. ಸರ್ವ ತುಲುವೆರೆನ ಅಪ್ಪೆ ಕಟೀಲೇಶ್ವರೀ :ಅಸ್ರಣ್ಣ
ಕಟೀಲುಡ್ ತುಳುವರ್ಲ್ಡ್ ಫೌಂಡೇಶನ್ ದ ಪ್ರಧಾನ ಕಛೇರಿ ಉದಿಪನೆ:
ತುಳುನಾಡುಡಾ ಜಾತಿ ಮತ ಭಾಷೆ ಭೇದವಿಪ್ಪಂದೆ ಸರ್ವೆರೆನ್ ಅನುಗ್ರಹ ಮಲ್ಪುನಾಲ್ ಕಟೀಲ ಉಳ್ಳಾಲ್ತಿ ಶ್ರೀ ದುರ್ಗಾಪರಮೇಶ್ವರಿ ಅಪ್ಪೆ. ತುಳುನಾಡುಡ್ ಪಂಗಡ ಬೇದ ಭಾವವಿಪ್ಪಂದೆ ಒಂಜಿ ಮಲ್ಪುನ ಮನೋಭಾವಡಾದ್ ತುಳುವರ್ಲ್ಡ್ ಫೌಂಡೇಶನ್ ಕಟೀಲುದ ಈ ಪುಣ್ಯ ನೆಲಟ್ ಪ್ರವರ್ತನ ಆರಂಭ ಮಲ್ದಿನಿ ಆಪ್ಪೆನ ಅನುಗ್ರಹ. ನಮ್ಮ ನಡುಟುಪಾಪುನ ವಿಭಜನೆದ ಪಿರಾವುಡುಪ್ಪುನ ಕಟ್ಟುಕಥೆತ ಬಗ್ಗೆ ಸಮಗ್ರ ಅಧ್ಯಯನ ನಡಪೊಡ್ ಬೊಕ್ಕ ಸತ್ಯ ಅಸತ್ಯದ ಬಗ್ಗೆ ಮನವರಿಕೆ ಮಲ್ಪುನ ಕೆಲಸ ಆವೊಡ್ ಪಂಡುದು ತುಳುವರ್ಲ್ಡ್ ಫೌಂಡೇಶನ್ ಗೌರವಾಧ್ಯಕ್ಷ ಬೊಕ್ಕ ಕಟೀಲು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಪ್ರಧಾನ ಅರ್ಚಕೆರಿಯಿನ ಶ್ರೀ ಶ್ರೀಹರಿನಾರಾಯಣದಾಸ ಅಸ್ರಣ್ಣ ಮೇರು ಅಭಿಪ್ರಾಯಪಂಡೆರು. ಇರು ಶ್ರೀ ದುರ್ಗಾಪರಮೇಶ್ವರಿ ದೇವಳ ಪ್ರಥಮ ದರ್ಜೆ ಕಾಲೇಜು ಶ್ರೀ ಕ್ಷೇತ್ರ ಕಟೀಲುಗ್ ತುಳುವರ್ಲ್ಡ್ ಫೌಂಡೇಶನ್ ದ ಪ್ರಧಾನ ಕಚೇರಿನ್ ಉದಿಪನ ಮಲ್ತುದ್ ಪಾತೆರಿಯೆರು.
ತುಳುವರ್ಲ್ಡ್ ಫೌಂಡೇಶನ್ ಅಧ್ಯಕ್ಷೆರಾಯಿನ ಸರ್ವೋತ್ತಮ ಶೆಟ್ಟಿ ಅಬುಧಾಬಿ ಮೇರು ಅಧ್ಯಕ್ಷತೆಡಿತ್ತುದ್ ಪಾತೆರ್ದ್ ತುಳುವೆರೆಗ್ ಪ್ರತ್ಯೇಕ ರಾಜ್ಯ ಸ್ಥಾನಮಾನೊಲು ಒವ್ಲಾ ಇಜ್ಜಿಡಲಾ ತುಳು ಭಾಷೆ ಇನಿಕುಲಾ ರಾಜ ಮರ್ಯಾದೆಡ್ ಉಂಡು. ನೆಕ್ ಕಾರಣ ನಮ ನಂಬೊಂದ್ ಬರೊಂದುಪ್ಪುನ ದೈವ ದೇವೆರ್. ನಮ್ಮ ಹಿರಿಯೆರು ಸ್ವಾತಂತ್ರ್ಯ ಪೂರ್ವಡಾ ತುಳುವ ಮಹಾಸಭೆ ಪನ್ಪಿನ ಸಂಸ್ಥೆನ್ ಸ್ಥಾಪನೆ ಮಲ್ತುದ್ ತುಳುವೆರೆನ ಬೇಡಿಕೆಗಾದ್ ಹೋರಾಟ ಮಲ್ದಿತ್ತೆರು. ಅಯಿತ ನೆಂಪುಗಾದ್ ತುಳುವರ್ಲ್ಡ್ ಫೌಂಡೇಶನ್ “ತುಳುವ ಮಹಾಸಭೆ “ತ್ತ ಪುದರುಡ್ ತುಳುನಾಡು ಕೂಟಲೆನ್ ರಚನೆ ಮಲ್ಪುಂಡ್. ತುಳುನಾಡುದ ಮಾತಾ ಗ್ರಾಮಲೆಡ್ ಈ ಕೂಟಲೆನ್ ರಚನೆ ಮಲ್ಪರೆಗ್ ಮಾತಾ ತುಳುವೆರು ಈ ಯೋಜನೆಡ್ ಭಾಗಿಯಾವೊಡು. ನೆಕ್ಕಾದ್ ಕಟೀಲು ಅಪ್ಪೆನ ಸನ್ನಿಧಿಡ್ ತುಳುವ ಮಹಾಸಭೆತ್ಥ ಯೋಜನೆಲೆಗ್ ಚಾಲನೆ ಕೊರ್ತುಂಡ್, ಇತ್ತೆ ತುಳುವ ಮಹಾಸಭೆಕ್ 96 ವರ್ಷ ಪೂರ್ತಿಯಾದಿತ್ತುದ್, 100ನೇ ವರ್ಷ 2028ಡ್ ವಿಶ್ವ ತುಳುವ ಮಹಾಸಭೆ ನಡಪರೆಗುಂಡ್ ಪಂಡೆರು.
