ತುಳು ಪಾತೆರ್ಗ ತುಳು ಒರಿಪಾಗ ದುಬೈ ಮೊಕ್ಲೆನ ಗೌಜಿ ಗಮ್ಮತ್ತ್ ತುಳುನಾಡ ಗೊಬ್ಬುಲೆದ ಲೇಸ್ ಕಜ್ಜೊ ಮಾರ್ಚ್ 12, 2023 ಐತಾರದಾನಿ ಝಬೀಲ್ ಪಾರ್ಕ್‌ಡ್ ಗೌಜಿಡ್ ನಡತ್ಂಡ್. ಊರುಡು ಬತ್ತಿನ ಮಲ್ಲ ಬಿನ್ನೆರಾಯಿನ ಗೋಪಿ ಅಂಚನ್ ಕುಲಶೇಖರ, ಯಶೋಧ, ಕಿರಣ್ ತುಳುವೆ ಕೈೂಕುಡೆ ಮೊಕುಲು ಬಾರ್ ದಿಂಜದಿನ ಕಲಸೆಡ್ ಊರ್ದಿನ ತಾರೆದ ಸಿರಿ ಕೊಂಬುನು ಅರಲ್ತ್‌ದ್ ಲೇಸ್‌ದ ಉದಿಪನ ಮಲ್ತೆರ್. ದುಬೈದ ಉದ್ಯಮಿಲಾಯಿನ ಪ್ರಭಾಕರ ಶೆಟ್ಟಿ, ನೋವೆಲ್ ಡಿ ಅಲ್ಮೆಡ, ಅಜ್ಮಲ್ ದುಬೈ, ಸತೀಶ್ ಉಳ್ಳಾಲ್, ಸಂದೀಪ್ ಕೋಟ್ಯಾನ್, ಡೋನಿ ಕೊರೆಯ, ಆಶಾ ಕೊರೆಯ, ಅಶೋಕ್ ಬೈಲೂರು, ವಿಜಯಕುಮಾರ್ ಕೊಡಿಯಲ್‌ಬೈಲ್ ಮಲ್ಲ ಬಿನ್ನೆರ್ ಆದ್ ಒತ್ತುಪಾಲಿತ್ತೆರ್. ಬತ್ತಿನ ಬಿನ್ನೆರೆನ್ ತುಳುನಾಡ ಸಂಪ್ರದಾಯದಲಕ ಬೆಲ್ಲ ನೀರ್ ಬೊಕ್ಕ ಬಚ್ಚಿರೆ ಬಜ್ಜೆಯಿದ ತಾಂಬೂಲ ಕೊರ್ದು ಲೇಸ್‌ಗ್ ಎದ್ಕೊಂಡೆರ್.
ದುಬೈದ ಪುಗರ್ತೆದ ಯಕ್ಷಗಾನ ಕಲಾವಿದೆ ಬೊಕ್ಕ ಯಕ್ಷಗುರು ಆಯಿನ ಕಿಶೋರ್ ಗಟ್ಟಿ ಬೊಕ್ಕ ತುಳು ಪಾತೆರ್ಗ ತುಳು ಒರಿಪಾಗ ಕೂಟದ ಬೊಕ್ಕ ಜೈ ತುಲುನಾಡ್ (ರಿ.) ಕೂಟದ ಸ್ಥಾಪಕ ಸದಸ್ಯೆ ಬೊಕ್ಕ ತುಳು ಲಿಪಿ ಕಲ್ಪಾದಿ ಕಿರಣ್ ತುಳುವೆ ಕೈೂಕುಡೆ ಮೊಕ್ಲೆಗ್ ಶಾಲ್ ಪೊದೆತ್‌ದ್ ನೆಂಪುದ ಕಾಣಿಕೆ ಬೊಕ್ಕ ಅಪ್ಪೆ ಬಾಸೆ ತುಳುವ ತುಡರ್ ಪನ್ಪಿ ಬಿರ್ದ್‌ನ್ ಕೊರ್ದು ತಮ್ಮನ ಬಲ್ಮನ ಮಲ್ತೆರ್.
