ಅಯ್ಯೋಯ್ಯೊ ನಮ ನಮನೇ ಅತ್ತ್…!?

ವಿಜ್ಯಾನೊದ ಒಂಜಿ ಬರವು…

ಅಯ್ಯೋಯ್ಯೋ ನಮ ನಮನೇ ಅತ್ತ್…!?

“ಮಾನವಾ, ಈ ದೇಹವು ಮೂಳೆ ಮಾಂಸದ ತಡಿಕೆ ಅದರ ಮೇಲಿದೆ ತೊಗಲಿನ ಹೊದಿಕೆ..”
ಪನ್ಪಿನ ಪದ್ಯೊನು ಡಾಕ್ಟರ್ ರಾಜಕುಮಾರ್ ಮೆರೆನ ಸೊರೊಟ್ಟು ಕೇಂದಿನ ಈ ಪೊರ್ಲುದ ಪದ್ಯೊನು ನನ ನಮ ಬಹುಶಃ ಇಂಚ ಪನೊಡಾವು…”ಮಾನವಾ, ಈ ದೇಹವು ಕೋಟಿ ಕೋಟಿ ಜೀವಿಗಳ ಹೊತ್ತೂ ಸಲಹುತಿದೆ…ನಿನ್ನಾ..ಸಲಹುತಿದೆ…” ಇತ್ತೆ ನಿಕ್ಲೆನ ಮನಸ್ಸ್ಡ್ ಪುಟ್ಟುನ ಪ್ರಶ್ನೆ ದಾದ ಪಂಡ ಒಂಜೇ ಶರೀರೊಡು ಕೋಟಿ ಕೋಟಿ ಜೀವಿಲೆನ್ ಎಂಚ ತಾಂಕೆರೆ ಸಾಧ್ಯ..ಪನ್ಪಿನ ಆಶ್ಚರ್ಯೋ ಅಪಿನ ಸಹಜನೆ. ಅಂದ್ ನಮ್ಮ ಈ ಸರ್ರೊಡು ಕೋಟಿ ಕೋಟಿ ಸೂಕ್ಷ್ಮ ಜೀವಿಲು ಉಲ್ಲ, ಆಂಡಲಾ ಈ ಸರ್ರ ನಮ್ಮನೇ..! ಒಂಜಿ ಸಾವಿರ ಸಹಸ್ರಕೋಟಿ ಬ್ಯಾಕ್ಟೀರಿಯೊಲು ನಮ್ಮ ಈ ಸರ್ರೊನೇ ಇಲ್ಲ್ ಮಲ್ತ್ ಕುಲ್ದ ಪನ್ಪಿನವು ಸತ್ಯೊ. ನಮ ತಿಂದಿ ಒಣಸ್ನ್ ಕರಪ್ಪೆರೆ, ಅಂಚೆನೆ ಕೆಲವು ರೀತಿದ ಸರ್ರೊದ ಉಲಾಯಿಯೆ ಆಹಾರೊದ ಅಂಸೊಲೆನ್ ಉಂಡು ಮಲ್ಪೆರೆ ಬೊಕ್ಕ ರೋಗ ಬರಂದಿಲೆಕ್ಕ ತಡೆಯೆರ್ಲಾ ಈ ಬ್ಯಾಕ್ಟೀರಿಯೊಲೆನ್ ಲೆಕ್ಕ ಮಲ್ಪೆರೆ ಆವಂದಿನಾತ್ ಸೈನ್ಯೊ ಬಚ್ಚೆಲ್ ದಾಂತೆ ಕೆಲಸ ಮಲ್ತೊಂದಿಪ್ಪುವ ನಮ್ಮ ಸರ್ರೊದ ಉಲಾಯಿಯೆ. ಅನುವಂಶೀಯತೆ, ನಿದ್ರೆ, ಸಂತಾನ, ಸಂಬಂಧೊ ಇಂಚಿತ್ತಿ ಬೇತೆ ಬೇತೆ ಆಯಾಮೊಲೆಡ್ ಈ ಬ್ಯಾಕ್ಟೀರಿಯೊಲು ಕೆಲಸ ಮಲ್ತೊಂದಿಪ್ಪುವ. ಎಂಚಿನನೇ ಆವಡ್ ನಮ್ಮ ಸರ್ರೊದ ಪ್ರತಿಯೊಂಜಿ ಅಂಗೊಡುಲಾ ಪರಕೀಯ ಪ್ರವೇಶ ಆವಂದೆ ನಮ ಬದ್ಕೆರೆ ಸಾಧ್ಯ ಇಜ್ಜಿ ಪನ್ಪಿ ಪಾತೆರದೊಟ್ಟುಗು ನಮ್ಮ ಈ ಸರ್ರೊ ನಮ್ಮನೇ ಅತ್ತ್ ಈ ಸರ್ರೊದ ಉಲಾಯಿ ಬೇತಕ್ಲು ಪಂಡ, ಪರಜೀವಿಲೆನ
( ಬ್ಯಾಕ್ಟೀರಿಯೊಲೆನ)ಇಲ್ಲ್ ನಮ್ಮ ಸರ್ರೊದ ಉಲಾಯೇ ಉಂಡು ಪನ್ಪಿನ ಸತ್ಯೊ ಪಾತೆರ ಇತ್ತೆ ತೆರಿಂಡ್!.
ನಿಕುಲು ಡಾಕ್ಟರ್ನ ಕೈತಲ್ ಪೋಂಡ ಸ್ಟೆಥೋಸ್ಕೋಪ್ ನಿಕ್ಲೆನ ತಿಗಲೆಗ್ ದೀದ್ , ಬೆರಿಟ್ಟ್ ತಿರ್ಗಾದ್ ಚೆಕ್ ಮಲ್ತ್ ಕಂಟೆಲ್ದ ಉಬ್ಬಿನ್ (ಸ್ಲಾಬ್) ಒಂತೆ ಗೆತ್ತೊಂದು ಟೆಸ್ಟ್ ಮಲ್ತ್ದ್ ಪನ್ಪೆರ್ ಇನ್ಫೆಕ್ಷನ್ ಆತ್ಂಡ್ ಪಂಡ್ದ್. ಐಕೇ ಪನ್ಪಿನಿ ಪರಕೀಯ ಪ್ರವೇಶ ಆತ್ಂಡ್. ಅಂಚ ಪಂಡ, ಸೂಕ್ಷ್ಮ ಬ್ಯಾಕ್ಟೀರಿಯಾ ನಿಕ್ಲೆನ ಸರ್ರೊದ ಉಲಾಯಿ ಬತ್ತ್ದ್ ದೊಂಡೆಡ್ ಕಿಚ್ ಕಿಚ್ ಅಂಚೆನೆ ಜ್ವರೋ ತೆಮ್ಮೊಗು ಕಾರಣ ಆತ್ಂಡ್ ಪಂಡ್ದ್. ಅಪಗನೇ ನಿಕ್ಲೆಗ್ ಗೊತ್ತಾಯಿನಿ ನಿಕ್ಲೆನ ಸರ್ರೋದ ಉಲಾಯಿ ಬೇತೆ ಜೀವೊಲಾ ಉಂಡು ಪಂಡ್ದ್. ಆಂಡ ಇಸಯ ಅಂಚ ಅತ್ತ್, ನಿಕ್ಲೆನ ಜೀವೊದುಲಾಯಿ ಜೀವೊಲು ದುಂಬೇ ಇತ್ತ ಪನ್ಪಿನವು ಬಾರಿ ಮಲ್ಲ ಸತ್ಯ ನಮಕ್ ಗೊತ್ತೇ ಇತ್ಜೀ. ನಮ್ಮ ಸರ್ರೊನೇ ಒಂಜಿ ಮಾಮಲ್ಲ ಇಲ್ಲ್ ಐಕ್ಲೆನ!

