ಅಲಫಲ ಬಾರ್ ತಾರೆ ಬಾರೆ ಕಂಗ್ ಎಡ್ಡೆನೇ ಬುಲೆಪುನ ಈ ತುಳುನಾಡ್ ದ ಪೊರ್ಲ ಭೂಮಿಡ್ ತುಳು ಪೊಣ್ಜೊವ್ಲೆನ್ ತುಳುತ ಸಿರಿಕುಲು ಪಂಡ್ದೇ ಮಾನಾದಿಗೆ ಕೊರ್ತೆರ್.
ಪಿರಾಕ್ ಡ್ ಹೆಚ್ಚಾದ್ ಅಳಿಯಕಟ್ ಸಂಪ್ರದಾಯೊಡೆ ನಡಪುನಂಚಿನ ಕೂಡು ಕುಟುಂಬ ವ್ಯವಸ್ಥೆ ಜಿಂಜ ಉಪ್ಪುನ ತುಳುನಾಡ್ ಮಾತೃ ಪ್ರಧಾನವಾದಿತ್ ದ್ ಅಪ್ಪೆನನೆ ಕಾರ್ಬಾರ್ ಆದಿತ್ ದ್ ಅಪ್ಪೆಗ್ ವಿಶೇಷವಾಯಿನ ಮಹತ್ವ ಕೊರ್ದಿತ್ತೆರ್.
ಇಲ್ಲನ್ ಅಚ್ಚುಕಟ್ಟಾದ್ ನಡಪಾವುನತ್ತಂದೆ ಜೋಕ್ಲೆಗ್ ವಿದ್ಯೆ ಬುದ್ಧಿನ್ ಕೊರ್ಪುನ ಜವಾಬ್ದಾರಿನ್ಲಾ ಆಲ್ ಮೋಕೆಡೆ ಮನ್ತ್ ತೋಜಾದಿನಾಲ್.
ಇಲ್ಲದುಲಾಯಿ ಅತ್ತಂದೆ ಪಿದಾಯಿಡ್ಲಾ ರಾಣಿ ಆದ್ ಮೆರೆದ್ ತುಳುನಾಡ್ ದ ಚರಿತ್ರೆನ್ ಬೆಳಗಾಯಿನ ತುಳು ಸಿರಿಕುಲೆನ ಕಥೆಲಾ ನಮ ಕೇನ್ದಿನವೆ.(ಅಬ್ಬಕ್ಕ ದೇವಿ.ಕಿತ್ತೂರು ರಾಣಿ ಚೆನ್ನಮ್ಮ.).

ತುಳುನಾಡ ಸಂಸ್ಕೃತಿಯೇ ತುಳುವೆರ್ನ ಸುಯಿಲ್ ಅಂಚಿನ ಸಂಸ್ಕೃತಿನ್ ಒರಿಪಾದ್ ಬುಲೆಪಾವೊಂದು ಪೋಪಿನಾಲ್ ಪೊಣ್ಣು.ಇತ್ತೆದ ಆತ್ಯಾಧುನಿಕ ತಂತ್ರಜ್ಞಾನೊದ ಕಾಲೊಡು ಪೊಣ್ಣು ಮಾತ ಕ್ಷೇತ್ರೊಡು ತನನ್ ತಾನ್ ತೊಡಗಿಸಾವೊಂದು ಆಣ್ಜೊವ್ಲೆಗ್ ಸರಿಸಮಾನಾದ್ ಬೆನೊಂದುಲ್ಲೊಲ್.
ಕೂಡ್ ಕುಟುಂಬ ಛಿದ್ರ ಆವೊಂದು ಪೋವೊಂದುಂಡು ಆಂಡಲಾ ತನ್ನ ಕಿಂಜ್ಯ ಸಂಸಾರೊಗಾದ್ ಖಂಡನೆಗ್ ಪೊಂಜೊವು ಪುಗೆಲ್ ಕೊರೊಂದುಲ್ಲೊಲ್ ಅನ್ಪಿನಲಾ ಆತೇ ಸತ್ಯ.
