ತುಳುವೆರೆ ಆಟಿ

🙏ತುಳುವೆರೆ ಆಟಿ🙏

ಪಗ್ಗು ಬೇಷೊಡ್ ಪಾಡ್ದುಂಡ್ ನೇಜಿ
ಕಾರ್ತೆಲ್ಡ್ ನಿಲೆ ಆತುಂಡ್ ನೀರ್
ಬಂಗ್ಞೊಡೆ ಮುಗಿದುಂಡ್ ಕಾರ್ತಿದ ಬೆನ್ನಿ
ಬತ್ತುಂಡ್ ಇತ್ತೆ ತಿಂಗೊಲು ಆಟಿ

ಪುಷ್ಯೆ ಆಶ್ಲೇಷದ ಬರ್ಸ ಬರ್ಪುಂಡ್ ಪನಿ ಕಡ್ಯಂದೆ
ಒಲ್ಪ ತೂಂಡಲಾ ನೀರ್ ನೀರ್ ನೀರುದೊಸರ್
ಪಚ್ಚೆ ಸೀರೆ ರವಕೆಡ್ ಐತ ಆತೋಲ್ ಭೂಮಿಯ್ಯಪ್ಪೆ
ಪಚ್ಚನೆ ಬುಲೆಪಿ ಬುಲೆ ಸೆಲೆ ಕೆಯಿ ಕಣ್ಣುಗ್ ಸಂಪು

ತಿರ್ತ್ ಬತ್ತುಂಡ್ ಮಿತ್ತ್ ಅಟ್ಟೊಡ್
ಇತ್ತಿ ಚೆನ್ನದ ಮಣೆ ಪೊಂಗರ್ದ ಕಾಯಿಲು
ಜೋಡು ಪೆರ್ಗ – ಅರಸು ಚೆನ್ನೆದ ಗೊಬ್ಬುಲು
ಮೆಗ್ದಿ ಪಲ್ದಿ ಒಟ್ಟುಗ್ ಗೊಬ್ಬೊಡ್ಚಿ ಪನ್ಪಿ ಹಿರಿಯೆರೆ ಪಾತೆರ

ರಚ್ಚ, ಗೂಂಜಿ, ನೀರುಪ್ಪಡ್, ಪೆಜಕಾಯಿ
ನುಂಗೆಲ್ ನಂಗ್, ಬತ್ತಿ , ಕುರ್ಚಿ ಗೋಲಾಯಿ
ನುರ್ಗೆ, ತೇವ್, ತೊಜಂಕ್ ಕಲ್ಲಲಾಂಬು
ಪುಲ್ಕಟ್ಟೆ, ಪೆಲತ್ತರಿ ಅರೆಪುಡ್ ಪಾಡುನ ಕಿರೆಂಗುದ ಪೂಲು

ಪೆಲಕಾಯಿದ ಗಟ್ಟಿ ಕೇನೆದ ಪುಂಡಿ
ಪೊಟ್ಟು ಕಾಫಿ ಪರ್ದ್ ಪಿದಡುಂಡ್ ಗುಡ್ಡೆ ಕುಮೆರಿಗ್
ಕಿದೆಕ್ ತಪ್ಪು ಎರ್ಲು ಕೈಕಂಜಿಲೆಗ್ ಅರ್ಕಂಜಿ
ಕೊನತುದ್ ಉಣುಂಡ್ ರಾಗಿ ಬೆರಕೆದ ಉರ್ಪೆಲರಿತ ಗಂಜಿ

ಬಾಯಿಗ್ ತೊಡ್, ಬಂಜಿಗ್ ಬಡವುಗೆ
ಕಲ್ಲ್ ತಿಂದುಂಡಲಾ ನೀರಾವುಗೆ
ತಿನ್ಪಿನಾತ್ ಉನ್ಪಿನಾತ್ ಕರವುಂಡುಗೆ
ಆಟಿದ ದೊಂಬುಡ್ ಆನೆದ ಬೆರಿ ಪುಡವುಂಡುಗೆ

