ತುಳು ಅಕಾಡೆಮಿದ ಚಾವಡಿ ತಮ್ಮನ ಪ್ರಶಸ್ತಿಗ್ ಕೇಶವ ಕುಡ್ಲ, ಅರುಣ್ ಉಲ್ಲಾಳ್, ಶಶಿಧರ ಪೊಯ್ಯತ್‌ಬೈಲ್, ತೀರ್ಥ ಪೊಳಲಿ, ತುಳು ಕೂಟ (ರಿ) ಶಕ್ತಿನಗರ ಆಯ್ಕೆ ಆತೆರ್.
ತುಳುನಾಡ ಸಂಸ್ಕೃತಿ ಬೊಕ್ಕ ಸಂಸ್ಕಾರದೊಟ್ಟುಗ್ ಸಾಹಿತ್ಯ-ಸಾಂಸ್ಕೃತಿಕ ಚಟುವಟಿಕೆದ ಮುಖೇನ ನಿರಂತರವಾದ್ ಕಾರ್ಯಕ್ರಮೊಲೆನ್‌ ಆಯೋಜನೆ ಮಲ್ದಿನ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಪ್ರತೀ ತಿಂಗೊಲು ತಾಲೂಕು ಮಟ್ಟೊಡ್ ಚಾವಡಿ ಪ್ರಶಸ್ತಿ ಪ್ರದಾನ ಕಾರ್ಯಕ್ರಮೊನ್ ಆಯೋಜನೆ ಮಲ್ಪುಂಡ್. ತಿಂಗೊಲ್ದ ಚಾವಡಿ ಪ್ರಶಸ್ತಿಗ್ ಈ ಸರ್ತಿ
ಶ್ರೀ ಕೇಶವ ಕುಡ್ಲ : (ಚಾವಡಿ ತಮ್ಮನ)
ಯಕ್ಷಗಾನ ಬೊಕ್ಕ ನಾಟಕ ರಂಗದ ಪ್ರಸಾದನ ಕಲಾವಿದೆರಾದ್, ಅವ್ವೇತೊ ತಂಡೊಲೆಗ್‌ ಸಹಕಾರ ಕೊರ್ದ್ ಪ್ರೋತ್ಸಾಹ ಮಲ್ಪುನ ಮಲ್ಲ ಗುಣ ಮೆರೆನವ್ವ್. ಹಿರಿತನದ ಆಧಾರೊಡ್ ಬೊಕ್ಕ ಆರು ಮಲ್ದಿನ ಸೇವೆನ್ ಗುರುತಿಸಾದ್ ಈ ಪ್ರಶಸ್ತಿಗ್ ಆಯ್ಕೆ ಆತೆರ್.
ಯುವ ಪ್ರಶಸ್ತಿ (ಶ್ರೀ ಅರುಣ್ ಉಳ್ಳಾಲ್) : 
ತುಳು ಭಾಷಾ ಪ್ರವೀಣೆರಾದ್, ವಾಗ್ಮಿಯಾದ್, ತುಳುತ್ತ ಸಾಹಿತ್ಯ ಕೃಷಿಟ್ ನಿರಂತರ ತೊಡಗಿಸಾವೊಂದ್ ಇಂಚಪ್ಪೊಗ್ ಡಾಕ್ಟರೇಟ್ ಪದವಿನ್ ಪಡೆದಿನ ಮೇರು ಯುವ ಸಾಧಕರೆನ ನಿಲೆಟ್ ಮೆರೆನ ತುಳು ಸಂಸ್ಕೃತಿ-ಭಾಷಾ ಅಭಿಮಾನೊನ್ ಗುರುತಿಸಾದ್ ಆಯ್ಕೆ ಮಲ್ದುಂಡ್.