ಕಳೆಯಿನ ಪತ್ತ್ ದಶಕೊಡ್ದಿಂಚ 80ಗ್ಲಾ ಹೆಚ್ಚಿನ ಸಂಸೋದನೆ ಮಲ್ಪುನ ಪ್ರಯೋಗ ಶಾಲೆಲೆಡ್ 200ಕ್ಕ್ಲಾ ಹೆಚ್ಚಿಗೆ ಜೀವೊ ವಿಜ್ಯಾನಿಲು ಭೂ ಅತ್ತಾಂದಿನ ನರಮಾನಿಯೆರ್ನ ಉಲಯಿ ಇಪ್ಪುನ ಸೂಕ್ಷ್ಮ ಜೀವಿಲೆನ್ ನಾಡ್ ಪತ್ತೆರೆ ಪ್ರಯತ್ನ ಮಲ್ದೆರ್. ಕಂಟೆಲ್, ಬಾಯಿ, ಮೂಂಕು,ಚರ್ಮ,ಬಂಜಿ, ಸ್ವಾಸಕೋಸ..ಇಂಚಿತ್ತಿ ಜಾಗೊಲೆಡ್ ಇಪ್ಪೆರೆ ಸಾಧ್ಯ ಇಪ್ಪುನ ಸೂಕ್ಷ್ಮ ಜೀವಿಲೆನ ಬೇತೆ ಬೇತೆ ರೀತಿಡ್ ಡಿ.ಯನ್.ಏ..ಪಂಡ ಐಕ್ಲೆನ ಜೆನೆಟಿಕ್ ಮೂಲೊನು ನಾಡ್ದ್ ಪತ್ತುನ ಪ್ರಯತ್ನ ಮಲ್ದೆರ್. ಪಿದಾಯಿಡ್ದ್ ಬತ್ತ್ದ್ ನಂಕ್ ಸೀಕ್ ಸಂಕಡೊ ಕೊರ್ಪಿನ ಪರಜೀವಿಲು ಮಾತ್ರ ನಮ್ಮ ಉಲಾಯಿ ಸೇರುನತ್ತ್. ನಮ್ಮ ಸರ್ರೋದ ಉಲಾಯಿ ಪುಟ್ಟುನಗೊನೇ ಇಪ್ಪುನ ಕೋಟಿ ಕೋಟಿ ಸೂಕ್ಷ್ಮ ಜೀವಿಲು ನಮ ಈ ಭೂಮಿಗ್ ಬನ್ನಗನೇ ನಮ್ಮೊಟ್ಟುಗೆ ಬೈದ ನಮ್ಮ ಸರ್ರೊದ ಉಲಾಯಿ ಸೇರೊಂದು.
ನಮ ನಮನೇ ಅತ್ತ್…ದಾಯೆ ಪಂಡ ನಮ್ಮ ಸರ್ರೊಡು ನಮ 10%ಮಾತ್ರ! ಬಾಕಿದ 90%..ಪರಕೀಯೆರೇ ನಮ್ಮ ಸರ್ರೊದ ಉಲಾಯಿ ಉಲ್ಲೆರ್, ಅಕುಲೇ..ಈ ಬ್ಯಾಕ್ಟೀರಿಯೊಲು.
ನಮ್ಮ ಸರ್ರೊ ಒಂಜಿ ರೀತಿದ ಜೈವಿಕ ವ್ಯವಸ್ಥೆ ಮಾತ್ರ ಅತ್ತ್ ಶಿಲೀಂದ್ರ ಬೊಕ್ಕ ಲೆಕ್ಕ ಮಲ್ಪೆರೆ ಸಾಧ್ಯನೇ ಆವಂದಿನ ವೈರಸ್ಸುಲ್ಲಾ ಈ ಸರ್ರೊದ ಉಲಾಯಿ ಉಲ್ಲ ಪಂಡ, ಒಂತೆ ಆಲೋಚನೆ ಮಲ್ಪುಲೆ, ಕಾಡ್ ಗುಡ್ಡೆ, ಕಂಡೊದುಲಾಯಿ ಇಪ್ಪುನ ಪುರಿಕ್ಕುಲೆನ ಲೆಕ್ಕ ನಮ್ಮ ಸರ್ರೊದ ಉಲಾಯಿದ ಅವಸ್ಥೆ ಐಡ್ದ್ಲಾ ಕಡೆ ಅತ್ತೇ..?
ನಮ್ಮ ಸರ್ರೊದ ತೂಕೊದ ಶೇ. 2 -3 ತ್ತಾತ್ ಸೂಕ್ಷ್ಮ ಜೀವಿಲು ನಮ್ಮ ಸರ್ರೊದ ಉಲಾಯಿಯೆ ಉಲ್ಲ. ಈ ಸಂಗತಿ ಇಂಚೊಗು ದುಂಬುದ್ದಿಂಚ ನಂಬೊಂದು ಬೈದಿನ ಎತೋ ಇಸಯೊಲೆನ್ ತರೆ ತಿರ್ತ್ ಕಾರ್ ಮಿತ್ತ್ ಮಲ್ತ್ದ್.
ಸುಮಾರ್ ನೂದು ವರ್ಸೊದ ಇಂಚಿಗ್ ನಮನ ಕೂಲಿ(ಹುಲ್ಲು) ಬೊಕ್ಕ ನಿಜ್ದಿದ ಸೀಕ್ ಗ್ ಬಾಯಿದ ತಾದಿಡ್ ಉಲಾಯಿ ಪೋಯಿನ ಪರೋಪಜೀವಿಲೇ ಕಾರಣ ಪನ್ಪಿನ ಸುದ್ದಿ ನಮಕ್ ಗೊತ್ತಿತ್ತಿನ. ಆಂಡಾ ಬಾಯಿಡ್ ಸುಮಾರ್ 700 ರೀತಿದ ಬೇತೆ ಬೇತೆ ನಮೂನೆದ ಬ್ಯಾಕ್ಟೀರಿಯೊಲು ಉಲ್ಲಗೆ!!

ಮಾಮಲ್ಲ ಸಂಗತಿ ಪಂಡ ಮೋಕೆಡ್ ಕೊರ್ಪಿನ 10 ಸೆಕೆಂಡ್ದ ಮುತ್ತುಡು ( partners exchange 80 lakhs bacterias while kissing!) 80 ದಶ ಲಕ್ಷೊ ಸೂಕ್ಷ್ಮ ಜೀವಿಲು ಒರಿಯಡ್ದ್ ಒರಿಯಗ್ ಅದಲ್ ಬದಲ್ ಆಪ ಪನ್ಪಿನ ಪಾತೆರ ಇಂಚೊಗು ಬೊಲ್ಪುಗು ಬೈದ್ಂಡ್ . ಕೊರೋನ ಒರಿಯಡ್ದ್ ಒರಿಯಗ್ ಪಗರ್ದ್ ಕೆಲವು ಪೊಸ ಮದ್ಮಲ್ ಮದ್ಮಯೆ ತೀರ್ದಿನ ಸುದ್ದಿ ನಮಕ್ ಗೊತ್ತಿತ್ತಿನವೇ. ಕಾರಣ ಸೂಕ್ಷ್ಮ ಜೀವಿಲು. ಆಂಡ ನಮನ ಶ್ವಾಸಕೋಷ ಬಾಯಿಡ್ದ್ ಎತೋ ಸ್ವಚ್ಛ ಇಪ್ಪುಂಡು. ದಾಯೆ ಪಂಡ ಐಟ್ಟೊಂಜಿ ರೀತಿದ ಎದ್ಯಾನೆದ ಲೆಕ್ಕೊ ರಚನೆ ಉಂಡು, ಅತ್ತಾಂದೆ ಈ ನಳಿಕೆಡ್ ಬೆಚ್ಚ ಗಾಳಿ(ಉಸಿರು/ಸ್ವಾಸೊ) ಪೋವೊಂದು ಬರೊಂದು ಇಪ್ಪುನೆಟ್ಟಾದ್ ಸುರಲೆದಂಚಿನ ಜಾರುನ ವಸ್ತುಲಾ ಇಪ್ಪುಜಿ. ಅಂಚಾದ್ ಶ್ವಾಸಕೋಸೊಡು ಸೂಕ್ಷ್ಮ ಜೀವಿಲು ಬಾರಿ ಕಡಿಮೆ‌.
