ಶಶಿ ಬಂಡಿಮಾರ್ ಗ್ ತುಳು ಸಂಘಟನೆಲೆರ್ದ್ ಶ್ರದ್ಧಾಂಜಲಿ ಸಭೆ.

ಸಾರ ಸಾರ ಜನ “ಶಶಿ”ಆದ್ ಮೂಡ್ದು ಬರೊಡು

ಕುಡ್ಲ : ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ, ತುಳುನಾಡ ರಕ್ಷಣಾ ವೇದಿಕೆ ಬೊಕ್ಕ ಸರ್ವ ತುಳು ಸಂಘಟನೆಲೆನ ಒಟ್ಟುಸೇರಿಗೆಡ್ ಟೈಮ್ಸ್ ಆಫ್ ಕುಡ್ಲ ತುಳು ಪತ್ರಿಕೆದ ಪ್ರಧಾನ ಸಂಪಾದಕೆರ್ ಶಶಿ ಆರ್. ಬಂಡಿಮಾರ್ ಮೆರೆನ ಸೂತಕದ ಸಭೆ ಫೆ.7 ಸುಕ್ರಾರ ತುಳು ಭವನದ ಸಿರಿ ಚಾವಡಿಡ್ ನಡತ್ಂಡ್.

ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರೆ ತಾರನಾಥ್ ಗಟ್ಟಿ ಮೇರ್ ಶಶಿ ಮೆರೆನ ಭಾವಚಿತ್ರೊಗು ಪುರ್ಪದ ಅರ್ಪಣೆ ಮಲ್ತ್ ಪಾತೆರ್ದ್, ತುಳುತ್ತ ಬಗೆಟ್ಟ್ ಮಸ್ತ್ ಮೋಕ್ಯೆ, ತುಳುವೆರ್ನ ಬಗ್ಗೆ ಮಸ್ತ್ ಕಾಳಜಿ ಇತ್ತಿನ ನಿಸ್ವಾರ್ಥ ಬೊಕ್ಕ ಪ್ರಾಮಾಣಿಕ ವ್ಯಕ್ತಿ ಶಶಿ ಬಂಡಿಮಾರ್. ಅರೆನ ಮರಣ ತುಳುವೆರೆಗೆ ಭಾರಿ ಮಲ್ಲ ನಷ್ಟ. ತುಳುನಾಡ್ ಗೇ ದುಃಖದ ವಿಷಯ. ಆಂಡ ಆರ್ ಮಲ್ದಿನ ಬೇಲೆ ದುಂಬರಿಯೊಡಾಂಡ ಸಾರ ಸಾರ ಜನ “ಶಶಿ” ಯಾದ್ ಮೂಡುದು ಬರೊಡು ಪಂಡೆರ್.
ಕನ್ನಡ ಸಾಹಿತ್ಯ ಪರಿಷತ್ ದ ಮಾಜಿ ರಾಜ್ಯಾಧ್ಯಕ್ಷೆರ್ ಧರ್ಮದರ್ಶಿ ಹರಿಕೃಷ್ಣ ಪುನರೂರು ಪಾತೆರ್ದ್,ಶಶಿನಂಚಿನ ಅಪ್ಪಟ ತುಳುವನ್ ನಮನ್ ಕಳೆವೊಂದ. ಒಂಜಿ ಕಾಲೊಡು ಪ್ರತ್ಯೇಕ
ತುಳು ರಾಜ್ಯದ ವಿಷಯ ಬನ್ನಗ ಅಯಿಕ್ಕ್ ಗಟ್ಟಿ ಸೊರೊಟ್ಟು ಬೆರಿಬಲ ಕೊರ್ತೆರ್ ಪಂದ್ ನೆಂಪು ಮಲ್ತೆರ್.

ಅಖಿಲ ಭಾರತ ತುಳು ಒಕ್ಕೂಟದ ಅಧ್ಯಕ್ಷೆರ್ ಎ.ಸಿ.ಭಂಡಾರಿ ಮೇರ್ ಪಾತೆರ್ದ್, ತುಳು ಬಾಸೆ ಅಧಿಕೃತ ಆಪಿನ ಕೆಲಸೊಗು ಫೋರ್ಸ್ ಬೋಡು ಪಂದ್ ಶಶಿಗ್ ಪಂಡ್ ದಿತ್ತೆ. ಅಯಿಕ್ಕ್ ಬೋಡಾದ್ ಆರ್ ಮಸ್ತ್ ಬೇಲೆ ಮಲ್ದೆರ್. ಅರೆನ ಸ್ನೇಹ ಪ್ರೀತಿ ಮದಪರೆ ಆವಂದಿನ ಪಂದ್ ಪಂಡೆರ್.