ಬಾಲ ಪ್ರಶಸ್ತಿ (ಕು.ತೀರ್ಥ ಪೊಳಲಿ) :
ತನ್ನ ಎಲ್ಯ ಪ್ರಾಯೊಡೇ ತುಳು ಭಾಷೆದ ಮಿತ್ತ್ ನಿರಂತರ ವಾಕ್ಚಾತುರ್ಯೊಡ್ ಪುಗಾರ್ತೆನ್ ಪಡೆದ್ ಎಲ್ಯ ಪ್ರಾಯೊಡೇ ಮಾಧ್ಯಮ ಸೇರಿನಂಚ ಕಾರ್ಯಕ್ರಮ ನಿರೂಪಣಾ ಕ್ಷೇತ್ರೊಡ್ ಅಸಾಧಾರಣ ಸಾಧನೆ ಮಲ್ದಿನವ್ವೆನ್ ಗುರುತಿಸಾದ್ ಪ್ರಶಸ್ತಿಗೆ ಆಯ್ಕೆ ಮಲ್ದುಂಡ್.
ಮಾಧ್ಯಮ ಪ್ರಶಸ್ತಿ (ಶಶಿಧರ ಪೊಯ್ಯತ್ತಬೈಲ್) :
ತುಳು ನಾಡುಎ್ ಪತ್ರಿಕಾರಂಗೊಡ್ ಬೇತೆ ಬೇತೆ ವಿಭಾಗೊಡ್ ಪತ್ರಕರ್ತೆರಾದ್, ನಿರೂಪಕೆರಾದ್, ಸಾಂಸ್ಕೃತಿಕ ಕಾರ್ಯಕ್ರಮದ ಸಂಘಟಕೆರಾದ್ ರಾಣಿ ಅಬ್ಬಕ್ಕನ ಪುದರುಡೇ ಗ್ರಾಮೀಣ ಭಾಗೊಡ್ ದೃಶ್ಯ ಮಾಧ್ಯಮೊನ್ ತಾಪನೆ ಮಲ್ದಿನವ್ವೆನ್ ಗುರುತಿಸಾದ್ ಮೆರೆನ್ ಆಯ್ಕೆ ಮಲ್ದುಂಡ್.
ಸಂಘಟನಾ ಪ್ರಶಸ್ತಿ (ತುಳು ಕೂಟ (ರಿ) ಶಕ್ತಿನಗರ) :
ಮಂಗಳೂರುದ ಶಕ್ತಿನಗರೊಡ್ ತಾಪನೆ ಆಯಿನ ಈ ಸಂಸ್ಥೆ ತುಳುನಾಡುದ ಸಂಸ್ಕೃತಿ-ಸಂಸ್ಕಾರದ ಮಹಾಪೋಷಕೆರಾದಿತ್ತುದ್ , ಸಾಂಸ್ಕೃತಿಕ ವೇದಿಕೆನ್ ನಿರ್ಮಾಣ ಮಲ್ತುದ್ ಪ್ರತಿಭೆಲೆಗ್ ಅವಕಾಶ ಕೊರ್ದ್ , ಬೊಳ್ಳಿ ಪರ್ಬದ ಸಂಭ್ರಮೊಡಿಪ್ಪುನ ಈ ಸಂಸ್ಥೆದ ನಿಸ್ವಾರ್ಥ ಸೇವೆನ್ ಗುರುತಿಸಾದ್ ಆಯ್ಕೆ ಮಲ್ದುಂಡ್. ಅಕ್ಟೋಬರ್‌ ತಿಂಗೊಲ್ದ ಅಕೇರಿದ ವಾರೊಡ್ ನಡಪರೆಗುಪ್ಪುನ ಕಾರ್ಯಕ್ರಮೊಡ್ ಈ ಪ್ರಶಸ್ತಿನ್ ಗಣ್ಯೆರೆನ ಸಮ್ಮುಖೊಡ್ ಸಾಧಕೆರೆಗ್ ಕೊರ್ದ್ ಮಾನಾದಿಗೆ ಮಲ್ಪುಂಡ್ ಪಂಡುದ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಮಂಗಳೂರು ನೆತ್ತ ಅಧ್ಯಕ್ಷೆರಾಯಿನ ದಯಾನಂದ ಜಿ. ಕತ್ತಲ್‌ಸಾರ್ ಪ್ರಕಟಣೆಡ್ ತೆರಿಪಾದೆರ್.
by 