ತುಳುನಾಡುದ ಆಟಿ ತಿಂಗೊಲು..

, ದೇವರಾಧನೆ ,ನಾಗಾರಾಧನೆ ನಡಪುನ ಪವಿತ್ರವಾಯಿನ ನಾಡು ನಮ್ಮ ಈ ತುಳುನಾಡು. ಈ ತುಳುನಾಡುಡ್ ವಿಶಿಷ್ಟವಾಯಿನ ವೈವಿದ್ಯವಾಯಿನ ಸಂಸ್ಕೃತಿ ಬೊಕ್ಕ ಆಚರಣೆಲು ಉಂಡು.

ತುಳು ಸೌರ ಕ್ಯಾಲೆಂಡರ್ ಡ್ “ಆಟಿ” ನಾಲನೇ ತಿಂಗೊಲು. ಆಟಿ ತಿಂಗೊಲುಗ್ ಸಂಬಂಧ ಪಟ್ಟಿನ ಆಚರಣೆಲು, ಕೃಷಿ ಪದ್ಧತಿಲು ತುಳುನಾಡುದ ಪ್ರಕ್ರತಿಗ್ ಕೈತಲುದ ಸಂಬಂಧ ಉಂಡು.

ಈ ತಿಂಗೊಲುಡ್ ಬಾರೀ ಬರ್ಸ ಬರ್ಪಿನೆಡ್ದಾವರ ಬೆನ್ನಿ ಬೆನ್ಪಿನಕುಲು ವಿಶ್ರಾಂತಿ ಮಲ್ಪುನ ಪೊರ್ತು. ಬೊಲ್ಲ ಬತ್ತುದ್ ಅಲ್ಪಲ್ಪ ನೀರು ಉಂತುನೆಡ್ದಾವರ ಸೀಖ್ ಸಂಕಡೊಲು ಬರ್ಪಿನ ಸಾಧ್ಯತೆ ಜಾಸ್ತಿ. ಬುಡಂದೆ ಬರ್ಸ ಬರ್ಪಿನೆಡ್ದಾವರ ಈ ತಿಂಗೊಲುಡ್ ಎಡ್ಡೆಮಿಲ್ಲಿ (ಶುಭಕಾರ್ಯ) ನಡಪುನ್ ಕಮ್ಮಿ.

. ಆಟಿ ತಿಂಗೊಲುಡ್ ಆಟಿ ಅಮಾಸೆದಾನಿ ಪರ್ಪಿನ ಕಷಾಯ, ನರಮಾನಿನ ಇಡೀ ವರ್ಷದ ಆರೋಗ್ಯನ್ ಕಾಪುನ ಮೌಖಿಕ ಔಷದೀಯ ಪಾನೀಯ.
ಆಟಿ ಅಮಾಸೆದಾನಿ “ಪಾಲೆದ ಕೆತ್ತೆದ ಕಷಾಯ” ಔಷದೀಯ ಅಂಶೊಲ್ ಉಪ್ಪುನೆಡ್ದಾವರ ನಮ್ಮ ಪೆರಿಯಕುಲು ಆಟಿದ ಅಮಾಸೆದಾನಿ ಈ ಮರ್ದುನ್ ಪರ್ಪಿನ ಸಂಪ್ರದಾಯ ದೀಯೊಂದೆರ್.

ಕೊಡಗುಡ್ “ಆಟಿ ತಪ್ಪುಡ್ ” ಪಾಯಸ ಮಲ್ತುದ್ ಪರ್ಪೆರ್..

ಆಟಿ ತಿಂಗೊಲು ವಿಶೇಷವಾದ್ ಪೊಂಜೊವುನಕುಲು ಅಪ್ಪೆಲ್ಲಗ್ ಆಟಿ ಕುಲ್ಲರೆಗ್ ಪೋಪಿನ ಕ್ರಮಕಂಡನಿಲ್ಲಡ್ ಇಡೀ ಕುಟುಂಬದ ನಿರ್ವಹಣೆಡಾದ್ ಬಚ್ಚಿದ್ ಪೋಯಿನ ಮರ್ಮಾಲ್ ಅಪ್ಪೆಲ್ಲಗ್ ಒಂತೆ ವಿಶ್ರಾಂತಿ ದೆತೊನರೆಗ್ ಪೋಪೊಲು.

ಆಟಿಡ್ ಪೊರ್ತು ಪೋವರೆಗ್ ಚೆನ್ನೆಮಣೆ ಗೊಬ್ಬು ಗೊಬ್ಬೊಂದಿತ್ತೆರ್.

ಆಟಿದ ವಿಶೇಷ ತೆನಸು ಅಂಬಡೆ, ಪತ್ರೊಡೆ, ಕನಿಲೆ, ಪಾಗಿಲೆ, ತಜಂಕ್, ಹಲಸು, ಬೋಳೆ ಇಂಚ ಪ್ರಕ್ರತಿಡ್ ತಿಕ್ಕುನ ಕಾಯಿಕಜಿಪುಲು ತುಳುನಾಡುದ ದಿನೊನಿಚ್ಚದ ತೆನಸುಲ್.

ಅಂಚೆನೇ ತುಳುನಾಡುದ ತೆನ್ಕಾಯಿ ಭಾಗೊಡ್ “ಆಟಿ ಕಲಂಜ” ವಿಶೇಷವಾದುಂಡ್. ಉಂದು ತುಳುನಾಡುದ ವಿಶೇಷ ಆಚರಣೆ. ಅಟಿ ತಿಂಗೊಲುಡ್ ಬರ್ಪಿನ ಸೀಖ್ ಸಂಕಡೊಲೆನ್ ದೂರ ಮಲ್ಪರೆಗ್ ಕಲಂಜನ ರೂಪೊಡ್ ಇಲ್ಲ ಇಲ್ಲಗ್ ತಿರ್ಗುವೆರ್ ಪನ್ಪಿನ ನಂಬೊಲಿಗೆ ಉಂಡು. .

ಒಟ್ಟಾರೆಯಾದ್ ಪನೊಡಾಂಡ ತುಳುನಾಡುಡ್ ಆಟಿ ತಿಂಗೊಲು , ಅರೋಗ್ಯ ದೃಷ್ಟಿಡ್ ವಿಶೇಷವಾಯಿನ ಗಮನರ್ಹವಾಯಿನ ತಿಂಗೊಲಾತುಂಡ್.

ಇತ್ತೆದ ಕಾಲಘಟ್ಟೊಡ್ ಆಟಿ ತಿಂಗೊಲ್ ನೆಂಪುಗಾದ್ ಒಂಜಿ ದಿನತ್ತ ಕಾರ್ಯಕ್ರಮ ಮಲ್ತುದ್, ತುಳುನಾಡುಡ್ ಗೌಜಿಡ್ ಆಚರಣೆ ಮಲ್ಪುನವ್ವ್ ಏತ್ ಸರಿ? ಆಟಿಡ್ ಒಂಜಿ ದಿನ ಮಾತ್ರ ಅತ್ತ್ ಮುಪ್ಪ ದಿನಲಾ ಇಸೇಸ. . ಆಟಿ ತಿಂಗೊಲುದ ಮಹತ್ವನ್ ದುಂಬುದ ನಮ್ಮ ಪೀಳಿಗೆಗ್ ಮುಟ್ಟಾವುನವ್ ಮಾತೆರೆನ ಜಬಾದಾರಿಯಾತುಂಡ್..

✍️ ಜಯರಾಂ ಅಂಬೆಕಲ್ಲು ಉಡುಪಿ