ಶಶಿ ಬಂಡಿಮಾರ್ರೆನ ಅಣ್ಣೆ, ನಿವೃತ್ತ ಯೋಧೆ ವಿನೋದ್ ಪಾತೆರ್ದ್ , ತುಳು ಬಾಸೆಗಾದ್ ಹೋರಾಟ ಮಲ್ತಿನ ಶಶಿಲ ಒರಿ ಯೋಧೆ. ಆರೆನ ಬಗ್ಗೆ ಎಂಕ್ಲೆಗ್ ಮಸ್ತ್ ಪ್ರೀತಿ ಉಂಡು. ಆರೆನ ಜನಪ್ರಿಯತೆದ ಬಗೆಟ್ಟ್ ಅಭಿಮಾನ ಉಂಡು ಪಂಡೆರ್.

ಡಾ.ವೈ.ಎನ್. ಶೆಟ್ಟಿ ಪಾತೆರ್ದ್, ಬಂಡಿಮಾರ್ ಪತ್ರಿಕೆ ಮಲ್ಪುನಗ ಮಸ್ತ್ ಸವಾಲ್, ಸಮಸ್ಯೆಲೆನ್ ಎದುರಿಸಾದಿತ್ತೆರ್.ಅರೆನ ತುಳು ಸೇವೆದ ಪಜ್ಜೆ ಗುರ್ತನ್ ತುಳುವೆರ್ ಮದಪರೆ ಬಲ್ಲಿ.ಅರೆನ ಕುಟುಂಬದಕ್ಲೆಡ ಪಾತೆರ್ದ್ ಪತ್ರಿಕೆ ನಡಪುಲೆಕ ಮಲ್ತ್ಂಡ ಆತ್ಮೊಗು ಶಾಂತಿ ತಿಕ್ಕುಂಡು ಪಂದ್ ಪಂಡೆರ್.
ಮಂಗಳೂರು ತುಳು ಕೂಟದ ಅಧ್ಯಕ್ಷೆರ್ ಪ್ರೇಮಾ ದಾಮೋದರ ನಿಸರ್ಗ ಮೇರ್,ಪಾತೆರ್ದ್ ಶಶಿರಾಜ್ ಪುದರ್ ತುಳುನಾಡ್ ಡ್ ಶಾಶ್ವತವಾದ್ ಒರಿಯೊಡು ಪಂಡೆರ್.
ತುಳುನಾಡ ಬಂಟ ಮಹಿಳಾ ಸಂಘದ ಶಮೀನಾ ಆಳ್ವ ಪಾತೆರ್ದ್, ಶಶಿ ಎನ್ನ ಮೆಗ್ಯೆನ ಸ್ಥಾನ ಕೊರ್ತೆ. ಎಂಕ್ಲೆನ ಸಂಘಟನೆದ ಕಾರ್ಯಕ್ರಮೊಕ್ಕು ವರದಿ ಮಲ್ಪರೆ ಆರ್ ಪ್ರತಿನಿಧಿಲೆನ್ ಕಡಪುಡೊಂದಿತ್ತ್ ದ್ ಪ್ರೋತ್ಸಾಹ ಮಲ್ದೆರ್ ಪಂದ್ ನೆಂಪು ಮಲ್ತೆರ್.

ತುಳು ವರ್ಲ್ಡ್ ಫೌಂಡೇಶನ್ ದ ಡಾ.ರಾಜೇಶ್ ಆಳ್ವ ಪಾತೆರ್ದ್, ಶಶಿ ಉಪ್ಪಂದೆ ಎಂಕ್ಲೆಗಿಜ್ಜಿ ಇಜ್ಜಿ ಕುಷಿ ಪಂಡೆರ್. ಯಾನ್ ಸೋಪುನ ಪೊರ್ತುಡು ಶಶಿಯಣ್ಣೆ ಆದೆರ್ತೆರ್. ತುಳು ಪನ್ಪಿನ ಅರೆನ ನರನಾಡಿಡ್ ಉಂಡು. ಶಶಿನ ನೆಂಪು ಒರಿಯರೆ ಪ್ರತಿಯೊರಿಲ ಸೇರೊಡು.ಕಲ್ಮಶ ಇಜ್ಜಾಂದಿನ ಪ್ರೀತಿ ಶಶಿನವು. ಶಶಿ ನಮ್ಮೊಟ್ಟುಗು ಇಜ್ಜೆರ್ , ಆಂಡ ತುಳುತ್ತ ತೇರ್ ಒಯಿಪರೆ ಮಾತೆರ್ಲ ಶಶಿ ಆವೊಡು ಪಂದ್ ಪಂಡೆರ್.