ಎಂಕುಲು ಕೇನ್ದಿನ ಪಾತೆರ ದಾದ ಪಂಡ ಅಪ್ಪೆನ ಮಿರೆ ಪೇರ್ ಬಾರಿ ಸ್ವಚ್ಛ. ಐಟ್ ಬ್ಯಾಕ್ಟೀರಿಯಾ ಇಜ್ಜಿ, ಸೋಂಕು ತಾಗುಜಿ ಅಪ್ಪೆನ ಗರ್ಭೊಡು ಪಂಡ್ದ್. ಆಂಡಾ ಇತ್ತೆ ಕೇನೆರೆ ತಿಕ್ಕುನ ಸುದ್ದಿಯೇ ಬೇತೆ. ನಮನ ಅಪ್ಪೆ ಗರ್ಭೊದುಲಯಿಲಾ ನಮನ್ ರಕ್ಷಣೆ ಮಲ್ಪುನ ಕೋಟ್ಯಂತರ ಸೂಕ್ಷ್ಮ ಜೀವಿಲು ಆ ಗರ್ಬೊಡುಲಾ ಉಲ್ಲಗೆ.
ನಮ ದಿನೊಲಾ ಸಾಬೂನು ಪಾಡ್ದ್ ಕೈ ಕಾರ್ ಮೋನೆ ಅಂಚೆನೆ ಪೊರ್ಲುಡು ಸಾಬೂನು, ಸ್ಯಾನಿಟೈಸರ್ ಪಾಡ್ದ್ ಕೈ,ಸರ್ರೊನು ತಿಕ್ಕ್ ತಿಕ್ದ್ ದೆಕ್ಕುವ. ಆಂಡ ಈ ಸರ್ರೊದ ಉಲಾಯಿದ ಬ್ಯಾಕ್ಟೀರಿಯೊಲೆನ ವಿರುದ್ಧ ಲಡಾಯಿ ಮಲ್ಪುನ ಇಸಯೊಡು ಆಲೋಚನೆ ಮಲ್ದನಾ..?!
ಬಾರಿ ಕಷ್ಟ. ಇಪ್ಪಡ್ ಬುಡ್ಲೆ ಅವೆನ್ ಮಾತಾ..ಎಂಚಿನಾಂಡ ದಾನೆ ನಮ ನಮನೇ ಅತ್ತ್.., ನಮ್ಮ ಮೈ ಕೈತ್ತ ಮಿತ್ತ್ ಕಡಿಮೆ ಪಂಡಲಾ 500 ರೀತಿದ ಸೂಕ್ಷ್ಮ ಜೀವಿಲು ಉಲ್ಲ!…ಒಂತೆ ಜೋಕೆ.!

☘️ಕುಸುಮ್ ಸಾಲಿಯಾನ☘️
ಪುಣೆ- ಮಹಾರಾಷ್ಟ್ರ
ತುಲುವೆರೆ ಕಲ ಕುಡ್ಲ

(ವೈಜ್ಞಾನಿಕ ಲೇಖನೊದ ಮೂಲ ಬರಹಗಾರೆರ್..
ಮಣ್ಣು ವಿಜ್ಞಾನಿ,
ಡಾಕ್ಟರ್ ಟಿ. ಯಸ್. ಚನ್ನೇಶ್
ಮೆರೆನ ಅನುಮತಿ ಪಡೆದ್ ಅರೆಗ್ ಸೊಲ್ಮೆ ಸಂದಾವೊಂದು ಕನ್ನಡೊಡ್ದು ತುಳು ಭಾಷೆಗ್
ಭಾಷಾಂತರ ಮಲ್ತ್ದೆ)