ತುಲು ಲಿಪಿ ಪುದರ್ ಪಲವೆ

ಒಡಿಪು, ದ.ಕ. ಜಿಲ್ಲೆಡ್ ಶೇ.60 ತುಳು ಲಿಪಿ ಪುದರ್ ಪಲವೆ ಪಾಡುನ ಕಾನೂನು ಜಾರಿಗ್ ಕನವರೆ ತುಳುನಾಡ ರಕ್ಷಣಾ ವೇದಿಕೆ ಆಗ್ರಹ
###
ಒಡಿಪು : ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆಗ್ ಅನ್ವಯ ಆಪಿಲೆಕ ಸಾರ್ವಜನಿಕ ಪ್ರದೇಶಡ್ ಅಂಚೆನೆ ವಾಣಿಜ್ಯ ಮಳಿಗೆದ ಪಲವೆಲೆಡ್ ಶೇ.60 ದಾತ್ ತುಳು ಲಿಪಿ ಗಲಸರೆ ಅವಕಾಶ ಮಲ್ಪರೆ ಈ ಕೂಡ್ಲೆ ವಿಶೇಷ ಆದೇಶ ಕೊರೊಡು. ತುಳುನಾಡ್ ಡ್ ತುಳು ಲಿಪಿತ್ತ ಶಿಕ್ಷಣ ಕ್ರಾಂತಿ ಏಪನೇ ಸುರುವಾದಿತ್ತ್ ದ್ 20 ಸಾರೊರ್ದುಲ ಎಚ್ಚ ವಿದ್ಯಾರ್ಥಿಲು ಪಾಸ್ ಆತೆರ್. ವಿಶ್ವವಿದ್ಯಾನಿಲಯಲೆಡ್ ತುಳು ಪಠ್ಯ ಸುರು ಆದ್ ತುಳು ಭಾಷೆದ ಬೆಳವಣಿಗೆ ಮಸ್ತ್ ಬಿರ್ಸ್ ಡ್ ಆವೊಂದುಂಡು. ಇಂಚಾನಗ ಮೂಲು ಕೆಲವೊಂಜಿ ಭಾಷೆದ ಹೋರಾಟಗಾರೆರ್ ಪನ್ಪಿನ ಸೋಗು ಪಾಡ್ದ್ ಬೇತೆ ಭಾಷೆದ ಪಲವೆಲೆಗ್ ಕರಿ ಪೂಜಿದ್ ಬೇತೆ ಭಾಷೆಲೆನ್ ದ್ವೇಷ ಮಲ್ಪುಲೆಕ ಮಲ್ತ್ ದ್ ಈ ನೆಲತ್ತ ಸೌಹಾರ್ದತೆನ್ ಹಾಳ್ ಮಲ್ಪುನ ಕೆಲಸನ್ ಕೆಲವೆರ್ ಮಲ್ತೊಂದಿತ್ತ್ ದ್ ಅಂಚಿನಕ್ಲೆನ ಮಿತ್ತ್ ನಿರ್ದಾಕ್ಷಿಣ್ಯ ಕ್ರಮ ದೆತೊಂದು ಶಾಂತಿ ಸೌಹಾರ್ದತೆ ಪುಟ್ಟಾವರೆ ಸೂಕ್ತ ಕ್ರಮ ದೆತೊನೊಡು ಪಂದ್ ತುಳುನಾಡ ರಕ್ಷಣಾ ವೇದಿಕೆದ ನಿಯೋಗದಕುಲು ಮಾ.10 ಸೋಮಾರ ಒಡಿಪು ಜಿಲ್ಲಾಧಿಕಾರಿಲೆನ್ ಭೇಟಿ ಮಲ್ತ್ ದ್ ಮನವಿ ಕೊರಿಯೆರ್ .