ಕಾಂಗ್ರೆಸ್ ಮುಖಂಡೆರ್ ದಿನೇಶ್ ಕುಂಪಲ ಪಾತೆರ್ದ್, ಶಶಿಯಣ್ಣೆ ಒರಿ ಸಂಶೋಧಕೆ. ತುಳು ಪಂಡ ಅರೆನ ಜೀವ. ಅವೆನ್ ಆರ್ ರಕ್ತಗತ ಮಲ್ತೊಂದೆರ್. ಹೋಟೆಲ್ದ ಬೇಲೆದಕುಲು ಬೇತೆ ಬಾಸೆ ಪಾತೆರೊಂದಿತ್ತೆರ್ಡ ಅಕ್ಲೆಗ್ ತುಳು ಪಾತೆರೊಡು ಪಂದ್ ಪಂಡ್ ದಿತ್ತೆರ್. ಸೈನಗ ಅಕ್ಲೆನ ವಿರೋಧಿಲೆನಲ ಕಣ್ಣ್ ಡ್ ನೀರ್ ಬರ್ಪುಂಡು ಪನ್ಪಿನೆಕ್ಕ್ ಶಶಿಯಣ್ಣನ ಮರಣನೇ ಸಾಕ್ಷಿ.
ಶಶಿಯಣ್ಣನ ಪುದರ್ ಡ್ ಪ್ರಶಸ್ತಿನ್ ಕೊರ್ಪಿನ ಬೇಲೆ ಮಲ್ಪೊಡು ಪಂಡೆರ್.

ತುಳುವೆರೆ ಕಲ ಗುರ್ಕಾರ್ದಿ , ಬರವುಗಾರ್ತಿ ಗೀತಾ ಲಕ್ಷ್ಮೀಶ್ ಪಾತೆರ್ದ್, ಜೈ ತುಲುನಾಡ್ ದ ತುಳು ಲಿಪಿ ಕಲ್ಪಾವುನ ಕೆಲಸಗ್ ಬೆರಿಬಲ ಕೊರ್ತಿನಾರ್ ಶಶಿ ಸರ್.ಅರೆನ ಜೀವನನೇ ತುಳುಕಾದ್ ಮುಡಿಪಾದ್ ದೀತೆರ್. “ತುಲುವ ನೇಸರೆ” ಪನ್ಪಿ ಬಿರ್ದ್ ಕೊರ್ತಿನೆಕ್ಕ್ ಸಾರ್ಥಕತೆ ಉಂಡು ಪಂದ್ ಪಂಡೆರ್.

ತುಳುನಾಡ ಧ್ವನಿ ಮೀಡಿಯಾದ ಯಶೋದ ಕೇಶವ್ ಪಾತೆರ್ದ್,ನಮ ತುಳುನಾಡ್ ಆಸ್ತಿನ್ ಕಳೆವೊಂಡ. ಶಶಿ ಸರ್ ನ ಬಿಲೆ ಗೊತ್ತಾತಿಜಿ. ಇತ್ತೆ ಗೊತ್ತಾವೊಂದುಂಡು ಪಂಡೆರ್.

ಟೈಮ್ಸ್ ಆಫ್ ಕುಡ್ಲ ಪತ್ರಿಕೆದ ವ್ಯವಸ್ಥಾಪಕೆರ್ ಭುವನಾ ದಿನೇಶ್ ಪಾತೆರ್ದ್, ಶಶಿಯಣ್ಣೆ ಎಂಕ್ಲೆನ್ ದಣಿಲೆಕ ತೂತುಜೆರ್. ಕುಟುಂಬದ ಸದಸ್ಯೆರ್ ಲೆಕ ತೂವೊಂದಿತ್ತೆರ್. ತುಳು ಪತ್ರಿಕೆ ಅರೆನ ಒಂಜಿ ಮಲ್ಲ ಕನ. ಅವೆನ್ ಒರಿಪಾವರೆ ಪ್ರೋತ್ಸಾಹ ಮಲ್ಪುಲೆ ಪಂಡೆರ್.

