ಒಡಿಪು ತುಳುಕೂಟದ ವತಿಡ್ದ್ 20ನೇ ವರ್ಷದ ಕೆಮ್ತೂರು ದೊಡ್ಡಣ್ಣ ಶೆಟ್ಟೆರೆನ ನೆಂಪುದ ತುಳು ನಾಟಕ ಪರ್ಬ ಜ.24ಡ್ದ್ ಫೆ.2 ಮುಟ್ಟ ಎಂಜಿಎಂ ಕಾಲೇಜಿದ ಮುದ್ದಣ ಮಂಟಪಡ್ ನಡಪರೆಗುಂಡ್.
ಈ ಬಗ್ಗೆ ಕೂಟದ ಅಧ್ಯಕ್ಷೆರಾಯಿನ ಬಿ.ಜಯಕರ ಶೆಟ್ಟಿಇಂದ್ರಾಳಿ ಮೇರು ಸುದ್ದಿಗೋಷ್ಠಿಡ್ ಮಾಯಿತಿ ಕೊರಿಯೆರ್.
ಜ.24ದಾನಿ ಬೈಯಗ್ 5 ಗಂಟೆಗ್ 7 ದಿನ ನಡಪುನ ನಾಟಕ ಪರ್ಬೊನ್ ರಾಜ್ಯ ಇಂಧನ ಬೊಕ್ಕ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಚಿವೆರಾಯಿನ ವಿ.ಸುನಿಲ್ ಕುಮಾರ್ ಉದಿಪನ ಮಲ್ಪರೆಗುಲ್ಲೆರ್. ಮೂಡಬಿದ್ರೆ ಶ್ರೀಜೈನಮಠದ ಡಾ.ಸ್ವಸ್ತಿಶ್ರೀ ಚಾರುಕೀರ್ತಿ ಭಟ್ಟಾರಕ ಪಂಡಿತಾಚಾರ್ಯ ಮಹಾಸ್ವಾಮೀಜಿ ಆಶೀರ್ವಚನ ಮಲ್ಪರೆಗುಲ್ಲೆರ್. ಮಲ್ಲ ಬಿನ್ನೆರಾದ್ ಒಡಿಪು ಶಾಸಕೆರಾಯಿನ ಕೆ.ರಘುಪತಿ ಭಟ್, ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಹಾಯಕ ನಿರ್ದೇಶಕೆರಾಯಿನ ಕುಮಾರ ಬೆಕ್ಕೇರಿ ಪಾಲ್ ಪಡೆಯರೆಗುಲ್ಲೆರ್.
ಈ ವೇದಿಕೆಡ್ ನಾಟಕಕಾರೆರಾಯಿನ ಗಂಗಾಧರ ಕಿದಿಯೂರು ಮೆರೆನ ಖ್ಯಾತ 14 ನಾಟಕೊಲೆನ ಸಂಪುಟ ಮೆನ್ಕುನ ಸಿರಿಸಿಂಗಾರ ಬುಡುಗಡೆ ಆವರೆಗುಂಡ್. ಈ ಸಂಪುಟದ ಬಗ್ಗೆ ತೆಂಕನಿಡಿಯೂರು ಕಾಲೇಜಿದ ಪ್ರಾಂಶುಪಾಲ ಡಾ.ಗಣನಾಥ ಎಕ್ಕಾರು ಪಾತೆರುವೆರ್. ಜಯಕರ ಶೆಟ್ಟಿ ಇಂದ್ರಾಳಿ ಗುರ್ಕಾರ್ಮೆಡಿಪ್ಪುವೆರ್.
ಸುದ್ದಿಗೋಷ್ಠಿಡ್ ನಾಟಕ ಪರ್ಬದ ಸಂಚಾಲಕೆರಾಯಿನ ಬಿ.ಪ್ರಭಾಕರ ಭಂಡಾರಿ, ತುಳುಕೂಟದ ಕಾರ್ಯಂತೆರಾಯಿನ ಗಂಗಾಧರ ಕಿದಿಯೂರು, ಪಣವುದ ಪಾಲವೆರಾಯಿನ ಚೈತನ್ಯ ಎಂ.ಜಿ., ತುಳು ಕಾದಂಬರಿ ಪಂತೊದ ಸಂಚಾಲಕಿ ತಾರಾ ಉಮೇಶ್ ಆಚಾರ್ಯ ಉಪಸ್ಥಿತರಿತ್ತೆರ್.
ಜ.24 ತಾರೀಕುದಾನಿ ಮಂಗಳೂರುದ ಜರ್ನಿ ಥಿಯೇಟರ್ ಗ್ರೂಪ್ ದಕ್ಲೆನ ಆದಿ ಅಳವುದ ಸಾದಿ, 25 ತಾರೀಕುದಾನಿ ಕಟಪಾಡಿದ ರಂಜನ ಕಲಾವಿದೆರೆಡ್ದ್ ಕಮಲಿ, 26 ತಾರೀಕುದಾನಿ ಮಣಿಪಾಲದ ಸಂಗಮ ಕಲಾವಿದೆರೆಡ್ದ್ ಸೊರದಾಂತಿ ನಲಿಕೆ, 27 ತಾರೀಕುದಾನಿ ಕೊಡವೂರು ನವಸುಮ ರಂಗಮಂಚದಕ್ಲೆನ ಆಣ್ ಸುರ್ಪೊದುಲಯಿದ ಪೊಣ್ಣ ಕಣ್ಣ್, 28 ತಾರೀಕುದಾನಿ ಮಲ್ಪೆ ಕರಾವಳಿ ಕಲಾವಿದೆರೆಡ್ದ್ ಗಾವುದ ಪುಂಚ, ಫೆ.1ತಾರೀಕುದಾನಿ ಸುಮನಸಾ ಕೊಡವೂರು ತಂಡೊಡ್ದ್ ಕಾಪ ಬೊಕ್ಕ ಫೆ. 2 ತಾರೀಕುದಾನಿ ಪಟ್ಲದ ಭೂಮಿಗೀತ ಸಾಂಸ್ಕೃತಿಕ ವೇದಿಕೆಡ್ದ್ ಈದಿ ನಾಟಕೊಲ್ ಪ್ರದರ್ಶನ ಆವರೆಗುಂಡ್.ಪಂಡುದ್ ಸಂಘಟಕೆರ್ ಸುದ್ದಿಗೋಷ್ಠಿಡ್ ತೆರಿಪಾದೆರ್.
by 