ಕೆಮ್ತೂರು ತುಳುನಾಟಕ ಪರ್ಬ ಲೀಲಾಧರ್ ಶೆಟ್ರೆಗ್ ಅರ್ಪಣೆ.

ತುಳುನಾಡುದ ತುಳುರಂಗಭೂಮಿದ ಬುಲೆಚ್ಚಿಲೆಡ್ ಅಪ್ರತಿಮ ಸೇವೆ ಮಲ್ತಿನ ಮಹನೀಯೆರೆಡ್ ದಿ.ಕೆಮ್ತೂರು ದೊಡ್ಡಣ್ಣ ಶೆಟ್ರು ಅಗ್ರಗಣ್ಯೆರ್.ಅರೆನ ತುಳುರಂಗಚಳುವಳಿದ ದಿಸೆಟ್ ತುಳುಬಾಸೆ ಕುಡೊರ ಪುನಶ್ಚೇತನ ಆಂಡ್ ಪಂಡುಂಡ ತಪ್ಪಾವಂದ್.ಉಂದೆನ್ ಗಣನೆಗ್ ದೆತೊಂಡಿನ ತುಳುಕೂಟ ಉಡುಪಿ ಕೆಮ್ತೂರು ದೊಡ್ಡಣ್ಣ ಶೆಟ್ರೆನ ನೆಂಪುಗಾದ್ ನಿರಂತರ ಉಡುಪಿಡ್ ತುಳುನಾಟಕ ಪಂತೊನ್ ನಡಪಾವೊಂದ್ ಬರೊಂದುಂಡ್.ಈ ಮೂಲಕ ತುಳುರಂಗಭೂಮಿಗ್ ವಿಶೇಷವಾಯಿನ ಕೊಡುಗೆ ಕೊರೊಂದುಂಡ್.ಕೆಮ್ತೂರು ತುಳುನಾಟಕ ಪಂತೊದ ಮುಖೇನ ಸಾರಮಂದಿ ಕಲಾವಿದೆರೆನ್ ಪುಟ್ಟಪಾಡುದ್ ತುಳುರಂಗಭೂಮಿ ಅನ್ಯಬಾಷಾ ರಂಗಭೂಮಿಲೆಗ್ ಸರಿಸಮನಾದ್ ಬುಲೆಯುನ ನಿಟ್ಟುಡ್ ಪ್ರೇರೇಪಣೆ ಮಲ್ಪುನ ಪ್ರಯತ್ನ ಮಲ್ತೊಂದುಂಡ್ ಪಂಡುದ್ ಉಡುಪಿ ತುಳುಕೂಟದ ಗುರ್ಕಾರೆರಾಯಿನ ಬಿ.ಜಯಕರ ಶೆಟ್ಟಿ ಇಂದ್ರಾಳಿ ತೆರಿಪಾದೆರ್.ಆರ್ ಇನಿ ಉಡುಪಿ ಪ್ರೆಸ್ ಕ್ಲಬ್ ಡ್ ನಡತಿನ ಪತ್ರಿಕಾಗೋಷ್ಠಿ ಡ್ ಪಾತೆರಿಯೆರು..

ಕೆಮ್ತೂರು ದೊಡ್ಡಣ್ಣ ಶೆಟ್ಟಿ ನೆಂಪುದ ತುಳುನಾಟಕ ಪಂತೊದ 22 ನೇ ವರ್ಷದ ಪಂತೊ ಜನವರಿ 7 ಡ್ದ್ 13 ಮುಟ್ಟ ಉಡುಪಿ ಎಮ್.ಜಿ.ಎಮ್. ಕಾಲೇಜಿದ ಮುದ್ದಣ ಮಂಟಪಡ್ ನಡಪರೆಗುಂಡ್ ಆಯೋಜನೆ ಮಲ್ದುಂಡ್.ಈ ವರ್ಷದ ತುಳುನಾಟಕ ಪಂತೊನ್ ಇಂಚಪ್ಪೊಗ್ ವಿಷ್ಣು ಪಾದ ಸೇರಿನ ಹಿರಿಯ ರಂಗಕರ್ಮಿ ಸಮಾಜರತ್ನ ಕರಂದಾಡಿ ಲೀಲಾಧರ್ ಶೆಟ್ರೆಗ್ ಅರ್ಪಣೆ ಮಲ್ತೊಂದುಲ್ಲ ಪಂಡುದ್ ಈ ಪೊರ್ತುಗ್ ಪಂಡೆರ್.

ಪತ್ರಿಕಾಗೋಷ್ಠಿ ಡ್ ಕೆಮ್ತೂರು ತುಳುನಾಟಕ ಪರ್ಬದ ಸಂಚಾಲಕೆರಾಯಿನ ಪ್ರಭಾಕರ ಭಂಡಾರಿ, ತುಳುಕೂಟದ ಕಾರ್ಯಂತೆರಾಯಿನ ಗಂಗಾಧರ್ ಕಿದಿಯೂರು, ಮಾಧ್ಯಮ ಸಂಚಾಲಕೆರಾಯಿನ ಪ್ರಕಾಶ್ ಸುವರ್ಣ ಕಟಪಾಡಿ,ಭಾರತಿ ಟಿ.ಕೆ., ಉಪಸ್ಥಿತರಿತ್ತೆರು..