ಉದ್ಯಮಿ ಬಬಿತಾ ಶೆಟ್ಟಿ ಪಾತೆರ್ದ್, ಎಂಕ್ ತುಳು ಬರೆಯೆರೆ ಕಲ್ಪಾದಿನಿ ಶಶಿ. ಎಂಕ್ಲೆನ ಪ್ರತಿಯೊಂಜಿ ಕಾರ್ಯಕ್ರಮಲ ಕ್ಕ್ ಲ ಪ್ರೋತ್ಸಾಹ ಮಲ್ತ್ ದಿತ್ತೆರ್ ಪಂದ್ ನೆಂಪು ಮಲ್ತೊಂಡೆರ್.

ಅಖಿಲ ಭಾರತ ತುಳು ಒಕ್ಕೂಟದ ಪ್ರಧಾನ ಕಾರ್ಯದರ್ಶಿ ಪಿ.ಎ. ಪೂಜಾರಿ,
ಕನ್ನಡ ಸಂಸ್ಕೃತಿ ಇಲಾಖೆದ ರಾಜೇಶ್,
ತುಳು ಚಿತ್ರ ನಿರ್ದೇಶಕೆರ್ ಇಸ್ಮಾಯಿಲ್ ಮೂಡುಶೆಡ್ಡೆ,
ತುಳುನಾಡು ಟ್ರಸ್ಟ್ ದ ಜಿ.ವಿ.ಎಸ್. ಉಳ್ಳಾಲ್, ಭಾರತಿ ಶೆಟ್ಟಿ, ವೈ.ವಿ. ಶೆಟ್ಟಿ, ಜೈ ತುಲುನಾಡ್ ದ ಅಧ್ಯಕ್ಷೆರ್ ಉದಯ ಪೂಂಜ, ಕಿರಣ್ ತುಳುವೆ, ಪ್ರಶಾಂತ್ ಭಟ್ ಕಡಬ, ಪವನ್ ರಾಜ್ ಮೊಕುಲು ಮಾತ ಇತ್ತೆರ್.
ಈ ಸಭೆಟ್ಟ್ ಮಾತ ತುಳು ಸಂಘಟನೆದಕುಲು, ಟೈಮ್ಸ್ ಆಫ್ ಕುಡ್ಲ ಪತ್ರಿಕೆದ ಸಿಬ್ಬಂದಿಲು ಪಾಲ್ ಪಡೆದಿತ್ತೆರ್.

ತುಳುಕ್ಕು ಬೋಡಾದ್ ಶಶಿ ಸಂಘರ್ಷೊಗುಲ ತಯಾರಾದಿತ್ತೆರ್ : ಡಾ.ಆಕಾಶ್ ರಾಜ್ ಜೈನ್

ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಸದಸ್ಯೆರ್ ಡಾ.ಆಕಾಶ್ ರಾಜ್ ಜೈನ್ ಪಾತೆರ್ದ್, ಶಶಿಯಣ್ಣನ ಮರಣ ತುಳುಕ್ಕು ಭಾರಿ ಮಲ್ಲ ಪೆಟ್ಟ್.ತುಳುನಾಡ್ ಗೇ ಗ್ರಹಣ ಪತ್ತಿಲೆಕ್ಕಾತ್ಂಡ್. ಕೊರೊನಾ ಕಾಲಡ್ ಪೇಪರ್ ನಡಪುನ ಕಷ್ಟದ ಬಗ್ಗೆ ನಿತ್ಯ ಚರ್ಚೆ ಮಲ್ತೊಂದಿತ್ತೆರ್. ಪ್ರಿಂಟ್ ಕಾಸ್ಟ್ ಕಮ್ಮಿ ಪತ್ರಿಕೆದ ಗಾತ್ರ ಎಲ್ಯ ಮಲ್ಪರೆ ಸಲಹೆ ಕೊರ್ದಿತ್ತೆ. ಆಂಡ ಓದುಗೆರೆಗ್ ತೊಂದರೆ ಆವರೆ ಬಲ್ಲಿ ಪಂದ್ ಆರ್ ಒಪ್ಪಿದಿಜೆರ್. ಕೊರೊನಾ ಕರೊ ಪೆಟ್ಟಿಗೆ ನಾಗಾಲ್ಯಾಂಡ್ ದ ಅರೆನ ಬೇಲೆದಕ್ಲೆಗ್ ಕೆಲಸ ಕೊರ್ಲೆ ಪಂಡ್ ದ್ ನಡುರಾತ್ರೆ ಒಡಿಪುದ ಪೇಂಟೆಡ್ ಪ್ಯಾಂಪ್ಲೆಟ್ ಅಂಟಾದಿತ್ತೆರ್. ಕಾರ್ಲಡ್ ರಾಜ್ಯೋತ್ಸವದಾನಿ ತುಳು ಬಾವುಟ ಪಾಡಿನೆಕ್ಕ್ ವಿರೋಧ ಬನ್ನಗ ತುಳುಕ್ಕೂ ಬೋಡಾದ್ ಸಂಘರ್ಷಗ್ ತಯಾರಾದಿತ್ತೆರ್. ತುಳುಕ್ಕು ನನೊಂಜಿ ಬಂಡಿಮಾರ್ ಪುಟುದು ಬರೊಡು. ಅರೆನ ನೆಂಪು ದೀಪುನ ಗೌರವಾರ್ಥವಾದ್, ಸಭಾಂಗಣ, ಲೈಬ್ರೆರಿ ಅರೆನ ಪುದರ್ ದೀವೊಡು ಪಂದ್ ಪಂಡೆರ್.