ಸಾರ ಸಾರ ವರ್ಷದ ಇತಿಹಾಸ ಉಪ್ಪುನ ದೈವಾರಾಧನೆ ಬೊಕ್ಕ ಶ್ರೀಮಂತ ಸಾಂಸ್ಕೃತಿಕ ವೈಶಿಷ್ಟ್ಯ ಉಪ್ಪುನ ತುಳುನಾಡ ಭಾಷೆ ತುಳು ಭಾಷೆಗೆ ಪ್ರಾಮುಖ್ಯತೆ ಕೊರೊಡು. ಈ ನೆಲತ್ತ ಅಪ್ಪೆ ಬಾಷೆಗ್ ಸುರುಕ್ಕು ಬಿಲೆ ಕೊರೊಡು. ಬೆಂಗಳೂರು, ಹಾಸನ ಮಂಡ್ಯ ಇಂಚಿನ ಬೇತೆ ಪ್ರದೇಶಡ್ ಕನ್ನಡ ಮಾತ್ರ ಉಪ್ಪುನೆರ್ದಾವರ ಅಲ್ಪ ಕಡ್ಡಾಯದ ನೀತಿ ಅನ್ವಯ ಆಪುಂಡು. ಆಂಡ ತುಳುನಾಡ್ ದ ಮಾತೆರ್ಲ ಪ್ರೀತಿ ಮಲ್ಪುನ ಬೊಕ್ಕ ಸಂಭಾಷಣೆಗ್ ಗಲಸುನ ಭಾಷೆ ತುಳು ಆಯಿನೆರ್ದಾವರ ನೆಕ್ಕ್ ಪೂರಕವಾಯಿನ ವ್ಯವಸ್ಥೆನ್ ಜಿಲ್ಲಾಡಳಿತ ಮಲ್ಪೊಡು. ಅಂಚೆನೆ ಈ ಭಾಷೆನ್ ಗೌರವಯುತವಾದ್ ಗಲಸುಲೆಕ ಆವೊಡು. ಸಾಂವಿಧಾನಿಕವಾದ್ ಒಂಜಿ ನೆಲಟ್ಟ್ ಪ್ರಾದೇಶಿಕ ಭಾಷೆ ಇತ್ತ್ಂಡ ಅವೆನ್ ಗಲಸರೆ ಅವಕಾಶ ಕೊರ್ಂಡ ತುಳುನಾಡ್ ಡ್ ಸೌಹಾರ್ದತೆ ಹೆಚ್ಚಾಪುಂಡು. ಅಂಚಾದ್ ದಯಮಲ್ತ್ ನಮ್ಮ ಈ ಸ್ಥಿತಿನ್ ಅರ್ಥ ಮಲ್ತೊಂದು ನಮ್ಮ ಬೇಡಿಕೆ ಈಡೇರಿಸಾವರೆ ಕ್ರಮ ದೆತೊನೊಡು ಪಂದ್ ಬಿನ್ನಾಪುಡ್ ತೆರಿಪಾದೆರ್.
ನಿಯೋಗಡ್ ತುಳುನಾಡ ರಕ್ಷಣಾ ವೇದಿಕೆದ ಒಡಿಪು ಜಿಲ್ಲಾಧ್ಯಕ್ಷೆರ್ ಫ್ರಾಂಕಿ ಡಿಸೋಜ ಕೊಳಲಗಿರಿ, ಜಿಲ್ಲಾ ಉಪಾಧ್ಯಕ್ಷೆರ್ ಜಯರಾಮ್ ಪೂಜಾರಿ, ವೈದ್ಯರ ಘಟಕದ ಜಿಲ್ಲಾಧ್ಯಕ್ಷೆರ್ ಸಂದೀಪ್ ಸನಿಲ್, ಕಾರ್ಮಿಕ ಘಟಕ ಜಿಲ್ಲಾಧ್ಯಕ್ಷೆರ್ ಜಯ ಪೂಜಾರಿ ಲಕ್ಷ್ಮಿನಗರ, ಬ್ರಹ್ಮಾವರ ತಾಲೂಕು ಗೌರವ ಅಧ್ಯಕ್ಷೆರ್ ಸುರೇಂದ್ರ ಪೂಜಾರಿ,ಮುಖಂಡೆರಾಯಿನ ಸದಾಶಿವ ಬ್ರಹ್ಮಾವರ, ಸುನಂದ ಕೋಟ್ಯಾನ್, ಅನುಸೂಯ ಶೆಟ್ಟಿ, ಮಜೀದ್, ಜ್ಯೋತಿ ಆರ್. ಬನ್ನಂಜೆ , ಶ್ಯಾಮಲಾ, ನಿತೀನ್, ಅಶ್ವಿನಿ, ಶ್ರೀಮತಿ ಅಚಾರ್ಯ ಹರ್ಷಿತಾ, ಉಮೇಶ್ ಶೆಟ್ಟಿ, ಸಂತೋಷ್ ಶೈಲೇಶ್, ಜಯಶ್ರೀ ಸುವರ್ಣ ಬೊಕ್ಕ ವೇದಿಕೆದ ಪದಾಧಿಕಾರಿಲು ಇತ್ತೆರ್.