ಮೋಕೆದ ಮಗೆ ಯಾನಾವೊಡು..

ತುಲುವ ಬಾಲೆ

ಪೊಪ್ಪ ಅಮ್ಮನ ಕಸ್ಟೊದ ಪುದೆಕ್
ತಾಂಗ್ ಕೊರ್ಪಿ ಮಗೆ ಯಾನಾವೊಡು
ಕಡೆ ಮುಟ್ಟಲ ಬೇನೆ ಬೆಸರ್ ದಾಂತೆ ತೂಯೆ
ಪನ್ಪಿ ಉಡಲ್ ಡ್ ಖುಷಿ ಅಕ್ಲೆಗಾವೊಡು
ಯಾನಾವೊಡು ಮೋಕೆದ ಮಗೆ ಯಾನಾವೊಡು..

ಪೊಣ್ಣ ಸಂಸಾರದ ಮೆಗ್ದಿ ಪಲಿ ಮೋಕೆ
ಕನಮನಸ್ ಡ್ಲ ಅಜತಪ್ಪಡ ನಿನ್ನ ನಡಕೆ
ಪಜ್ಜೆ ಪಜ್ಜೆಗ್ ಲ ಇಪ್ಪಡ್ ಕುಸಿತ ತೆಲಿಕೆ
ಉಸುಲು ಕಡಿಯಂದಿಲೆಕ ಕಾತೊಂದಿಪ್ಪುವೆ ಜೋಕೆ
ಯಾನಾವೊಡು ಜೋಕೆದ ಪಲಯೆ ಯಾನಾವೊಡು..

ಗುರುಕುಲು ಮೆಚ್ಚಿನ ಶಿಷ್ಯೆ ಯಾನಾವೊಡು
ಅರೆ ಪುದರ್ ನ್ ನಾಲೂರು ಮೆನ್ಕಾವೊಡು
ಊರ ಜನಮಂದೆಲೆನ ನಡುಟು ಪುಗಾರ್ತೆಡ್
ಎನ್ನ ಶಿಷ್ಯೆ ಪಂಡ್ದ್ ಪೆರ್ಮೆಡ್ ಪನ್ಪಾವೊಡು
ಯಾನಾವೊಡು ಪುಗಾರ್ತೆದ ಶಿಷ್ಯೆ ಯಾನಾವೊಡು.

ಆಚಾರ ವಿಚಾರೊಡು ನಮ್ಮ ತುಲು ನಾಡ್
ದೈವದೇವೆರೆ ಕಲೆ ಕಾರ್ನಿಕ ದಿಂಜಿ ಬೂಡ್
ತುಲುವ ಸಂಸ್ಕೃತಿ ದ ಪೊರ್ಲು ತಿರ್ಲ್ ನ್ ಒರಿಪಾವೊಡು
ತುಲುವಪ್ಪೆ ಮಗೆ ಪಂಡ್ದ್ ತಂಕೊಡು ಪನೊಡು
ಯಾನಾವೊಡು ತುಲುವಪ್ಪೆ ಬಾಲೆ ಯಾನಾವೊಡು..

✍️ ಭಾಸ್ಕರ್.ಎ ವರ್ಕಾಡಿ
ತುಲುವೆರೆ ಕಲ ಕುಡ್ಲ