ತುಳು ಅಪ್ಪೆನ ಬಂಡಿದ ಬಲ್ಲ್ ಕಡಿದ್ ಪೋಂಡು : ದಯಾನಂದ ಕತ್ತಲ್ ಸಾರ್

“ತುಳು ಅಪ್ಪೆನ ಬಂಡಿದ ಬಲ್ಲ್ ಮಂಜೊಟ್ಟಿಡೇ ಕಡಿದ್ ಒರಿದ್ ಪೋಂಡ ತುಳು ಅಪ್ಪೆನ ಬಂಡಿನ್ ಗಟ್ಟಿಡ್ ಒಯಿಪುನು ಏರ್ ಪನ್ಪಿನ ಪ್ರಶ್ನೆ ಶಶಿ ಬಂಡಿಮಾರ್ ನ ನಿಧನೊರ್ದು ಬೊಕ್ಕ ಮೂಡ್ದುಂಡು” ಪಂದ್ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಅಧ್ಯಕ್ಷೆರ್ ದಯಾನಂದ ಕತ್ತಲ್ ಸಾರ್ ಪಂಡೆರ್. ತುಳು ಪನ್ಪಿನ ನೀಲಾಕಾಶದ ಚಂದ್ರಗ್ ಗ್ರಹಣ ಪತ್ ದಿನತ್ತ್. ಚಂದ್ರೆನೇ ಇಜ್ಜಿ ಪನ್ಪಿಲೆಕಾತ್ಂಡ್. ಅಂಚಿನ ಶಶಿ ಬಂಡಿಮಾರ್ರೆಗ್
ತುಳುತ್ತ ತುಡಿತ ಮಸ್ತ್ ಇತ್ತ್ಂಡ್.ತುಳುಕ್ಕಾದ್ ಮಸ್ತ್ ಹಟ ಚದಿತ್ತ ಮನುಷ್ಯೆ.ಅಕಾಡೆಮಿದ ಗುರ್ಕಾರೆ ಆದುಪ್ಪುನಗ ಕಾರ್ಯಕ್ರಮಕ್ಕ್ ಮಾಧ್ಯಮದಕ್ಲೆನ್ ಲೆಪ್ಪುನಗ ತುಳು ಪತ್ರಿಕೆನ್ ಸುರು ಲೆಪ್ಪೊಡು ಪಂದ್ ಪಂಡ್ ದಿತ್ತೆರ್ ಶಶಿ. ತುಳು ಲಿಪಿತ್ತ ಯುನಿಕೋಡ್ ದ ಬೇಲೆದ ಜಬದಾರಿನ್ ಅಕಾಡೆಮಿ ಒಯಿಸೊನ್ನಗ ಕುಷಿ ಪಡೆದಿತ್ತೆರ್ ಶಶಿ .ಕರಾವಳಿ ಉತ್ಸವದ ಬದಲ್ ತುಳುನಾಡ ಉತ್ಸವ ಮಲ್ಪೊಡು ಪಂದ್ ಹೋರಾಟ ಮಲ್ದಿನಾರ್ ಶಶಿ. ಅರೆನ ಟೈಮ್ಸ್ ಆಫ್ ಕುಡ್ಲ ಪತ್ರಿಕೆಡ್ “ದೈವದ ನಡೆ” ಪನ್ಪಿನ ಅಂಕಣ ಬರೆಯರೆ ಅವಕಾಶ ಮಲ್ತ್ ಕೊರ್ತೆರ್. ಅಂಚಿನ ಮಲ್ಲ ಸಾಧಕೆ ಶಶಿ ಬಂಡಿಮಾರ್ರೆನ ಪತ್ರಿಕೆಗ್ ಎನ್ನ ಅವಧಿಡ್ ತುಳು ಅಕಾಡೆಮಿರ್ದ್, ರಾಜ್ಯ ಮಾಧ್ಯಮ ಪ್ರಶಸ್ತಿ ಕೊರ್ತಿಜಿಡ ಮಲ್ಲ ಬೇನೆ ಆತು ಪಂದ್ ಪಂಡೆರ್.
ಅರೆನ ಕುಟುಂಬದಕ್ಲೆನ ಮನ ಒಲಿಕೆ ಮಲ್ತ್ ದ್ ಟ್ರಸ್ಟ್ ಮಲ್ತ್ ದ್ ಟೈಮ್ಸ್ ಆಫ್ ಕುಡ್ಲ ಪತ್ರಿಕೆನ್ ಒರಿಪೊಡು ಪಂಡೆರ್.
ತುಳುಕ್ಕು ಸೇವೆ ಮಲ್ದಿನಕುಲು ದೇವೆರೆ ಪಾದ ಸೇರ್ನಗ ಉಂದುವೇ ಸುರುತ್ತ ಸರ್ತಿ ಪಾರ್ಥಿವ ಶರೀರೊಗು ತುಳು ಕೊಡಿ ಪಾಡುನ ಸಂಪ್ರದಾಯ ಶಶಿಯಣ್ಣನ ಮುಕೇನ ಸುರು ಆಂಡ್. ತುಳುಕ್ಕಾದ್ ಶಶಿಯಣ್ಣನಂಚಿನ ಸಾವಿರ ಜವನೆರ್ ತಯಾರಾವೊಡು ಪಂದ್ ಪಂಡೆರ್.

