ಜೋಕ್ಲೆನ್ ಅಪ್ಪೆ ಅಮ್ಮೆ ಸುಸಂಸ್ಕೃತೆರಾದ್ ಬುಲೆಪಾಂಡ ಮಾತ್ರ ಅಕುಲು ದೇಶದ ಆಸ್ತಿ ಆವರೆಗ್ ಸಾಧ್ಯ..ಇಜ್ಜಿಡ ಏತ್ ಆಸ್ತಿ ಅಂತಸ್ತು ಇತ್ತುಂಡಲಾ ಪ್ರಯೋಜನ ಇಜ್ಜಿ ಪಂಡುದ್ ಮುನಿಯಾಲು ಉದಯ್ ಕುಮಾರ್ ಶೆಟ್ಟಿ ಪಂಡೆರ್.ಆರು ಉಡುಪಿ ಎಮ್.ಜಿ.ಎಮ್.ಕಾಲೇಜಿದ ತುಳುಸಂಘದ ನೇತ್ರತ್ವೊಡ್ ನಡತಿನ ತುಳು- ಐಸಿರಿ 2022 ಕಜ್ಜೊನ್ ಉದಿಪನ ಮಲ್ತುದ್ ಪಾತೆರಿಯೆರ್.ತುಳುನಾಡುಡ್ ತಿಕ್ಕುನ ತೆನಸುಲ್ ಬೇತೆ ಒಲ್ಪಲಾ ತಿಕ್ಕುಜಿ.ಈತ್ ಎಡ್ಡೆ ತೆನಸುಲು ಮುಲ್ಪ ಇತ್ತುಂಡಲಾ ನಮ ಪಾಶ್ಚಾತ್ಯ ತೆನಸುದಂಚಿ ಒಗ್ಗುದ್ ಪೋತಿನವ್ವ್ ಬಾರೀ ಬೇಜಾರುದ ಸಂಗತಿ.ತುಳುನಾಡುಡ್ ಪುಟ್ಟುದ್ ನಮ್ಮ ಈ ನಾಡುಗ್ ದಾದ ಕೊರ್ಪ ಪನ್ಪಿನವ್ವ್ ಬಾರೀ ಮುಖ್ಯವಾದುಂಡ್ ಪಂಡುದ್ ಆರ್ ಈ ಪೊರ್ತುಡ್ ಪಂಡೆರ್.
ಕಜ್ಜೊಡ್ ಮಲ್ಲ ಬಿನ್ನೆರಾದಿತ್ತಿನ ತುಳು ಚಲನಚಿತ್ರ ಕಲಾವಿದೆರಾಯಿನ ಅರ್ಜುನ್ ಕಾಪಿಕಾಡ್ ಪಾತೆರ್ದ್ ಪ್ತತಿಯೊಂಜಿ ತುಳುನಾಡ್ದ ಕಾಲೇಜಿಲೆಡ್ ಇಂಚ ತುಳು ಐಸಿರ ನಡಪೊಡ್.ಈ ನಿಟ್ಟುಡ್ ಉಡುಪಿ ಎಮ್.ಜಿ.ಎಮ್.ಕಾಲೇಜ್ ಬಾಕಿದ ಕಾಲೇಜಿಗ್ ಮಾದರಿಯಾತುಂಡ್.ಪಂಡೆರ್. ತುಳು ಸಿನೆಮಾಲೆನ್ ಟ್ಯಾಕೀಸ್ ಡೇ ತೂದ್ ಕಲಾವಿದೆರೆಗ್ ಪ್ರೋತ್ಸಾಹ ಕೊರ್ಲೆ ಪಂಡುದ್ ಬಿನ್ನಪ ಮಲ್ತೆರ್.
ವೇದಿಕೆಡ್ ಮಲ್ಲ ಬಿನ್ನೆರಾಯಿನ ಕುಡೊರಿ ಚಿತ್ರನಟೆ ವಿಜಯ್ ಶೋಭ್ ರಾಜ್ ಪಾವೂರು ಪಾತೆರ್ದ್ ಇನಿ ತುಳುಸಿನೆಮಾ ಕಲಾವಿದೆರ್ ಬುಲೆವೊಡಾಂಡ ತುಳುವೆರೆನ ಬೆರಿಸಹಾಯನೇ ಕಾರಣ. ಪಂಡೆರ್ .ನಮ್ಮ ಹಿರಿಯೆರ್ ಕೊರ್ತಿನ ಸಂಸ್ಕಾರೊನ್ ನಮಲಾ ದುಂಬರಿತೊಂದ್ ಪೋವೊಡ್ ಪಂಡೆರ್.
