ತುಳುಕೂಟ ಉಡುಪಿ (ರಿ) ವತಿಡ್ದ್ ಇರ್ವತ್ತರಡ್ಡನೇ ವರ್ಷದ ಕೆಮ್ತೂರು ದೊಡ್ಡಣ್ಣ ಶೆಟ್ರೆನ ನೆಂಪುದ ತುಳುನಾಟಕ ಪರ್ಬದ ಉದಿಪನದ ಲೇಸ್ ಜನವರಿ 7 ತಾರೀಕುಗ್ ಉಡುಪಿ ಎಮ್.ಜಿ.ಎಮ್.ಕಾಲೇಜಿದ ಮುದ್ದಣ ಮಂಟಪಡ್ ನಡತುಂಡ್.ಉಡುಪಿ ಶಾಸಕೆರಾಯಿನ ಶ್ರೀ ಯಶ್ ಪಾಲ್ ಸುವರ್ಣ ಕಜ್ಜೊದ ಉದಿಪನ ಮಲ್ತುದ್ ತುಳುಕೂಟ ಉಡುಪಿದ ಮಾದರಿ ಕಾರ್ಯಕ್ರಮ ತುಳುನಾಡುಗ್ ವಿಶೇಷ ಕೊಡುಗೆ ಕೊರೊಂದುಂಡ್ ಪಂಡುದು ಎಡ್ಡೆಪ್ಪು ಬಯಕಿಯೆರ್.
ಈ ಪೊರ್ತುಡ್ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪಡೆಯಿನ ಸಮಾಜಸೇವಕೆರಾಯಿನ ಪೂನಾ ತುಳುಕೂಟದ ರಜತ ಮಹೋತ್ಸವ ಸಮಿತಿದ ಅಧ್ಯಕ್ಷೆರಾಯಿನ ಪ್ರವೀಣ್ ಶೆಟ್ಟಿ ಮೆರೆಗ್ ಮಾನಾದಿಗೆ ಮಲ್ತೆರ್.ಮಾನಾದಿಗೆ ಪಡೆತುದ್ ಪಾತೆರಿನ ಆರು ತುಳುನಾಟಕೊಲೆಡ್ ಸಮಾಜಗ್ ಎಡ್ಡೆ ಸಂದೇಶ ತಿಕ್ಕುಂಡ್.ತುಳುಕೂಟದ ಈ ಕಜ್ಜೊಡಾದ್ ತುಳುಬಾಸೆದ ಬುಲೆಚ್ಚಿಲ್ ಆಪುಂಡ್.ನಮ ಮಾತೆರ್ಲ ಇಲ್ಲಡ್ ತುಳುಟೇ ಪಾತೆರೊಡ್.ಊರು ಬುಡ್ದ್ ಪರವೂರುಗ್ ಪೋಂಡಲಾ ಆಪ್ಪೆಬಾಸೆನ್ ಮದಪರೆ ಬಲ್ಲಿ ಪಂಡೆರು..
ಕಜ್ಜೊಡ್ ಮಲ್ಲ ಬಿನ್ನೆರಾದಿತ್ತಿನ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಹಾಯಕ ನಿರ್ದೇಶಕೆರಾಯಿನ ಶ್ರೀಮತಿ ಪೂರ್ಣಿಮಾ ಪಾತೆರ್ದ್ ನಮ್ಮ ಬದುಕೇ ಒಂಜಿ ನಾಟಕ.ಇಲ್ಲಡ್ ಕುಟುಂಬದಕ್ಲೆನೊಟ್ಟುಗ್ ಒಂಜಿ ಪಾತ್ರ ಆಂಡ ಇಲ್ಲದ ಪಿದಾಯಿ ಬನ್ನಗ ಸಮಾಜಡ್ ಕುಡೊಂಜಿ ಪಾತ್ರ.ಇಂಚ ಬೇತೆ ಬೇತೆ ಕ್ಷೇತ್ರೊಗ್ ಪೋವನಗ ಬೇತೆ ಬೇತೆ ಪಾತ್ರ ಮಲ್ಪೊಡಾಪುಂಡ್.ತುಳುಕೂಟ ಉಡುಪಿದ ತುಳುಕಜ್ಜೊ ಯುವಜನತೆಗ್ ಎಡ್ಡೆ ಸಾದಿಡ್ ಕೊನೊಪಿನ ಮೂಲಕ ತುಳುಬಾಸೆ 8ನೇ ಪರಿಚ್ಛೇದಗ್ ಆಯಿನಾತ್ ಬೇಗ ಸೇರಡ್ ಪಂಡುದ್ ಕಜ್ಜೊಗ್ ಎಡ್ಡೆಪ್ಪು ಬಯಕಿಯೆರ್..