ತುಳು ಭವನದ ರಂಗಮಂದಿರಗ್ ಶಶಿ ಬಂಡಿಮಾರ್ ಪುದರ್ ದೀವೊಡು: ಯೋಗೀಶ್ ಶೆಟ್ಟಿ

ತುಳುನಾಡ ರಕ್ಷಣಾ ವೇದಿಕೆದ ಅಧ್ಯಕ್ಷೆರ್ ಯೋಗೀಶ್ ಶೆಟ್ಟಿ ಜಪ್ಪು ಪಾತೆರ್ದ್, ತುಳು ಭವನಡ್ ಶಶಿ ಬಂಡಿಮಾರ್ರೆನ ಪುಟ್ಟುದಿನ ದಿನವಾಯಿನ
ಅಕ್ಟೋಬರ್ 20 ತಾರೀಕ್ ಗ್ ಪ್ರತಿವರ್ಷಲ ನೆಂಪು ಕಾರ್ಯಕ್ರಮ ಮಲ್ಪೊಡು.ತುಳು ಭವನದ ರಂಗಮಂದಿರಗ್ ಶಶಿ ಬಂಡಿಮಾರ್ ಪುದರ್ ದೀದ್ ಅರೆನ ಪುದರ್ ಶಾಶ್ವತವಾದ್ ಉಪ್ಪರೆ ಅವಕಾಶ ಮಲ್ತ್ ಕೊರೊಡು. ಅವ್ವತ್ತಾಂದೆ ತುಳುವೆರೆನ ರಕ್ಷಣೆಗಾದ್ ತುಳುವೆರೇ ಒಟ್ಟಾವೊಡು. ಮಾತ ತುಳು ಸಂಘಟನೆದಕುಲು ಒಗ್ಗಟ್ಟಾದ್ ಕೋಪ, ನಂಜಿ, ಪಗೆ ಬುಡ್ದು ಮಾತೆರ್ಲ ಒಂಜಾದ್ ತುಳು ಅಪ್ಪೆನ ಸೇವೆ ಮಲ್ಪೊಡು ಪಂಡೆರ್.