ತುಲುವೆರೆ ಪಕ್ಷ ಬೊಕ್ಕ ತುಲುನಾಡ್ ಒಕ್ಕೂಟ ಕಾರ್ಯಕರ್ತೆರೆನ ಸಮಾಲೋಚನಾ ಸಭೆ ಪಕ್ಷದ ಕೇಂದ್ರ ಕಚೇರಿಡ್ ಗುರ್ಕಾರೆರಾಯಿನ ಶೈಲೇಶ್ ಆರ್.ಜೆ.ಮೆರೆನ ಮುತಾಲಿಕೆಡ್ ನಡತುಂಡ್.ಸಭೆಟ್ ತುಳುನಾಡೊರ್ಮೆ ತುಲುಪಕ್ಷ ಕಟ್ಟುನ ಸಮಗ್ರ ಚಿಂತನೆ ನಡತುಂಡ್.
ಭಾಷಾವಾರು ರಾಜ್ಯೊಲೆನ ರಚನೆದ ಪೊರ್ತುಡ್ ತುಲುಭಾಷೆಗ್ ರಾಜ್ಯ ಕೊರಂದೆ,ರಾಷ್ಟ್ರೀಯ ಪಕ್ಷೊಲು ತುಲುವೆರೆಗ್ ಅನ್ಯಾಯ ಮಲ್ದುಂಡ್.ತುಲುಭಾಸೆನ್ ಸಂವಿಧಾನದ 8 ನೇ ಪರಿಚ್ಚೇದೊಗ್ ಸೇರಾವರೆಗ್ ದುಂಬು ಪಿರ ತೂವೊಂದುಪ್ಪುನವ್ವ್ ತುಲುಭಾಸೆದ ನಾಶೊಗ್ ಸುರುತ್ತ ಪಾತೆರ ಬರೆಯಿಲೆಕ್ಕಾತುಂಡ್.ಈ ನಿಟ್ಟುಡ್ ತುಲುಚಳುವಳಿ ಪ್ರತೀ ಹಳ್ಳಿ ಗ್ರಾಮೊಲೆಡ್ ಚಿಗುರೊಂದಿತ್ತುದ್ ದುಂಬುದ ದಿನೊಕ್ಲೆಡ್ ತುಲುವೆರೆ ಪಕ್ಷೊದ ರೂಪೊಡ್ ಮಲ್ಲ ಮರವಾದ್ ಬುಲೆಯೆರೆಗುಂಡ್ ಪಂಡುದ್ ಒಕ್ಕೂಟದ ಅಧ್ಯಕ್ಷೆರಾಯಿನ ಶೈಲೇಶ್ ಆರ್.ಜೆ.ತೆರಿಪಾಯೆರ್.
ಪ್ರಜಾಪ್ರಭುತ್ವ ವ್ಯವಸ್ಥೆದ ಮಾತಾ ವಿಭಾಗೊಡ್ ತುಲುಭಾಸೆ ಬೊಕ್ಕ ತುಲುಲಿಪಿತ್ತ ಅನುಷ್ಠಾನೊಗ್ ಕಾರ್ಯಕರ್ತೆರ್ ಪೊರಂಬಾಟ ಮಲ್ಪೊಡ್ ಪಂಡುದ್ ಪಂಡೆರ್.ತುಲುವೆರೆ ಪಕ಼್ಷೊನ್ ವಾರ್ಡ್‌ ಮಟ್ಟೊಡೇ ಸಂಘಟನಾತ್ಮಕವಾದ್ ಕಟ್ಟುನ ಮುಖೇನ ದುಂಬುದ ಮಾತಾ ಚುನಾವಣೆಲೆಡ್ ಪಕ್ಷದ ಅಭ್ಯರ್ಥಿಲು ಗೆಂದುಲೆಕ್ಕ ಮಲ್ಪುನವ್ ಕಾರ್ಯಕರ್ತೆರೆನ ಜವಾಬ್ದಾರಿ ಪಂಡೆರ್.
ಈ ಪೊರ್ತುಡ್ ವೇಣೂರು ಹೋಬಳಿ ವ್ಯಾಪ್ತಿಡ್ ಪಕ್ಷದ ಏನೂರು ಸೀಮೆದ ಅಧ್ಯಕ್ಷೆರಾದ್ ಉದಯ ಗೋಳಿಯಂಗಡಿ ಬೊಕ್ಕ ಬೆಳ್ತಂಗಡಿ ಹೋಬಳಿ ವ್ಯಾಪ್ತಿಡ್ ಪಕ್ಷದ ಬೋಲ್ತೆರ್ ಸೀಮೆದ ಅಧ್ಯಕ್ಷೆರಾದ್ ಕೆ.ಎಮ್.ಮೊಹಮ್ಮದ್ ಶರೀಫ್ ಬೊಕ್ಕ ಉಪಾಧ್ಯಕ್ಷೆರಾದ್ ರಮೇಶ್ ಸಾಲಿಯಾನ್ ಉಜಿರೆ ಆಯ್ಕೆಯಾತೆರ್‌
ತುಲುನಾಡ್ ಒಕ್ಕೂಟ ತಾಲೂಕು ಘಟಕದ ಅಧ್ಯಕ್ಷೆರಾಯಿನ ಸುರೇಂದ್ರ ಕೋಟ್ಯಾನ್, ಜತೆ ಕಾರ್ಯ ದರ್ಶಿ ಜಿ,ವಿ.ಹರೀಶ್ ಸವಣಾಲು,ಪಕ್ಷದ ಕರಂಬಾರು ಗ್ರಾಮ ಅಧ್ಯಕ್ಷೆರಾಯಿನ ಉಮೇಶ್ ಕುಲಾಲ್ ಬೊಕ್ಕ ಇಂದಬೆಟ್ಟು ಗ್ರಾಮ ಸಮಿತಿದ ಅಧ್ಯಕ್ಷೆರಾಯಿನ ಸುಜಿತ್ ಮೊಯಿಲಿ ಬಂಗಾಡಿ ಮೊಕುಲು ಪಟ್ಟೊಂಡೆರ್.ಪಕ್ಷ ಬೊಕ್ಕ ಸಂಘಟನೆದ ಕಾರ್ಯಕರ್ತೆರ್ ಈ ಪೊರ್ತುಡ್ ಉಪಸ್ಥಿತರಿತ್ತೆರ್.
by 