ತುಳುಕೂಟದ ವತಿಡ್ದ್ ಪೆರಿಯ ರಂಗ ಕಲಾವಿದೆರೆಗ್ ಮಾನಾದಿಗೆ.

ತುಳುನಾಡ್ದ ಪ್ರತಿಷ್ಠಿತ ಬಂಟ ಮನೆತನವಾಯಿನ ನಂದಳಿಕೆ ಚಾವಡಿದಿಲ್ಲ್ ಮುತ್ತಕ್ಕ ಶೆಟ್ಟಿ ಬೊಕ್ಕ ಹೇರೂರ್ ಪಟೇಲರಿಲ್ಲ್ ಶೀನಪ್ಪ ಶೆಟ್ರ ದಂಪತಿಲೆನ ನಾಲ್ ಜೋಕುಲೆಡ್ ದಯಾನಂದ ಶೆಟ್ರೆಗ್ ಎಲ್ಯದಿಂಚಿಲಾ ನಾಟಕದ ಮಲ್ಲ. ಅಮ್ಮೆರ್ ಪನ್ನಿನ ಕಂಡೋಗ್ ನೀರ್ ಕಟ್ಟುನವೆನ್ ಪದೆತ್ ಪೋಯಿನ 8 ನೇ ಕ್ಲಾಸಡ್ ಕಲ್ತೊಂದಿತ್ತಿನ ದಯಾನಂದ ಶೆಟ್ರ ಅಮೆರೆಡ ಪೆಟ್ಟದ ತಮ್ಮನ ತಿಂದಿನಾರ್ ಪಾಡಿ ಅಂಗಿ ಕುಂಟುಡೇ ಹೊಸ ಪೇಟೆಗ್ ಪೋದು ಸುಬ್ಬಿಯನಾಯ್ಡು ಮೆರೆನ ನಾಟಕ ಕಂಪೆನಿದ ಬಾರಿಲ್ ಬೊಟ್ಟುವೆರ್, ಆ ಕಂಪೆನಿಡ್ ನಟನೆ ಮತ್ತೊಂದಿತ್ತಿನ ವರನಟ ರಾಜಕುಮಾರ್‌ರೆನ ವಸೂಲಿಡ್ ಟಿಕೆಟ್ ಚಕ್ಕಿಂಗ್ ದ ಕೆಲಸ ಮಲ್ಪುವೆರ್, ಆ ಕಾಲದ ಖ್ಯಾತ ನಾಟಕ ಕಲಾವಿದೆರಾಯಿನ ಮಹಾಲಿಂಗೆರೆನ ಪ್ರೋತ್ಸಾಹಡ್ ಕಿನ್ಯ ಕಿನ್ಯ ಪಾತ್ರೊಲೆನ್ ಮಲ್ತೆರ್ ಬೊಕ್ಕ ಡಾ. ರಾಜಕುಮಾರ್ ಲೀಲಾವತಿ, ನಟ ಭಯಂಕರ ಗಂಗಾದರ್ ಇಂಚಿನ ಶ್ರೇಷ್ಠ ಕಲಾವಿದೆರೆ ನೊಟ್ಟುಗ್ ಭಕ್ತ ಅಂಬರೀಶ, ಎಚ್ಚಮ್ಮ ನಾಯಕ, ಭೂ ಕೈಲಾಸ ಶ್ರೀರಾಮ ಜನನ, ಸತಧರ್ಮ ದಂಚಿನ ನಾಟಕೊಲೆಡ್ ಅಭಿನಯ ಮಲ್ತ್ ದ್ ಪುಗಾರಿಕೆ ದೆತೊಂಡೆರ್ ಬೊಕ್ಕ ಹಲಗೇರಿಯ ಹಾಲಸಿದ್ದೇಶ್ವರ ನಾಟಕ ಮಂಡಳಿ, ಎಳಗಿ ಬಾಳಪ್ಪ ಕಂಪೆನಿಡ್ಡ್ ರಂಗ ಚಾವಡಿ ಏರಿನ ಶೆಟ್ರು ತನ್ನ ಆತ್ಮೀಯೆರಾಯಿನ ಹಾಸ್ಯನಟ ನರಸಿಂಹ ರಾಜ್ ರೆ ಸಿನಿಮಾಡ್ ಕೆಲಸ ಮಲ್ಪೆರೆಗಾದ್ ಮದ್ರಾಸನ್ ಲೆತೊಂದು ಪೋದು, ಕನ್ನಡ ಸಿನಿಮಾಡ್ ಕೆಲಸ ಮಲ್ಪೆರೆ ತಯಾರ್ ಮತ್ತೊಂದುಪ್ಪುನ ಸಮಯಡೇ ಪುಟ್ಟಣ ಕಣಗಾಲ್ ನಾಗರ ಹಾವು ಸಿನಿಮಾಡೇ ವಿಷ್ಣುವರ್ಧನ್ ಮಲ್ತಿನ ರಾಮಾಚಾರಿ ಪಾತ್ರೋಗ್ ಆಯ್ಕೆ ಆದಿತ್ತೆರ್. ಆ ಸಮಯಡ್ ಭೂಮಸೂದೆ ಕಾನೂನು ಬತ್ತಿನದಗ ತನ್ನ ಹಿರಿಯೆರೆನ ಭೂಮಿ ಒರಿಪೆರೆಗಾದ್ ಊರುಗ್ ಬತ್ತಿನರೆಗ್ ಮದ್ರಾಸ್ ಗೆ ಪೋವೆರೆ ಆವಂದೆ ಸಿಕಿನ ಮಲ್ಲ ಅವಕಾಶ ದೆತ್ತೊಂಡೆರ್, ಬೊಕ್ಕ ಶ್ರೀದರ್ ರಾವ್‌ರೆನ ಸರ್ವಮಂಗಳ ನಾಟಕ ಸಭಟ್ 10 ವರುಷ ಕೆಲಸ ಮಲ್ತೆರ್ ಬೊಕ್ಕ ಕಾರಂತೆರೆನ ಚೋಮನ ದುಡಿಟ್ ಮುಖ್ಯ ಪಾತ್ರ, ನಾಗಭರ ನೆರೆನ ಬಯಲಾಟ ಗಿರೀಶ್ ಕಾಸರ ವಳ್ಳಿರೆನ ಗುಲಾಬಿ ಟಾಕೀಸ್, ರಕ್ಷಿತ್ ಶೆಟ್ರನ ಉಳಿದವರು ಕಂಡಂತೆ ಸಿನಿಮಾಡ್ ನಟನೆ ಮಲ್ತೆರ್ ಸದಾನಂದ ಸುವರ್ಣರೆನ ಗುಡ್ಡೆದಭೂತ ಧಾರವಾಹಿ ಇಂಚನೆ ಮಸ್ತ್ ಮಸ್ತ್ ಸಾಕ್ಷ್ಯ ಚಿತ್ತೋಲೆಡ ನಟನೆ ಮಲ್ತಿನ ಶೆಟ್ರೆಗ್ ಊರ ಪರವೂರ್ದ ಶ್ರೇಷ್ಠ ಸಂಘ ಸಂಸ್ಥೆಲಾ ಮಾನಾದಿಗೆ ಮಲ್ಪೆ ರ್. 2018 ಡು ಕರ್ನಾಟಕ ನಾಟಕ ಅಕಾಡೆಮಿ ಪುರಸ್ಕೃತರಾಯಿನ ದಯಾನಂದ ಶೆಟ್ರೆಗ್ ಇತ್ತೆ 92 ವರ್ಷ, ಎಡ್ಡೆ ಆರೋಗ್ಯ ಅಗಾದ ನೆನಪು ಶಕ್ತಿ ದೊಟ್ಟು ಗ್ ಜೋಕುಲೆನಂಚಿನ ಕ್ರೀಯಾಶೀಲ ವ್ಯಕ್ತಿತ್ವ ಉಪ್ಪುನ ಶೆಟ್ರ ಡಾ.ರಾಜ್ ಕುಮಾರ್ ನೊಟ್ಟುಗ್ ಮಸಾಲ್ ದೋಸೆ ತಿನ್ತಿನವೆನ್ ಅರೆನ ಪ್ರೋತ್ಸಾಹನ್ ಇಲ್ಲ ಕಟ್ಟನಾಗ ಆರ್ ಬತ್ ದು 10,000 ಧನಸಹಾಯ ಕೊರ್ತಿನ ವೆನ್ ಶಿವರಾಜ್ ಕುಮಾರ್, ಪುನೀತ್ ರಾಜ್ ಕುಮಾರ್ ಅರೆನ್ ನಾಡೊಂದು ಬತ್ ದು ಆಶೀರ್ವಾದ ಗೆತೊಂದಿನ ವೆನ್, ಅಂಚನೆ ಬೆರಿಸಹಾಯ ಕೊರಿನಗಲೆನ್ ಸದಾ ನೆಂಪು ಮತ್ತೊಂದಿಪ್ಪುವೆರ್, ಅರೆನ ಮೋಕೆದ ಬುಡೆದಿ ಲಲಿತ ಶೆಟ್ಟಿ ವೈಕುಂಟ ಸೆರ್ದ್ ಆಜಿ ವರ್ಷ ಆಂಡಲ ಅರೆನ ಜೋಕುಲಾಯಿನ ಖ್ಯಾತ ಉದ್ಯಮಿ ಚೇತನ್ ಕುಮಾರ್ ಶೆಟ್ಟಿ, ಉಡುಪಿದ ಖ್ಯಾತ ಸಿ. ಎ ಜೀವನ ಕುಮಾರ್ ಶೆಟ್ಟಿ ಮರ್ಮಲೆರಾಯಿನ ದೀಪ ಚೇತನ್ ಶೆಟ್ಟಿ ಬೊಕ್ಕ ನಾಗರತ್ನ ಜೀವನ ಶೆಟ್ಟಿ ಆಜಿ ಜನ ಪುಲ್ಲಿನಕ್ಲೆ ನೊಟ್ಟುಗು ಖುಷಿಟ್ ಉಪ್ಪುನ ಶೆಟ್ರ್, ಕೆಮ್ತೂರು ದೊಡ್ಡಣ್ಣ ಶೆಟ್ರೆನೊಟ್ಟುಗ್ ಅಭಿನಯ ಮಲ್ದಿನಾರ್ ಇಂಚಿನ ಮಹಾ ಕಲಾವಿದೆ ಕಲಾರಂಗೊಗ್ ಮಲ್ದಿನ ಮಹಾ ಸೇವೆಗಾದ್ ತುಳುಕೂಟ ಉಡುಪಿ ತನ್ನ 22ನೇ ಕೆಮ್ತೂರು ದೊಡ್ಡಣ್ಣ ಶೆಟ್ರೆನ ನೆನಪುದ ನಾಟಕ ಪಂಥೊದ ಇನಾಮು ಪಟ್ಟುನ ಲೇಸ್ ಡ್ ಪೆರಿಯ ಕಲಾವಿದೆರಾಯಿನ ದಯಾನಂದ ಶೆಟ್ರೆಗ್ ತುಳು ಕಲಾರತ್ನ ಬಿರ್ದಾವಳಿ ಕೊರ್ದು ಮಾನಾದಿಗೆ ಮಲ್ತುಂಡ್.

ತುಳುಕೂಟ ಉಡುಪಿದ ಗುರ್ಕಾರೆರಾಯಿನ ಬಿ. ಜಯಕರ ಶೆಟ್ಟಿ ಇಂದ್ರಾಳಿ ಮೆರೆನ ಗುರ್ಕಾರ್ಮೆಡ್ ನಡತಿನ ಈ ಲೇಸ್ ಡ್ ವೇದಿಕೆಡ್ ಕಾಪು ವಿಧಾನಸಭಾ ಕ್ಷೇತ್ರದ ಶಾಸಕೆರಾಯಿನ ಗುರ್ಮೆ ಸುರೇಶ್ ಶೆಟ್ಟಿ, ಉಡುಪಿ ಕ್ಷೇತ್ರದ ಮಾಜೀ ಶಾಸಕೆರಾಯಿನ ಕೆ. ರಘುಪತಿ ಭಟ್, ಉದ್ಯಮಿ ಪ್ರಸಾದ್ ರಾಜ್ ಕಾಂಚನ್, ಎಂ. ಜಿ. ಎಂ. ಕಾಲೇಜಿದ ಪ್ರಾಂಶುಪಾಲೆರಾಯಿನ ಪ್ರೊ. ಲಕ್ಷ್ಮೀನಾರಾಯಣ ಕಾರಂತ, ತುಳುಕೂಟ ಉಡುಪಿದ ಕಾರ್ಯಂತೆರಾಯಿನ ಗಂಗಾಧರ ಕಿದಿಯೂರು, ಪಣವುದ ಪಾಲವೆರಾಯಿನ ಚೈತನ್ಯ ಎಮ್.ಜಿ., ನಾಟಕ ಸಂಚಾಲಕೆರಾಯಿನ ಪ್ರಭಾಕರ ಭಂಡಾರಿ, ಹಿರಿಯ ಸದಸ್ಯೆರಾಯಿನ ದಯಾನಂದ ಶೆಟ್ಟಿ ದೆಂದೂರು, ಕೆಮ್ತೂರು ಕುಟುಂಬದ ವಿಜಯ್ ಕುಮಾರ್ ಶೆಟ್ಟಿ ಉಪಸ್ಥಿತರಿತ್ತೆರ್.