊಡ್ ನಡತಿನ ತುಳುನಾಡ್ದ ಕರ್ಣೆ ಪಂಡುದೇ ಪುಗಾರ್ತೆನ್ ಪಡೆದಿನ ರವಿ ಕಟಪಾಡಿ ಮೇರ್ ಏಸ ಪಾಡ್ದ್ ಐಟ್ ಒಟ್ಟಾಯಿನ ಪಣವುನ್ ಸೀಖ್ ಡ್ ನರಳೊಂದುಪ್ಪುನ ಬಡಜೋಕ್ಲೆಗ್ ಸಹಾಯಹಸ್ತ ಕೊರ್ಪಿನ ಕಜ್ಜೊಡ್ ಮಲ್ಲ ಬಿನ್ನೆರಾದ್ ಪಾತೆರಿಯೆರ್.ಈ ಪೊರ್ತುಡ್ ಆರ್ ರವಿ ಕಟಪಾಡಿ ಬೊಕ್ಕ ತಂಡದಕ್ಲೆನ ಸೇವೆನ್ ಮೆಚ್ಚಿದ್ ಕೊಂಡಾಡಿಯೆರ್.
ಕಾರ್ಯಕ್ರಮದ ವೇದಿಕೆಡ್ ಕೇಮಾರು ಮಠತ್ತ ಶ್ರೀ ಶ್ರೀ ಈಶ ವಿಠ್ಠಲದಾಸ ಸ್ವಾಮೀಜಿ,ತುಳುಸಾಹಿತ್ಯ ಅಕಾಡೆಮಿದ ಅಧ್ಯಕ್ಷೆರಾಯಿನ ದಯಾನಂದ ಕತ್ತಲ್ ಸಾರ್,ರವೀಂದ್ರ ಹೆಗ್ಡೆ,ಕಟಪಾಡಿ ಪೇಟೆಬೆಟ್ಟು ಬಬ್ಬುಸ್ವಾಮಿ ದೇವಸ್ಥಾನದ ಗುರಿಕಾರೆರಾಯಿನ ಹರಿಶ್ಚಂದ್ರ ಪಿಲಾರು,ಉಡುಪಿದ ಪೋಲಿಸ್ ಅಧೀಕ್ಷಕೆರಾಯಿನ ಅಕ್ಷಯ್ ಮಚ್ಚೀಂದ್ರ,ಯಜ್ಞೇಶ್ ಬರ್ಕೆ,ಮಹೇಶ್ ಶೆಣೈ,ರವಿ ಕಟಪಾಡಿ ಉಪಸ್ಥಿತರಿತ್ತೆರ್.
ಕರಿನ 8‌ವರ್ಸೊಡಿಂಚಿ ಒಟ್ಟು 1 ಕೋಟಿ 4‌ಲಕ್ಷದ 30 ಸಾವಿರದ 685 ರೂ.ಪಣವುನ್ ಸಹಾಯಹಸ್ತ ಕೊರ್ದ್ ಜೋಕ್ಲೆನ ಪಾಲ್ ಗ್ ಆಶಾಕಿರಣ ಆಯಿನ ರವಿಕಟಪಾಡಿ ಬೊಕ್ಕ ತಂಡದಕ್ಲೆನ್ ಬತ್ತಿನ ಬಿನ್ನೆರ್ ಕೊಂಡಾಡಿಯೆರ್..ಈ ಪೊರ್ತುಡ್ ರವಿ ಕಟಪಾಡಿ ಬೊಕ್ಕ ಮೆರೆನ ಅಮ್ಮ ದೇವಿ ಮೆರೆಗ್ ತಂಡದ ವತಿಡ್ದ್ ಮಾನಾದಿಗೆ ನಡತುಂಡ್.