ತುಳುತ್ತ ಕಮ್ಮೆನ ಕಲ್ಪಾದಿಲೆನ ಮುಖೇನ ಪರಪಾವುನ ಪ್ರಯತ್ನ ನಡಪಡ್: ಎಸ್.ಆರ್.ಬಂಡಿಮಾರ್.

ಮಂಗಳೂರು : ತುಳು ಭಾಷಾಭಿಮಾನ ಹೆಚ್ಚಾವೊಡಾಂಡ ಜೋಕ್ಲೆಗ್ ತುಳುತ್ತ ಆಸಕ್ತಿ ಪುಟ್ಟಾವುನ ಎಡ್ಡೆ. ಅಕಾಡೆಮಿ ತುಳು ಶಿಕ್ಷಕೆರೆನ ಮುಖೇನ ತುಳುತ್ತ ಕಮ್ಮೆನೊನ್ ಪರಪಾವುನ ಪ್ರಯತ್ನ ಮಲ್ತೊಂದುಪ್ಪುನವ್ವ್ ಶ್ಲಾಘನೀಯ, ತುಳು ಭಾಷೆ, ಸಂಸ್ಕೃತಿ, ರಂಗಕಲೆತ್ತ ಒಟ್ಟುಗ್ ಪರಂಪರೆನ್ ಪ್ರೋತ್ಸಾಹ ಮಲ್ಪುನವ್ ಅಕಾಡೆಮಿದ ಜವಬ್ದಾರಿ ಅವ್ವೆನ್‌ ಮಲ್ಪರೆಗ್ ಇತ್ತೆದ ಅಕಾಡೆಮಿದ ಸದಸ್ಯೆರು ಪ್ರಾಮಾಣಿಕ ಪ್ರಯತ್ನ ಮಲ್ತೊಂದುಲ್ಲೆರ್. ಪರ-ವಿರೋಧ ಸಮಾಜೊಡ್ ಇತ್ತಿನವ್ವೆ ಆಂಡ ನಮ್ಮ ಕೆಲಸ ಪ್ರಾಮಾಣಿಕತೆಡ್ ಮಲ್ತುಂಡ ತಿಕ್ಕಿನ ಗೌರವಾದರಲೆನ್ ಸಮರ್ಥವಾದ್ ನಿಭಾಯಿಸಾಯಿನ ತೃಪ್ತಿ ನಮಡ ಉಪ್ಪುಂಡ್ ಪಂಡುದ್ ಟೈಮ್ಸ್ ಆಫ್ ಕುಡ್ಲ ತುಳು ಪತ್ರಿಕೆದ ಮುಖ್ಯಸ್ಥೆರಾಯಿನ ಎಸ್.ಆರ್. ಬಂಡಿಮಾರ್ ಪಂಡೆರ್.
ಆರು ಉರ್ವಸ್ಟೋರ್‌ದ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸಿರಿ ಚಾವಡಿಡ್ ನಡತಿನ ತುಳು ಕಲ್ಪಾದಿಲೆನ ಓದು – ಬರವುದ ಕಜ್ಜಕೊಟ್ಯ ತುಳುನ್ ತೃತೀಯ ಭಾಷೆಯಾದ್ ಭೊಧನೆ ಮಲ್ಪುನ ದಕ್ಷಿಣ ಕನ್ನಡ ಬೊಕ್ಕ ಉಡುಪಿ ಜಿಲ್ಲೆದ ಶಿಕ್ಷಕೆರೆಗ್ ಶೈಕ್ಷಣಿಕ ವಿಶೇಷ ಕಾರ್ಯಾಗಾರನ್ ಉದೀಪನ ಮಲ್ತುದ್ ಆರು ಪಾತೆರಿಯೆರ್.
ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಅಧ್ಯಕ್ಷೆರಾಯಿನ ದಯಾನಂದ ಜಿ. ಕತ್ತಲ್‌ಸಾರ್ ಮೇರು ಕಜ್ಜೊದ ಅಧ್ಯಕ್ಷತೆಡಿತ್ತುದ್ , ಪಾತೆರ್ದ್ ತುಳು ಶಿಕ್ಷಕೆರೆನ ಶ್ರೇಯಸ್ಸುಗ್ ಅಕಾಡೆಮಿ ಯೇಪೊಲಾ ಬದ್ಧರಾದುಪ್ಪುವಾ. ಅಕ್ಲೆಗ್ ಭವಿಷ್ಯೊಡ್ ಭದ್ರತೆನ್ ಕೊರ್ಪಿನ ಪ್ರಯತ್ನ ಸಂಘಟನಾತ್ಮಕವಾದ್ ನಡಪೊಡ್, ತಾಲ್ಲೂಕುವಾರು ತುಳು ಸಂಘದ ಸಮಿತಿನ್ ರಚನೆ ಮಲ್ತುದ್ ತುಳು ಶಿಕ್ಷಕೆರೆನ್ ಸೇರಾದ್ ತಾಲೂಕುಡ್ ತುಳು ಭಾಷೆ, ಸಂಸ್ಕೃತಿ, ಸಂಸ್ಕಾರ, ಸಾಂಸ್ಕೃತಿಕತೆನ್ ಪ್ರತಿಬಿಂಬಿಸಾವುನ ಕೆಲಸ ನಡಪೊಡ್ ನೇಕ್ ಕೈತಲ್ ದ ಶಾಸಕೆರೆನ ಮುಖೇನ ಸರಕಾರಡ್ದುಲಾ ಅನುದಾನ ನಿರಂತರವಾದ್ ತಿಕ್ಕುಂಡ ನೆಕ್ಕೊಂಜಿ ಭದ್ರ ಬುನಾದಿಯಾಪುಂಡ್ ಪಂಡೆರ್.