ಉಂದೆತೊಟ್ಟುಗು ಪಿರಾಕ್ ದ ಆಚಾರ ವಿಚಾರ ಸಂಸ್ಕೃತಿಲ್ ಮಾಜಂದಿಲಕ ದೀವೊಂಬಿನ ಮಾಮಲ್ಲ ಜವಾಬ್ದಾರಿ ಇತ್ತೆದ ಪೊಂಜೊವ್ಲೆನ ಮಿತ್ ಉಂಡ್. ನನ ದುಂಬುದ ಜೋಕುಲು ಮದಪಾವಂದಿಲಕ ತುಳುವೆರ್ನ ತುತ್ತೈತ ಸಿಂಗಾರ ತಿಂಡಿ ತಿನಸ್ ಭೂತಾರಾಧನೆ ನಾಗಾರಾಧನೆ ಕೋಲ ತಂಬಿಲ ಯಕ್ಷಗಾನ ಉಂದೆನ್ ಪೂರ ಎಂಚ ಬುಲೆಪಾವೊಂದು ಪೋವೊಡನ್ಪಿನ ವಿಷಯೊಗ್ ಅಣ್ಜೊವ್ಲೆಗ್ ಅಲ್ನ ಸಹಕಾರ ಅತ್ಯಗತ್ಯ ಆತಂಡ್.
ವಿದೇಶಿಯರ್ನ ತುಂಡ್ ಕುಂಟ್ ದ ಸಂಸ್ಕೃತಿಗ್ ಎದುರಾದ್ ಎಂಕಲ್ನ ಪೊರ್ಲಕಂಟ್ ದ ತುಳುವೆರ್ನ ಸಹಜ ಸೌಂದರ್ಯದ ಐತನ್ ಮದಪಂದೆ ಒರಿಪಾವೊಂದು.ಇತ್ತೆದ ಪೊಣ್ಣುಲು ಅನುಸರಿಸಾವೊಂದು ಪೋಪಿನಂಚ ಮನ್ಪುನ ಮಾಮಲ್ಲ ಜವಾಬ್ದಾರಿಲಾ ಪೊಂಜೊವ್ಲೆನ ಮಿತ್ ಉಂಡ್.
ಕಾಲ ಬದಲಾಂಡಲಾ ಆರೋಗ್ಯಕರ ಆಪಿನಂಚಿತ್ತಿನವೆನ್ ಒರಿಪಾವರೆ ಪಿರ ದುಂಬು ತೂವಂದೆ ಮಾತ ಸೌಲಭ್ಯದ ಸದುಪಯೋಗೊನು ಪಡೆತೊಂದುಲಾ ಪೊಂಜೊವ್ಲೆಗ್ ಮಾದರಿ ಆಪಿನಂಚ ಸಂಸಾರ ಸಮಾಜೊಗ್ ಕಣ್ ಆಪಿನಂಚ ಬದ್ಕ್ ದ್ ತೋಜಾವುನ ಸವಾಲ್ ಆಲ್ನ ಮಿತ್ ಉಂಡ್.
ಪೊಣ್ಣು ತಾನುಪ್ಪುನಲ್ಪ ಉಲ್ಲೇಸ ಸಂತಸ ಐಸಿರ ಕುಸಿ ಉರ್ಕಾವುನಂಚ ಇತ್ ದ್ ತೋಜಾವೊಡು.ಆಸೆ ಆಮಿಷೊಲೆಗ್ ಬಲಿ ಆವಂದೆ ಇಡೀ ದೇಶೊದ ಆಸ್ತಿ ಆಪಿನಂಚಿನ ಕಾರ್ಯೊಡು ಉತ್ಸಾಹೊಡ್ ತನನ್ ತೊಡಗಿಸಾವೊಂದು ತುಳುವೆರ್ನ ಪೆರ್ಮೆನ್ ಲೋಕೊರ್ಮೆ ಮೆರೆಪಾವೊಡು.ತುಳುತ ಸಿರಿಯಾದ್ ಪೊಣ್ಣು ಸಮಾಜೊನು ಬೆಳಗೊಡು.
ಸುಜ್ಞಾನ ಜ್ಯೋತಿ.
(ಜ್ಯೋತಿ.ಎಸ್.ದೇವಾಡಿಗ.)
ಉಡುಪಿ