ಅಂಚೆನೆ ಬೇತೆ ಬೇತೆ ಕ್ಷೇತ್ರೊಲೆಡ್ ಸಾಧನೆ ಮಲ್ದಿನ 10 ಜನ ಸಾಧಕೆರಾಯಿನ ಪ್ರಭಾಕರ ಶೆಟ್ಟಿ, ಬಾಲಕೃಷ್ಣ ಸಾಲ್ಯಾನ್, ಜಯಂತ್ ಶೆಟ್ಟಿ, ಹರೀಶ್ ಬಂಗೇರ, ಇರ್ಷಾದ್ ಮೂಡಬಿದ್ರೆ, ಮರೀನಾ ನೊರ್ಮ ಮಿನೆಜಸ್, ಅಶೋಕ್ ಬೈಲೂರು, ಡೋನಿ ಕೊರೆಯ, ಆಶಾ ಕೊರೆಯ, ಜಸ್ಮಿತಾ ವಿವೇಕ್ ಮೊಕ್ಲೆಗ್ ಶಾಲ್ ಪಾಡ್‌ದ್ ನೆಂಪುದ ಕಾಣಿಕೆ, ಮಾನಾದಿಗೆದೋಲೆ ಕೊರ್ದು ಮಾನಾದಿಗೆ ಮಲ್ತೆರ್. ದುಬೈದ ಮಾತ ಲೇಸ್‌ಲೆಡ್ ಸಕ್ರೀಯೆರಾದ್ ಬೆನ್ನಿ ಬೆನೊಂದುಪ್ಪುನ ತುಳು ಸಂಘಟಕೆ , ನಿರೂಪಕೆ, ತುಳು ಪಾತೆರ್ಗ ತುಳು ಒರಿಪಾಗ ಕೂಟದ ಪ್ರಧಾನ ಕಾರ್ಯಂತೆರಾಯಿನ ರಿತೇಶ್ ಅಂಚನ್ ಕುಲಶೇಖರ ಮೆರೆಗ್ ನೆಂಪುಗ ಕಾಣಿಕೆ, ಮಾನಾದಿಗೆದೋಲೆನ್ ಕೊರ್ದು ಮಾನಾದಿಗೆ ಮಲ್ತೆರ್
ಬೊಕ್ಕ 20 ವರ್ಷ ದುಬೈಡ್ ಇತ್ತ್‌ದ್ ತುಳು-ಕನ್ನಡ ಕೂಟೊಲೆದ ಬುಲೆಚ್ಚಿಲ್‌ಗ್ ಕಾರಣಿಕರ್ತೆರಾದಿತ್ತಿನ ದಿವಂಗತ ಉಮೇಶ್ ನಂತೂರು ಮೆರೆನ ನೆಂಪುಗು ಕರೀದ್‌ಪೋಯಿನರೆನ ನೆಂಪುದೋಲೆನ್ ಅರೆನ ಮಗೆ ಅಮರ್ ನಂತೂರುಗು ಸಂದೈತ ಮಲ್ತೆರ್.
