ಟೆಲಿಬರವು ತಂತ್ರಾಂಶ ಬುಡುಗಡೆ..

ತೇದಿ : 11-06-2023 ದಿನೊತಾನಿ ಜೈ ತುಲುನಾಡ್(ರಿ)ಸಂಘಟನೆದ ಟೆಲಿಬರವು ತಂತ್ರಾಂಶ ಬುಡುಗಡೆ ಲೇಸ್ ನಡತುಂಡ್.
ಲೇಸ್ ದ ಉದಿಪನ ಬೊಕ್ಕ ಟೆಲಿಬರವು ತಂತ್ರಾಂಶ ಬುಡುಗಡೆ ಸಾಂದೀಪನಿ ಸಾಧನ ಆಶ್ರಮ ಕೇಮಾರು ಮಠ ತ ಶ್ರೀ ಶ್ರೀ ಈಶವಿಠಲದಾಸ ಸ್ವಾಮೀಜಿ ಮಲ್ತುದು, ತಂತ್ರಜ್ಞಾನನ್ ನಮ ಎಡ್ಡೆ ರೀತಿಡ್ ಉಪಯೋಗ ಮಲ್ಪೋಡು ಅಂಚನೇ ಯುವಜನತೆ ನನಲಾ ಎಡ್ಡೆ ಎಡ್ಡೆ ರೀತಿದ ತಂತ್ರಾಂಶನು ಉಂಡು ಮಲ್ತುದು ತುಲುಲಿಪಿತ ಬುಲೆಚ್ಚಿಲ್ಗ್ ಬೆನೋಡ್, ಜೈತುಲುನಾಡ್ (ರಿ )ಸಂಘಟನೆ ನನ ದುಂಬಗ್ಲಾ ತುಲುಪರ ಎಡ್ಡೆ ಕೆಲಸ ಮಲ್ಪುಂಡು, ತುಲುಪರವಾದ್ ಕೆಲಸ ಮಲ್ಪುನಕುಲೆಗ್ ಖಂಡಿತವಾದ್ಲ ಬೆರಿತಾಂಗ್ ಆದ್ ಉಂತುವ ,ಈ ಬಗೆಟ್ ಮಾತ ತುಲುವೆರ್ ಸಹಕಾರ ಕೊರೊಡು ಪಂದ್ ಕೇನೊಂಡೆರ್.
ತುಳು ಲಿಪಿ ಮೂಲೆ ಮೂಲೆ ಪಸರಿಸಾವೋಡ್ ಜೈ ತುಲುನಾಡ್ ಸಂಘಟನೆ ನನಲಾ ಎಡ್ಡೆ ಕಾರ್ಯ ಮಲ್ಪೋಡ್ ಪನ್ಪುನನೆ ಎನ್ನ ಆಶಯಯಂದ್ ಪಂಡೆರ್.
ಟೆಲಿ ಬರವು ತಂತ್ರಾಂಶ ಬಿಡುಗಡೆ ಲೇಸುಗ್ ಮಲ್ಲ ಬಿನ್ನೆರಾದ್ ಬೈದಿನ ಐಕಳ ಗ್ರಾಮ ಪಂಚಾಯಿತಿದ ಒತ್ತು ಗುರ್ಕಾರ್ ಲಾಯಿನ ಶ್ರೀ ರಾಜೇಶ್ ಶೆಟ್ಟಿ ತುಲುಲಿಪಿನ್ ದೇಶದ ಮೂಲೆ ಮೂಲೆಡ್ ಪಸರಿಸವೊಂದ್ ಇಪ್ಪುನ ನಿಕ್ಲೆನ ಬೇಲೆ ಮಾತರೆಗ್ಲಾ ಮಾದರಿಯವೊಡ್ ಪನೊಂದು, ಟೆಲಿಬರವು ತಂತ್ರಾಂಶ ಉಂಡು ಮಲ್ತುನ ಜ್ಞಾನೇಶ್ ಮೆರೆಗ್ ಎಡ್ಡೆಪ್ಪು ಬಯಕಿಯೆರ್.
ಲೇಸ್ ದ ಗುರ್ಕಾರ್ಮೆ ವಹಿಸೊಂದಿನ ಶ್ರೀವಿಶು ಶ್ರೀಕೆರ ಮೆರ್ ಜೈ ತುಲುನಾಡ್ ಸಂಘಟನೆ ನನಲಾ ಎಡ್ಡೆಎಡ್ಡೆ ಕಾರ್ಯ ಮಲ್ಪರ ಉಂಡ್ ತುಲುವೆರ್ ಮಾತೆರ್ಲ ನೆಕ್ ಸಹಕಾರ ಕೊರೊಡು ಅಂಚೆನೇ ತುಲುಲಿಪಿ ಶಿಕ್ಷಕರೆಗ್ ಮಾನದಿಗೆ ತಿಕ್ಕೊಡು ತುಲುಭಾಷೆ 8ನೇ ಪರೀಚ್ಚೆದೋಗ್ ಸೇರೋಡ್ ಪಂದ್ ಲೇಸುಡ್ ಪಂಡೆರ್.

ಈ ಪೊರ್ತುಡ್ ಟೆಲಿಬರವು ಉಂಡು ಮಲ್ತಿನ ಜ್ಞಾನೇಶ್ ದೇರಳಕಟ್ಟೆ ಮೆರೆಗ್ ಮಾನದಿಗೆ ಮಲ್ತುಂಡು. ಅಂಚನೆ ಕೇಮಾರ್ ಮಠಕ್ ತುಲು ಲಿಪಿಟ್ ಬರೆತಿನ ಪುದರ್ ಪಲವೆದ ಉಧಿಪನಲಾ ನಡತುಂಡು.
ಜೈ ತುಲುನಾಡ್ ಸಂಘಟನೆದ ಸಂಘಟನಾ ಕಾರ್ಯಂತೆರಾಯಿನ ಸುಮಂತ್ ಹೆಬ್ರಿ ಮೇರ್ ಟೆಲಿಬರವುದ ಬಗ್ಗೆ ಮಾಹಿತಿ ಪಟ್ಟಿಯೇರ್. ಒತ್ತು ಕಾರ್ಯಂತೆರಾಯಿನ ಪೂರ್ಣಿಮಾ ಬಂಟ್ವಾಳ್ ಮಾನದಿಗೆ ಪತ್ರ ಓದಿಯೇರ್,ಜೈ ತುಲುನಾಡ್ ಸಂಘಟನೆದ ಪದುಕೆದಿ ಮೇಘನಾ ಸುಗಿತುದು, ಪವಿತ್ರ ಕೋಟ್ಯಾನ್ , ಅಂಚನೇ ಲೇಸ್ ನ್ ಸಂಘಟನೆದ ಪ್ರಧಾನ ಕಾರ್ಯದರ್ಶಿ ಕಿರಣ್ ತುಳುವೆ ಸುಧಾರಿಕೆ ಮಲ್ತೆರ್.
ಈ ಒಂಜಿ ಲೇಸ್ ಡ್ ಸಂಘಟನೆದ ಪದಾಧಿಕಾರಿಲು, ಪದುಕೆರ್ ಬೊಕ್ಕ ಊರುದ ಜನಮಾನಿಲು ಪಾಲ್ ಪಡೆದಿತ್ತೆರ್