ತುಳುಕೂಟದ ಗುರ್ಕಾರೆರಾಯಿನ ಬಿ.ಜಯಕರ ಶೆಟ್ಟಿ ಇಂದ್ರಾಳಿ ಮೇರೆನ ಗುರ್ಕಾರ್ಮೆಡ್ ನಡತಿನ ಕಜ್ಜೊಡ್ ತುಳುಕೂಟದ ಒತ್ತು ಗುರ್ಕಾರೆರಾಯಿನ ಭುವನಪ್ರಸಾದ್ ಹೆಗ್ಡೆ ಎದ್ಕೊಂಡೆರ್.ನಾಟಕ ಸಂಚಾಲಕರಾಯಿನ ಪ್ರಭಾಕರ ಭಂಡಾರಿ ಪ್ರಾಸ್ತಾವಿಕ ಪಾತೆರ್ದ್, ಕಾರ್ಯಂತೆರಾಯಿನ ಗಂಗಾಧರ್ ಕಿದಿಯೂರು ಸೊಲ್ಮೆ ಸಂದಾಯ್ತ ಮಲ್ತೆರು.ಡಾ.ವಿ.ಕೆ.ಯಾದವ್ ಕಜ್ಜೊದ ನಿರೂಪಣೆ ಮಲ್ತೆರು.ತುಳುಕೂಟದ ಪಣವುದ ಪಾಲವೆರಾಯನ ಚೈತನ್ಯ ಎಂ ಜಿ, ಕೆಮ್ತೂರು ದೊಡ್ಡಣ್ಣ ಶೆಟ್ರೆನ ಕುಟುಂಬದ ವಿಜಯ್ ಕುಮಾರ್ ಶೆಟ್ಟಿ, ತುಳುಕೂಟದ ಒತ್ತು ಗುರ್ಕಾರೆರಾಯಿನ ಮನೋರಮಾ ಶೆಟ್ಟಿ ಮಿತ್ತರ್ಮೆಡಿತ್ತೆರ್.
ಈ ಸರ್ತಿದ ತುಳುನಾಟಕ ಪರ್ಬೋನ್ ಇಂಚಪ್ಪೊಗ್ ವಿಷ್ಣು ಪಾದ ಸೇರಿನ ರಂಗಕರ್ಮಿ ಸಮಾಜರತ್ನ ಕರಂದಾಡಿ ಲೀಲಾಧರ್ ಶೆಟ್ರೆಗ್ ಅರ್ಪಣೆ ಮಲ್ತೆರು..ಅಂಚೆನೇ ಇಂಚಪ್ಪೊಗ್ ಅಗತಿನ ಹಿರಿಯ ಸಾಹಿತಿ ತುಳುನಾಡುದ ಮಲ್ಲ ಆಸ್ತಿ ಸಜ್ಜನಿಕೆದ ಸಾಕಾರ ಮೂರ್ತಿ ಅಮ್ರತಸೋಮೇಶ್ವರ್ ಮೆರೆಗ್ ಈ ಪೊರ್ತುಡ್ ಶ್ರದ್ಧಾಂಜಲಿ ನಡತುಂಡ್.
ಸಭಾಕಜ್ಜೊ ಮುಗಿಬೊಕ್ಕ ಗಯಾಪದ ಕಲಾವಿದೆರು ಮೊಕ್ಲೆನ ” ಮುರಳಿ ಈ ಪಿರ ಬರೊಲಿ” ನಾಟಕ ನಡತುಂಡ್.ಏಳು ದಿನ ನಡಪರೆಗುಪ್ಪುನ ನಾಟಕೊಗ್ ಖ್ಯಾತ ರಂಗಕರ್ಮಿಲಾಯಿನ ಶ್ರೀ ಜಗನ್ಮೋಹನ್,ರಂಗನಟೆ ಮೋಹನ್ ಮಾರ್ನಾಡು,ತುಳು ಕನ್ನಡ ಸಾಹಿತಿ ಶ್ರೀಮತಿ ಕಾತ್ಯಾಯಿನಿ ಕುಂಜಿಬೆಟ್ಟು ಮೊಕುಲು ತೀರ್ಪು ಕೊರ್ರೆಗುಲ್ಲೆರ್..
by 