ವೇದಿಕೆಡ್ ಮಲ್ಲ ಬಿನ್ನೆರಾದಿತ್ತಿನ ಉಡುಪಿ ತುಳುಕೂಟದ ಗುರ್ಕಾರೆರಾಯಿನ ಲಯನ್ ಜಯಕರ ಶೆಟ್ಟಿ ಇಂದ್ರಾಳಿ ಪಾತೆರ್ದ್ ಸಾಂಸ್ಕೃತಿಕ ನಗರಿ ಉಡುಪಿಡ್ ಎಮ್.ಜಿ.ಎಮ್.ಕಾಲೇಜ್ ಉಡುಪಿ ಸಾಂಸ್ಕೃತಿಕ ಕಜ್ಜೊಲೆಗ್ ವಿಶೇಷ ವೇದಿಕೆ ಕಲ್ಪಿಸಾದ್ ಕೊರ್ತುಂಡ್.ನಮ್ಮ ತುಳುನಾಡುಡ್ ಮಾತಾ ಧರ್ಮೀಯೆರ್ ಉಲ್ಲೆರ್.ತುಳುಕ್ ಧರ್ಮ,ಜಾತಿ ಇಜ್ಜಿ. ಮಾನವೀಯ ಧರ್ಮೊನ್ ಅನುಕರಣೆ ಮಲ್ತೊಂದ್ ನಮ ಬದುಕೊಡ್ .ನಮ್ಮ ಸಂಸ್ಕ್ರತಿ ಅವ್ವ್ ಇಲ್ಲಡೇ ಪುಟ್ಟೊಡ್. ಪಂಡುದ್ ತೆರಿಪಾಯೆರ್.
ಕಜ್ಜೊದ ಮತ್ತರ್ಮೆಡ್ ಅಬತರ ತುಳುಸಿನೆಮಾದ ನಾಯಕೆ ಅರ್ಜುನ್ ಕಾಪಿಕಾಡ್ ಬೊಕ್ಕ ನಾಯಕಿ ನಟಿ ಗಹನಾ ಭಟ್ ಮೊಕ್ಲೆಗ್ ಮಾನಾದಿಗೆ ನಡತುಂಡ್.ಅಂಚೆನೇ ಉದ್ಯಮಿಲಾಯಿನ ಮುನಿಯಾಲು ಉದಯ್ ಕುಮಾರ್ ಶೆಟ್ಟಿ,ಜಯಕರಶೆಟ್ಟಿ ಇಂದ್ರಾಳಿ ಬೊಕ್ಕ ವಿಜಯ್ ಶೋಭರಾಜ್ ಪಾವೂರು ಮೊಕ್ಲೆನ್ ಗೌರವಿಸಾಯೆರ್ .
ಕಾಲೇಜಿದ ಪ್ರಾಂಶುಪಾಲೆರಾಯಿನ ಡಾ.ದೇವಿದಾಸ್ ನಾಯಕ್ ಕಜ್ಜೊದ ಗುರ್ಕಾರ್ಮೆಡಿತ್ತೆರ್.ತುಳು ಸಂಘದ ಸಂಚಾಲಕೆರಾಯಿನ ಡಾ.ಪು.ತಿ ವಸಂತಕುಮಾರ್ ಸ್ವಾಗತ ಪ್ರಾಸ್ತವಿಕ ಪಾತೆರಿಯೆರ್.ತುಳುಸಂಘದ ಕಾರ್ಯಂತೆ ಮೈತ್ರಿ ಕೋಟ್ಯಾನ್ ಸೊಲ್ಮೆ ಸಂದಾಯ್ತ ಮಲ್ತೆರ್.ಸುಚಿತ್ ಕೋಟ್ಯಾನ್ ಕಜ್ಜೊದ ಮದಿಪು ಕೊರಿಯೆರ್.
ಈ ಪೊರ್ತುಡ್ ಅಗಸ್ಟ್ 18 ತಾರೀಕುಗ್ ಬುಡುಗಡೆ ಆವರೆಗುಪ್ಪುನ ಅಬತರ ತುಳುಸಿನೆಮಾದ ನಿರ್ಮಾಪಕೆರಾಯಿನ ಸಂದೀಪ್ ಶೆಟ್ಟಿ, ವಿಕ್ರಮ್ ದೇವಾಡಿಗ,ಲಕ್ಷ್ಮೀಶ್ ಸುವರ್ಣ,ಸನತ್ ಶೆಟ್ಟಿ, ಯಶ್ವಿನ್,ಶಬರೀಶ್ ಮೊಕ್ಲೆನ್ ಗುರುತಿಸಾಯೆರ್.
by 