ಭಾರತ ದೇಶೊಡ್ ಒಂಜೊಂಜಿ ರಾಜ್ಯೊಡ್ ವಿಭಿನ್ನವಾಯಿನ ಸಾಂಸ್ಕೃತಿಕ ವೈಭವೊಲೆನ್ ತೂವೊಲಿ.ವಿಶೇಷವಾದ್ ಕರ್ನಾಟಕದ ತುಳುನಾಡುದ ಸಂಸ್ಕೃತಿ,ಸಂಪ್ರದಾಯೊಲ್, ಮುಲ್ಪದ ಆಹಾರ ಪದ್ದತಿ ಜಗತ್ತುಡ್ ಒಲ್ಪಲಾ ತೂವರೆ ತಿಕ್ಕುಜಿ.ನಮ್ಮ ತುಳುನಾಡ್ದ ವೈಭವದ ತಿರ್ಲ್ ನ್ ದುಂಬುದ ಪೀಳಿಗೆಗ್ ತೆರಿಪಾವರೆಗ್ ನಾಟಕ ಪರ್ಬದ ಮುಖೇನ ಮಲ್ಪುನವ್ವ್ ಒಂಜಿ ಎಡ್ಡೆ ಕಜ್ಜೊ .ಈ ನಿಟ್ಟುಡ್ ಉಡುಪಿ ತುಳುಕೂಟ ಕರಿನ 20 ವರ್ಷೊಡಿಂಚಿ ತುಳುನಾಟಕಕಾರೆ ಕೆಮ್ತೂರು ದೊಡ್ಡಣ್ಣ ಶೆಟ್ರೆನ್ ನೆಂಪು ಮಲ್ತೊಂದ್ ವರ್ಷಲಾ ತುಳುನಾಟಕ ಪರ್ಬ ಮಲ್ಪುನವ್ವ್ ಶ್ಲಾಘನೀಯ..ಈ ಕಜ್ಜೊ ಉಡುಪಿಡ್ ಮಾತ್ರ ಅತ್ತಾವಂದೆ ಬಾಕಿದ ಜಿಲ್ಲೆಡುಲಾ ನಡಪೊಡ್ ಪಂಡುದ್ ಮೂಡಬಿದ್ರೆ ಜೈನಮಠದ ಡಾ|ಸ್ವಸ್ತಿಶ್ರೀ ಚಾರುಕೀರ್ತಿ ಭಟ್ಟಾರಕ ಪಂಡಿತಾಚಾರ್ಯ ಮಹಾಸ್ವಾಮೀಜಿ ಪಂಡೆರ್.ಆರು ಒಡಿಪು ತುಳುಕೂಟ ಆಯೋಜನೆ ಮಲ್ದಿನ ಕೆಮ್ತೂರು ತುಳುನಾಟಕ ಪರ್ಬೊಡ್ ಉಡುಪಿ ತುಳುಕೂಟದ ಕಾರ್ಯಂತೆರಾಯಿನ ಗಂಗಾಧರ ಕಿದಿಯೂರು ಮೆರೆನ “ಮೆನ್ಕುನ ಸಿರಿ ಸಿಂಗಾರ”ನಾಟಕ ಸಂಪುಟೊನ್ ಉದಿಪನ ಮಲ್ತುದ್ ಪಾತೆರಿಯೆರ್.
ಕೆಮ್ತೂರು ತುಳು ನಾಟಕ ಪರ್ಬೊನ್ ತುಡರ್ ಅರ್ಲಾದ್ ಉದಿಪನ ಮಲ್ತಿನ ಕನ್ನಡ ಸಂಸ್ಕೃತಿ,ಇಂಧನ ಇಲಾಖೆ ಸಚಿವೆರಾಯಿನ ಸುನೀಲ್ ಕುಮಾರ್ ಪಾತೆರ್ದ್ ತುಳುಬಾಸೆ ನಮ್ಮ ಅಪ್ಪೆಬಾಸೆ..ಈ ಬಾಸೆದ ಸೊಗಡುನ್ ಜಗತ್ತುಡೊರ್ಮೆ ಪರಡಾವುನ ಬೇಲೆ ತುಳುನಾಡೊರ್ಮೆ ಆವೊಂದುಪ್ಪುನವ್ವ್ ಬಾರೀ ಪೆರ್ಮೆದ ಸಂಗತಿ..ಈ ಬಾಸೆಗ್ ಸಂವಿಧಾನೊಡ್ ಮಾನಾದಿಗೆ ತಿಕ್ಕಾವರೆಗ್ ಯಾನ್ ಪ್ರಯತ್ನ ಮಲ್ಪುವೆ ಪಂಡುದ್ ಭರವಸೆ ಕೊರಿಯೆರ್..
ವೇದಿಕೆಡ್ ಮಲ್ಲ ಬಿನ್ನೆರಾದ್ ಕನ್ನಡ ಸಂಸ್ಕೃತಿ ಇಲಾಖೆ,ಉಡುಪಿದ ಸಹಾಯಕ ನಿರ್ದೇಶಕೆರಾಯಿನ ಶ್ರೀ ಕುಮಾರ ಬೆಕ್ಕೇರಿ,ತುಳುಕೂಟದ ಪಣವುದ ಗುರ್ಕಾರೆರಾಯಿನ ಚೈತನ್ಯ ಎಮ್.ಜಿ.,ಗೌರವ ಗುರ್ಕಾರೆರಾಯಿನ ಡಾ.ಭಾಸ್ಕರಾನಂದ ಕುಮಾರ್,ಒತ್ತು ಗುರ್ಕಾರೆರಾಯಿನ ಮನೋರಮ ಶೆಟ್ಟಿ ,ಸದಾನಂದ ಭಟ್ ಬೊಕ್ಕ ಕೆಮ್ತೂರು ದೊಡ್ಡಣ್ಣ ಶೆಟ್ಟಿ ಕುಟುಂಬದ ಸುರೇಶ್ ಶೆಟ್ಟಿ ಉಪಸ್ಥಿತರಿತ್ತೆರ್.
ವೇದಿಕೆಡ್ ಗುರ್ಕಾರ್ಮೆಡಿತ್ತಿನ ಒಡಿಪು ತುಳುಕೂಟದ ಗುರ್ಕಾರೆರಾಯಿನ ಬಿ.ಜಯಕರ ಶೆಟ್ಟಿ ಇಂದ್ರಾಳಿ ಸ್ವಾಗತ,ಪ್ರಸ್ತಾವನೆ ಮಲ್ತೆರ್. ಡಾ.ಗಣನಾಥ ಎಕ್ಕಾರ್ ಮೆನ್ಕುನ ಸಿರಿ ಸಿಂಗಾರ ಬೂಕುದ ಪರಿಚಯ ಮಲ್ತೆರ್. ಪಣಿಯಾಡಿ ಕಾದಂಬರಿ ಪ್ರಶಸ್ತಿದ ಸಂಚಾಲಕಿ ತಾರಾ ಉಮೇಶ್ ಆಚಾರ್ಯ ಸೊಲ್ಮೆ ಸಂದಾಯ್ತ ಮಲ್ತೆರ್.ಸುಚಿತ್ ಕೋಟ್ಯಾನ್ ಕಜ್ಜೊದ ಮದಿಪು ಕೊರಿಯೆರ್.
by 