ಮುಡಿಕುಕ್ಕು, ಕಂರ್ಡೆದ ಉಪ್ಪಡ್
ಕುಡುತ ಸಾರ್ ಬೆರಕೆಗ್ ತೌತೆ
ತಿಮರೆದ ಬಜ್ಜಿ ಉಪ್ಪಡ್ ಪಚ್ಚಿರ್
ಅರ್ತಿಕಾಯಿದ ಕೈಪ್ ರಾತ್ರೆಗ್ ಮಾತ್ರ ನುಪ್ಪು

ಬತ್ತುಂಡ್ ಆಟಿದ ಅಮವಾಸೆ
ಪುಲ್ಯಾನಗ ಕನತ್ತ್ಂಡ್ ಪಾಲೆದ ಕೆತ್ತೆ
ಬೊರ್ಗಲ್ ಪಾಡ್ದ್ ಒಗ್ಗರಣೆ ಕೊರ್ದ್
ಪರ್ಪುಂಡ್ ಪುದರ್ ಪನಂದೆ ಕೈಪೆ ಮರ್ದ್

ನಾಗ ಬನತ ಬೂರ್ ಬಲ್ಲೆನ್ ಕಡ್ತುಂಡ್
ಬೇಗನೆ ಬತ್ತುಂಡ್ ನಾಗರ ಪಂಚೆಮಿ
ಜಾಗೆದ ನಾಗೆ ಮೂಲ ನಾಗಗ್
ಬೆರನ ಕೈಟ್ ತನು ಮೈಪಾದ್ ತಂಬಿಲ ಕಟ್ಟಾಂಡ್

ಕುತ್ಪಾಂಡ್ ಲಾಕಿ, ಕಟ್ಟುಂಡ್ ಕೋರಿ
ಗಡಿಕಡಪ ದೇರ್ಂಡ್ ಆಟಿದ ಮಾರಿ
ಅಗೆಲ್ ಬಲಸ್ಂಡ್ ತರೆ ತಗ್ಗಾದ್ ಕೈ ಮುಗಿದ್
ಕೈಕೊನ್ಲೆ ಪಂಡ್ಂದ್ ಅರ್ತಿಂಡ್ ಪನ್ನೊಂಡ್

ಬರೊಂದ್ ಉಲ್ಲೆ ಆಟಿ ಕಳಂಜೆ
ಕೇನೊಂದ್ ಉಲ್ಲೆ ಕಲಸೆ ಬಾರ್
ಬೊಟ್ಟುನ ತೆಂಬರೆ ಪಾಡುನ ಪಜ್ಜೆ
ನಲ್ಪುನ ನಲಿಕೆ ಪನ್ಪಿನ ಪಾಡ್ದನ
ಬಾನದಂಚಿ ಮಿತ್ತ್ ಕೈಯಲ ಮುಗಿದೆ
ಐಸಿರಿ ಸಂಪತ್ತ್ ದಿಂಜ್ಞಾಡ್
ಕೊರ್ಪಿ ಪೊಣ್ಣ ಸಂತತಿ ಬುಲೆವಡ್
ಕಬೆತ್ತಿ ಬೊರಿಯಡ್ ಪೇರ್ ಉರ್ಕವಡ್
ನಾಲ್ ಬಾರ್ ಮಾಡುಗ್ ಪಾರಾದ್
ಪಿರಿ ಪನ್ನೊಂದ್ ಉಲ್ಲೆ ಆಟಿ ಕಳಂಜೆ

ಮದಪಡೆ ತುಳುನಾಡುದ ರೀತಿ ನೀತಿನ್
ಕಡ್ಪಡೆ ಮೂಲ ಬೇರುನ್, ಪೊಲ್ಪಡೆ ಕಟ್ಟುಕಟ್ಲೆನ್
ಪೊರ್ಲುಡ್ ಕಲ್ಪಾಲೆ ತುಳುವೆರೆ ಎಡ್ಡೆಪ್ಪುನ್
ಬುಲೆವಡ್ ತುಳು ಬಾಸೆ, ತುಳು ಅಪ್ಪೆ ಜೋಕುಲು

✍️ಉದಯ ಬಿ. ಶೆಟ್ಟಿ, ಪಂಜಿಮಾರು