ತುಳುಬಾಸೆ,ಸಂಸ್ಕ್ರತಿ, ದೈವಾರಾಧನೆಗ್ ವಿಶೇಷ ಕೊಡುಗೆ ಕೊರ್ತಿನಾರ್ ಬನ್ನಂಜೆ ಬಾಬು ಅಮೀನೆರ್ ತುಳುನಾಡ್ದ ಕ್ರಷ್ಣೆ ಇತ್ತಿಲೆಕ್ಕ ಪಂಡುದ್ ಒಡಿಪು ತುಳುಕೂಟದ ಗುರ್ಕಾರೆರಾಯಿನ ಬಿ.ಜಯಕರ ಶೆಟ್ಟಿ ಇಂದ್ರಾಳಿ ಪಂಡೆರ್.ಆರು ಜಗನ್ನಾಥ ಸಭಾಭವನ ಒಡಿಪುಡ್ ನಡತಿನ ಒಡಿಪು ತುಳುಕೂಟದ ವರ್ಸೊದ ಮಹಾಸಭೆಟ್ ರಾಜ್ಯೋತ್ಸವ ಪ್ರಶಸ್ತಿ ವಿಜೇತೆರೆಗ್ ಮಾನಾದಿಗೆ ಮಲ್ತುದ್, ಗುರ್ಕಾರ್ಮೆದ ನಿಲೆಟ್ ಪಾತೆರಿಯೆರ್.
ಮಹಾಸಭೆಟ್ ಈ ಸರ್ತಿ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ವಿಜೇತೆರಾಯಿನ ತುಳುಕೂಟದ ಪದುಕೆರಾಯಿನ ತುಳುನಾಡ್ದ ನಡತೊಂದುಪ್ಪುನ ಗರಡಿ ಪಂಡುದೇ ಪುಗಾರ್ತೆನ್ ಪಡೆದಿನ ಬನ್ನಂಜೆ ಬಾಬು ಅಮೀನ್, ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ವಿಜೇತೆರಾಯಿನ ಸಮಾಜಸೇವಕೆರಾಯಿನ ಗೋಪಾಲ್ ಸಿ.ಬಂಗೇರ,ಮಾಧ್ಯಮ ಕ್ಷೇತ್ರೊಡ್ ಕನ್ನಡಪ್ರಭಾದ ಹಿರಿಯ ಪತ್ರಕರ್ತೆರಾಯಿನ ಸುಭಾಶ್ಚಂದ್ರ ವಾಗ್ಲೆ,ಮದಿಪುದ ಮಹಾಬಲಶೆಟ್ಟಿ,ಬೊಕ್ಕ ಡಿಜಿಟಲ್ ಮೀಡಿಯಾಡ್ ಕರಾವಳಿ ಇ ಧ್ವನಿ ಪ್ರಶಸ್ತಿ ಪುರಸ್ಕೃತೆರಾಯಿನ ಜನಾರ್ಧನ್ ಕೊಡವೂರು ಮೊಕ್ಲೆಗ್ ತುಳು ಕೂಟದ ವತಿಡ್ದ್ ಮಾನಾದಿಗೆ ಮಲ್ತೆರ್.
ಮಹಾಸಭೆಟ್ 2021-22ನೇ ಸಾಲುದ ತುಳುಕೂಟದ ಪೊಸ ಸಮಿತಿ ರಚನೆಯಾದ್ ಬಿ.ಜಯಕರ ಶೆಟ್ಟಿ ಇಂದ್ರಾಳಿ ಮೇರು ಗುರ್ಕಾರೆರಾದ್ ಪುನರಾಯ್ಕೆ ಆಯೆರ್.
ಕೂಟದ ಮಾಜಿ ಒತ್ತುಗುರ್ಕಾರೆರಾಯಿ ಮಹಮ್ಮದ್ ಮೌಲಾ ಮೇರು ಸ್ವಾಗತ ಮಲ್ತೆರ್.ಕಾರ್ಯಂತೆರಾಯಿನ ಗಂಗಾಧರ ಕಿದಿಯೂರು ಕರಿನ ವರ್ಸೊದ ವರದಿನ್ ಓದಿಯೆರ್.ಪಣವುದ ಪಾಲವೆರಾಯಿನ ಚೈತನ್ಯ ಎಮ್.ಜಿ.ಲೆಕ್ಕಪತ್ರೊನ್ ಓದಿಯೆರ್. ನಾಟಕ ಸಂಚಾಲಕೆರಾಯಿನ ಪ್ರಭಾಕರ ಭಂಡಾರಿ ಬೊಕ್ಕ ಸೋಣ ಸೇಸೆದ ಸಂಚಾಲಕೆರಾಯಿನ ರತ್ನಾಕರ್ ಇಂದ್ರಾಳಿ ಮೊಕುಲು ಕಜ್ಜೊದ ಮದಿಪು ಕೊರಿಯೆರ್. ಒತ್ತು ಕಾರ್ಯಂತೆರಾಯಿನ ಮೋಹನ್ ಶೆಟ್ಟಿ ನಿಡಂಬೂರು ಸೊಲ್ಮೆ ಸಂದಾಯ್ತ ಮಲ್ತೆರ್.
by 