ಮುಖ್ಯ ಅತಿಥಿಲಡದ್ ಮಂಗಳೂರು ಮಹಾನಗರಪಾಲಿಕೆ ಮೇಯರ್ ಪ್ರೇಮಾನಂದ ಶೆಟ್ಟಿ ಮೇರ್ ಎಡ್ಡೆಪ್ಪು ಬಯಕಿಯೆರ್.
ಸಾರ್ವಜನಿಕ ಶಿಕ್ಷಣ ಇಲಾಖೆ, ಮಂಗಳೂರು ನೆತ್ತ ಉಪ ನಿರ್ದೇಶಕೆರಾಯಿನ ಸುಧಾಕರ್ ಕೆ. ಪಾತೆರ್ದ್ , ಶಾಲೆ ಶಾಲೆಲೆಡ್ ಮಂಜೂರಾಯಿನ ಹೆಚ್ಚುವರಿ ಹುದ್ದೆ ಇತ್ತುಂಡ ಮಾತ್ರ ಅತಿಥಿ ಶಿಕ್ಷಕರ ನೇಮಕಾತಿ ಸಾಧ್ಯ,, ತುಳು ಸಂಘಟನೆಲು ಸಂಘಟಿತೆರಾದ್ ಈ ಕೆಲಸೊನ್ ಸರಕಾರದ ಮುಖೇನ ಮಲ್ತುಂಡ ಶಿಕ್ಷಕೆರೆನ್ ಕಾಡೊಂದುಪ್ಪುನ ಸಮಸ್ಯೆ ಪರಿಹಾರ ಆವರೆಗ್ ಸಾಧ್ಯ ಪಂಡೆರ್.
ಪದವಿ ಪೂರ್ವ ಕಾಲೇಜು ಉಪ್ಪುಂದದ ಪ್ರಾಂಶುಪಾಲೆರಾಯಿನ ಬಿ. ಯಾದವ ಬೊಕ್ಕ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ತುಳುಪೀಠ ಬೊಕ್ಕ ತುಳು ಸ್ನಾತಕೋತ್ತರ ಅಧ್ಯಯನ ವಿಭಾಗ ಮಂಗಳೂರು ವಿಶ್ವವಿದ್ಯಾನಿಲಯ ನೆತ್ತ ಶಿಕ್ಷಣ ಸಂಯೋಜಕೆರಾಯಿನ ಡಾ. ಮಾಧವ ಎಂ.ಕೆ ಮೊಕುಲು ಸಂಪನ್ಮೂಲ ವ್ಯಕ್ತಿಯಾದ್ ಪಾಲ್ ಪಡೆದಿತ್ತೆರ್.
ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸದಸ್ಯೆರಾಯಿನ ಸಿದ್ಧಕಟ್ಟೆ ಮಲ್ಲಿಕಾ ಶೆಟ್ಟಿ, ನಾಗೇಶ್ ಕುಲಾಲ್, ಕಲಾವತಿ ದಯಾನಂದ್, ನರೇಂದ್ರ ಕೆರೆಕಾಡು, ಚೇತಕ್ ಪೂಜಾರಿ, ಸಂತೋಷ್ ಪೂಜಾರಿ ಕಾರ್ಕಳ, ರಿಜಿಸ್ಟ್ರಾರ್ ಕವಿತಾ, ಶ್ರೀ ರಾಮಕುಂಜೇಶ್ವರ ಆಂಗ್ಲ ಮಾಧ್ಯಮ ಶಾಲೆ ರಾಮಕುಂಜದ ಕಾರ್ಯದರ್ಶಿ ಕೆ. ಸೇಸಪ್ಪ ರೈ ಉಪಸ್ಥಿತರಿತ್ತೆರ್.
ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸದಸ್ಯೆರಾಯಿನ ಸಿದ್ಧಕಟ್ಟೆ ಮಲ್ಲಿಕಾ ಶೆಟ್ಟಿ ಸೊಲ್ಮೆ ಸಂದಾಯ್ತ ಮಲ್ತೆರ್, ಕಾರ್ಯಕ್ರಮದ ಸದಸ್ಯ ಸಂಚಾಲಕೆರಾಯಿನ ಕಡಬ ದಿನೇಶ್ ರೈ ಕಾರ್ಯಕ್ರದ ನಿರೂಪಣೆ ಮಲ್ತೆರ್.