ಅಮೇರಿಕಾ ತುಳು ಅಸೋಸಿಯೇಷನ್ “ತುಳು ಉಚ್ಚಯ”..

ಅಕ್ಟೊಬರ್ 29,ಐತಾರದಾನಿ ಆಲ್ ಅಮೆರಿಕಾ ತುಳು ಅಸೋಸಿಯೇಷನ್ ಸಂಸ್ಥೆದ ”ತುಳು ಉಚ್ಚಯ 2023”

ತುಳು ಬಾಸೆ ಸಂಸ್ಕೃತಿದ ಬುಲೆಚಿಲ್ಗ್ ದೂರದ ಅಮೆರಿಕಾ ದೇಶಡು ಪುನೆವೊಂದಿಪ್ಪುನ ನಮ್ಮ ಪೆರ್ಮೆದ ಆಲ್ ಅಮೆರಿಕಾ ತುಳು ಅಸೋಸಿಯೇಷನ್ ಈ ಸರ್ತಿದ ತನ್ನ ಮೂಜನೆ ವರ್ಷದ ”ತುಳು ಉಚ್ಚಯ 2023” ಅಕ್ಟೊಬರ್ ತಿಂಗೊಲ್ದ 29ನೇ ತಾರೀಖ್ ಐತಾರದಾನಿ ಬಾರಿ ಗೌಜಿಡ್ ನಡಪ ಕೊರೊಂದುಂಡು.

ಆನಿ ಅಮೇರಿಕದಾ ಪೊರ್ತು ಕಾಂಡೆ 11:30 ಗಂಟೆಗ್ ನಡಪುನ ಈ ತುಳು ಸಾಹಿತ್ಯ ಸಂಸ್ಕೃತಿದ ಕಾರ್ಯಕ್ರಮೊನು ಭಾರತದ ಪೊರ್ತು ರಾತ್ರೆ 9:00 ಗಂಟೆಗ್ ಮಾತಾ ತುಳುವೆರ್ ಅಂತರ್ಜಾಲೊಡು ಯೂ ಟ್ಯೂಬ್ ಚಾನೆಲ್ www.aatana.org/tulu_uchchaya_2023 ಪ್ರಸಾರ ಆಯೆರೆ ಉಂಡು .

ಈ ಸರ್ತಿದ ಮಿನದನದ ಕಲೊಟು ಸ್ಯಾಕ್ಸೋಫೋನ್ ಪ್ರಕಾಶ್ ಕಾರ್ಕಳ , ಕುಡ್ಲ ಕುಸಲ್ ಕೂಟದ ಕುಶಲ ಗೊಬ್ಬು , ನಾಟ್ಯ ಮಯೂರಿ ಡಾ. ರಾಧಿಕಾ ಕಲ್ಲೂರಾಯೆರೆನ ನಲಿಕೆ , ಎಮ್ಮೆಕೆರೆತ ಪಿಲಿ ಗೊಬ್ಬು , ಡಾ. ಗುರುದಾಸೆರೆನಾ ಹರಿಕತೆ , ಬೈಲೂರು ದಂಪತಿಲೆನ ತುಳುವ ಪಾರ್ದನ ಇಂಚಿನ ತರತರತ ಸಾಂಸ್ಕೃತಿಕ ಮನೋರಂಜನೆಲು ಮನಸ್ ದಿಂಜಾಯರೆ ಉಲ್ಲ .

ಮಾನದಿಗೆದಾ ಬಿನ್ನೆರಾದ್ ತುಳುವ ಜಾನಪದ ಪಂಡಿತೆ ಬನ್ನಂಜೆ ಬಾಬು ಅಮೀನ್ , ಮಂಗಳೂರು ವಿಶ್ವವಿದ್ಯಾಲಯದ ತುಳು ಪೀಠದ ಡಾ. ಮಾಧವ ಎಂ ಕೆ , ಮಾಜಿ ಪರಿಷತ್ ಸದಸ್ಯೆ ಐವಾನ್ ಡಿಸೋಜೆರ್ ಅಂಚನೆ ತುಳುವ ಮಣ್ಣುದಾ ಅಭಿಜಾತ ಪ್ರತಿಭೆ ಸಿನಿಮಾ ನಾಯಕಿ ವಿನಯ ಪ್ರಕಾಶ್, ಗುರ್ಕಾರ್ಲ್ ಆದ್ ಆಟದ ಶ್ರೀವಲ್ಲಿ ರೈ ಅಕಲ ಉಡಲ ಪಾತೆರ ನಮ್ಮೊಟ್ಟುಗು ಪಟೊನೊರೆ ಉಲ್ಲೆರ್.

ಲೋಕೊರ್ಮೆದ ತುಳುತ ಬಂದುಲು ಯೂ ಟ್ಯೂಬ್ ಮುಕಾಂತ್ರ ಈ ಕಜ್ಜದೊಟ್ಟುಗು ಒಂಜಾದ್ ತುಳುವ ಕಲೆ ನಿಲೆತ ಬುಲೆಚ್ಚಿಲ್ಗ್ ಬೆರಿ ಕಾಪು ಕೊರೊಡುಂದು ಆಲ್ ಅಮೆರಿಕಾದ ತುಳು ಅಸೋಸಿಯೇಷನ್ ದ ಪದಾಧಿಕಾರಿಲಾಯಿನ ಭಾಸ್ಕರ್ ಶೇರಿಗಾರ್ ಸಿರೀಶ್ ಶೆಟ್ಟಿ , ಸುದರ್ಶನ್ ಶೆಟ್ಟಿ , ಪೂಜಾಶೆಟ್ಟಿ , ಸಂತೋಷ್ ಶೆಟ್ಟಿ , ಡಾ. ಮೋಹನ್ಚಂದ್ರ ಕೆ ಪಿ , ರಂಜನಿ ಅಸೈಗೋಳಿ , ಸುದೀಪ್ ಹೆಬ್ಬಾರ್ , ವಿವಾಸ್ಮಾನ್ ಶೆಟ್ಟಿ , ಆರ್ಯಮಾನ್ ಶೆಟ್ಟಿ ಬೊಕ್ಕ ಮಾತಾ ಆಡಳಿತ ಸಮಿತಿ ಸದಸ್ಯೆರೆನ ಒಟ್ಟು ಸೇರಿಗೆಡ್ ಮಾತಾ ತುಳುವೆರೆಡ ಮೋಕೆದ ಬಿನ್ನಾಪು ಮಲ್ದೆರ್.