ತುಳು ಗಝಲ್

ತುಲು ಗಝಲ್

ಬಡವುದ ಬಂಜಿಗ್ ಒಂಜೀತ್ ತೆಲಿ ತಿಕ್ಕ್ಂಡಲಾ ಯಾವುಜಾ ಬಾಲೆ
ಮೊಡೆತಿನ ಕಬಿತೆದ ತಿರ್ಲ್‌ನಿಂಚಿಗ್ ಪಟ್ಯೆರೆ ಪಂಡ ಕೇನುಜಾ ಬಾಲೆ

ಅಬ್ಬರೊದ ಜಾತ್ರೆ ಕೋಲ ನೇಮೊಲು ನನ ಬರ್ಪಿ ವರ್ಸೊಗಾಂಡತ್ತೇ
ಗೊಬ್ಬರೊದ ಕಿದೆನ್ ಖಾಲಿ ಮಲ್ಪೊಡಿತ್ತೆ ಬರ್ಸೊ ತೋಜುಜಾ ಬಾಲೆ

ಭೂಮ್ಯಪ್ಪೆನ ಮಟ್ಟೆಲ್ಡ್ ನೀರ ಒಸರ್‌ ಗತ್ತ್‌ಡ್ ಪರಿಪುನವೇ ಪೊರ್ಲು
ಬಾಮೊಡು ಉಡಲ್ ದಿಂಜಿನ ಪೊರ್ತುಡು ಬೇನೆ ಮಾಜುಜಾ ಬಾಲೆ

ಬೇಲೆದ ಬಂಙೊನು ಇತ್ತೆನೇ ತೆರಿಯೊನೊಡು ಪನ್ಪಿನವು ಎಲ್ಲೆಗ್ ಎಡ್ಡೆ
ಕಾಲೊದ ಬಲಿಪುದ ಒಟ್ಟೊಟ್ಟುಗು ಸೇರ್ದ್ ನಡಪೆರೆ ಆಪುಜಾ ಬಾಲೆ

ಪಜ್ಜೆದ ಲೆಕ್ಕೊನು ಮನಸ್‌ಡೇ ಗೆನ್ಪುಲೆಕ ಬದ್ಕ್ ದುಂಬರಿಯಡ್ ಹಿತೇಶ
ಕಜ್ಜೊಗು ಬೋಡಾದ್ ಉಮೇದ್‌ಡ್ ಬೆನ್ಪುನ ಕನ ಬೂರುಜಾ ಬಾಲೆ.

ಹಿತೇಶ್ ಕುಮಾರ್ ಎ
ತುಲುವೆರೆ ಕಲ