ಕಾರ್ಯಕ್ರಮಡ್ ಹರಿಕೃಷ್ಣ ಪುನರೂರು, ತುಳು ಅಕಾಡೆಮಿ ಮಾಜಿ ಅಧ್ಯಕ್ಷೆ ಶ್ರೀಮತಿ ಜಾನಕಿ ಬ್ರಹ್ಮಾವರ, ಶ್ರೀಮತಿ ವಜ್ರಾಕ್ಷಿ ಬಾಲಕೃಷ್ಣ ಶೆಟ್ಟಿ ಪೊಳಲಿ, ಲಯನ್ ದಿವಾಕರ ಶೆಟ್ಟಿ ಸಾಂಗ್ಲಿ, ಕಟೀಲ್ ಕಾಲೇಜು ಪ್ರಾಂಶುಪಾಲೆರಾಯಿನ ಡಾ. ವಿಜಯ್, ಭುವನಾಭಿರಾಮ ಉಡುಪ, ಯೋಗೀಶ್ ಶೆಟ್ಟಿ ಜೆಪ್ಪು, ಪ್ರವೀಣ್ ಕುಮಾರ್ ಕೊಡಿಯಾಲ್ ಬೈಲ್, ಪುತ್ತೂರು ತುಳುಕೂಟ ಅಧ್ಯಕ್ಷ ಪಾಟ್ರಿಕ್ ಸಿಪ್ರಿಯನ್ಹ್ ಮಸ್ಕರ್ನಸ್, ಸುಧಾಕರ ಶೆಟ್ಟಿ ಕಟೀಲು, ವಿಶ್ವನಾಥ ಶೆಟ್ಟಿ ಕಟೀಲು, ಶಂಕರ ಶೆಟ್ಟಿ ಕಟೀಲು, ಉಮೇಶ್ ಶೆಟ್ಟಿ ಕಟೀಲು, ಮಂದಾರ ರಾಜೇಶ್ ಭಟ್, ಚಂದ್ರಹಾಸ ದೇವಾಡಿಗ ಮೂಡುಬಿದಿರೆ, ಮುರಳಿ ಭಟ್ ಉಪ್ಪಂಗಳ, ಸಂಜೀವ ಪಾಂಡೇಶ್ವರ, ಮಂಜುನಾಥ ಅಡಪ್ಪ, ಪ್ರಕಾಶ್ ಪಾವಂಜೆ ಐಲೇಸ, ಪದ್ಮಶ್ರೀ ಭಟ್ ನಿಡ್ಡೋಡಿ ಮೊಕುಲು ಶುಭ ಹಾರೈಸಿಯೆರು.
ತುಳುವರ್ಲ್ಡ್ ಫೌಂಡೇಶನ್ ದ ಪ್ರಧಾನ ಕಾರ್ಯದರ್ಶಿ ಪುರುಷೋತ್ತಮ ಬಲ್ಯಾಯ ಕಾರ್ಯಕ್ರಮ ನಿರೂಪಣೆ ಮಲ್ತೆರು, ಪ್ರಧಾನ ಸಂಚಾಲಕ ಪ್ರಮೋದ್ ಸಪ್ರೆ ಸ್ವಾಗತ ಮಲ್ತುದ್, ಡಾ. ರಾಜೇಶ್ ಆಳ್ವ ಬದಿಯಡ್ಕ ಸೊಲ್ಮೆ ಸಂದಾಯ್ತ ಮಲ್ತೆರ್. ಕಾರ್ಯಕ್ರಮಡ್ ಬೊಲಿಕೆ ಜಾನಪದ ಕಲಾವಿದೆರಾಯಿನ ಶಂಕರ ಸ್ವಾಮಿಕೃಪಾ ಬೊಕ್ಕ ತಂಡದಕ್ಲೆಡ್ ಪಾಡ್ದನ ಮೇಳ ನಡತುಂಡ್.
by 