ಲೇಸ್‌ಡ್ ತುಳುನಾಡ ಗೊಬ್ಬುಲಾಯಿನ ಕಬ್ಬಡಿ, ಲಗೋರಿ, ಬಲ್ಲ್ ಒಯ್ಪುನ, ಸೈಕಲ್ ಚಕ್ರ ಬುಡ್ಪುನ, ಕಾಕಜಿದ ಗೊಬ್ಬು, ರಸಪ್ರಶ್ನೆ, ಗೋಣಿಚೀಲಡ್ ನಡಪುನ ಪಂತ, ತಾರಾಯಿದ ಕಟ್ಟ ಇಂಚ ನಾನ ನಮೂನೆದ ಗೊಬ್ಬುಲೆನ್ ಅಟ್ಟನೆ ಮಲ್ತ್ ಇತ್ತೆರ್. ಪೊಣ್ಣುಲೆಗ್ – ಜೋಕುಲೆಗ್ ಬೇತೆ ಬೇತೆ ನಮೂನೆದ ಗೊಬ್ಬು ಗೊಬ್ಬಾಯಿನವು ವಿಶೇಷವಾದ್ ಇತ್ತ್ಂಡ್. ಗೊಬ್ಬುದ ಲೇಸ್‌ಗ್ ಡೋನಿ ಕೊರೆಯ ಬೊಕ್ಕ ಆಶಾ ಕೊರೆಯ ಚೆನ್ನೆಮಣೆ ಗೊಬ್ಬುದು ಉದಿಪನ ಮಲ್ತೆರ್. ನೋವೆಲ್ ಅಲ್ಮೇಡ, ಅಮರ್ ನಂತೂರು, ಶೋಭಿತಾ ಪ್ರೇಮ್‌ಜೀತ್, ಅಶ್ವಿನಿ ಸತೀಶ್, ಜಸ್ಮಿತಾ ವಿವೇಕ್, ಲಕ್ಷ್ಮೀ ಮಾತ ಗೊಬ್ಬುಲೆನ್ ಪೊರ್ಲುಡು ನಡಪಾದ್ ಕೊರಿಯೆರ್.
ಮದ್ಯಾನ ವನಸ್‌ಗ್ ಉರ್ಪೆಲ್ ಅರಿತ ಗಂಜಿ, ಕಡ್ಲೆ ಬಲ್ಯರ್, ಕುಡುತ ಚಟ್ನಿ, ನುಂಗೆಲ್ ಮೀನ್, ಕುಕ್ಕುದ ತಲ್ಲಿ, ಕಡ್ಲೆ ಸಲೈದ ಪಾಯಿಸ ಇತ್ತ್ಂಡ್. ಊರುಡು ಕನಪದಿನ ಪಾಲೆದ ಬಟ್ಟಲ್‌‌ಡ್ ವನಸ್‌ದ ಅಟ್ಟನೆ ಮಲ್ದಿನವು ಆಕರ್ಷಣಿಯವಾದ್ ಇತ್ತ್ಂಡ್. 500 ರ್ದ್‌ಲಾ ಜಾಸ್ತಿ ಜನ ಉಮೇದ್‌ಡ್ ಪಾಲ್ ಪಡೆಯೆರ್.
ಗೊಬ್ಬುಲೆಡ್ ಗೆಂದಿನ ಕೂಟೊಗು ಇನಾಮುದ ಓಲೆ ಬೊಕ್ಕ ಪದಕ ಕೊರ್ದು ಮಾನಾದಿಗೆ ಮಲ್ತೆರ್ ಬೊಕ್ಕ ಲೇಸ್‌ಗ್ ಬೆರಿತಾಂಗ್ ಕೊರಿನ ಮಲ್ಲಮಾನಿಲೆಗ್ ನೆಂಪುದ ಕಾಣಿಕೆ ಕೊರ್ದು ಮಾನಾದಿಗೆ ಮಲ್ತೆರ್. ಕೂಟದ ಗುರ್ಕಾರ್ಲು ಆಯಿನ ಪ್ರೇಮ್‌ಜೀತ್ ಬಿನ್ನೆರೆನ್ ಎದ್ಕೊಂಡೆರ್, ಪ್ರಧಾನ ಕಾರ್ಯಂತೆರ್ ಆಯಿನ ರಿತೇಶ್ ಅಂಚನ್ ಕುಲಶೇಕರ ವರದಿ ವಚನ ಮಲ್ತ್ ಲೇಸ್‌ನ್ ಸುದರ್ತ್ ಕೊರ್ದು ಸೊಲ್ಮೆ ಸಂದೈತ ಮಲ್ತೆರ್. ಕೂಟದ ಸರ್ವ ಸದಸ್ಯೆರ್ ಒತ್ತುಪಾಲಿತ್ತ್‌ದ್ ಲೇಸ್‌ನ್ ಪೊರ್ಲುಡು ಗೆಂದಾದ್ ಕೊರಿಯೆರ್.
by 